మూలు 23

సారా హాయ్యలిఎ మహ్ణి మండత ముహ్నయి

1 సారా సోహొ కొడి సాత బర్సయఁ బత్కితె. 2 కనాను దేసత హెబ్రోను ఇంజిహిఁ దోరు గట్టి కిర్యతు అర్బా*23:2 కిర్యాతు అర్బా ఇచ్చిహిఁ సారి గొట్ట గాడయఁ ఇన్ని జాగత ఏది హాతె. అబ్రాహాము సారాని పాయిఁ దుక్కు అయ్యలి ఓడె డియ్యలి వాతెసి. 3 ఏ డాయు అబ్రాహాము హాతి తని డొక్రిని దర్రటి నింగహఁ హేతు బేలితొల్లె ఇల్లె ఇంజిహిఁ జోలితెసి, 4 "నాను మీ మద్ది రో ఎట్క పంగ రాజి దేసత ఎట్క తత్తెఎఁలేఁ మంజ మఇఁ. హాతి నా డొక్రి నా కణ్క నోకితెఎఁ మన్నె. హాతి నా లోకూఁణి ముస్సలితక్కి నంగె రో మహ్ణియఁ మండతి నంగె ఇచ్చణి హియ్యదు" ఇచ్చెసి. 5 ఎచ్చెటిఎ హేతు బేలితరి ఇల్లె ఇచ్చెరి "ఆబ, అబ్రాహాము మాంబు వెస్తనణి వెన్నము. నీను మా మద్ది రో రజ్జలెహెఁ మంజ మంజి. 6 మా మహ్ణియఁ మండ నెహిఁ బూమిత హాతి నీ డొక్రిని ముహ్ముము. హాతి నీ డొక్రిని నీను ముస్సలితక్కి మా తాణ మహ్ణియఁ మండతి హియ్యఅ గట్టసి ఎంబఅసి హిల్లొఒసి." ఇంజిహిఁ అబ్రాహాముఇఁ వెస్తెరి. 7 ఎచ్చెటిఎ అబ్రాహాము నింగహఁ ఏ దేసతి లోకు ఆతి హేతు బేలితరి నోకిత బొంగహఁ జొహొర కిత్తెసి. 8 "హాతి నా డొక్రిని ముస్సలి మింగె ఇచ్చెఎ ఇచ్చిహిఁ మీరు నా హాడ్డ వెంజు. సోహరు మీరెఎణ ఆతి ఎప్రోనుఇఁ నా పాడియటి జోల హియ్యదు. 9 ఏవణి సొబ్బయఁ అత్తల మన్ని మక్పేలా పావుతి నంగె హిమ్ము ఇంజిహిఁ ఏవణఇఁ వెస్స హియ్యదు. ఏది నా సొంతె మహ్ణియఁ మండ ఆహీఁ మంజలితక్కి ఏదఅఁతి పూర్తి డబ్బుతక్కిఎ పార్ము ఇంజిహిఁ వెహ్దు" ఇచ్చెసి. 10 ఏ ఎప్రోను హేతు బేలితరి మద్దిఎ కుగ్గ మచ్చెసి. ఇంజహఁ హిత్తీయుతసి ఆతి ఎప్రోను ఏ గాడ దువ్వెరిత హజ్జి మన్నరి బర్రెజాణ నోకితెఎ హేతు బేలితరి వెణ్బఎ అబ్రాహాము ఇల్లె ఇచ్చెసి. 11 "ఆబ, ఎల్లెకిఁ ఆఎ. నా హాడ్డ వెన్నము. ఏ సొబాఁణి ఎంబఅఁ మన్ని ఏ పావుతివ నింగె హీహి మంజఇఁ. నా లోకు నోకితెఎ ఏదఅఁ నాను నింగె హీహి మంజఇఁ. హాతి నీ డొక్రిని ముస్సలితక్కి నింగె హీహి మంజఇఁ." 12 ఎచ్చెటిఎ అబ్రాహాము ఏ దేసతి లోకు నోకిత మున్ను కుత్తహఁ జొహొర కిత్తెసి. 13 "నీను ఇచ్చఆతిఁ నా హాడ్డ వెన్నము. ఏ సొబయఁతక్కి మొల్ల హియ్యఇఁ. నా తాణ మొల్ల ఓము. ఎచ్చెటిఎ నా డొక్రిని ఎంబఅఁ ముహిఇఁవ" ఇంజిహిఁ బర్రెతక్కి వెన్నిలెహెఁ వెస్తెసి. 14 ఏదఅఁతక్కి ఎప్రోను అబ్రాహాముఇఁ ఇల్లె ఇచ్చెసి. 15 "ఆబ, వెన్నము. ఏ బూమితక్కి సారి వంజ తూలొమి వెండి హియ్యతి సరి. ఏ బర్రె నింగె నంగె ఎచ్చెక? హాతి నీ డొక్రిని ముహ్ము" ఇచ్చెసి. 16 అబ్రాహాము ఎప్రోను వెస్తి హాడ్డ వెచ్చెసి. హేతు మీర్క వెన్నిలెహెఁ ఎప్రోను వెస్తి దర్రతక్కిఎ తూంకొమి సొమన సారి వంజ తులొమిక వెండితి అబ్రాహాము తూప్కి కిహఁ హిత్తెసి. 17 ఏ సొమన మమ్రే టొటొతెఎ మన్ని మక్పేలాత మన్ని ఎప్రోను సొబయఁ, ఎంబఅఁ మన్ని పావు, ఏ సొబయఁ హద్దుత మన్ని మార్కవ, 18 ఏ నాయుఁత హన్నరి బర్రెజాణ నోకిత హేతు బేలితరి నోకిత అబ్రాహాముకి సొంతె ఆతె. 19 ఏ డాయు అబ్రాహాము కనాను దేసత హెబ్రోను ఇన్ని హాట్టిని మమ్రే టొటొత మన్ని మక్పేలా సొబయఁ పావుత తని డొక్రి సారాని ముస్తెసి. 20 ఏ సొమన ఏ సొబాఁణి, ఎంబఅఁ మన్ని పావుతి మహ్ణియఁ మండ తక్కి అబ్రాహాముకి హేతు బేలితరి హీతకి ఏవి ఏవణి సొంతె ఆతు.