ପ୍ରକାଶିତ୍‌ ବାକ୍ୟ 8

ସାତ୍‍ଟାନ୍ ସିଲ୍‍

1 ମେକାଗଲାଲ୍ ସାତ୍‍ଟାନ୍ ସିଲ୍‍ ଟେଣ୍ଡାନ୍ ସାଙ୍ଗେ ସାଙ୍ଗେ ସ୍ୱର୍ଗତାଗ୍ ମାତର୍ ଅଦାଗାଣ୍ଟା ଯାକ ସାରେ ଲେଙ୍ଗ୍‍ ଆୟକଟ କଟମାତ୍‍ତଡ଼୍‍ । 2 ତାନ୍‍ପେର୍କେ ଇଶ୍ୱର୍‌ତେ ମୁନେ ନିସ୍‍ମାନ୍ଦାନ୍ ସାତ୍‍ଟାନ୍ ଦୂତଙ୍କ୍ ନାନେ ଉଡ଼୍‍ତାନ୍; ଅଡ଼୍‌‍କିଂଙ୍କ୍ ସାତ୍‍ଟାନ୍ ତୁରି ଇତ୍‍ତଡ଼୍ ।

3 ମେଣ୍ଡେ ଅର୍‍ତୁନ୍ ଦୂତ ୱେରଡ଼୍ ସୁବର୍ଣ୍ଣ ଦୁପାମ୍ ଆସ୍ ବେଦି ମୁନେ ୱାସ୍ ନିତ୍‍ତେ । ସିଂହାସନ୍ ମୁନେମାନ୍ଦାନ୍ ସୁନ୍ନତ୍‍ ବେଦି ପରୁ, ଇଶ୍ୱର୍‌ତେ ବକ୍ତନଡ଼ାଦ୍ ପ୍ରାର୍ତନା ଲେକାମ୍ ଦୁପାମ୍‍ ତଡ଼୍‍ କାଲ୍‍ପି ଉସ୍ୱର୍ଗ ମାଡ଼ାନ୍ ସେଙ୍ଗେ, ଅଙ୍କ୍‌ ନାର୍ଗେମାଡ଼ି ଦୁପାମ୍ ଇତ୍‍ତଡ଼୍ । 4 ଆୱୁ ଦୂତନ୍ କାଇକିନାଗ୍ ନିଡ଼୍‍ସ ମାନ୍ଦାନ୍ ଦୁପାମ୍ ଉମେ ତଡ଼୍ ଇଶ୍ୱର୍‌ତେ ବକ୍ତନଡ଼ାଦ୍ ପ୍ରାର୍ତନା କାଇଲି ମିକା ପରୁ ତେଦିଆତ୍‍ତେ । 5 ✝୮:୫ ପ୍ରକାଶିତ୍‌ ବାକ୍ୟ ୧୧:୧୯; ୧୬:୧୮.ତାନ୍‍ପେର୍କେ ଦୂତ, ଦୁପାମ୍ ପଇତେ ବେଦିତେ କିସ୍ ବର୍ତିମାଡ଼ି ଆଦ୍ ବୁମ୍‌ତେ ପରୁ ହେସିତ୍‍ତଡ଼୍ । ଅଦିନ୍‌ ପେର୍କେ ଜିଗ୍‍ଜାଗ୍‍ ଲେଙ୍ଗେ ଆତ୍‍ତେ, ୱାନେ ମେର୍ସତେ ନୁ ବୂମିକମ୍ପ ଆତ୍‍ତେ ।

ତୁରି ନେକାନାଲ୍‌ଦ୍

6 ତାନ୍‍ପେର୍କେ ପରୁତେ ସାତ୍‍ଜାନ୍ ଦୂତ ତୁରି ଉଦାନଙ୍କ୍ ତିଆର୍‍ ଆତ୍‍ତା ।

7 ମୁନେତାଦ୍‍ ଦୂତ ତୁରି ଉଦାନ୍ ସାଙ୍ଗେ ଆଦୁର୍‍ଗାଡା, କିସ୍‍ ନୁ ନେତୁର୍ ପୃତିବିତେ ପରୁ ରାଲ୍‍ତା । ତାନ୍‍ପେର୍କେ ସାରେ ମାଡ଼ାକ୍ ପଦ୍‍ଲା, ସାରେ ଇସୁରାଦ୍ ମିକା ପୃତିବିତେ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ନିଡ଼୍‍ସ୍‍ ଆତ୍‍ତେ ।

