1 Aŋ yaanna yaajaŋ Yünaan ti aŋ ike pennä kä yaac. 2 Aŋ mälcin Pïṭo ti aŋ jaajjin ogo, "Ay Pïṭo, batta a yaana jaajjänä kä wääna cääyä baan yeeni jï ina? Ina ken yïŋŋä kä Tarcïïc yaanna. Ŋäjjä ïkï agä män ŋerrä aŋ agä Jooŋ yaana ängïdï ŋïngïn ye, ïkï batta piiṇdädä kä bïraŋ, aŋ ïkï agä biilin mooye ke cüle aŋ ïkï agä Jooŋ yaana ḍüükcïtï ti yiñ ye. 3 Ay Pïṭo, kura üṇṇü yeeni koowu ika ti, iiñca ika tüwü kä yaana agä kä üdon ye."

4 Aŋ luugi Pïṭo ogo, "Yoku päjjïdï ïkï agä penon?"

5 Aŋ Yünaan kaaccä woo baan mooye jï, aŋ attä cääjjin ïñï baan mooye taaŋŋe ti kä ñomuk. Aŋ näŋŋä daaŋ aŋ cääjjin ṭïïbbe ti, aŋ kïïjjïdï a ŋaaka ken bi näŋï ḍoŋe Nïnawa. 6 Aŋ Pïṭo Jooŋ pïïtcïn ïñï liŋŋä waŋe aŋ yüülïn ñaalok Yünaan wiñe ti, ogo näŋgee ṭïïbbä aŋ yïïkke ko jone yiñe, aŋ Yünaan jone ñappä kä yaac kä liŋŋä meen.

7 Aŋ wääna buur kääjene kä tïṇṇäk aŋŋi ye, Jooŋ tuucin yuuññan aŋ liŋŋä meen näŋŋe ḍok aŋ ïjjïn woo. 8 Aŋ wääna äŋ kääjene kä ye, Jooŋ tuucin jommu carrä yen mä ñomuŋŋu küütïn Yünaan ti. Aŋ äŋ Yünaan jemme witkin ke bämje ïñï, aŋ ṭäkï ogo yoku ike tüwje, aŋ jaajjin ogo, "Iiñca ika tüwü kä yaana agä kä üdon ye."

9 Aŋ Jooŋ Yünaan kiinne ogo, "Yoku päjjïdï ïkï agä penon kä tüwnü liŋŋä meen?"

Aŋ Yünaan luukcin ogo, "Ee päjjïdï, ika agä penon kä piinkä tüwnü."

10 Aŋ kiini Pïṭo ogo, "Ïkï ängädä ŋïngïn liŋŋä meen yaanni i batta agii tïïcon aŋ batta agii pïrgon kä ïkï aŋan, yüülïn ñaalok kä wïïrïn jïñe aŋ tüwnü kä wïïrïn jïñe. 11 Aŋ ika Nïnawa baan mooye yäwnä batta ängä ŋïngïn yaana cääygene me kä ḍiräk 120,000 yaaka batta ŋäjjä buŋ birrä ke buŋ aam ye, ke ḍigärgä ḍiirken?"