João 5

బెతెస్త బందత సుస్తొఆనయి

1 ఏదఅఁదేచొ యూదుయఁ పర్బు రొండి వాతకి, జీసు యెరుసలేముత హచ్చెసి. 2 యెరుసలేము గొర్రియఁ దువ్వెరి దరి, హెబ్రు బాసతొల్లె బేతెస్త ఇన్ని రో బంద మన్నె, ఎంబఅఁ పాసగొట్ట సమ్‌దయఁ మన్ను. 3 ఏదఅఁతక్కి ఏ సందయఁ డోఇ రోగొగట్టరి, కాణయఁ సొట్టయఁ కెస్కకొడయఁ అట్కితరి మందయఁ రిహమచ్చెరి. 4 ఏ బేలత మహపురు దూతొ బందత రెచ్చాఁ ఏయుణి వీట్నె, ఏయు వీడిని దేచ్చొ, తొలిఎ అంబఅఁసి రెఎనెసి ఏవసి ఏనిలెతి రోగొగట్టసి ఇచ్చివ నెహిఁఆనెసి.*5:4 ఈ హాడ్డ కొచ్చెక తాణ రాస్కిఆహలెఎ 5 ఎంబఅఁ కోడెఅట్రొ బర్సటి రోగొగట్టి రో మణిసి మచ్చెసి. 6 జీసు ఏవణఇఁ సినికిహాఁ ఏవసి ఎంబఅఁ గడ్డుదిన్నటి మన్నెసి ఇంజిహిఁ పుంజహఁ, ఏవణఇఁ ఇల్లెకీఁ ఇచ్చెసి నీను నెహిఁఅపెఎఁ ఇంజిహిఁ ఒణ్పిమంజికి? ఇంజిహిఁ వెచ్చెసి.

7 ఏ రోగొ గట్టసి ఆబ, ఏయు వీడితిసరి నన్నఅఁ బందత రేప్హనసి అంబఅసివ హిలొఒసి ఏదఅఁతక్కి నాను రేఇని బేలత ఒరొఒసి నాకిహాఁ తొలిఎ రేచ్చిమనెసి ఇంజిహిఁ ఏవణఇఁ వెస్తెసి.

8 జీసు ఎలెఇచ్చెసి "నీను నింగహఁ నీ సాప అస్సహఁ తాకము" ఇంజిహిఁ ఏవణఇఁ వెస్తెసి. 9 దేచ్చొఎ ఏవసి నెహిఁఆహఁ తన్ని సాప అస్సహఁ తాకితెసి.

ఏ దిన్న జోమిని దిన్న.