1 Aŋ wina jiik Pïṭo äätin Yünaan minneni Amataay ti, jayok ogo, 2 "Juwu atä Nïnawa baan mooye yäwnä jï, aŋ me päkkä ogo yiñ yeenen ḍäägono ti ika ti." 3 Aŋ Yünaan juwin buurcin woo Pïṭo ti üŋjïn Tarcïïc*. Aŋ attä ïñï nänṭä battä me ogo Yaapa, aŋ käññä kuun atï Tarcïïc, aŋ tiil yeeke äcce aŋ taappä kuun jï kä ïñï, ogo ike atce ke iken Tarcïïc ike buurcee woo Pïṭo ti.

4 Aŋ Pïṭo tuccin jommu yäwconḍe wii mooye jï, aŋ jommuwiingä yäwconḍe kaaccä kä rüüṇṇü yok piik wii jï ke kuun cokule kä liŋŋä. 5 Aŋ mä kuun bojgin aŋ yawgin, yaŋkalaŋ daa mälcïdï jooŋ yeene ti, aŋ wakkä yeeken yaaka ättä kuun jï ye, yibji piitti ogo kuun paṭolo. I Yünaan a kaacon ïñï kuun jï, aŋ nïïnjïn ïñï oodi kä yaac.

6 Aŋ woydo yen mä kuun äätin ike ti aŋ ike kiini ogo, "Ïkï ootciti ina aŋan? Juwu yaajjä jooŋ yüünü ti naana ye bi ïkïïn däämmin ïñï, aŋ ïkïïn batta bi tüwïn."

7 Aŋ iken jaajjin pääken ogo, "Ääte por wïkïn guygu, dale ïkïïn nüütkïn a ŋaani bi ken läppä yiñ yaanni ïkïïn ti." Aŋ guygu wiki, aŋ ḍimjin Yünaan ti. 8 Aŋ kiini ogo, "Kura nüütkoon a ŋaani bi ken läppä yiñ yaanni ïkïïn ti? Aŋ ïkï ñuugula yüünü a ŋa? Aŋ ïkï äätä wa? Aŋ baannic a wa? Aŋ ïkï agä män wanä?"

9 Aŋ kiinne ogo, "Ika agä män Iburu, aŋ ika mäŋä Pïṭo Jooŋ polloŋ jïñe, yaana näŋŋä wii mooye ke ŋommañ ye."

10 Aŋ ook bojgin kä yaac, aŋ kiini ogo, "Ïkï näŋjädä aŋan ina?" Aŋ ŋïjï ook ike a büürcïdïnï woo Pïṭo ti, nääŋka iken nüütkeneeda kä ye. 11 Aŋ kiini ogo, "Ïkï naŋgi ogoo nuŋko jommu yuutee ïñï ye?" Wii mooye üüttïdï kä nütkïtïn.

12 Aŋ kiinne ogo, "Koowa aŋ yeepa piitti nuŋko wii mooye yuutee ïñï, ŋäjjä a nääŋkä yeeki ken ikki ääcïdï jommuwiingä yäwconḍe ikee ti yaanni." 13 Aŋ ook kuun gobcutu ŋäjäk woo aaygon aŋ batta lïïltä, nääŋka jommu wii mooye üüttedee kä nütkïtïn iken ti ye.

14 Aŋ iken yaajjin Pïṭo ti ogo, "Ay kura Pïṭo, dalä ŋana ikoon tüwdon ogo men yaanni näŋŋoon ḍok, aŋ ŋana ikoon iñdoon ḍuugin leññä kä yïmgä m'ana ḍoŋe ladaŋ ye. Pïṭo, ïkï näŋŋi bata nääŋkä yaaka daa ṭäkkä ye." 15 Aŋ Yünaan koowi aŋ yeepi piitti, aŋ wii mooye yuuttu ïñï kä nütkïtïn. 16 Aŋ ook bojgin kä yaac kä Pïṭo, aŋ iken äccin wäämmä yok aŋ ircin jiik ke Pïṭo.

17 Aŋ Pïṭo tuccin yakcan yäwconḍe, yaana lätï Yünaan ye. Aŋ Yünaan cääynä yakcan jïñe ti nïïnkä kä ḍäk.