1 Aŋ Yeecüwa baaddoni yeeke kiinne ogo, "Oon yaŋkalaŋ wïca a ceeggon cääyge iinḍok yeene, aŋ cïŋtäŋ äätin ike ti ogo iinḍok yeene wakkä yeeke ḍaakcedee woo waanjï. 2 Aŋ bärkene ti aŋ kiinne ogo, ‘A ŋaaka ina tiŋdä ïkï ti ogo aŋan yaanna? Nüütkaa paŋŋä yen mügdïn yüünü, ïkï batta bi agä iinḍok ke on.’

3 "Aŋ iinḍok ḍoŋe taaññe ogo, ‘Ika bi näŋjä ogoo? Men mooye yeeni mügdïn koojjene woo ika ti. Ika batta teyätey yaana lïïltä kä puuynu ye, aŋ ika yori a loon kä ñuynu. 4 Ika ḍuccunu gin'a naŋdä ye, naana ika äbana me woo mügdïn ti ye, ika bi gïmgana me äärgen ti.’

5 "Iinḍok m'aka ḍuuggen a mïïngä yek men mooye yeene ye bärkene muure, yen ïïjjïnï taaññe ogo, ‘Ïkï cääygini mïïngä kä ŋïṭṭä yek men mooye yeeni?’ 6 Aŋ luuŋŋe ogo, ‘Wälkä caykä kä caay yek ñownä jeytüün.’ Aŋ kiinne ogo, ‘Meeŋka yüünü koowu aŋ cääjjä ïñï aŋ waak pergin yaakka cügü gïtï, aŋ pircä caykä kä duuc.’

7 "Aŋ menen taaññe ogo, ‘Aŋ ïkï cääygini mïïngä kä ŋïṭṭä?’ Aŋ ike jaajjin ogo, ‘Cuukulli päk caykä kä caay.’ Aŋ kiinne ogo, ‘Meeŋka yüünü koowu aŋ pircä caykä kä cunuuk.’

8 "Men mooye iinḍok yeene ṭäämconḍe maaŋŋe yok kä yaana nääŋenee kä wiñ bïtärene ye. Kä yaana merkä ŋommañ wiñe yaakki witken bïtärene kä bïtar kä nääŋkä yaaka naŋtä meken ti buṭene wic mä diktäŋ ye. 9 Aŋ ikee kiine, ḍuuggic näŋge muggic kä cekkïtïn ṭäämconḍe. Nuŋko naana baakkin ye, ikee bi gïmgene me nänkä cäwdä ke cüle.

10 "M'ana cääyge luggin waak ḍeewken ti ye, i ike cäänna bi cääyge luggin ḍiirken ti. Aŋ naana ïkï ṭäämäṭääm ḍeewken ti ye, i ïkï bi ṭäämäṭääm ḍiirken ti. 11 Aŋ naana ikee batta lukkete kä me kä cekkïtïn ṭäämconḍe ye, i a ŋaani ken bi luggu kä ikee kä cekkïtïn yaana a gïtken ye? 12 Aŋ naana ikee batta lukkete kä me kä waak yek mekic ye, i ikee bi iñge ŋaani yeekic?

13 "Baati ñuugulo yaana ñuugal me mäyken kä yewwe ye. Naana ye yaŋkalaŋ bi putke jï aŋ yaŋkalaŋ bi bilge, aŋ naana ye yaŋkalaŋ bi tiiŋgede aŋ yaŋkalaŋ bi gääle gïtï. Ikee batta lïïṭe age ñuuguloni yek Jooŋ ke tiil."

