1 ନାନ୍‌ ବାତା ସ୍ୱାଦିନତା ଆୟନ୍‌ ? ନାନ୍‌ ବାତା ଅରନ୍‌ ପ୍ରେରିତ ଆୟନ୍‌ ? ନାନ୍‌ ବାତା ମାନ୍‍ ପ୍ରବୁଙ୍କ୍ ଉଡ଼ିଲେନ୍‌ ? ମିଡ଼୍ ବାତା ପ୍ରବୁନାଗା ମାଡ଼୍‍ତେ ପାଡିୟ୍‌ ଆୟ୍‍ୟ ? 2 ଯଦ୍ୟପି ନାନେ ପ୍ରେରିତ ନଡ଼ାଗାଙ୍କ୍‍ ଆରନ୍‌ ରଅତେନନ୍‌ ଆୟନ୍‌, ମିକା ମିୟାଗ୍‌ ନିଜାମ୍‌ ରଅତେନନ୍‌, ବାତେଙ୍କ୍‍ଇତ୍‍କେ ପ୍ରବୁନାଗ୍ ମିଡ଼୍ ନାୟାଦ୍‌ ରଅତାନଣ୍ଡ୍ ଇଞ୍ଜ ଗ୍ରହନ୍ ମାଡ଼ାଟ୍ ।

3 ନା ସମାଲୋଚକ ନାରୁଡ୍‌କ୍ ନାୟାଦ୍‌ ଇଦ୍ ଉତ୍ତର୍‌ । 4 ତିନ୍ଦାଙ୍କ୍‍ ଉନ୍ଦାଙ୍କ୍ ବାତା ମାୟାଦ୍‌ ଅଦିକାର୍‌ ଇଲ୍‌ଲେ ? 5 ବାଗାତ୍ ସାର୍‍ରେ ପ୍ରେରିତନଡ୍‌, ପ୍ରବୁନ୍‌ ଦାଦାଲର୍‌ ନୁ ଏଲାସ୍କ୍‌ କୈଫାନ୍ ଲେକେତ୍‍ ବିଶ୍ୱାସ୍‌ତାଦ୍‌ ମୁତ୍‍ତେ ପେଣ୍ଡୁଲ୍ ଆସ୍‌ ସାଙ୍ଗେ ପଇସ୍‌ ଉଡ଼ାନଙ୍କ୍‌ ବାତା ମାକିନ୍‌ ଅଦିକାର୍‌ ଇଲ୍ଲା ? 6 କି ବାଦ୍‍କାନଡ଼ାଦ୍ ପାଡ଼ିୟ୍‌ ୱିଡ଼୍‍ସାନଙ୍କ୍ ବାତା ନାୟାଦ୍‌ ନୁ ବର୍ଣ୍ଣବ୍‌ବାନାଦ୍‌ ଅଦିକାର୍‌ ଇଲ୍ଲା ? 7 ବେନନ୍ ନିଜେ କର୍ସତେ ବେସୁଙ୍କ୍‍ ସୈନିକ ବୃତ୍ତି ଇଦ୍‍ତଣ୍ଡ୍‌ ? ବେନନ୍ ଦ୍ରାକ୍ଷାକ୍ଷେତ୍ର ମାଡ଼ି ଆଗାତାୱ୍‌ ପାଣ୍ଡି ତିନନ୍‌ ? ବା ବେନ ପଶୁମାନ୍ଦା ପଡ୍‌ପି ପଶୁନାଦ୍‌ ପାଲ୍‌ ଉନନ୍‌ ?

