హోసెయ 9

హోసెయఁ ఇస్రయేలుతరకి వాని డొండొ పాయిఁ వేక్నయి

1 ఇస్రయేలు, యూదుయఁఆఅతరి రాఁహఁఆనిలెహెఁ నీను రాఁహఁఆఅని. నీను నీ మహపురుఇఁ ఒప్పఅన నమ్మికీహఁ నాడికీతి. నీ క్డాను బర్రెతి లెక్కొ మన్ని కూలియని బకిటి నీను దారిగట్టణకి హీని మాములి కోరితి. 2 క్డానుయఁ గాని ద్రాక్సక్డాను గాని ఏవరకి ఒండ హీఒ. పూని ద్రాక్సరస్స మఁణ్బెఎ. 3 ఏవరి యెహోవ దేసత మన్నొఒరి. ఎప్రాయిముతరి ఐగుప్తుత వెండె హన్నెరి. అస్సూరు దేసత ఏవరి లగ్గెఎతిఆతఅతి తిన్నెరి. 4 యెహోవకి ద్రాక్సరస్స ఎంబఅఁ హీఒరి. ఏవరి హీనఅ ఏవణకి ఇచ్చ హిల్లెఎ. ఏవరి రాందతి కొడ్డినయి డీనరి రాందలెహెఁ మన్నె. ఏదణితి తిన్ని బర్రెజాణ లగ్గెఎతరిఆదెరి. ఏవరి రాంద ఏవరకి సరిఆనె. ఏది యెహోవ గుడిత వాఎ. 5 నియొమికీతి పర్బూణ, యెహోవ పర్బు దిన్నాణ మీరు ఏనఅకీదెరి? 6 సినికిద్దు, ఏవరి నొస్టొ పిట్టొవికిహఁకొడ్డితిహిఁ. ఐగుప్తుదేసతరకి కూడ్డిఆని టాయులెహెఁ మఁణ్బినె. మెంపిసు గాడతరకి మహ్ణియమండ బూమిలెహెఁ మఁణ్బినె. ఏవరి దరఆతి వెండి హర్కూణి టూడయఁ మొక్కొయఁ బుడ్ను. హాప్కుదుప్ప ఏవరి బస్స టాయుత పడ్డఆహినె. 7 డొండొ దిన్నయఁ వాహిమన్ను. పగ్గ దిన్నయఁ వాతు. "ప్రవక్తయఁ బుద్దిహిల్లగట్టరి, జీవు బకిటి జోలినరి బయ్యగట్టరి" లోకు హారెఎ దోహొ, ఏవరి హీతి హారెఎ సెత్రువు బకిటి ఇస్రయేలుతరి ఈది పుంజకొడ్డినెరి. 8 నా మహపురు తాణ మన్ని ప్రవక్త ఎప్రాయిముకి కాపుగట్టసి. ఏవరి జీంగ బర్రెతాణ పొట్టయఁకి ఇట్టిని ఉర్క మన్ను. మహపురు గుడిత ఏవరి లెక్కొ పగ్గమన్నె. 9 గిబియా దిన్నయఁ లెహెఁ ఏవరి హారెఎ ముర్కొగట్టరిఆతెరి. యెహోవ ఏవరి దోహొయఁ గుర్తు కీహకొడ్డినెసి. ఏవరి పాపుతక్కి ఏవసి ఏవరఇఁ డొండొ కిన్నెసి.

ఇస్రయేలు పాపుతక్కి డొండొ

10 యెహోవ మహపురు ఇల్లెకి ఇంజినెసి. "పాడుజాడత ద్రాక్సపట్క ప్ణానిలెహెఁ ఇస్రయేలుతరఇఁ నాను బెట్టఆతెఎ. గోవేడి కాలత అంజుర మార్ను లెక్కొ తొల్లి బెట్టానిలెహెఁ మీ అక్కుయఁ నాను బెట్టాతెఎ. ఇంజహఁ ఏవరి పెయోరు కజ్జహోరు లెక్కొ మన్ని బయలు పేణు దరి హచ్చెరి. ఏ లజ్జగట్టి మహపురుఇఁ తాంబు హెర్పిఆతెరి. తాంబు ఇచ్చఆహఁ పేణ్కబొమ్మయఁలెహెఁ ఏవరివ లజ్జఆతెరి." 11 ఎప్రాయిము కత్త వాతిహిఁ ఏవరి గౌరొమి పొట్టలెహెఁ ఊంబినె. ఏవరకి కొక్కరిపోదయఁ ప్ణాఒరి, పూరమాసమన్నొఒరి, పూరమాసఆఒరి. 12 ఏవరి తమ్మి కొక్కరిపోదని పోహికిత్తరకి అంబఅరి హారఅరేటు రెఇఁ. నాను ఏవరి తాణటి మూంబు వెండినటి ఆబలెయ, ఏవరకి డొండొ! 13 లోవత ఉహ్హితి తూరు గాడ లెహెఁ మంజలితక్కి. నాను ఎప్రాయిముఇఁ ఎర్సకొడ్డితెఎ. ఇచ్చిహిఁ దానరకి హెర్పలితక్కి ఏది తని కొక్కరిపోదాణి పంగత తచ్చిహిఁ వానె. 14 యెహోవ, ఏవరఇఁ పగ్గఆము. ఏవరకి నీను ఏనఅఁ పగ్గఆతి? ఏవరి ఇయ్యస్కకి పిండొమి గడ్పిని గర్రాయఁని, పాలు హిల్లఅగట్టిలెహెఁ కిమ్ము. 15 గిల్గాలుత ఏవరి కిత్తి పాపొమి బకిటి. ఎంబఅఁ నాను ఏవరకి పగ్గగట్టతెఎఁ ఆతెఎఁ. ఏవరి లగ్గెఎ కమ్మయఁ బకిటి ఏవరఇఁ ఓడె నా గుడిటి పేర్హఁపండిఇఁ. ఏవరఇఁ నీఎఁటి జీవునోఒ. ఏవరి హుక్కొమిగట్టరి బర్రెజాణ వెండెతిర్విమచ్చెరి. 16 ఎప్రాయిము రోగొ ఆతెసి. ఏవరి హీరు వాయహచ్చె. ఏవరి ఆసిర్వాదొమి ప్ణాఒరి. ఏవరి కొక్కరిపోదని పాటివ ఏవరి ఇచ్చఆతి కొక్కరి పోదాఁణి నొస్టొకీఇఁ. 17 ఏవరి నా మహపురు హాడ్డ వెంజల్లొఒరి ఇంజహఁ ఏవసి ఏవరఇఁ ఓపఅతెసి. ఏవరి దేసెతి పిస్సహఁ యూదుయఁఆఅతి ఏవరితాణ నిస్తబడ్డుయఁఆనెరి.