1 ✝ ୨:୧ ୧ ଥେସଲନିୟ ୪:୧୫-୧୭. ଦାଦାନଡ଼ି ନୁ ଏଲାସ୍କ୍, ପ୍ରବୁ ଜିସୁ କ୍ରିଷ୍ଟ‍ନ୍ ୱାଦାନାଦ୍ ବିଷୟ୍‍ତେ ନୁ ଅନ୍‌ ପାକେ ମାନାଡ଼୍ ସାରେତଡ଼୍ ଅଣ୍ଡୟାଗେ ଆଦାନ୍ ମୁନେଙ୍କ୍ ମିକିଂଙ୍କ୍ ଅନୁରଦ୍‌ ମାଡ଼ୁତମ୍ । 2 ପ୍ରବୁନାଦ୍ ଦିନାମ୍ ୱାସ୍‍ହେଉତେ ଇଞ୍ଜ ବେନନାଗାଙ୍କ୍ କେଞ୍ଜି ମିଡ଼୍ ଦାନ୍ଦେ ଆୟ୍‍ମାଟ୍ । ମାମ୍‍ମେ ପ୍ରଚାର୍ ମାଡ଼ାନ୍ ୱେଲେ ଇଦ୍‍ଲେକାମ୍ ବାତେଏ ଗଟ୍ କେତ୍‍ତମ୍, ବା ଇଦ୍ ବିଷୟ୍‍ତେ ବାତେଏ ଲେକି କେଞ୍ଜ୍‍ପ୍‍ତମ୍ ଇଞ୍ଜ୍ ବେସ୍କ୍‌ତୁଡ଼ାଦ୍ ମନ୍‍ଦାଗ୍ ମିନ୍ଦେ । 3 ଇଦ୍‍ଲେକାମ୍ କେସ୍ ମିକିଂଙ୍କ୍ ବେନ ବେଲାବାଆୟି ପ୍ରତାରନା ମାଡ଼୍‍ମାକି । ଇଶ୍ୱର୍‌ତେ ବିରୁଦ୍ଦ୍‍ତେ ଅନ୍‌ତିମ ଯୁଦ୍‌ ଗଟେମ୍ ଆୟୱେ ଯାକ ନୁ ଆଦ୍ ନର୍‍କ ଆଦାନାଦ୍ "ଆଦାର୍ମି ଆତ୍ମା," ନର୍‍କତାଗ୍‍ ଅନ୍‌‍ୱେ ଯାକ ଆଦ୍ ଦିନ୍ ୱାଡ଼୍ । 4 ଆଦ୍ କାରାପ୍ ଆତ୍ମା ନାରୁଡ଼ାଦ୍ କେତାନାଦ୍ ସାର୍‍ରେ ପୁଜାମାଡ଼ାନ୍ ଦେୟାମ୍ ନୁ ଉପାସ୍ୟ ବସ୍ତୁତାଦ୍ ବିରୁଦ୍‍ ଆଚରନ୍ ମାଡ଼ିତ୍ ନୁ ନିଜେତିଙ୍କ୍ ସାର୍ରେତ୍ ପର୍‍ର ନେଃତାନଙ୍କ୍ ପାର୍‍ଦ୍‍ତେ । ଇଦ୍ ରକମ୍ କି ଅଣ୍ଡ୍‌ ଇଶ୍ୱର୍‌ତେ ମନ୍ଦିର୍‌‍ତାଗ୍ କୁଦି ନିଜେ ଇଶ୍ୱର୍ ଇଞ୍ଜ ଦାବୀ ମାଡ଼ିତ୍ ।

5 ମିକିଂଙ୍କ୍ ବାତେଏ ଏର୍କା ଇଲେ ? ନାନ୍ ମିଇ ତଡ଼୍ ମାନ୍ଦାନ୍ ୱେଲେ ମିକିଂଙ୍କ୍ ଇ ସାରେ ବିଷୟ କେସ୍‍ମାତ୍‍ତାନ୍ ? 6 ଆଦ୍ ବିପଦ୍ ଇଞ୍ଜେ ଗଟେମ୍ ଆୟ୍‍ୟ, ବାତେଙ୍କ୍ ଇତ୍‍କେ ଆଦିନ୍ ପ୍ରତିରଦ୍ ମାଡ଼ାନଙ୍କ୍ ଇଞ୍ଜ ୱେରଡ଼୍ ଶକ୍ତି ମିନ୍ଦେ, ଆଦ୍ ବାତେଏ ମିଡ଼୍ ପୁତ୍‍ତିଡ଼୍ ! ବାତେଙ୍କ୍ ଇତ୍‍କେ ଟିକ୍ ସମୟ୍‍ତେ ଆଦ୍ ଦୁଷ୍ଟଆତ୍ମା ତଅନ୍‌ଦିତ୍ । 