୨ ପିତର୍‌ 2

ବୁସାମାଡ଼ାନ୍‍ ମେସ୍ତେରିଡ଼୍‍

1 ମୁନେଙ୍କ୍ ବେଲାନ୍ ନାରୁଡ଼ାଗେ ମିକା ବଣ୍ଡବାବବାଦିଡ଼୍ ତଅନ୍‌ଦି ମାତ୍‍ତଡ଼୍, ଟିକ୍ ଆଦେଲେକାମ୍ ମିୟାଗେ ବୁସାମାଡ଼ାନ୍‍ ମେସ୍ତେରିଡ଼୍ ପେଇତିତଡ଼୍ । ଅଡ଼୍‌ ସାରେ ବିନଷ୍ଟକାରିଡ଼୍ ଅଡ଼୍‌‍ ଆଲାନ୍ ବୁସା ଶିକ୍ଷା ଇଦ୍‍ତଡ଼୍ ନୁ ବେନ୍ ପ୍ରବୁ ଅଡ଼୍‌‍କିଂଙ୍କ୍ ମୁକ୍ତି ଇସ୍‍ମିନ୍ଦେନ୍‍, ଅଙ୍କ୍‌ ସ୍ୱୀକାର୍ ମାଡ଼ଡ଼୍ । ଆଦିଙ୍କ୍ ସେନେକ୍‍ତିଙ୍କ୍‍ ଅଡ଼୍‌‍ୱାଦ୍‍ ବିନାଶ ଗଟେମ୍ ଆଦ୍‍ତେ । 2 ଆଗେକ୍‍ବା ନାର୍ଗେ ଅଡ଼ାଦ୍‌ ଅଦର୍ମ ମାର୍ଗ ଲେକାମ୍‌ ନିଜାମ୍‍ ସତ୍‍ ମାଡ଼ିତଡ଼୍ । ବାଗାତଡ଼୍ ଅଡ଼ାଦ୍‌ କାମ୍‍ମାଡ଼ାନାଦ୍ ଉଡ଼ି ଦର୍ମ ଆର୍‍ଦେ ବିରୁଦ୍ଦତେ ଗଟି କେତିତଡ଼୍ । 3 ଇଡ଼୍ ବୁସା ମାଡ଼ାନ୍‍ ମେସ୍ତେରିଡ଼୍ ଦନ୍‍ଆସେତିଙ୍କ୍ ମାନ୍‍ମାୟିସ୍‍ ଗଟି କେସ୍ ଲାବ୍ ତେଃତିତଡ଼୍ । ଇତ୍‍କେ ନାର୍ଗେ ଦିନାକଞ୍ଚ୍‍ ଇଶ୍ୱର୍ ଇଡ଼ାଦ୍‍ ବିଚାର୍‍ ମାଡ଼ ୱାଦୁତଣ୍ଡ୍‍ ନୁ ଇଡ଼ାଦ୍ ଡଲାନ୍‍ ଦିନାମ୍ ଗାରେ ଆସ ୱାଦୁତ୍ ।

4 ଇଶ୍ୱର୍ ପାପାମ୍‍ ଦୂତକିଙ୍କ୍ କ୍ଷମା ଇୱକଟ୍ ନର୍କତାଗ୍ ହେସ୍‍ସି ମାତ୍‍ତନ୍ । ଆଗେ ଆୱୁ ମହାବିଚାର୍ ଦିନ୍ ଯାକ ଇକାଡ଼୍‍ତେ ଗୁୟିନ୍ଦେତାଗ୍‍ ମିନ୍ଦେ । 