1 ఎచ్చెటిఎ ఏవరి బర్రెజాణ నింగహఁ జీసుఇఁ పొంతి పిలాతుతాణ ఓహిఁ హచ్చెరి. 2 "ఈవసి మా లోకుణి పాణగటరఇఁ ఓజఅరేటు కివికిహిని లెహెఁకి ఒణ్పిఁకిహిఁ కైసరుకి సిస్తు హిఅదు నానుఎ క్రీస్తు రో రజ్జ తెఎఁ ఇంజినెసి" ఇంజిహిఁ ఏవణి ముహెఁ నింద గెట్హలి మాట్హెరి.

3 పొంతి పిలాతు, ఏవణఇఁ "నీను యూదాయఁకి రజ్జతికి?" ఇంజిహిఁ వెంజలిఎ

నీను ఇచ్చిలెహెఁకిఎ ఇంజిహిఁ జీసు ఏవణఇఁ వెస్తెసి.

4 పొంతి పిలాతు కజ్జపూజెరంగాణి, జన్న లోకూణి, ఈ మణసితాణటి నంగె ఏని నిందవ తోంజఆహి మంజెఎ

5 ఇంజహఁ ఏవరి, ఈవసి గలిలయ రాజిటిఎ అస్సహఁ నీఎఁ పత్తెక యూదాయఁ రాజి బర్రె వెస్సీహిఁ లోకూణి తిరివికినెసి ఇంజిహిఁ ఓడె హారెఎ వెస్తెరి.

6 పొంతి పిలాతు ఈ కత్తయఁ వెంజహఁ, ఈ మణిసి గలిలయ తసిఇకి? ఇంజిహిఁ వెచ్చెసి. 7 జీసు హేరోదు హుక్కొమి రాజితక్కి హెలితసి ఇంజిహిఁ పిలాతు పుంజహఁ, హేరోదు తాణ పండితెసి. హేరోదు ఏ దిన్నాణ యెరుసలేముత మచ్చెసి. 8 హేరోదు జీసుఇఁ మెస్సహఁ హారెఎ రాఁహఁ ఆతెసి. ఏవణి పాయిఁ హారెఎ కత్తయఁ వెంజలితక్కి ఏవసి ఎన్నఅఁ పట్టెఎ రో కబ్బగట్టి కమ్మ కిత్తిసరి సినికియలి హారెఎ కాలొమిటి ఏవణఇఁ మెస్సలి హారెఎ ఆస ఆహఁ మచ్చెసి. 9 జీసుఇఁ మెస్సహఁ హారెఎ కొస్నియఁ మెత్హెసి. జీసు ఏవణఇఁ ఏన్నఅఁవ వెహఅతెసి. 10 కజ్జపూజెరంగ నియొమిసాస్తురి జాప్నరి నిచ్చహఁ జీసు ముహెఁ కజ్జ నింద గేట్హెరి. 11 హేరోదు తన్ని కోస్కతొల్లె, కల్హఁ ఏవణఇఁ ఊణ మెస్సహఁ లజ్జ కిహఁ ఏవణఇఁ దరగటి లాబొ హెంబొరి తురివి కిహఁ పొంతి పిలాతు తాణెఎ ఓడె వెండె పండితెసి. 12 తొల్లి హేరోదుఎ, పొంతి పిలాతుఎ పగ్గగట్టసి దొస్పిఆహఁ మచ్చెరి. ఏ నేచుటిఎ ఏవరి తోణెయఁ ఆతెరి.

13 ఎచ్చెటిఎ పొంతి పిలాతు కజ్జ పూజెరంగాణి పగ్గగట్టరఇఁ జన్నలోకూణి హాటికితెసి. 14 మా ముహెఁ తిరివి కినిలెహెఁకి ఒణ్పికిత్తెసి ఇంజహఁ మీరు హేరోదు తాణ తత్తెరి సినికిద్దు నాను మీ నోకితెఎ వెచ్చెఎఁ, సమ్మ మీరు ఈవణి ముహెఁ గెట్హి నిందయఁ రొండివ నంగె తోంజఅయఆతు. 15 సినికిద్దు ఈవసి హయలితకి పాడఆతి ఏని దొహొవ హేరోదుకి తోంజఆఅతె. ఓడె వెండె మా తాణెఎ పండతెసి. 16 ఇంజహఁ నాను ఈవణఇఁ డొండొ కివికిహఁ పిఇఁ ఇంజిహిఁ ఏవరఇఁ వెస్తెసి. 17 పస్కాపర్బుత పిలాతు లోకు కోసొమి జేలిత తుండితరఇఁ రొఒణిలక పిస్సలి మీర్హచెసి.*

18 ఇంజహఁ ఏవరి బర్రెజాణ ఈవణఇఁ పాయహఁ మంగె బరబ్బఇఁ పిహ్ము, ఇంజిహిఁ రొక్కటిఎ ఆహఁ కిల్లెడి కిత్తెరి. 19 ఈ బరబ్బ ఏ గాడత గొడ్బ, ఆతి బదులి ఓడె లోకుతి పాయితి బదులి జేలిత మచ్చెసి,

20 పొంతి పిలాతు జీసుఇఁ పిస్సలి ఇంజిహిఁ ఒణ్పహఁ ఏవరఇఁ ఓడె జోలితెసి. 21 సమ్మ ఏవరి "ఈవణి సిలువత వేము" ఇంజిహిఁ కిల్లెడికిత్తెరి.

