ఆమోసు 2

మోయాబు

1 యెహోవ వెస్సీమంజన్నయి ఏనయి ఇచ్చిహిఁ, "మోయాబు తీని సారి హుట్టు కిత్తి పాపుతి పాయిఁ నాను తప్పన ఏదఅఁతి డొండొకీఇఁ. ఏనఅఁతక్కి ఇచ్చిహిఁ ఏవరి ఎదోము రజ్జ డుమ్కాని హూడ్డహఁ దఁర్బు కిత్తెరి. 2 మోయాబు లెక్కొ నాను హిచ్చు పండఇఁ. ఏది కెరీయోతు సుట్టుకోడ్డయఁని హూడ్డిమంజనె. ఓడెవ జుజ్జొ సాడియఁని బాకా సాడి వెఁణ్బిఆహిఁచిహిఁ మోయాబు హాక్కి కిల్లెడిక కీహిఁ మెఁణ్గానె. 3 ఎంబఅఁ లేంబినసి హిల్లఅరేటు కిఇఁ. ఏవణితొల్లె మన్నెరి హుక్కొమిగట్టరి బర్రెతి నాను పాయిఇఁ" ఇంజిహిఁ యెహోవ వెస్సిమన్నెసి.

యూదయ

4 యెహోవ వెస్సీమంజన్నయి ఏనయి ఇచ్చిహిఁ, "యూదా తీని సారి హుట్టు కిత్తి పాపొమికాని బకిటి నాను తప్పన ఏవరఇఁ డొండొకీఇఁ. ఏనఅఁతక్కి ఇచ్చిహిఁ ఏవరి తమ్మి పూర్బెతరి కీతఅతి కితరి ఏవరి బొంకుతొల్లె తాణటి నాడిఆహఁ యెహోవ నియొమి పిస్సహఁ, ఏవసి మేరాని కిఅతెరి. 5 యూదా లెక్కొ నాను హిచ్చు పండఇఁ. ఏది యెరుసలేము రజ్జ మేడ్డాణి హూడ్డిమన్నె."

ఇస్రయేలు లెక్కొ మహపురు బిచ్చర

6 యెహోవ వెస్తనయి ఏనఅఁ ఇచ్చిహిఁ "ఇస్రయేలు తీని సారి హుట్టు కిత్తి పాపొమికాని బకిటి నాను తప్పన ఏదఅఁతి డొండొకీఇఁ. ఏనఅఁతక్కి ఇచ్చిహిఁ టక్కయఁ కోసొమి ఏవరి నీతిగట్టరఇఁ పార్తెరి. సెప్పుయఁ కోసొమి కర్మగట్టి లోకూణి పార్తెరి. 7 బూమి లెక్కొ ఇఅరతి లోకు తొక్కినిలెహెఁ పేదగట్టరఇఁ త్రాకని విస్సిమన్నెరి. దొస్పిఓతరఇఁ అత్తల మెడ్డిమన్నెరి. తంజి, మీరెఎసి రొండిఎ ఇయ్యనితొల్లె దారి కమ్మకీహిఁ నా సుద్దు దోరుతి లజ్జకిహిమన్నెరి. 8 తణ్క ఇట్టితి హెంబొరికాని హెర్పఅన ప్రెతి పూజపిండ దరి ఏవఅఁతి లెక్కొ హుంజినెరి. తప్పుతక్కి హీతి దొన్నొతొల్లె కొడ్డితి ద్రాక్సకాడుతి తమ్మి మహపురు గుడిత గొహ్నెరి. 9 దేవదారు మార్కు ఎచ్చెక ఎత్తుఆతి ఏవరి సిందూరి మార్కు ఎచ్చెక బల్లొమి మన్ని అమోరీయుతరి నోకిత మన్నఅరేటు నాను నొస్టొ కిత్తెఎఁ ఆఎకి! లెక్కొ ఏవరి పొఒలొతి డోఇ ఏవరి హీర్కాని నాను నొస్టొ కిత్తెఎఁ ఆఎకి. 10 ఐగుప్తు దేసత తాణటి మిమ్మఅఁ తచ్చహఁ, అమోరీయుయఁ దేసతి మింగె *2:10 నాజీరుయఁ ఇచ్చిహిఁ మహపురు కమ్మ కోసొమి ఎర్సకొడ్డితరఇఁ సుద్దుఆఅతఇఁ డీగాణ, త్రాయు రొతఅణ మన్నెరఇఁ నాజీరుయఁ ఇన్నెరి, సంకియఁ 6:1-8; సొంతెకియ్యలివల్లె ఇంజిహిఁ దుయికోడి బర్స పాడుజాడత మిమ్మఅఁ తాకికియ్యతెఎఁ. 11 మీ మీర్కాణ ప్రవక్తాణి ఎర్సితెఎఁ. మీ దఁగ్ణాణ ప్రెతెకొమిగట్టరిలెహెఁ ఎర్సకొడ్డితెఎఁ. ఇస్రయేలులోకుతెరి, ఈది సొత్తొ ఆఎకి?" యెహోవ పుఁణ్బికిన్నయి ఈదిఎ. 12 "ఇచ్చిహిఁ ప్రెతెకొమికిహఁకొడ్డితరకి మీరు ద్రాక్సరస్స గొస్పికిత్తెరి. వేకఅదు ఇంజిహిఁ ప్రవక్తయఁకివ ఆంగితెరి. 13 సినికిద్దు. కూలియఁతొల్లె నెంజతి బండి అంబఅఁరఇఁవ లొక్హఁ విస్సలిఆడ్డినిలెహెఁ నాను మిమ్మఅఁ లొక్హఁఇఁ. 14 ఉసారఆతరి ఓడె పిట్టొవికీహఁఆడ్డొఒరి. బల్లొమిఆతరి తమ్మి బల్లొమితి బకిటి బ్డాయు తచ్చకొడ్డలిఆడ్డొరి. గొప్ప సెక్తిగట్టసి జికెల తని జీవుతి జీణకిహఁకొడ్డలిఆడ్డొఒసి. 15 వేలుజీణసి నిచ్చలిఆడ్డొఒసి. బేగి హొడ్నసి పిట్టొవికిహఁకొడ్డలిఆడ్డొసి. గుర్రొమి హోచ్చఁ డక్నసి తని జీవుతి జీణకిహిఁకొడ్డలిఆడ్డొసి. 16 ఏ దిన్న సాత సెక్తిగట్టసిఆతసివ జుజ్జొ హర్కుయఁ పిస్సహఁ హొడ్నెరి. యెహోవ దిన్న ఈదిఎ."