5 ଇଶ୍ୱର୍‍ ପୁରାତନ୍ ଜଗତ୍‍ତିଙ୍କ୍ ଦଣ୍ଡ ଇୱକଟ୍ ୱିଡ଼୍‍ସିୱେ ମାତ୍‍ତନ୍; ଆଦାର୍ମିକ୍ ଜଗତ୍‍ତେ ନାରୁଡ଼୍‍ ପରୁ ଗାଟିଏର୍‍ ତଡ଼୍‍ ମୁଃଉସ୍‍ ଦଂସ ମାଡ଼ିମାତ୍‍ତନ୍ । ଆଦ୍ ମାତର୍ ଦର୍ମ ପ୍ରଚାର୍ ମାଡ଼ମାନ୍ଦାନ୍ ନୋହ ନୁ ବାଗାତ୍ ସାତ୍‍ଜାନ୍ ନାରୁଡ଼୍‍କ୍ ରକ୍ଷା ମାଡ଼୍‍ତଣ୍ଡ୍‍ । 6 ତାନ୍‍ପେର୍କେ ଇଶ୍ୱର୍ ସଦୋମ୍‍ ନୁ ଗମୋରା ନଗର୍‍ ରେଣ୍ଡିଙ୍କ୍ ଦଣ୍ଡଇସ୍‍ କିସ୍‍ତେ ଦଂସ ମାଡ଼୍‍ତନ୍ ନୁ ଦାର୍ମାମ୍‌ ଇଲ୍‍ୱେ ନାରୁଡ଼୍‍ ସେଙ୍ଗେ ବାତେ ଗଟେମ୍‍ ଆଦ୍‍ତେ, ଇୱୁ ରେଣ୍ଡ୍ ନାର୍‍କିଙ୍କ୍ ଅନାଦ୍‌ ୱେଷଡ଼୍ ଲେକାମ୍ ନେଃଏତଣ୍ଡ୍‍ । 7 ଦାର୍ମାମ୍‌ ଇଲ୍‍ୱେ ନାରୁଡ଼୍‍ତେ କାରାପ୍‍ ବ୍ୟବହାର୍‌ ସେଙ୍ଗେ କଷ୍ଟ ଆସ୍‍ମାନ୍ଦାନ୍‍ ଦାର୍ମାମ୍‌ତଣ୍ଡ୍‍ ଲୋଟଙ୍କ୍‍ ଇଶ୍ୱର୍ ରକ୍ଷା ମାଡ଼୍‍ତଣ୍ଡ୍ । 8 ଆଦିଙ୍କ୍‍ ସାୟେତଣ୍ଡ୍‍ ଲୋଟ ଅଡ଼୍‌‍ତଡ଼୍ ତଡ଼୍ ମାନ୍ଦାନ୍ ୱେଲେ ସାରେଦାମ୍ ଅଡ଼ାଦ୍‌ କାରାପ୍‍ କାମ୍ ଉଡ଼ି ନୁ କେଞ୍ଜି ସାରେଦିନାମ୍‍ ମନ୍‍ତାଗ୍ ନାର୍ଗେ ଦୁଃକାମ୍ କଷ୍ଟ ଆଲ୍‍ସି ମାତ୍‍ତଣ୍ଡ୍‍ । 9 ପ୍ରବୁ ପୁତ୍‍ତନ୍, ବେଲାନ୍ ଦାର୍ମିକ୍ ନାରୁଡ଼୍‍କିଙ୍କ୍‍ ଅଡ଼୍‌‍କିଂଙ୍କ୍‍ ପରିକ୍ଷାତାଗାଙ୍କ୍ ରକ୍ଷା ମାଡ଼ାନଙ୍କ୍‍ ଆଦ୍‍ତେ । ମେଣ୍ଡେ ଦୁଷ୍କର୍ମକାରିଡ଼୍‍କ୍, 10 ବିଶେଷତଃ ବେନଡ଼୍‍ ଇଶ୍ୱର୍‌ତେ କ୍ଷମତାତିଙ୍କ୍ ପେର୍କେ ୱାଟ୍‍ଟି ନିଜେତ୍ ମେନ୍ଦୁଲ୍‍ତେ ଆସେ ଚରିତାର୍ତ ମାଡ଼ମାନ୍‍ତଡ଼୍, ଅଡ଼୍‌‍କିଂଙ୍କ୍ ମହାବିଚାର୍ତେ ଦିନାମ୍ ଯାକ ବେଲାନ୍ ଦଣ୍ଡିତ୍ ମାଡ଼ି ୱାଟ୍‍ଟିତଡ଼୍, ଆଦ୍ ଅଣ୍ଡ୍‌ ପୁତ୍‍ତନ୍ । ଆ ବୁସା ମେସ୍ତେରିଡ଼୍ ବେନଙ୍କ୍ ୱେର୍‍ୱଡ଼୍‍ ମନ୍‍ଇଚ୍ଛାତେ କାମ୍ ମାଡ଼ିତଡ଼୍ ନୁ ନିଜର୍‍ ବିଷୟତେ ଆଶେତାୱୁ ଗଟି କେତିତଡ଼୍ । ଅଡ଼୍‌ ସ୍ୱର୍ଗଦୂତକିନ୍ ବିରୁଦ୍ଦତେ କାରାପ୍ ଗଟି କେତାନଙ୍କ୍ ୱେର୍‍ୱଡ଼୍ ।

11 ଅଡ଼୍‌‍କ୍‍ ୱିଡ଼୍‍ସି ଗାଟି ଶକ୍ତି ନୁ ସାହାସୀ ଦୂତକି ମିକା ଇଶ୍ୱର୍‌ତେ ମୁନେ ଗାଟି ଗୌରବ୍‍ମୟତେ ଜିୱାକିଂଙ୍କ୍‍ ନିନ୍ଦା ମାଡ଼ି ଆୱିଙ୍କ୍ ଦୋଷି ମାଡ଼ଡ଼୍ । 12 କିନ୍ତୁ ଇ ବୁସା ମେସ୍ତେରିଡ଼୍‍ ମୁର୍କ ପଶୁ ଲେକାମ୍‍ ସ୍ୱବାବ୍‍ ଲେକାମ୍‌ ସିଟ୍‍ପାଟ୍‍ ନାଡ଼୍‍କାନଙ୍କ୍‍ ପୁଟ୍‍ତା । ବେନ୍‍ ବିଷୟ୍‍ ବୁଜେମ୍‍ ଆୟଡ଼୍‍ ଆଦିଙ୍କ୍‍ ଅଡ଼୍‌‍ ଗଲକ୍‍ ମାଡ଼ିତଡ଼୍‍ କିନ୍ତୁ ଅଡ଼୍‌‍ ବନ୍‍ ପଶୁ ଲେକାମ୍‍ ଦଂସ ଆଦ୍‍ତଡ଼୍‍ । 13 ମେଣ୍ଡେବାଗାତଡ଼୍‍କ୍ ବେଲାନ୍ ତିପାଲ୍ ଇତ୍‍ତଡ଼୍, ନିଜେ ଆଦ୍‍ଲେକାମ୍ ଦୁଃକାମ୍ କଷ୍ଟ ଆଦ୍‍ତଡ଼୍ । ବାତ୍ ଆୟି ଅଡ଼୍‌‍ୱାଦ୍‍ ମେନ୍ଦୁଲ୍‍ତେ ସାରେ ଲାଲସା ପୁରା ମାଡ଼ିତ୍‍, ଆଦ୍ ଅଡ଼୍‌ ପାୟାଲ୍‍ ୱେସିନାଗ୍‍ ନାରୁଡ଼୍‍ଡ଼ାଗ୍ ୱେଡ଼୍‍କେ ପାହେମ୍ ଆଦ୍‍ତଡ଼୍ । ଅଡ଼୍‌ ନିଜେତ୍ ଚଲ୍‍ନାତେ ବର୍ତି କାମ୍‍ତାଗ୍ ୱେଡ଼୍‍କେ ଆସଡ଼୍‍ ମିଡ଼୍ ତଡ଼୍ କାଇଲି ମିକା ତିନ୍‍ତଡ଼୍ । 