14 Aŋ Pïrrïcïïnnï yaaka billä tiilgä ye, jiik yaakka tiiŋi muure aŋ Yeecüwa ñiyene kä yok. 15 Aŋ kiini Yeecüwa ogo, "Ikee age m'aka ḍuuggen nüütütü woo me ñomgen ti ye aŋ Jooŋ ŋäjjä juuggic. Aŋ gin'a ḍooccutu mänbaan yäwaŋ iken ti ye, i Jooŋ ti yaajaŋ kä yaac. 16 Jiik ḍoocin yek Müüca ke bäṭoni nüüdï me ke waan Yaaya ti. Aŋ tiññaŋ Jiik Ŋerkä yek Yätkïtïn Jooŋ pagi me, aŋ me muure kaaccïdï kä ïïrrä. 17 Aŋ poṭulaŋ kä kaaccin woo polloŋ ke ŋommañ kä yaana ṭomṭom keelok yen jiik ḍoocin yek Jooŋ yääyee kä ye.

18 "Aŋ m'ana iiŋe äkkene aŋ ŋuccin ḍiññä ye, i näŋit balkïtïn aŋ m'ana ḍiññä iiŋ yaana a äkkïnï kä oore ye, i näŋit balkïtïn.

19 "Aŋ wïca oon yaŋkalaŋ a ceeggon aŋ eŋit buruŋgu büüjülgü ke burŋu carrä aŋ ämï wakkä ñapkä kä yaac kamat. 20 Aŋ oon yaŋkalaŋ battä me ogo Liyaajir a aangon gaane muure a kuggu, a maaṭon ïñï äntüke yeene ti. 21 Aŋ ike ṭäkï ogo yoku ike ämje ammani yaaka ḍiimjodo ïñï därŋañ yen ceeggon ti ye. Aŋ gukku cäänna äätïdï aŋ kuggu yeeke nalgä. 22 Aŋ oon yaana a aangon ye tüwnü aŋ koowi malaŋŋi aŋ iji Abrayiim gunne ti. Aŋ oon yaana a ceeggon ye cäänna tüwnü aŋ jïkï me ïñï. 23 Aŋ yore attä maccük nänṭä ba' jooññu aŋ ike wääcï pillä aŋ däämjin ñaalok aŋ Abrayiim yooṭṭe kä utar ke Liyaajir gunne ti. 24 Aŋ ike bärcin ogo, ‘Wäyo Abrayiim, ängaa ŋïngïn, aŋ Liyaajir tucci dalä ïṇtele büüce piitti aŋ lüüjee kä lemmi kä yaana cääyä kä pillä maañ gïtï ye.’

25 "Aŋ kiini Abrayiim ogo, ‘Mugoya, päjjä waan yaana a yüünü ina, ïkï cääygini waak muure yaaka ŋeraŋ ye, aŋ Liyaajir a waak yaackä ken kañde, aŋ tiññaŋ ike käññä lüynü winni aŋ ïkï ken wääcä wina.’ 26 Aŋ yaakki ti muure, waan yoono ti ke ïkï waan mooye bilti a yïïjjïnï aŋ m'ana ṭäkï iiṭin woo ikoon ti ïkï ti wina ye batta lïïṭït, aŋ baati m'ana iṭä woo ïkï ke ikoon ti winni ye.

27 "Aŋ ceeggon jaajjin ogo, ‘Kura ika ñuju ïkï ti, wäyo Abrayiim, Liyaajir tucci än yen wäyo ti. 28 Ika cääyga mädgo kä duuc, dalä ike atï kole, nuŋko ŋana iken äätete nänṭä ba' pillä yaanni.’

29 "Aŋ kiini Abrayiim ogo, ‘Iken cääygene Müüca ke bäṭoni, dale iken tïïŋï iken ti.’

30 "Aŋ ike jaajjin ogo, ‘U'u, wäyo Abrayiim, naana mäŋkalaŋ attä iken ti juwu tüwnü ti ye, iken bi ḍak kä nääŋkä yaackä aŋ ḍükcï ti Jooŋ ti.’

31 "Aŋ kiini Abrayiim ogo, ‘Naana iken batta a tiiŋin Müüca ti ke bäṭoni ti ye m'ana juwu tüwnü ti ye, batta bi cäänna gïmgänä.’"