22 పిలాతు తీనిబేడ ఏవరఇఁ "ఎన్నఅకి? ఈవసి ఏని లగ్గెఎతి కమ్మ కిత్తెసి? ఈవసి హయ్యలితకి ఈవణి తాణ నంగె ఏని దోహొవ నంగె తోంజఅయతె. ఇంజహఁ డొండొ కివికిహఁ పిఇఁ" ఇచ్చెసి.

23 ఏవరి రొక్కొటిఎ ఆహఁ గట్టి కిల్లెడికీహిఁ సిలువత వేము ఇంజిహిఁ వెస్సలిఎ. ఏవరి కిల్లెడికెఎ గెల్తు. 24 ఇంజహఁ ఏవరి రీస్తిలెహెఁకిఎ పొంతి పిలాతు జీసుఇఁ బిచ్చరకిహఁ. 25 గొడ్బయఁ బదులి లోకుతి పాయితి బదులి జేలిత మెత్హఁచనఇఁ ఏవరకి పిస్సహఁ జీసుఇఁ తాంబు ఇచ్చఆని లెహెఁకి హెర్పితెసి.

26 ఏవరి జీసుఇఁ ఓహిఁ హజిఁచటి కురేనియ నాయుఁతి సీమోను ఇన్ని రొఒణఇఁ అస్సహఁ, జీసు జేతొ సిలువతి ఒయలితకి డేకికీతెరి.

27 హారెఎ జన్నలోకు ఏవణి జేతొ హచ్చెరి ఏవణి తాణటి ఇయ్యస్క బొక్కొ వేచకొడిహిఁ దుక్కుఆహిఁ మచ్చు. 28 జీసు ఏవస్క బకి తిరవహఁ యెరుసలేముతి మాస్కతెరి, నా పాయిఁ డిఅదు, మీ పాయిఁ, మీ కొక్కరి పోదయఁ పాయిఁ డీదు. 29 సినికిదు, బాంజెణిస్క, పాలు ఉటఅ తల్లిస్క, కొర్మొగట్టఇ ఇంజిహిఁ వెహ్నిదిన్నయఁ వాహిఁమన్ను. 30 ఎచ్చెటిఎ లోకు హోర్కణి మా ముహెఁ రియదు ఇంజిహిఁ మెట్టాణి మమ్మఅఁ ప్డీక్హదు ఇంజిహిఁ వెస్సలి మాట్నెరి. 31 ఇంజహఁ హీలి మార్నుతిఎ ఇల్లెకీఁ ఇచ్చె వాయితి ఏదని ఏనిఎ కినెరికి ఇంజిహిఁ వెస్తెసి.

32 ఓడె రీఅరఇఁ ఏవణితొల్లె పాయలితక్కి తత్తెరి, ఏవరి దోహొ కిత్తెరి. 33 ఏవరి కపాల ఇన్ని టాయుత వయ్యలిఎ ఏ దోహొ కిత్తరఇఁ ఎంబఅఁ ఏవణితొల్లె ఏవణఇఁ టిఇని పాడియ, ఒరొఒణఇఁ టెబ్రి పాడియ సిలువత వేతెరి. 34 ఎచ్చెటిఎ జీసు, "తంజి, ఈవరి ఏనఅఁ కిహిమన్నెరికి తాంబు పుంజలొఒరి, ఇంజహఁ ఈవరఇఁ కెమాకీము" ఇంజిహిఁ జీసు వెస్తెసి.

ఏవణి హెంబొరికాణి బాటి కిహఁ కొడలితకి సీటియఁ మెత్హెరి. 35 లోకు ఎంబఅఁ నిచ్చహఁ సినికిమచ్చెరి. ఈవసి ఎట్కతరఇఁ గెల్పితసి. మహపురు ఎర్సకొడితి క్రీస్తు ఇచ్చిహిఁ తంగొతకి తానుఎ జీణకిహకొడినసి ఇంజిహిఁ పాణగట్టరి ఏవణఇఁ లజ్జకీతెరి.

36 రేటుఎ కోస్క ఏవణి దరి వాహఁ పుల్లఆతి ద్రాక్సరస్స ఊట్హఁ 37 నీను యూదుయఁకి రజ్జతి ఇచ్చిహిఁ నింగెతక్కి నీనుఎ జీణఆము ఇంజిహిఁ ఏవణఇఁ లజ్జకీతెరి.