14 ଅଡ଼୍‌ ମିକିଙ୍କ୍ ସିଗ୍ ନୁ କାର୍‍କେ ପୟ୍‍ତେ ଲେକାମ୍ । ଅଡ଼ାୱୁ କଣ୍ଡା କାରାପ୍ କାମ୍‍ତେ ନିଣ୍ଡ୍‍ତେ । ଅଡ଼ାଦ୍‌ ପାପ୍ ବେସୁଙ୍କ୍‍ ପୁରା ଆୟ୍‍ୟ । ଅଡ଼ାଦ୍‌ ଦୁର୍ବଲ୍‍ତେ ମନ୍‍ତେ ନାରୁଡ଼୍‍କ୍ ଉଡ଼ିଇଦାଗ୍ ୱାଟିତଡ଼୍ । ଲବି ଆଦାନଙ୍କ୍‍ ଅଡ଼୍‌‍ୱାଦ୍‍ ଅବ୍ୟାସ୍ । ଅଡ଼୍‌ ଇଶ୍ୱର୍‌ତେ ଅବିଶାପ୍‌‍ତେ ନାରୁଡ଼୍‍ ଆଦ୍‍ତଡ଼୍‍ । 15 ଅଡ଼୍‌ ଲେକେତ୍ ପ୍ରେମଆର୍ ୱିଡ଼୍‍ସିମିକା ୱେରେ ଆର୍‍ତାଗ୍‍ ଆଞ୍ଜ୍‍ମିନ୍ଦେଡ଼୍ । ବିଓର୍‍ତେ ମାର୍‍ ବାଲାମତେ ଆର୍ ଅଡ଼୍‌ ପୟ୍‍ତ୍‍ତଡ଼୍ । ଅଣ୍ଡ୍‌ ଅନ୍‌ୟାୟ୍‍ କାମ୍ ମାଡ଼ି ସାୟେତ୍‌ ଦନ୍‍ ଲାବ୍ ମାଡ଼ନଙ୍କ୍ ପସନ୍ଦ୍‍ ଆଇନାଙ୍କ୍, 16 ଇଦ୍ ପାପ ସେଙ୍ଗେ ଆସ୍‍ମାତ୍‍ତଣ୍ଡ୍‍ । ନାରୁନ୍ ଲେଙ୍ଗ୍‍ଦେ ଅନାଦ୍‌ ଗଦ୍‍ତେ ଗଟ୍ କେସ୍‍ ବେନ ବାବବାଦୀଙ୍କ୍ ବାୟେ ପାଡ଼୍‍ୟିତାଗାଙ୍କ୍ ଆୟ୍‍ସ୍ପ୍‍ତନ୍ ।

17 ଇଡ଼୍‍ ବୁସା ମେସ୍ତେରିଡ଼୍ ୱାସ୍‍ତେ ଇଲ୍‍କେ ଲେକାମ୍ ନୁ ଗାଲ୍‍ଦେ ଚାଲେମ୍‍ ଆଦାନ୍ ମାବ୍‍ ଲେକାମ୍ । ଇଶ୍ୱର୍‍ ଇଡ଼୍‍ ସେଙ୍ଗେ ଗାଟି ଇକାଡ଼୍‍ ତାଗ୍ ଗୁଇନ୍ଦେତାଗ୍ ପଡ଼ିୟେ ତିଆର୍ ମାଡ଼୍‍ତଡ଼୍ । 18 ଅଡ଼୍‌ ଆଂକାର୍‍ତେ ନିଣ୍ଡ୍‍ତଡ଼୍ କାରାପ୍ ଗଟି କେସମାନ୍‍ନ୍ତଡ଼୍; ଦସଂକାରୀଡ଼ାଗାଙ୍କ୍ ରକ୍ଷା ଆସ୍ ମିରି ୱାସମାନ୍ଦାନ୍ ନାରୁଡ଼୍‍କିଙ୍କ୍ ନିଚ୍‌ ଶାରିରିକ କାମ୍‍ତେ ମାୟା ତଅସ୍ ଉଡ଼୍‍ୟିତାଗ୍ ୱାଟିତଡ଼୍ । 