1 "తయ్యియఁతెరి, ఓడె తంజితెరి, నాను ఎచ్చెలవ మీ నోకిత వెహ్ని కత్త వెంజు!" 2 ఏవసి హెబ్రుబాసతొల్లె జోలినయి వెంజీఁచటి ఏవరి పల్లెఎఆతెరి ఏవసి ఇల్లెకీఁ వెస్తెసి,

3 నాను కిలికియత తార్సు గాడత జర్నఆతి యూదుయఁడతెఎఁ. ఇచ్చిహిఁ ఈ గాడత గమలీయేలు దరి సద్వితెఎఁ, మా పూర్బెతెరి నియొమిసాస్తురి హెల్లొయఁ జాప్హెఁ. మీరు బర్రెజాణ ఈ దిన్న మన్నిలెహెఁ మహపురు హాడ్డత ఆసతొల్లె మచ్చెని, 4 ఈ నమ్ముగట్టి జియ్యుతి కిహఁ ఇయ్యస్క ఆబెలంగాణి డొండొకిహఁ జేలిత ఇట్టితెరి. 5 ఈ హాడ్డత కజ్జ కజ్జపూజెరంగ తగొమండత మన్ని లోకు బర్రెజాణ కజ్జరి బర్రెజాణ సాక్కిఆతెరి. నాను ఏవరితాణటి దమస్కుత మా తయ్యికి ఉత్రొమిక కొడ్డహఁ, ఎంబతి నమ్ముగట్టరఇఁవ దొస్సహఁ డొండొకియ్యలితక్కి యెరుసలేము తచ్చలితక్కి ఇంజిహిఁ ఎంబఅఁ హచ్చెఎఁ.

6 నాను హజ్జిహిఁ దమస్కుతక్కి దరిఆతటి మద్దెన హాగుటి రో కజ్జ ఉజ్జెడి జిక్కి నా సుట్టు ఉజ్జెడిఆతె. 7 నాను తోజొ రీహఁ సౌలు, సౌలు! నీను నన్నఅఁ ఏనకి డొండొకిహిఁజది? ఇంజిహిఁ నాతొల్లె రో సోరొ జోలితయి వెచ్చెని. 8 ఏదఅఁతక్కి నాను నీను ప్రెబుతికి? అంబఅతి ఇంజిహిఁ వెంజలెఎ ఏవసి, నాను నీను డొండొకిహిఁ మన్ని నజరేతుతి జీసుతెఎఁ ఇంజిహిఁ నా తొల్లె వెస్తతెసి. 9 నా తొల్లె మన్నరి ఏ ఉజ్జెడితి మెస్తెరి సమ్మ నాతొల్లె జోలితి సోరొతి వెంజలొఒరి. 10 ఎచ్చెటిఎ నాను ప్రెబు, నన్నఅఁ ఏనఅఁ కిమ్ము ఇంజది? ఇంజిహిఁ వెచ్చెని. ఎచ్చెటిఎ నీను నింగహఁ దమస్కుత హజ్జహఁ, ఎంబఅఁ నీను ఏనఅఁ కిమ్ము ఇంజిహిఁ నాను ఒణ్పితయి ఏవి బర్రె నీను పుంజి ఇంజిహిఁ నా తొల్లె ఇంజతెసి. 11 ఏ మహిమతి మెస్సహఁ నాను కాణ ఆతెఎఁ ఇంజహఁ నాను మెస్సలి ఆడతెఎఁ నాతొల్లె మచ్చరి నన్నఅఁ కెస్క అస్సహఁ దమస్కు గాడత తాకికిహిఁ ఒయ్యతెరి.

12 ఎంబఅఁ నియొమిసాస్తురి కత్తత నమ్ముగట్టరి, ఎంబఅఁ డొయిమచ్చి యూదుయతొల్లె నెహిఁ దోరు పాటి అననీయ ఇన్ని మణిసి మచ్చెసి. 13 ఏవసి వాహఁ సౌలు, నా తయ్యి, నిచ్చహఁ మెహ్ము ఇంజిహిఁ వెస్సలెఎ ఏ బేలఎ నా కణ్క దెప్పిఆతు ఎచ్చెటిఎ ఏవణఇఁ మెస్తెఎఁ. 14 ఎచ్చెటిఎ ఏవసి మా పూర్బెతెరి మహపురు నిన్నఅఁ హెర్సకొడ్డహఁ ఇచ్చతి పుంజలితక్కి, ఏ సుద్దుగట్టి సేబగట్టణఇఁ మెస్సలితక్కి, ఏవణి గూతి హాడ్డ వెంజలితక్కి నిన్నఅ హెర్సతెఎఁ. 15 నీను మెస్తఅతి పాయిఁ, వెచ్చఅఁ పాయిఁ లోకుబర్రెతి నోకిత ఏవణకి సాక్కి ఆహఁ మఁణ్బిది. 16 ఇంజహఁ మీరు నీఎఁతక్కి డాయు ఆహింజి? నింగహఁ బాప్తిసొమి ఓము, ఏవసి నా దోరుత ప్రాతనకిహఁ నీ పాపుయఁ ఒప్పకొడము ఇంజతెసి.