7 ବାତେଙ୍କ୍ ଇତ୍‍କେ ଅଦାର୍ମିତାଗ୍ ଆତ୍ମା ଇଞ୍ଜେ ଗାଲା ପାଡ଼୍‍ୟି ମାଡ଼ୁତ୍ । ମାତର୍ ଅନାଦ୍‌ ବାଦା ଇଦାନ୍‍ ନାରୁନ୍ ଦୁରାମ୍ ଆୟୱେ ଯାକ ଆଦ୍ ପାଡ଼୍‍ୟି ମାଡ଼ମାନ୍‌ତେ । 8 ତାନ୍ ପେର୍‍କେ ପାପଆତ୍ମା ହେକାମ୍ ଆଦ୍‍ତେ; ବାତେଙ୍କ୍ ଇତ୍‍କେ ବେସୁଙ୍କ୍‍ ପ୍ରବୁ ଜିସୁ ୱାଦ୍‍ତନ୍, ଅନ୍‌ ତାନ୍ ମକମ୍‍ତେ ନେହେସ୍‍କାନାଲ୍‌ଦ୍‍ ତଡ଼୍ ଦଂସ ମାଡ଼ିତନ୍, ନୁ ଅନ୍‌ ଜାଜଲ୍‌ଲ୍ୟମାନ୍ ଦିନ୍ ଏୱୁକେ ୱିଡ଼୍‍ସି ଆଦ୍‍ତନ୍ । 9 ✝୨:୯ ମାତିଉ ୨୪:୨୪.ଆଦ୍ ଦୁରଆତ୍ମା ଶୟ୍‍ତାନ୍‍ ଲାୱ୍‌ଦେ ଡାଟୁମ୍‌ ଆସ୍ ୱାଦ୍‍ତନ୍ ନୁ ନାର୍‍ଗେ ଲେକ୍‍ତାଉ ଦାଦ୍‌ରେଲାନ୍ ପାଡ଼୍‍ୟି ମାଡ଼ାନଙ୍କ୍ ବୁସା ମାଡ଼ିତନ୍ । 10 ନାର୍ଗେମୁଲ୍ ତାନ୍ ପ୍ରତାରଣାତାଗ୍ ବ୍ରାନ୍ତ ଆସ୍ ବିନଷ୍ଟ ଆଦ୍‍ତଡ଼୍ । ବେନ୍ ସତ୍‍ତିଙ୍କ୍ ଗ୍ରହନ୍ ମାଡ଼ି ତାନ୍ ସେଙ୍ଗେ ଆଶ୍ୱକ୍ତ ଆଦ୍‍ଦାନ୍ ତଡ଼୍ ବେନ୍ ନାରିଡ଼୍ ମାଇ ମିନ୍ଦେ, ଅଡ଼୍‌‍କିଂଙ୍କ୍ ପ୍ରତାରନ୍ ମାଡ଼ାନଙ୍କ୍ ଇଦ୍ କାରାପ୍ ନାରିଡ଼୍ ସାରେତ୍‍ଲେକେତ୍ କାରାପ୍ ପାଡ଼୍‍ୟି ସୃଷ୍ଟିମାଡ଼ିତଡ଼୍ । ଅଡ଼୍‌ ସତ୍‍ତିଙ୍ଗ୍ ପ୍ରେମ ଆଦିଲ୍‌ୱେ ସେଙ୍ଗେ ଅସ୍ୱୀକାର୍ ମାଡ଼୍‍ତଡ଼୍, ବେଦ୍‍ଲେକାମ୍ ଅଡ଼୍‌ ଉଦ୍ଦାର୍‍ ଦର୍ସିକି ଆୟେଡ଼୍ । 11 ବାତେଏ ସତ୍, ଇଦିନ୍ ସେଙ୍ଗେ ଅଡ଼୍‌ ବେନ ମିଚ୍‌ତିଙ୍କ୍‌ ବିଶ୍ୱାସ୍ ମାଡ଼ିତଡ଼୍, ଆଦିନ୍ ସେଙ୍ଗେ ଇଶ୍ୱର୍ ଅଡ଼୍‌ ପାକେ ନଷ୍ଟ ଉତ୍ପାଦକ ଶକ୍ତିଡ୍‌ କାୟ୍‍ଦେ ୱିଡ୍‌ସିଦ୍‌ତନ୍‌ । 12 ବେନଡ଼୍ ସତ୍‍ତିଙ୍କ୍ ବିଶ୍ୱାସ୍ ମାଡ଼କଟ୍ ମାନ୍‍ନ୍ତନ୍, ମାତର୍ ପାପାମ୍‍ତାଗ୍ ୱେଡ଼୍‍କ୍‍ ମାଡ଼ିତଡ଼୍, ଅଡ଼୍‌ ସାର୍ରେତଡ଼୍ ହିଦ୍‍ଲେକାମ୍ ଦଣ୍ଡ୍ ପାଏମ୍ ଆଦ୍‍ତଡ଼୍ ।