8 ନାନ୍‌ ନାରୁନ୍‌ତ୍‌ ଇସାବ୍‌ତେ ବାତା ଇୱ୍‌ସାର୍ରେ ମାଟ୍ଟା କେତୁତାନ୍ ? ବ୍ୟବସ୍ଥା ମେଣ୍ଡେ ବାତା ଇୱ୍‌ସାର୍ରେ ମାଟ୍ଟା କେଲ କି ? 9 ✝୯:୯ ୧ ତୀମତି ୫:୧୮.ବାତେଙ୍କ୍‍ ଇତ୍କେ ମୋଶାନ୍‌ ବ୍ୟବସ୍ଥାତେ ଇଲ୍‍ଲେ ଲେକାମିନ୍ଦେ, କଟାମ୍‍ତାଗ୍‌ ଉଡାନ୍ କନ୍ଦେତ୍‌ ମୁଟ୍‌ତାଗ୍‌ ମୁର୍‌ସୁଲ୍‌ ତଅମାଟ୍‌ । ଇଶ୍ୱର୍ ବାତା କନ୍ଦା ବିଷୟ୍‌ତେ ଆଲ୍‌ସିତଣ୍ଡ୍ ? 10 ଅଣ୍ଡ୍‌ ବାତା ମାନ୍‍ ମାଇଦିଙ୍କ୍‌ ଇଦ୍‌ କେଲୋନ୍‌ କି ? ହଁ ମାନ୍‍ ମାଇଦିଙ୍କ୍‌ ଇଦ୍‌ ଲେକ୍‍ତାଦ୍ ମିନ୍ଦେ, ବେଲାକି ବେନନ୍ ଉଡ଼୍‍ଦିତଣ୍ଡ୍, ଆସା କିସ୍‌ ଅର୍‌ ଉଡ଼୍‍ଦା ୱେଇତିତ୍, ମେଣ୍ଡେ ବେନଣ୍ଡ୍ କଟାମ୍ ୱାଟାତଣ୍ଡ୍, ବାଗ୍‌ ଦର୍କାନ୍ ଆଶାତେ ଅନାଦ୍‌ କଟାମ୍ ୱାଟାନ୍ ମିନ୍ଦେ । 11 ✝୯:୧୧ ରୋମୀୟ ୧୫:୨୭.ଯଦି ମାମ୍ ନି ମାଇଦିଙ୍କ୍ ପାରମାର୍ତିକ ୱିଜେ ୱିତି ମିନ୍ଦେମ୍‌, ଆଲେକ୍ ମିୟାଦ୍‌ ଐହିକ କେଡ଼୍ ବାତା ଗୁରୁତ୍‌ ବିଷୟ ? 12 ଯଦି ଅର୍‌ତୁଡ଼ାଗାଙ୍କ୍‍ ମିଡ଼୍‌ କାଇଲ୍‌ତେନଡ଼୍‌ ଆଦ୍‌ତିଡ଼୍‌, ଆଲେକ୍ ମାମ୍ ବାତା ନେକାନାଲ୍‌ର୍ଗେ ଆୟମ୍‌ ? ମିକା ମାମ୍‍ମେ ଆଦ୍‌ ଅଦିକାର୍‌ ବ୍ୟବହାର୍‌ କିଦ୍‌ଇଲେମ୍‌; ବାତେଙ୍କ୍ ଇତ୍‍କେ ବେଲାକି ମାମ୍‍ମେ କ୍ରିଷ୍ଟନ୍‌ ନେଲ୍ଲା କାବୁର୍‌ତାଗ୍‌ ବେଲେବା ଆଡାମ୍‌ ଆୟମ୍‌, ଇଦିନ୍‌ ମାଇଦିଙ୍କ୍‌ ସାର୍‍ରେ ସାରେ ମାଡ଼ୁତମ୍ । 