1 పేతురు యోహాను లోకుతొల్లె జోలి మచ్చటి, కొచ్చెక జాణ పూజెరంగ* మహపురు గుడి హుక్కొమి గట్టసి సద్దుకయుఁయఁ ఏవరి దరి వాతెరి. 2 ఏవరి జీసు పాయిఁ జాప్హిఁ, జీసు హాహఁ వెండె నింగితెసి ఇంజిహిఁ, ఎల్లెకీఁఎ హాతరివ వెండె తిర్వహఁ నింగినెరి ఇంజిహిఁ జాప్హణి వెంజహఁ కల్లిబిల్లి ఆతెరి. 3 ఏవరఇఁ బల్మిఇఁ అస్సహఁ, మిలొఒడ ఆహి మచ్చటి ఓరొ దిన్న పత్తెక ఏవరఇఁ జేలిత ఇట్టితెరి. 4 సమ్మ మహపురు బోలు వెచ్చరి హారెఎ లోకు నమ్మితెరి. ఏవరి తాణటి ఆబెలంగెఎ పాసమాణ ఎచ్చెక ఆతెరి.

5 ఓరొ దిన్నత ఏవరి హుక్కొగట్టరి, కజ్జరి, నియొమి సాస్తురి జాప్నరి, యెరుసలేముత కూడ ఆతెరి. 6 కజ్జ పూజెర ఆతి అన్న, ఇన్ని కయప, యోహాను, అలెక్సంద్రు, కజ్జపూజెర గొత్తయఁ బర్రెజాణ ఏవరి తొల్లె మచ్చెరి. 7 ఏవరి పేతురు యోహానుఇఁ ఏవరి మద్ది నిప్హఁ, "మీరు ఏమిని హుక్కొమితొల్లె ఏమిని దోరు తొల్లె ఇదఅఁ కిత్తెరి?" ఇంజిహిఁ వెచ్చెరి.

8 ఎచ్చెటిఎ పేతురు సుద్దుజీవుతొల్లె నెంజహఁ ఇల్లె ఇచ్చెసి. "లోకుతక్కి హుక్కొమి గట్టతెరి, కజ్జతెరి, 9 ఏ సొట్టగట్టణకి కిత్తి నెహిఁ కమ్మతి పాయిఁ, ఏవసి ఏనికిహిఁ నెహిఁ ఆతెసి ఇంజిహిఁ నీంజు మమ్మఅఁ తయిపరి కీహిఁ వెంజి మంజదెరికి. 10 మీరు, ఇస్రయేలు లోకు బర్రెజాణ పుంజ కొడ్డినయి మన్నె ఏనయి ఇచ్చిహిఁ, మీరు సిలువ వేతి, మహపురు హాకిటి వెండె నిక్హి, ఈ నజరేతుతసి ఆతి జీసు క్రీస్తు దోరుతెఎ ఈవసి నెహిఁ ఆతెసి ఇంజహఁ మీ నోకిత నిచ్చ మన్నెసి. 11 ఇల్లు దొహ్ని మీరు పిస్తి వల్లి ఏవసిఎ, ఏ వల్లి ఇల్లుతక్కి ముక్కెణి ఆతె. ఇంజిహిఁ జీసు పాయిఁ పుస్తెకొముత రాచ్చితయి మన్నె. 12 ఎంబఅరి తాణటివ గెల్పి ఆనయి వాఎ. ఈ దోరుతెఎ మారొ గెల్పి ఆనయి మన్నె సమ్మ, హాగు డోఇ మన్ని మణిసియఁ తాణ ఇచ్చివ ఓడె ఏమిని దోరుతవ గెల్పి ఆఅయి."

13 సబత మన్నరి పేతురు యోహానుఁగ బ్డాయుతి మెస్సహఁ, ఏవరి సదువు జాపఅతి మణిసియఁ ఇంజిహిఁ పుంజహఁ కబ్బ ఆతెరి. ఏవరి జీసుతొల్లె మచ్చెరి ఇంజిహిఁ పుచ్చెరి. 14 నెహిఁ ఆతసి పేతురు యోహానుఁగ తొల్లె నిచ్చ మచ్చణి మెస్సహఁ ఏవరి ఏనవ వెండె వెస్సలి ఆడ్డఅతెరి. 15 ఎచ్చెటిఎ సబటి పంగత హజ్జు ఇంజిహిఁ హాడ్డ హీహఁ తాంబు తాంబుఎ జోల్కి ఆహఁ, 16 ఈవరఇఁ మారొ ఏనఅఁ కిన్నయి? ఏవరి తాణటి హారెఎ కబ్బగట్టి కమ్మయఁ కిత్తఇఁ మన్ను ఇంజిహిఁ. యెరుసలేముత మన్నరి బర్రెజాణ పుంజెఎనెరి. ఏది ఆహాలెఎ ఇంజిహిఁ వెస్సలి ఆడ్డఅయి. 17 ఇచ్చివ ఇది లోకు తాణ వెంగఅరేటు, ఈ దోరుతొల్లె ఎంబఅరఇఁ జోలలి కూడెఎ ఇంజిహిఁ మారొ ఏవరఇఁ అజ్జి కిన్నొ ఇంజిహిఁ వెస్పి ఆతెరి.