13 ହୋ ଦାଦାନଡ଼ି ନୁ ଏଲାସ୍କ୍, ମିଇ ସେଙ୍ଗେ ଇଶ୍ୱର୍‌ତିଙ୍କ୍ ଦନ୍ୟବାଦ୍ ହିଦାନାଦ୍ ଲେକାମ୍ । ବାତେଙ୍କ୍ ଇତ୍‍କେ ପ୍ରବୁ ମିକିଂଙ୍କ୍ ପ୍ରେମମାଡ଼ୁତ୍ । ସତ୍‍ତେ ମିୟାଦ୍ ବିଶ୍ୱାସ୍‍ତେ ସେଙ୍ଗେ ଇଶ୍ୱର୍ ମିକିଂଙ୍କ୍ ପରିତ୍ରାଣ ମାଡ଼ିମିନ୍ଦେଣ୍ଡ୍, ବେଦ୍‍ଲେକାମ୍ ପବିତ୍ର ଆତ୍ମା ଶକ୍ତିତେ ମୀଡ଼୍ ପରିତ୍ରାନ୍ ଆଦ୍‍ତିଡ଼୍ ନୁ ୱେରଡ଼୍ ପବିତ୍ର ଜିୱାତେ ଗୋଷ୍ଟି ଆଦ୍‍ତିଡ଼୍ । 14 ମିଇ ପାକେ ମାମ୍‍ମେ ବେନ୍ ନେଲା କାବୁର୍ କେତ୍‍ତଣ୍ଡ୍, ଆଦିନ୍ ସେଙ୍ଗେ ଇଶ୍ୱର୍ ମିକିଂଙ୍କ୍ କାର୍‍ଙ୍ଗିମିନ୍ଦେନ୍ । ମାନ୍‍ ପ୍ରବୁ ଜିସୁ କ୍ରିଷ୍ଟନ୍ ମାଇମାତେ ଗୌରବ୍‍ତେ କାଇଲାନ୍ ସେଙ୍ଗେ ଅଣ୍ଡ୍‌ ମିକିଂଙ୍କ୍ କାର୍‍ଙ୍ଗିମିନ୍ଦେନ୍ । 15 ହୋ ଦାଦାନଡ଼ି ନୁ ଏଲାସ୍କ୍‍, ମାୟାଦ୍‌ କେତାନାଦ୍ ନୁ ଚିଟିତେ ବେନ୍‍ସାରେ ଶିକ୍ଷାଲେକାମ୍ ବେନ୍‍ସାରେ ସତ୍ କେସ୍‍ମିନ୍ଦେମ୍, ଆଦିଙ୍କ୍ ଡାଟୁମ୍ ପଇସ୍‌ ମାନୁଟ୍; ବିଶ୍ୱାସ୍‍ତେ ମାନୁଟ୍ ।

16 ମାନ୍‍ ପ୍ରବୁ ଜିସୁ କ୍ରିଷ୍ଟ ନିଜେ, ମାନ୍‍ ବେନ୍ ବାବାଲ୍ ଇଶ୍ୱର୍ ମାନ୍‍ ପ୍ରେମ ମାଡ଼ି ମାନ୍‍ ଅନୁଗ୍ରହତେ ମାନ୍‍ ସାରେଦିନାତ୍ ସାନ୍ୱନା ନୁ ଲେକେତ୍‍ ଆଶେ ଇସ୍‍ମିନ୍ଦେନ୍ । 17 ଅଣ୍ଡ୍‌ ମାନ୍‍ ସାରେଦିନାମ୍ ସାୟେ ପାଡ଼୍‍ୟି ମାଡ଼ାନ୍ ସେଙ୍ଗେ ନୁ ସତ୍‍ ବାକ୍ୟ କେତାନଙ୍କ୍ ରହତନ୍ ନୁ ଶକ୍ତି ଇୱିଣ୍ଡ୍ ।