Lucas 24

హెమ్మె నాయుఁతక్కి జియ్యు

13 ఏ దిన్నతెఎ రిఅరి సిసుయఁ యెరుసలేముటిఎ సాత మయిలి హెక్కొ మన్ని ఎమ్మాయిస్ ఇన్ని రో నాయుఁత హజ్జహఁ. 14 ఆతి ఈ కమ్మయఁ పాయిఁ రొఒణితొల్లె రొఒసి వెస్పిఆహి మచ్చెరి. 15 ఏవరి వెస్పిఆహిఁ ఒణ్పిసటి జీసు తానుఎ ఏవరి దరి వాహఁ ఏవరితొల్లె కల్హఁ ఏవరితొల్లె తాకితెసి. 16 సమ్మ ఏవరి ఏవణఇఁ పోల్హలి ఆడఅరేటు ఏవరి కణ్క దుందర ఆతు. 17 ఇంజహఁ జీసు ఇల్లెకీఁ ఇచ్చెసి,

"మీరు తాకిహిఁ రొఒణితొల్లె రొఒతెరి జోల్కిఆహిని ఈ కత్త ఏన్నయి?" ఇంజిహిఁ వెంజలిఎ 18 ఏవరి తాణటి క్లెయొప ఇన్ని దోరు గట్టసి, ఏవణఇఁ ఏ దిన్నన యెరుసలేముత ఆతఅఁ ఎంబఅఁ బస్స మచ్చివ, పున్నఅఁతి నీను రొఒతెఎఁకి ఇంజిహిఁ వెచ్చెసి.

19 "ఏవి ఏన్నఅఁ?" ఇంజిహిఁ ఏవరఇఁ వెంజలిఎ. ఏవరి

"నజరేతుతి జీసు పాయిఁ తఇఎ. ఏవసి మహపురు నోకితవ కమ్మటి కత్తటి సత్తువగట్టి ప్రవక్త ఆహఁ మచ్చెసి. 20 మా కజ్జ పూజెరంగ, పాణగట్టరి ఏవణఇఁ ఎన్నఅఁకి పాయలితక్కి హెర్పహఁ ఏవణఇఁ సిలువత వేపికితెరినొ నీను పుంజహిలొఒదికి? 21 ఇస్రయేలుని గెల్పలి ఆడినసి ఈవసిఎ ఇంజిహిఁ ఏదిఎ ఆఅన ఈవి ఆహఁ నీంజు తన్నితొల్లె తీనిదిన్న ఆహనె. 22 నీంజు మా తాణటి కొచ్చెక జాణ ఇయ్యస్క వేయలిఎ రేటుఎ మహ్ణియఁమండత హజ్జహఁ ఏవణి అంగతి మెహఁతు. 23 ఏవి వెండె వాహఁ కొచ్చెకజాణ మహపురు దూతొయఁ తోంజఆహఁ, ఏవసి అంగతొల్లె వెండె నింగితెసి ఇంజిహిఁ వెస్తెరి. ఇంజిహిఁ మమ్మఅఁ వెస్సహఁ కబ్బ కియ్యతు. 24 మా తొల్లె మన్నరి తాణటి కొచ్చెకజాణ మహ్ణియఁమండత హజ్జహఁ సినికితెరి సమ్మ ఏ ఇయ్యస్క వెస్తి లెహెఁకిఎ మెహఁతెరి" ఇంజిహిఁ ఏవణఇఁ వెస్తెరి.

25 ఏదఅఁతక్కి జీసు, ఇల్లెకీఁ ఇచ్చెసి "తెల్వి హిల్లగట్టతెరి, ప్రవక్తయఁ వెస్తి బర్రె హడ్డాణి నమ్మఅఁ గట్టతెరి. 26 క్రీస్తు ఇల్లెకీఁ డొండొ ఆహఁ తన్ని మహిమత హన్నయి పిట్టొవి ఆఎమా?" ఇంజిహిఁ ఏవరఇఁ వెస్సహఁ, 27 మోసే పుస్తెకొముటిఎ అస్సహఁ బర్రెజాణ ప్రవక్తయఁ తన్ని పాయిఁ రాచ్చణి మహపురు కత్తతి అర్దొమితి ఏవరకి వెస్తెసి.

28 ఏవరి హజ్జీని నాయుఁ దరి వయ్యలిఎ ఏవసి ఏవరకి రొచ్చెక హెక్కొ హచ్చిలెహెఁ తోంజఆతెసి. 29 ఇంజహఁ ఏవరి మ్ణిఒల ఆహినె వేడ మెద్దితె మా తొల్లె మన్నము ఇంజిహిఁ ఏవణఇఁ బతిమాలితెరి. ఇంజహఁ ఏవరితొల్లె మంజలి బిత్రహచ్చెసి. 30 ఏవసి ఏవరితొల్లె రాంద తక్కి కుగ్గాఁచటి రో రొట్టె పెర్హకొడహఁ జొహొరకిహఁ ఏవరకి బాటికిహఁ హిత్తెసి. 31 ఎచ్చెటిఎ ఏవరి కణ్కటి దుంద్ర హజ్జలిఎ ఏవణఇఁ పుంజలి ఆడితెరి. సమ్మ రేటుఎ ఏవసి ఏవరకి తోంజ ఆఅతెసి. 32 ఇంజహఁ ఏవరి ఏవసి జియ్యుత మా తొల్లె జోలిహి మహపురు పుస్తెకొముతి కత్తాణి మంగె జాప్హిఁజతటి మా హిఁయఁయఁ మా తాణ కాడ్డలఆతుకి? ఇంజిహిఁ రొఒణితొల్లె రొఒసి వెస్పిఆతెరి.

33 రేటుఎ ఏవరి ఎంబటిఎ నింగహఁ యెరుసలేముత వెండె హజ్జలిఎ ఎగొర జాణ సిసుయఁ ఏవరితొల్లె కల్హఁమంజహఁ, 34 అస్సులిఎ ప్రెబు హాకిటి జీవుతొల్లె నింగితెసి ఇంజాఁ సీమోనుకి తోంజఆతెసి. ఇంజిహిఁ ఏవరి వెస్పిఆహిమచ్చెరి.

35 ఏవరి ఇద్దఅఁ వెంజహఁ ఏవసి రొట్టెడిక్హటి తాంబు ఏనికిఁ పుచ్చెరినొ. ఎద్దఅఁవ వెస్తెరి.