13 ବେନଡ଼୍ ମନ୍ଦିର୍‌ତାଗ୍ ସେବା ମାଡ଼ୁତଡ଼୍, ଅଡ଼୍‌ ଯେ ମନ୍ଦିର୍‌ନୁଞ୍ଚ୍‌ କାଦି ଦର୍କିତା, ମେଣ୍ଡେ ବେନଡ଼୍ ବେଦିନାଗ୍‌ ସେବା ମାଡ଼ାନଙ୍କ୍ ମାନ୍‌ତଡ଼୍‌, ଅଡ଼୍‌ ଯେ ବେଦିନାଗ୍‌ କାଇଲିତଡ଼୍‌, ଇଦ୍‌ ବାତା ପୁନ୍‌ୱିଡ଼୍‌ କି ? 14 ✝୯:୧୪ ମାତିଉ ୧୦:୧୦; ଲୁକ ୧୦:୭.ଆଦେଲେକାମ୍‌ ବେନଣ୍ଡ୍ ସାୟେ କାବୁର୍‌ କେତିତଣ୍ଡ୍, ଅଡ଼୍‌ ଯେ ସାୟେ କାବୁର୍‌ ତଡ଼୍ ବାଦ୍‌କାତଡ଼୍‌, ଇଦ୍‌ ପ୍ରବୁ କେସ୍‌ମିନ୍ଦେ ।

15 ବାତେଙ୍କ୍‍ଇତ୍କେ ନାନ୍ ଇୱୁ ସାର୍‍ରେ ବିଷୟ୍ ବ୍ୟବହାର୍‌ ମାଡ଼ନ୍, ମେଣ୍ଡେ ନା ସେଙ୍ଗେ ଯେ କିତ୍‍ତଡ଼୍‌, ଇଦିନ୍‌ ମାଇଦିଙ୍କ୍‌ ନାନ୍ ଇୱ୍‌ସାର୍ରେ ଲେକନ୍‌; ବାତେଙ୍କ୍‍ଇତ୍‍କେ ବେନ ନାୟାଦ୍‌ ଇଦ୍‌ ଦର୍ପ ମାଡ଼ାନ୍‌ ୱିଡ଼୍‍ସି ବେଲାନ୍ ନାୟାଦ୍‌ ଡଲାନାଦ୍‌ ସାୟେ । 16 ସୁସମାଚାର୍ ପ୍ରଚାର୍ ମାଡ଼ୁତାନ୍ ଇଞ୍ଜ ନାୟାଦ୍ ପ୍ରସଂଶା ମାଡ଼ାନାଦ୍ ବାତ୍ ବାତେଙ୍କ୍ ଇତ୍‍କେ ଇଲ୍‍ଲେ । ଇଦ୍ ଦାୟିତ୍ୱ ପାଲନ୍ ମାଡ଼ାନ୍ ସେଙ୍ଗେ ନାନ୍ ଗଟ୍ ପାଏମ୍ ଆତ୍‍ତାନ୍ । ଆଦିଙ୍କ୍ ସୁସମାଚାର୍ ପ୍ରଚାର୍ ମାଡ଼୍‍ୱେ ମାତ୍‍କେ ନାକିଂଙ୍କ୍ ଦଣ୍ଡ୍‍ଆଦ୍‍ତେ । 17 ନିଜେତ୍ ମାନ୍‍ତେ ଇଦ୍ ପାଡ଼୍‍ୟି ମାଡ଼୍‍କେ, ନାନ୍ ପୁରସ୍କାର୍‍ତିଙ୍କ୍ କେପି ମାନେନ୍, ଇତ୍‍କେ ଇଶ୍ୱର୍ ନା ପର୍‍ର ଇଦ୍ ଦାୟିତ୍ୱ ଇସ୍‍ମାନ୍ଦାନ୍ ମାୟ୍‍ଦିଙ୍କ୍ ଇଦ୍ ମାଡ଼ାନାଦ୍ ନାୟାଦ୍ ପାଡ଼୍‍ୟି । 