17 నాను యెరుసలేము హచ్చెఎఁ, మహపురు గుడిత ప్రాతన కిహిఁచటి ప్రెబు దొర్సొనొతి మెస్తెఎఁ. 18 ప్రెబు నాతొల్లె వెస్తిలెహెఁ, నీను బేగి యెరుసలేము పిస్స హల్లము. నా పాయిఁ నీను వెహ్ని సాక్కి ఇంబతరి ఒప్పకొడ్డొఒరి ఇంజిహిఁ వెస్తెసి. 19 ఏదఅఁతక్కి నాను, ప్రెబు! బర్రె యూదుయఁ కూడఆని ప్రాతన టాయుత నిన్నఅఁ నమ్మితరఇఁ నాను జేలిత మెత్హెఎఁ, వేపికిత్తెఎఁ ఇంజిహిఁ ఏవరి పున్నెరి. 20 ఓడె, నీ సాక్కి ఆతి స్తెపను కస్స బొక్హటి నాను ఎంబఅఁ నిచ్చహఁ ఏదఅఁతక్కి ఒప్పకొడ్డహఁ నీఎఁ ఏవణఇఁ పాయినరి హెంబొరికతక్కి నాను కాపు మచ్చెని ఇంజిహిఁ వెస్తెసి. 21 "ఎచ్చెటిఎ ఏవసి నాతొల్లె హల్లము, ఏనఅఁతక్కి ఇచ్చిహిఁ నాను నిన్నఅ యూదుయఁఆఅతి ఏవరి దరితక్కి హెక్కొ పండీఁజఇఁ ఇంజిహిఁ నాతొల్లె వెస్తెసి."

22 ఈ హాడ్డ పత్తెక ఏవసి వెస్తయి ఏవరి నెహిఁకి వెచ్చెరి సమ్మ బేగి ఏవరి, "ఇల్లెతెసి డొయ్యలితక్కి మన్నఅ ఆతిదెహెఁ. బూమి లెక్కొ మన్నఅఁ రేటుఎ ఏవణఇఁ పాయదు" ఇంజిహిఁ కిల్లెడికిత్తెసి. 23 ఏవరి కిల్లెడికిహిఁ ఏవరి లెక్కొతి హెంబొరిక పిస్సకొడ్డిహి హాగు బకి దూడితి పెర్హ వాక్హెరి. 24 ఇల్లెకీఁ ఏవరి ఏవణఇ కుట్రఆహఁ కిల్లెడితక్కి ఏనఅఁ పుంజలితక్కి కోసొమి రోమకోస్కతక్కికజ్జసి ఏవణఇఁ కొర్డతొల్లె వేపికిత్తెసి, వెంజలితక్కి కోటత ఓదు ఇంజిహిఁ హెల్లొహిత్తెసి. 25 ఏవరి పౌలుఇఁ డోర్కతొల్లె దొస్సఁచటి ఏవసి ఏవణి దరి నిచ్చహఁ వంజ కోస్కతక్కి కజ్జణితొల్లె "ఏని దోహొ కిఆతి రోమతడఅఁ ఆతి పౌలుఇఁ కొరడయతొల్లె మీరు వేచలి నాయెఁమిఎకి?" ఇంజిహిఁ వెచ్చెసి.

26 వంజ కోస్కతక్కి కజ్జసి ఏ హాడ్డయఁ వెంజహఁ కోస్క హుక్కొమిగట్టసి దరితక్కి హజ్జహఁ, "నీను ఏనఅఁ కిహింజి? ఈ మణిసి రోమతసిఎ!" ఇంజిహిఁ ఇచ్చెసి.

27 ఎచ్చెటిఎ వంజ కోస్కతక్కి కజ్జసి వాహఁ సౌలుతొల్లె, "నీను రోమతతికి? ఏది నాతొల్లె వెస్తము" ఇచ్చెసి

సౌలు "హొఒ" ఇచ్చెసి.

28 ఎచ్చెటిఎ ఏ కోస్కతక్కిహుక్కొగట్టసి, "నాను రోమతత్తెఎఁ అయ్యలితక్కి హారెఎ డబ్బుయఁ హిత్తెఎఁ" ఇచ్చెసి. ఏదఅఁతక్కి పౌలు,

"నాను ఇచ్చిహిఁ జర్నతొల్లె రోమియుడతెఎఁ" ఇంజిహిఁ వెస్తెసి.

29 ఇంజహఁ ఏవరి జిక్కి పౌలుఇఁ పిస్తెరి. ఓడె ఏవసి రోమతసి ఇంజిహిఁ పుచ్చటి ఏవణఇఁ దొస్సలితక్కి అజ్జితెరి.

30 ఓరొదిన్న, యూదుయఁ ఏవణి లెక్కొ కిత్తి నిందయఁ నిజ్జెఎ పుంజకొడ్డలి కోసొమి, వంజకోస్కతక్కి హుక్కొమిగట్టసి ఏవణఇఁ హిక్ణిఁయఁ పిస్పికిహఁ. కజ్జపూజెర, కజ్జసబతి బర్రెజాణ కూడఆహలి ఇంజిహిఁ హెల్లొహిహఁ, పౌలుఇఁ తచ్చిహిఁ వాహఁ ఏవరి నోకిత నిప్హెసి.