38 "ఈవసి యూదుయఁకి రజ్జ" ఇంజిహిఁ బల్లెత రాచ్చహఁ ఏవణి లెక్కొటి లెత్తెరి.

39 సిలువత వేచ్చాఁచి దోహొ కిత్తి ఏ రిఅరి తాణటి రొఒసి ఏవణఇఁ దుసొవిఆహిఁ, నీను క్రీస్తుతి ఇచ్చిహిఁ నీనుతకి నీను గెల్పకొడహఁ మమ్మఅఁవ జీణకియ్యము ఇచ్చెరి.

40 సమ్మ రొఒసి ఏవణఇఁ లాగహఁ నీనువ ఎల్లెతి డొండొతెఎ మంజిమ ఇంజహఁ మహపురుఇఁ అజ్జొఒదికి? 41 మంగె ఇచ్చిహిఁ ఇది నయ్యొమిఎ మారొ కిత్తణితక్కి బదులి డొండొ ఆహినయి. ఈవసి ఏని దోహొ కిహఁ హిల్లొఒసి ఇంజిహిఁ వెస్తెసి. 42 ఏవసి జీసుఇఁ సినికిహఁ, ప్రెబు నాను నీ రాజిత వానటి నన్నఅఁ ఒణ్పము ఇచ్చెసి.

43 ఇంజహఁ జీసు ఏవణఇఁ, "నీంజు నీనువ నాతొల్లె లెక్కొపురు రాజిత మంజి ఇంజిహిఁ సొత్తొఎ వెస్సీంజఇఁ" ఇచ్చెసి.

44 ఏ బేలత ఇంచుమించు మద్దెణ త్రాయుఁ వేడ ఆహమచ్చె. ఎంబటిఎ అస్సహఁ తీని గంట పత్తెక ఏ దేస బర్రె అందెరి ఆతె. 45 వేడ తోంజ ఆఅతె. మహపురు గుడి బిత్ర మచ్చి తుము లెక్కొటిఎ డోఇ పత్తెక జోడెక బాగయఁ ఆహిఁ గెంజితె. 46 ఎచ్చెటిఎ జీసు గట్టి కిల్లెడికీహఁ ఇల్లెకీఁ ఇచ్చెసి, "తంజి, నీ కెయ్యుత నా జీవుతి హెర్పింజఇఁ" ఇచ్చెసి. ఏవసి ఇల్లెకీఁ ఇంజహిఁ వెస్సహఁ జీవు పిస్తెసి.

47 వంజ కోస్కతక్కి కజ్జసి ఆతని మెస్సహఁ, "ఈ మణిసి అస్సులెఎ నీతిగట్టసి" ఆహఁ మచ్చెసి. ఇంజహఁ మహపురుఇఁ గౌరొమి కిత్తెసి.

48 సినికియలి కూడ ఆహఁ వాహమచ్చి లోకు బర్రెజాణ ఎంబఅఁ ఆతి కమ్మయఁ మెస్సహఁ దుక్కుతొల్లె బొక్కొత వేచకొడిహిఁ వెండె హచ్చెరి. 49 సమ్మ ఏవణఇఁ నెల్వగట్టరి, గలిలయటి ఏవణి జేచ్చొవాతి ఇయ్యస్క హెక్కొ నిచ్చహఁ ఇవఅఁ సినికిహిఁచు.

50 యూదుయ రాజిత మన్ని అరిమతయి ఇన్ని రో గాడతక్కి హెలితసి యోసేపు ఇన్ని రొఒసి మచ్చెసి. ఏవసి నెహిఁ గట్టసి, నీతిగటసి ఆహఁ. 51 కజ్జరి ఒణ్పిని ఒణ్పూణి కమ్మాణి ఓపఅణ మహపురు రాజితి బదులి సినికిహిఁ మచ్చెసి. 52 ఏవసి పొంతి పిలాతు తాణ హజ్జహఁ జీసు అంగతి రీస్సహఁ 53 ఏదని డోకి రేప్హఁ నెహిఁ హెంబొరికతొల్లె సుట్టహఁ రో వల్లిత పొత్హి మహ్ణియఁమండత ఇట్టితెసి. ఎంబఅఁ తొల్లి ఎచ్చెలవ అంబరఇఁవ ఇట్టలఅతెరి. 54 ఏ దిన్న జోమిని దిన్నతక్కి తెయర ఆని దిన్న.

55 ఎచ్చెటిఎ గలిలయటి జీసు తొల్లె వాతి ఇయ్యస్క యోసేపు జేచ్చొ హజ్జహఁ మహ్ణియఁమండత జీసు అంగతి ఏన్నికి ఇట్టానెసి ఇంజిహిఁ సినికితు. 56 ఎచ్చెటిఎ వెండె హజ్జహఁ ఆతరు గందగట్టి నియుఁ హల్లెహెఁ తెయరకితు. సమ్మ మహపురు హెల్లొ లెహెఁకిఎ జోమిని దిన్నత జొమితు.