18 ଆଲେକେ ନାନ୍ କି ପୁରସ୍କାର୍ ପାଏମ୍ ଆଦ୍‍ତାନ୍ ? ସାର୍ରେତଡ଼୍ ଗାର୍‍ରେ ୱିଡ଼୍‍ସି ମୁଲ୍ୟବାନ୍‍ ସୁସମାଚାର୍ ପ୍ରଚାର୍ ସେଙ୍ଗେ, ଇଦ୍ ନାୟାଦ୍ ପୁରସ୍କାର୍ । ଆଦିନ୍ ସେଙ୍ଗେ ସୁସମାଚାର୍ ପ୍ରଚାର୍ ମାୟ୍‍ଦିଙ୍କ୍ ନାନ୍ ବାତ୍‍ମିକା ସୁଯୋଗ୍ ସୁବିଦା ପାଏମ୍ ଆତ୍‍ତାଙ୍କ୍ ମାଇଦିଙ୍କ୍ ନାନ୍ ବାତେବା ଆଶେ ମାଡ଼ନ୍ ।

19 ନାନ୍ ୱେରଣ୍ଡ୍ ସ୍ୱାଦିନ୍ ନାରୁନ୍‌, ବେନ ଆସ୍‍ତେ ଦାସ ଆୟନ୍, ଆଗେକ୍‍ବା କ୍ରିଷ୍ଟନାଗ୍ ସାର୍ରେତଡ଼୍ ଲାବ୍ ପାଏମ୍ ଆଦାନ୍ ସେଙ୍ଗେ ନାନ୍ ସାର୍ରେତଡ଼୍‍ୱାଦ୍ ଦାସ ଆତ୍‍ତାନ୍ । 20 ଇହୁଦୀନଡ଼୍ କ୍ରିଷ୍ଟନ୍‍ନାଗେ ଲାବ୍ ପାଏମ୍ ଆଦାନ୍ ସେଙ୍ଗେ ନାନ୍ ଅଡ଼୍‌ ତଡ଼୍ ଇହୁଦୀ ଲେକାମ୍ ବ୍ୟବହାର୍‌ ମାଡ଼ୁତାନ୍ । ମୋଶାନ୍‌ ନିୟମ୍ ପାଲନ୍ ମାଡ଼ାନଡ଼୍‍କିଙ୍କ୍ ପାଏମ୍ ଆଦାନ୍ ସେଙ୍ଗେ ନାନ୍ ବାତ୍‍ଆଇ ନିୟମ୍ ପୟ୍‍ୱେକଟ ନିୟମ୍‍ତାଗ୍ ମାନ୍ଦାନ୍ ଲେକାମ୍ ବ୍ୟବହାର୍‌ ମାଡ଼ୁତାନ୍ । 21 ଆଦେରକମ୍ ଅଣଇହୁଦୀଡ଼୍ ପାଏମ୍ ଆଦାନ୍ ସେଙ୍ଗେ ନାନ୍ ଅଡ଼୍‌ ଲୋପେ ପାଡ଼୍‍ୟି ମାଡ଼ାନ୍‍ୱେଲେ ଅଣଇହୁଦୀଡ଼୍ ଲେକାମ୍ ନିୟମ୍‍ତେ ବାୟିଦେ ବ୍ୟବହାର୍‌ ମାଡ଼ୁତାନ୍ । ଇଦିନାଦ୍ ଇତ୍‍କେ ଆୟ୍‍ୟ ଜେ, ନାନ୍ ଇଶ୍ୱର୍‌ତେ ନିତୀନିୟମ୍ ପାଲନ୍ ମାଡ଼ନ୍ । ନିଜାମ୍‍ତେ ନାନ୍ କ୍ରିଷ୍ଟନ୍ ନିୟମ୍‍ତାଗ୍ ମିନ୍ଦେନ୍ । 22 ବେନଡ଼୍ ବିଶ୍ୱାସ୍‍ତାଗ୍ ଶାତ୍‍ୱାମ୍ ଇଲ୍‍ଲେ, ଅଡ଼୍‌‍କିଂଙ୍କ୍ ପାଏମ୍ ଆଦାନ୍ ସେଙ୍ଗେ ନାନ୍ ଅଡ଼୍‌ ଲେକାମ୍ ଆତ୍‍ତାନ୍ । ବେଲାମେଣ୍ଡେ ଆୟି ଅଡ଼୍‌‍କିଂଙ୍କ୍ ଗେଲ୍‍ସ୍ପାନ୍ ମାୟ୍‍ଦିଙ୍କ୍ ନାନ୍ ସାରେ ୱେରେ ଲେକାମ୍ ବ୍ୟବହାର୍‌ ଆଚରଣ ମାଡ଼୍‍ତାନ୍ ।

