యూదుయఁఆఅతరి కోసొమి పౌలు కమ్మ
1 ఇదఅఁతక్కి యూదుయఁఆఅతి ఏవరి నమ్ముగట్టరి ఆతి మీ కోసొమి జీసు క్రీస్తు జేలిత మన్ని పౌలు ఇన్ని నాను ప్రాతనకిహిమఇఁ. 2 మీ కోసొమి మహపురు నంగె హియ్యతి క్రుప పాయిఁ మీరు వెంజహఁ మఁణ్బినెరి. 3 ఏనఅఁ ఇచ్చిహిఁ దొర్సొనొమి క్రీస్తు డుగ్గ మన్ని సొత్తొ పుఁణ్బిఆతె. ఇదఅఁ పాయిఁ మీరువ పుచ్చికత్తతి తొల్లిఎ నెహిఁకి రాచ్చితెఏ. 4 మీరు ఏదని సద్వితెహెఁ ఏ క్రీస్తు డుగ్గ మన్ని సొత్తొ పాయిఁ నాను పాటి తెల్వితి మీరు ప్ణాఁదెరి. 5 ఈ డుగ్గ మన్ని సొత్తొ నీఎఁ సుద్దుజీవుతొల్లె మహపురులోకుఆతి అపొస్తుయఁకి ప్రవక్తకి పుఁణ్బికిత్తిలెహెఁ పూర్బొమి మణిసియఁ పుచ్చెరి. 6 ఈ డుగ్గ మన్ని సొత్తొ ఏనఅఁ ఇచ్చిహిఁ యూదుయఁఆఅతి ఏవరి, నెహిఁకబ్రుతొల్లె క్రీస్తుజీసుత, యూదుయతొల్లెవ రో అంగత బాగొమిక, వాగ్దానొమిత పాలిబాగియ ఇంజిహిఁ వెహ్నయి.
7 నాను ఏ నెహిఁకబ్రుతక్కి సేబకినతెఎ ఆతెఎ. మహపురు సొక్తితి పాయిఁ నంగె హియ్యతి క్రుపవరొమి బదులి నాను ఏ నెహిఁకబ్రు వెహ్నతెఎ ఆతెఎ. 8 నా మహపురు లోకుతాణ నాను పాడఆనతె ఇచ్చిహిఁవ మహపురు నంగె క్రీస్తు గొప్ప దొన్నొతి నెహిఁకబ్రుతి యూదుయఁఆఅతి ఏవరి దరితక్కి ఓని ఔకాసొమితి మహపురు హియ్యతెసి 9 తాడెపురుతక్కి కజ్జయిఆతి హుక్కొమిగట్టరి, సంగొమితొల్లె ఏవణి పాయిఁ రకొమిఆతి తెల్వి నీఎఁ పుంజలివల్లె ఇంజిహిఁ ఒణ్పితెరి. 10 తన్ని డుక్హమన్ని తెల్వి సఙొమితొల్లె హాగులెక్కొ కజ్జరి హుక్కొమిగట్టరి పుంజలివల్లె ఇంజిహిఁ మహపురు ఒణ్పు. 11 ఏది మా ప్రెబుఆతి క్రీస్తు జీసుతాణ కిత్తి తన్ని కాలెతి ఒణ్పు. 12 క్రీస్తు లెక్కొ మా నమ్ముతొల్లె ఏవణి బకిటి మంగె బ్డాయుతి, మహపురు సన్నిదితాణ హోడ్ని బ్డాయువాతె. 13 ఇంజహఁ మీ కోసొమి నంగె వాతి హింసయఁ మెస్సహఁ మీరు అజ్జదు ఇంజిహిఁ వెస్సీహిఁ. ఈవి మింగెకి మహిమతక్కి మన్ను.
క్రీస్తు జీవునోనయి
14 ఇదఅఁతక్కి తంజి నోకిత మీ మెండకుత్తహఁ ప్రాతన కిహిమఇఁ. 15 లెక్కొపురుతాణ బూమి తాణ మన్ని బర్రె కుట్మ తన్ని సొత్తొతి దోరుతి ఒప్పకొడ్డినెరి. 16 మహపురు తన్ని తాణ సుద్దుజీవుతొల్లె మీ హిఁయఁత ఏవణికి గొప్ప మహిమతి సొక్తితి మింగె హియ్యలి ఇంజిహిఁ నాను మహపురుకి ప్రాతన కిహిమఇఁ. 17 ఇచ్చిహిఁ క్రీస్తు మీ హిఁయఁత నమ్ముతొల్లె మంజలి ఇంజిహిఁ, మీరు తన్ని జీవుత తీరుతొల్లె మంజలివలె ఇంజిహిఁ, నాను ప్రాతన కిహిమఇఁ 18 మీరు మహపురు లోకు బర్రెతి తొల్లె కల్హఁ ఏదని లంబ, ఏదని ఓసర, క్డుతయి, పడ్డెణి, హారెఎ పూర్తి పుంజకొడ్డలి ఇంజిహిఁ, 19 తెల్వితక్కి మించితి క్రీస్తు జీవుతి పుంజకొడ్డలితక్కి సొక్తితి పాటలి ఇంజిహిఁ ప్రాతనకిహినొమి.
20 మా తాణ కమ్మకిన్ని తన్ని సొక్తితొల్లె మారొ రీస్తి సొమన, ఒణ్పుహాలతి కిహఁ హారెఎ గడ్డు సొక్తిగట్టి మహపురుకి, 21 క్రీస్తు జీసు తొల్లె సఙొమిత బేలి కాలె మహిమ ఆపెదె. ఆమేన్.