1 ఈది మహపురు కబ్రు. ఇస్రయేలు లోకుతి పాయిఁ వాతి యెహోవ బోలు. హాగుయఁని బర్రె కిహఁ, బూమితి కంద మెత్హఁ, ఈవణి తాణ జీవుఆత్మ ఆవిజీతసి యెహోవ. 2 ఏవసి వెస్సీమన్నయి ఏనయి ఇచ్చిహిఁ "నాను యెరుసలేము సుట్టు మన్ని బర్రె లోకు బర్రెతక్కి మత్తు కిన్ని సిప్పలెహెఁ జాతి ఆనిలెహెఁ కీఇఁ. సెత్రుయ యెరుసలేము, యూదా దేసతి జికెల ముచ్చితిహిఁ. 3 బూమి లెక్కొ మన్ని వేరెతి దేసయఁ బర్రె యెరుసలేముత నప్పఅరేటు కూడ్డఆను. ఏ బేలత నాను యెరుసలేము బర్రె దేసతి లోకుతక్కి బరువుఆతి వల్లిలెహెఁ కీఇఁ, ఏదఅఁతి పిట్టొకియ్యలివల్లె ఇంజిహిఁ సినికినరి బర్రెజాణ గాఁహయఁఆనెరి." 4 ఈదిఎ యెహోవ బోలు. "ఏ దిన్నత నాను గుర్రొమిక బర్రెతక్కి అజ్జికిఇఁ, గుర్రొమి డక్నరకి వెర్రి ఆవికిఇఁ. యూదాతరి లెక్కొ ఇచ్చఆహఁ, వేరెతి లోకు గుర్రొమిక బర్రెతతి కాణ కీఇఁ." 5 ఎచ్చెటిఎ యెరుసలేముత మన్ని హుక్కొమిగట్టరి, ఎంబఅఁ బత్కినెరి "మహపురుఆతి యెహోవఇఁ నమ్మలెఎ మహపురు మంగె తోడు మన్నెసి" ఇంజిహిఁ తమ్మి మణుసుత వెస్పిఆనెరి. 6 ఏ దిన్నత నాను యూదా హుక్కొమిగట్టరఇఁ వెస్క డోఇ గుద్వ కీఇఁ, అర్న డోఇ బొద్దు ఇట్టిఇఁ, ఏవరి సారిగుట దిక్కుటి మన్ని లోకు బర్రెతి హూడ్డిఇఁ. యెరుసలేము ఎంబఅఁ బత్కినెరి తమ్మి సొంతె టాంగాణ నెహిఁకి డొయ్యినెరి. 7 తొల్లిఎ యెహోవ యూదా బస్సటాంగాణి జీణకిన్నెసి. దావీదు కుట్మతరివ, యెరుసలేము లోకు తంగొకి వాతి మహిమ బకిటి యూదాతరఇఁ గౌరొమికీనిలెహెఁ ఏవసి ఇల్లెకి కిత్తెసి. 8 ఏ బేలత యెహోవ యెరుసలేము బత్కి మన్నరఇఁ జీణకిన్నెసి. ఏవరితాణ బల్లొమిహిల్లఅగట్టరి దావీదులెహెఁ తరిలెహెఁ, దావీదు బేలితరి మహపురు లెహెఁతరిలెహెఁ, లోకు నోకిత యెహోవ మహపురు దూతొయఁ లెహెఁతరిఆహఁ మఁణ్బెనెరి. 9 ఏ కాలత యెరుసలేము లెక్కొ జుజ్జొతక్కి వాహఁ వేరెతి దేసయఁతి బర్రెజాణతి నొస్టొ కియ్యలితక్కి నాను తెయరఆహఁ మఇని

10 ఎచ్చెటిఎ దావీదు బేలితరి లెక్కొ యెరుసలేముత మన్ని లోకుతి లెక్కొ కర్మతోఁఇ సుద్దుజీవు కోసొమి వెన్ని సుద్దుజీవుతి నాను సుద్దు జీవుతి పండిఇఁ. తాంబు కుత్తతివ నన్నఅఁ ఏవరి కణ్కతొల్లె మెహ్నెరి. రొఒసి తని రొండిఎ రో మీరెఎసి హాతిహిఁ లెహెఁ దుక్కుఆనిలెహెఁ, తని తొల్లితి మీరెఎసి హాతిహిఁ లెహెఁ రొఒసి డీతిలెహెఁ ఏవణి పాయిఁ దుక్కుతొల్లె బాదఆనెరి. 11 మెగిద్దో కొర్నుత *హదదిమ్మోను దరి ఆతి డీనయిలెహెఁ ఏ దిన్నత యెరుసలేముత హారెఎ గట్టిడీనయి ఆనె. 12 దేసతి లోకుస బర్రెజాణ ఏ బేలితక్కి ఏ బేలితరిలెహెఁ డీనెరి. దావీదు బేలితరి ప్రెతెకొమిలెహెఁ, ఏవరి డొక్రియఁ ప్రెతెకొమి డీనెరి. నాతాను బేలితరి ప్రెతెకొమి, ఏవరి డొక్రియఁ ప్రెతెకొమి డీనెరి. 13 లేవి బేలితరి ప్రెతెకొమి, ఏవరి డొక్రియఁ ప్రెతెకొమి, సిమీ బేలితరి ప్రెతెకొమి, ఏవరి డొక్రియఁ ప్రెతెకొమి డీనెరి. 14 హారితి బర్రె బేలితరి ప్రెతెకొమి, ఏవరి డొక్రియఁ ప్రెతెకొమి డీనెరి.