1 Aŋ wääna Äŋ jïñe Wääktäŋ ḍakkee kä aŋ tïṇṇä wic yen ïïjjïn ti nïïnnä ŋaṭükel ti ye, i Märïyam yen mä Majdalïïna ke Märïyam yaŋkalaŋ attä ükcïdï kääl wiñe. 2 Aŋ kä ḍeeraŋ aŋŋi ŋommañ bukcin kä yaac kä yaana malak yen Pïṭo kääjenee ïñï polloŋ jï ye, aŋ äätin aŋ pääm ḍüljene woo, aŋ cääjjenee kä wic. 3 Aŋ biilke beel bata wïldïn, aŋ buruŋgu yeeke bowaŋ bata aak. 4 Aŋ tïïconi bojgin kä yaac aŋ yoken tïïcïn kä liin ke beeljene bata mä tüwïn. 5 Aŋ malak määngä kiinne ogo, "Ŋana ikee booje, ŋäjjä ikee määje Yeecüwa yaana ṭelji me ti kaakkon jok ina. 6 Ike batta a winni Ike juwin ñaalok tüwnü ti, bata yaana jaajjenee kä ye. Ääte nänṭä yaana nïïnee kä ye yoore. 7 Ate kä bïraŋ, aŋ baaddoni yeeke kiine ogo, Ike juwono ñaalok tüwnü ti, aŋ bilto ti ato ñomgic ti Jalïïl. Aŋ Ike bi yoorje wïca. Yaaka nüütkene kä yaakki payde."

8 Aŋ määngä kääl wiñe dalji ïñï kä bïraŋ kä liin, i a küümïn kä jon ñamme mooye, aŋ lüdgïn baaddoni yeeke nüütkütü.

9 Aŋ kä ḍeeraŋ aŋŋi, Yeecüwa purjene kä aŋ kiinne ogo, "Ogook?" Aŋ iken wükcïn ti Ike ti aŋ tabi kïïgïn kä maaŋŋä. 10 Aŋ iken kiini Yeecüwa ogo, "Ŋana ikee booje. Ate aŋ mädgo nüütke ogo ato Jalïïl, aŋ Ika bi yoorjada wïca."

11 Aŋ wääna määngä äätene kä päy jï ye, i tïïconi yakkalaŋ attä baan jï, aŋ ḍuuŋku däŋkä yek Jooŋ päkki kä waak’a näŋŋä ḍuuggen ye muure. 12 Aŋ wääna ḍuuŋku däŋkä purjene ke yätïnï ye, i iken läälin pugin, aŋ kääygä iñi tiil kä ḍiräk. 13 Aŋ kiini ogo, "Jaaye ogo baaddoni yeeke ken äätono ko mïïllä i ikee agje ootin, aŋ gaane kallïï. 14 Aŋ naana mügdo yaakki tiiŋŋe ye, i ikoon bi yuuton ñaalok kä ikee nuŋko ŋana kaaccede kä tïñïdïn gïtï."

15 Aŋ kääygä tiil koowi, aŋ iken näŋjin bata yaana daa kiinene daa kä ḍuuŋku däŋkä yek Jooŋ ye. Aŋ jiik yaakki piirjin woo Yühüüṇṇï ti ke tiññaŋ.

16 Aŋ baaddoni yaaka kä caay wiñen kä keelok ye attä Jalïïl, pääm yaana nüütkene daa Yeecüwa ogo atcï ko ye ti. 17 Aŋ wääna Ike yoorene daa kä ye, Ike maaŋi aŋ yakkalaŋ juuggen riijjin. 18 Aŋ Yeecüwa äätin iken ti, aŋ jaajjin ogo, "Mügdïn yen polloŋ jïñe ke mügdïn yen ŋommañ wiñe, iñana kä Jooŋ muure. 19 Aŋ wäättan ate aŋ näŋe baaddoni ṭoŋ ti muure, aŋ iken büüle kä yäṇtäŋ Wäy ke Minneni ke Wääktäŋ Laṇṇä yen Jooŋ. 20 Aŋ iken nüüde dale tiŋit wakkä muure yaaka iingene kä ye. Aŋ wina Ika bi ke ikee kamat ke düüñïn yen yuungu ti."