1 ఆతని బర్రె మొర్దెకయ వెచ్చెసి. ఏవసి తని హెంబొరిక గెస్సకొడ్డహఁ దుక్కుహెంబొరిక దొస్సకొడ్డహఁ దఁర్బు రుబ్బకొడ్డహఁ. గాడ మద్ది హజ్జహఁ దుక్కుతొల్లె హారెఎ డీతెసి. 2 ఏవసి రజ్జమేడ దార పత్తెక దెహెఁ వాతెసి. ఏనఅఁతక్కి ఇచ్చిహిఁ దుక్కు హెంబొరిక దొస్సకొడ్డినసి రజ్జ దారటి హోడ్డలి కూడెఎ ఇన్ని హెల్లొ మన్నె. 3 రజ్జహెల్లొ, నియొమి పెర్హఁ రాజొమిక బర్రెతాణ ఎంబఅఁ యూదుయఁ బర్రెజాణ దుక్కుతొల్లె మంజహఁ ఉపవాసొమి మంజహఁ గొప్ప దుక్కుతొల్లె, బాదతొల్లె మచ్చెరి. హారెఎ లోకు దుక్కు హెంబొరిక దొస్సకొడ్డహఁ దఁర్బు రాక్హఁకొడ్డహఁ రీహఁ మన్నెరి. 4 ఎస్తేరు హల్లెణిస్క, ఏదని దరి మన్ని పెజ్జుయఁ వాహఁ ఆతి కత్త ఏదనకి పుఁణ్బికిత్తెరి. రాణికి హారెఎ బాదఆతె, మొర్దెకయ దొస్సకొడ్డితి దుక్కు హెంబొరితి రెమ్ము ఇంజిహిఁ హెల్లొ హీహఁ, ఏవసి తుర్హలితక్కి హెంబొరిక పండితె సమ్మ ఏవసి ఏవఅఁతి కొడ్డఅతెసి. 5 ఎచ్చెటిఎ ఎస్తేరు ఏవణఇఁ సేబకియ్యలితక్కి రజ్జ నియొమికిత్తి పెజ్జుయఁతాణ హతాకు ఇన్నణఇఁ హాట్టహఁ ఏనయి ఆతెకి ఏది బర్రె ఏనఅఁతక్కినొ పుంజకొడ్డహఁ వాము ఇంజిహిఁ మొర్దెకయ పండితె. 6 హతాకు రజ్జదార నోకిత మన్ని గాడ సహ్డత మొర్దెకయ దరి వాతెసి. 7 మొర్దెకయ తంగెకి ఆతని బర్రె ఏవణకి వెస్తెసి. హామాను యూదుయఁణి నొస్టొ కియ్యలితక్కి రజ్జకి వెండితి తూక్హఁ హియ్యఇఁ ఇంజిహిఁ వెస్తి దొన్నొ బర్రె ఇచ్చెక ఇంజిహిఁ ఏవణకి పుఁణ్బికిత్తెసి. 8 ఎస్తేరునకి తోసలితక్కి యూదుయఁ పాయలితక్కి సూసనుత పిస్పికిత్తి హెల్లొ పత్రొమితి జికెల ఏవణకి హిత్తెసి. ఏది తని జాతి లోకు బకిటి రజ్జ నోకిత హజ్జహఁ ఏవణకి వెహ్నె ఒణ్పుయఁ బకిటి బాజెత కొడ్డదు ఇంజిహిఁ వెస్తెసి. 9 ఎచ్చెటిఎ హతాకు హజ్జహఁ మొర్దెకయ వెస్తయి బర్రె ఎస్తేరునకి వెస్తెసి. 10 ఎచ్చెటిఎ ఎస్తేరు మొర్దెకయతొల్లె వెస్తము ఇంజిహిఁ హతాకుతొల్లె ఇల్లెకి వెస్సహఁ పండితె. 11 "కబ్రు వాఅన ఆబెలవ అయ్యనివ రజ్జ కోటత హచ్చిహిఁ సెట్టొమి సొమన ఏ మణిసికి హాకి డొండొఎ. రజ్జ తని బఙర రజ్జ బడ్గతి అంబరిబకి సాపినెసినొ ఏ మణిసి దెహెఁ బత్కినెసి. ఈ కొస్టొఆతి హెల్లొ రజ్జ సేబగట్టరి బర్రెతక్కి రజ్జ కోటాణ బర్రెజాణ పున్నెరి. కోడెదొస్సొ దిన్నయఁ రజ్జ నోకిత హజ్జలితక్కి నంగె కబ్రు వాఅతె." 12 హతాకు ఎస్తేరు హాడ్డయఁ మొర్దెకయకి పుఁణ్బికిత్తెసి. 13 మొర్దెకయ ఎస్తేరునకి ఇల్లెకి కబ్రు పండితెసి. "రజ్జమేడ్డత మచ్చిహిఁ వేరెతి యూదుయఁకి ఎట్కఎ నీను పిట్టొవికిహఁకొడ్డిది ఇంజకొడ్డఅని. 14 నీను ఈ బేలత ఏనఅఁ జోలఅతిహిఁ యూదుయఁకి సాయొమి, ఇచ్చిహిఁ పంగత ఓరొ దిక్కుటి వానె. ఇచ్చిహిఁ నీను నీ తంజి బేలి నొస్టొఆదెరి. నీను రోవేల ఇల్లెతి సమేఁ కోసొమిఎ రాణి ఆతి హబ్బుల అంబఅఁరకి పున్నెరి?" 15 ఎచ్చెటిఎ ఎస్తేరు మొర్దెకయకి ఇల్లెకి వెస్సహఁ పండితె. 16 "సూసనుత మన్ని యూదుయఁ బర్రెజాణ కూడ్డికిహఁ నా కోసొమి ఉపవాసొమి మన్నిలెహెఁ కిమ్ము. తీని దిన్న ఏనఅఁ తిన్నఅదు, గొహఁఅదు. నాను నా హల్లెఎణి జికెల ఉపవాసొమి మన్నొమి. సెట్టొతక్కి నప్పఅరేటు ఇచ్చివ నాను రజ్జ దరి హజ్జిమఇఁ. నాను హాతిహిఁ హాఇఁ." 17 మొర్దెకయ హజ్జహఁ ఎస్తేరు తంగెకి వెస్తని బర్రె కిత్తెసి.