18 ఎచ్చెటిఎ ఏవరఇఁ హాటికిహఁ, "మీరు జీసు దోరుతొల్లె రో ఇచ్చణివ జోలలి కూడెఎ, వెస్సలి కూడెఎ" ఇంజిహిఁ ఏవరఇఁ వెస్తెరి. 19 ఏదఅఁతక్కి పేతురు యోహాను ఏవరఇఁ సినికిహఁ, "మహపురు హాడ్డ కిహఁ మీ హాడ్డ వెన్నయి మహపురు నోకిత నాయెఁమిఎకి? మీరుఎ వెస్తదు. 20 మాంబు ఏనఅఁ మెస్తొమినొ, ఏనఅఁ వెచ్చొమినొ ఏవఅఁతి వెహఅనఁ మంజలి ఆడ్డొఒమి" ఇంజిహిఁ వెస్తెరి. 21 లోకు బర్రెజాణ ఆతణి పాయిఁ మహపురుఇఁ గౌరొమికిహిఁ మన్నెరి ఏదఅఁతక్కి ఏ సబత మన్నరి ఈవరఇఁ ఏనికిహిఁ డొండొ కిన్నయి మన్నె పున్నఅనఁ గట్టి అజ్జి కిహఁ పిస్స పండితెరి. 22 కబ్బగట్టి కమ్మతొల్లె నెహిఁ ఆతణి వయుసు దుయికొడి బర్సయఁ కిహఁ గడ్డుఎ.

23 ఏ పేతురు యోహానుఁగ పిస్స పండితి రేటుఎ తమ్మి సొంతె లోకు తాణ వాహఁ, కజ్జ పూజెరంగ కజ్జరి తమ్మఅఁ వెస్తి హాడ్డయఁ బర్రె ఏవరఇఁ వెస్తెరి. 24 ఏవరి వెంజహఁ, రో మణుసుతొల్లెఎ మహపురుఇఁ ఇల్లెకీఁ ప్రాతన కిత్తెరి. ప్రెబు, నీను హాగుతి, బూమితి, సమ్‌దురితి, ఎంబఅఁ మన్ని బర్రెతి కేపితతి. 25 నీను సుద్దుజీవు తొల్లె నీ సేబ గట్టసి, మా తంజి ఆతి దావీదు తాణటి వెస్పి కిత్తి.

యూదుయఁఆఅతి ఏవరి ఏనఅకి అల్లర కిత్తెరి?

లోకు ఏనఅఁకి లగ్గెఎతి ఒణ్పుయఁ ఒణ్పినెరి?

26 ప్రెబు ముహెఁ ఓడె ఏవణి

క్రీస్తు ముహెఁ తాడెపురుత మన్ని రజ్జయఁ నింగితెరి,

27 ఏవఅఁ బర్రెతి కియ్యలితక్కి నీను అబిసేకొమి కిత్తి నీ సుద్దుగట్టి సేబగట్టి జీసుఇఁ దుసొవిఆతి హేరోదు పొంతి పిలాతువ యూదుయఁఆఅతి లోకు ఇస్రయేలు లో 28 హేరోదు, పొంతి పిలాతు, యూదుయఁఆఅతి ఏవరి, ఇస్రయేలు లోకుతొల్లె అండహఁ ఈ గాడత రొండిఎ ఆతెరి. 29 ప్రెబు, ఏవరి అజ్జికినణితి పుంజహఁ సేబగట్టరి 30 రోగొ గట్టరఇఁ నెహిఁ కియ్యలితక్కి, నీ సుద్దు ఆతి సేబ గట్టరి జీసు దోరుత పుణ్కియఁ, కజ్జ కమ్మయఁ కియ్యలితక్కి నీ కెయ్యు దాస మంజాఁ, నీ సేబగట్టరి నీ బోలుతి జాప్హలితక్కి హారెఎ బ్డాయు హీము.

31 ఏవరి ప్రాతన కియ్యలెఎ ఏవరి కూడ ఆహఁ మచ్చి టాయు వీడ్డితె ఎచ్చెటిఎ ఏవరి బర్రెజాణ సుద్దుజీవుతొల్లె పూర ఆహఁ మహపురు బోలుతి బ్డాయుతొల్లె వెహ్తెరి.

32 నమ్మితి బర్రెజాణవ రొండి హిఁయఁతొల్లె రొండి జీవుతొల్లె మచ్చెరి. ఎంబఅరివ తమ్మి ఆస్తి పాస్తితి ఏనయివ తన్నివయి ఇన్నఅతెరి. ఏవరకి మచ్చణితి బర్రె రొండిఎచ్చెకెఎ ఇట్టితెరి. 33 అపొస్తుయఁ కజ్జ బల్మితొల్లె ప్రెబు ఆతి జీసు హాహఁ వెండె నింగితి పాయిఁ సాక్కి వెస్తెరి. మహపురు కర్మ బర్రెతి ముహెఁ వాతె. 34 బూమియఁ ఇల్క మన్నరి బర్రెజాణ ఏవఅఁతి పార్చహఁ, ఏ టక్కయఁ అపొస్తుయఁ నోకిత తచ్చిహిఁ వాతెరి. 35 ఏవరి బర్రెతక్కి సరిఆని పత్తెక బాటి కిత్తెరి ఏదఅఁతక్కి ఏవరకి ఏనయివ ఊణ ఆఅతె.

36 కుప్రత జర్న ఆతి లేవి కుట్మతక్కి పాడఆతి యోసేపు ఇన్ని రొఒసి మచ్చెసి. ఈవణఇఁ అపొస్తుయఁ బర్నబా ఇన్ని దోరు ఇట్టితెరి. ఏ దోరుతక్కి "ఆదకిన్ని మీరెఎసి" ఇన్ని అర్దొమి. 37 ఈవసి హారెఎ బూమిగట్టసి తంగొ మచ్చి బూమితి బర్రె పార్చహఁ ఏ టక్కయఁ అపొస్తుయఁ నోకిత తచ్చహఁ హిత్తెసి.