23 ନାନ୍ ସୁସମାଚାର୍ ପ୍ରଚାର୍ ମାଡ଼ି, ଇଦିନାଗାଙ୍କ୍ ଆର୍ଶିବାଦ୍ ପାଏମ୍ ଆଦ୍‍ଦାନ୍ ଅଂଶି ଆଦାନ୍‍ ସେଙ୍ଗେ ଇୱୁ ସାର୍‍ରେ ମାଡ଼ିତାନ୍ । 24 ମିଡ଼୍ ବାତ୍ ପୁନ୍‍ୱିଡ଼୍ ଜେ, କାର୍‍ସାନାଗ୍ ନାର୍‍ଗେ ମୁଲ୍ ବାଗ୍‍ ଆଦ୍‍ତଡ଼୍, ଇତ୍‍କେ ୱେରଣ୍ଡେ ପୁରସ୍କାର୍ ପାଏମ୍ ଆଦ୍‍ତନ୍ ? ମିଡ଼୍ ଇଦ୍‍ରକମ୍ ମିରାଟ୍, ବେଲାକି ପୁରସ୍କାର୍ ପାଏମ୍ ଆଦ୍‍ତିଡ଼୍ । 25 କାର୍‍ସାନଡ଼୍ ଟ୍ରେନିଂ ୱେଲେ ସାର୍‍ରେ ବିଷୟ୍ ସାୟେ ବ୍ୟବହାର୍‌ ମାଡ଼ିତଡ଼୍ । ଅଡ଼୍‌ ନଷ୍ଟଆଦାନାଦ୍ ସହଜ୍‍ ପାଏମ୍ ଆଦାନ୍ ସେଙ୍ଗେ ଇଦ୍‍ରକମ୍ ମାଡ଼ିତଡ଼୍ । ଇତ୍‍କେ ମାନାଡ଼୍ ତେର୍‍ୱାଦ୍ ସହଜ୍‍ ପାଏମ୍ ଆଦାନ୍ ସେଙ୍ଗେ ଇଦ୍‍ରକମ୍ ମାଡ଼ିତାଡ଼୍ । 26 ଆଦିନ୍ ସେଙ୍ଗେ ନାନ୍ ସିଦା ଏୱୁଦାନ୍ ବକେତ୍ ମିରିତାନ୍, ନାନ୍‍ ୱେରଣ୍ଡ୍ ମୁଷ୍ଟି ବୀର ଲେକାମ୍ ନାନ୍ ନିଜେତ୍ ମୁଟେତେ ରେଏତାନଙ୍କ୍ ଆସାମ୍ ୱିଡ଼୍‍ସାନଙ୍କ୍ ମାନ୍‍ ମାଡ଼ନ୍ । 27 ୱେରେ ନାରୁଡ଼ାଗ୍ ସୁସମାଚାର୍ ପ୍ରଚାର୍ ମାଡ଼ିମାତ୍‍କେ ଗାଲା ନାନ୍ ନିଜେ ବେଲାକି ପିନ୍ଦ ଆୟନ୍, ନାନ୍ ତିପାଲ୍ ମାଡ଼ି ମେନ୍ଦୁଲ୍‍ତିଙ୍କ୍ ଡୁଟାଙ୍ଗ୍‌ ମାଡ଼୍‍ତାନ୍ ନୁ ନିଜେତ୍ ଗଟ୍‍ତେ ମାଡ଼ି ନେଃଏତାନ୍ । ବାତେଙ୍କ୍‍ଇତ୍କେ ବାଗାତଡ଼୍ ପାକେ ସୁସମାଚାର୍ ପ୍ରଚାର୍ ମାଡ଼ିମାତ୍‍କେ ମିକା ନାନ୍ ନିଜେ ଆଗ୍ରାହ୍ୟ ଆୟନ୍ ।