8 ତାନ୍‍ପେର୍କେ ଦ୍ୱିତିୟ ଦୂତ ତାନ୍ ତୁରି ଉଦାନ୍ ସାଙ୍ଗେ ମେଟେଲେକାମ୍ ଅଣ୍ଡୟ୍‌ ବେଡ଼ିୟାଦ୍ ମେଟେ ସମୁଦ୍ରତାଗ୍ ଏସ୍‍ତଣ୍ଡ୍‍ ନୁ ସମୁଦ୍ରତେ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ନେତୁର୍‍ତେ ବର୍ତି ଆତ୍‍ତେ, 9 ସମୁଦ୍ର ପଶୁନାଗାଙ୍କ୍ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ଡଲିଆତ୍‍ତା ନୁ ସମୁଦ୍ରତାଗ୍ ମାନ୍ଦାନ୍ ଜାହାଜ୍‍କିନାୱୁ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ଦ୍ୱଂସ ଆତ୍‍ତା ।

10 ତାନ୍‍ପେର୍କେ ତୃତିୟ ଦୂତ ତାନ୍ ତୁରି ଉଦ୍‍ତା । ସାଙ୍ଗେ ସାଙ୍ଗେ ମାବ୍‍ତାଗାଙ୍କ୍ ମଶାଲ୍ ଲେକାମ୍ ଅଣ୍ଡୟ୍‌ ବେଡ଼ିୟାଦ୍ ନିଡ଼୍‍ତାନ୍ ଉକାମ୍‍ ସାରେ ନଦିନ୍ ନୁ ଇଲ୍‍କାନାଗ୍ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ପରୁ ରାଲ୍‍ତା । 11 ଆୱୁ ନକ୍ଷତ୍ରତେ ପେଦେର୍ "ତିକ୍ତ ।" ତାନ୍‍ପେର୍କେ ପାନିୟ ଏର୍‍ଦେ ଅଣ୍ଡ୍‌‍ପାକେ ସାରେପାକା ଆତ୍‍ତେ ନୁ ଆଦ୍‍ ଏର୍ ଉଞ୍ଜ୍ ନାର୍ଗେ ନାରୁଡ଼୍‍ ଡଲ୍‍ତଡ଼୍ ।

12 ତାନ୍‍ପେର୍କେ ଚତୁର୍ତ ଦୂତ ତାନ୍ ତୁରି ଉଦାନ୍ ପେର୍କେ, ପଡ଼ଦ୍‍ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍, ନେଞ୍ଜ୍‍ତେ ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ ନୁ ନକ୍ଷତ୍ରକି ମୁଣ୍ଡ୍‍ ବାଗ୍‍ତାଗାଙ୍କ୍‍ ଅଣ୍ଡୟ୍‌ ବାଗ୍‍ କାୟ୍‍ତା ଆତ୍‍ତା । ଆଦିଙ୍କ୍ ୱେସିନ୍ ଅଣ୍ଡୟ୍‌ ତୃତିୟାଶଂ ୱେସ୍ ଡଲିଆତ୍‍ତେ । ତାନ୍‍ପେର୍କେ ଦିନାମ୍‍ତେ ଅଣ୍ଡୟ୍‌ ତୃତିୟାଶଂ ନୁ ନର୍କାତ୍ ଅଣ୍ଡୟ୍‌ ତୃତିୟାଶଂ ୱେସ୍‍ କମ୍‍ ଆତ୍‍ତେ ।

13 ତାନ୍‍ପେର୍କେ ନାନେ ମାଲ୍‍ସ୍‍ ଉଡ଼୍‍ତାନ୍, ମୟଲ୍‍ତେ ନାର୍ଗେ ପରୁ ୱେରଡ଼୍ ଗିଦ୍‍ ପିଟେ ପାର୍ସ ଗାଟିଲେଙ୍ଗ୍‍ଦେ କେତୁତ୍, "ଆୟ ! କି ବୟଙ୍କାର୍ ! ମେଣ୍ଡେ ବାଗାତାଉ ଦୂତକି ତୁରି ଉଦାନ୍ ୱେଲେ ପୃତିବିତେ ଅବସ୍ଥା ବେସର୍ ସାଙ୍ଗାତିକ୍ ଆୟ !"