లూకా 10

నెహిఁ సమరయుడ పుస్పొని

25 రో నేచు నియొమిసాస్తురి జాప్హిని రొఒసి నింగహఁ, జీసుఇఁ తయిపరి కిహిఁ. జాప్నతి, "నాను కాలెఎతక్కి మన్ని జీవు బెట్ట అయ్యలితక్కి ఏనఅఁ కియలివలె?" ఇంజిహిఁ ఏవణఇఁ వెచ్చెసి.

26 ఏదఅఁతక్కి ఏవసి ఇల్లెకీఁ ఇచ్చెసి, నియోమిస్తురిత ఏనఅఁ ఇంజిహిఁ రాస్కిఆహఁ మన్నె? నీను ఏదఅఁతి ఏన్నికిఁ అర్దొమి కిహకొడితి ఇంజిహిఁ వెచ్చెసి.

27 ఎచ్చెటిఎ ఏవసి, "నీ మహపురు ఆతి ప్రెబుఇఁ నీ హిఁయఁతొల్లె, నీ మణుసుతొల్లె, నీ పూర్తి సక్తితొల్లె, నీ తెల్వితొల్లె, జీవునోతిదెహెఁ ఓడె నింగె నీను ఏనికి జీవునోహ కొడాంజినొ ఎల్లెకిఎ నీ టొట్టొతణఇఁ జీవునోతిదెఁ" ఇంజిహిఁ ఇచ్చెసి.

28 ఏవసి నీను నెహిఁకి వెస్తతి "ఎల్లె కిమ్ము ఎచ్చెటిఎ నీను బతికిది." ఇంజిహిఁ ఏవణఇ వెస్తెసి.

29 ఏవసి తాను నీతిగట్టతెఎఁ ఇంజిహిఁ వెస్పికిహ కొడ్డలితక్కి ఇంజిహిఁ హఒ సమ్మ నా టొట్టొతసి ఎంబఅసి, ఇంజిహిఁ జీసుఇఁ వెచ్చెసి.

30 ఇంజహఁ జీసు ఏవణఇఁ ఇల్లె వెస్తెసి. రో మణిసి యెరుసలేముటి యెరికొ గాడత హజ్జిహిఁచెసి, ఎచ్చెటిఎ డొఙయఁ ఏవణఇఁ అస్సహఁ ఏవరి ఏవణి హెంబొరిక రిక్హకొడ్డహఁ ఏవణఇఁ ఇర్హఁ, ఇచ్చాణి జీవుతొల్లె పిస్సహఁ హచ్చెరి. 31 ఎచ్చెటిఎ రో కజ్జ పూజెర ఏ జియుటి హజ్జిహిఁ ఏవణఇఁ మెస్సహఁ టొటొబకిటి హచ్చెసి. 32 ఎల్లెకిఁఎ రో లేవి ఇన్నసి ఎల్లెఎఁకి హజ్జిమచ్చెసి ఏవణఇఁ మెస్సహఁ టొట్టొబకిటిఎ హచ్చెసి. 33 ఇచ్చిహిఁ రో సమరయతసి ఏ జియుటి హజ్జి మచ్చటి, ఏవసి రీహఁ మన్నిటాయుతకి వాతెసి. ఎచ్చెటిఎ ఏవణి మెస్సహఁ కర్మ మెస్తెసి, 34 ఏవణి దరి హజ్జహఁ ఏవణి గాయఁణ నియుఁ ద్రాక్సరస్స రుబ్బహఁ కట్టుయఁ దొస్తెసి, ఇంజహఁ ఏవణఇఁ తన్ని గాడిముహెఁ హోప్హ రో బస్సకీనిటాయుత ఓహ, ఏవణఇఁ నెహిఁకి సక్కతకిత్తెసి. 35 ఓరొ నేచు ఏవసి ఏ అద్దె గుమస్తకి జోడెక వంజ టక్కయఁ హీహఁ, ఈవణఇఁ నెహిఁకి హేరికిము, నీను ఓడె ఏనఅపట్టెఎ కర్చు కిత్తిసరి నాను వెండె వానటి ఏవఅఁ నింగె హియ్యఇఁ ఇంజిహిఁ ఏవణఇఁ వెస్స హచ్చెసి.

36 ఇంజహఁ ఈ తీనిజాణ డొఙయఁ కెయ్యుత హెర్విఆతనకి ఎట్కతసి అంబఅసి ఇంజిహిఁ నీను తెల్హితి ఇంజిహిఁ ఏవణఇఁ వెచ్చెసి.

37 ఏదఅఁతక్కి నియొమిసాస్తురి వెహ్నసి ఇల్లె ఇచ్చెసి, "ఏవణి ముహెఁ కర్మఆతసిఎ ఇచ్చెసి." ఎచ్చెటిఎ జీసు నీనువ హజ్జహఁ ఎల్లెఎ కిమ్ము ఇంజిహిఁ ఏవణఇఁ వెస్తెసి.