19 ଇଡ଼୍‍କିଙ୍କ୍ ଅଡ଼୍‌ ବୁସା ମାଡ଼ାନ୍‍ ମେସ୍ତେରିଡ଼୍‍ ସ୍ୱାଦିନ୍‍ତେ ମାଡ଼ାନନ୍ ସେଙ୍ଗେ ନିଜେତ୍ ମନ୍ ଇଦ୍‍ତଡ଼୍, ଆଗେକ୍ ବା ଅଡ଼୍‌‍ ନିଜେ ଦ୍ୱଂସକାରିଡ଼୍‍ ସାରେ ଲେକେତ୍ କ୍ରିତଦାସ; ବାତେଙ୍କ୍ଇତ୍କେ ନାରୁଣ୍ଡ୍ ବେନ୍ ବିଷୟତେ ମିନ୍ଦେଣ୍ଡ୍, ଅନାଦ୍‌ ଅଣ୍ଡ୍‌ କ୍ରୀତଦାସ । 20 ମାନ୍‍ ପ୍ରବୁ ନୁ ତ୍ରାଣକର୍ତ୍ତାଲ୍ ଜିସୁ କ୍ରିଷ୍ଟନାଗାଙ୍କ୍ ଜ୍ଞାନ୍ ଆସ୍ ବେନଡ଼୍ ସଂସାର୍‍ତେ ବିନାଶ ଆଦାନଡ଼୍ ଶକ୍ତି ନାଗାଙ୍କ୍ ରକ୍ଷା ଆଦାନ୍ ପେର୍କେ ମେଣ୍ଡନ୍‍ ଦାମ୍ ଆୱୁ ସାରେ ଆୟେ, ଅଡ଼୍‌‍ୱାଦ୍ ମାଡ଼େଙ୍କ୍‌ତେ ଦଶା ମୁନେତ୍ ଦଶାତାଗାଙ୍କ୍‍ ଗାଟି ଅଦିକ୍‌ ଶୋଚନିୟ ଆଦ୍‍ତେ । 21 ଦାର୍ମାମ୍‌ ଆର୍‍ ପୁଞ୍ଜ୍‍ ଆଗେ ଇତ୍‍ତେ ପବିତ୍ର ଶିକ୍ଷାତାଗାଙ୍କ୍‍ ୱେରେ ଆଦାନ୍‍ ୱିଡ଼୍‌ସି, ଯଦି ଅଡ଼୍‌ ମୁନେଙ୍କ୍ କଞ୍ଜ୍ ଟିକ୍ ଆର୍ ପୁନ୍‍ୱେ ମାନ୍‍ନେଡ଼୍, ଅଡ଼୍‌ ପାକେ ଲେକେତ୍ ଆୟେଡ଼୍ । ଲେକେତ୍ କାମ୍ ପୁଞ୍ଜ୍, ପବିତ୍ର ଶାସ୍ତ୍ରତେ ଶିକ୍ଷାତାଗାଙ୍କ୍ ୱେର୍‍ ଆଦାନ୍ ୱିଡ଼୍‍ସି ଆଦ୍ ପୁନ୍‍ୱେ ମାନ୍ଦାନ୍ ଇକ୍‍କେ, ଅଦିକ୍‌ ଲେକେତ୍ ଆୟେଡ଼୍ । 22 ଅଡ଼୍‌ ସେଙ୍ଗେ ବାତ୍ ଗଟେମ୍ ଆତ୍‍ତେ, ଆଗାଙ୍କ୍ ଇଦ୍ ନାରୁଡ଼୍‍ କେତାନ୍ ସତ୍‍ତାଗାଙ୍କ୍ ନିଜାମ୍ ଅଦୁତ୍, "ନେୟ୍‍ ବାତେ କାକିତ୍‍ ଆଦିଙ୍କ୍‍ ମେଣ୍ଡେ ତିନ୍ଦିତେ, ପାଦ୍‍ତିଙ୍କ୍ ନର୍‍ସିତେ ପେର୍କେ ମେଣ୍ଡେ ବୁର୍‍ଦେତାଗ୍ ତଡ଼୍‍ଞ୍ଜାଙ୍କ୍ ଆଦ୍‍ତେ ।"