1 ✝ବେତନିୟା ମାନ୍ଦାନ୍ ଲାଜାର୍ ପେଦେର୍ ତଣ୍ଡ୍ ୱେରଣ୍ଡ୍ ନାରୁଣ୍ଡ୍‌ ରୋଗ୍‍ତେ ମାତ୍‍ତଣ୍ଡ୍; ମରୀୟମ୍ ନୁ ତାନ୍ ଏଲାଡ଼୍‍ ମାର୍ତା ଆଦ୍ ନାର୍ ମାଞ୍ଜମାତ୍‍ତା । 2 ✝ବେନ୍ ନାଟାଡ଼୍ ପ୍ରର୍‍ବୁଙ୍କ୍ ସାଏତ୍ ଗାବ୍‍ତାଦ୍ ନିୟ୍‍ ଲେକେତ୍‍ ମାଡ଼ି ତାନ୍ କେଲ୍‍କିନେ ଅନ୍‌ ଡେକାଙ୍କ୍ ଉଞ୍ଜ୍‍ପିତେ, ଇଦ୍ ଆ ମରୀୟମ୍; ତାମ୍ ଦାଦାଲ୍ ଲାଜାର୍ ରୋଗ୍‍ତେ ମାତ୍‍ତଣ୍ଡ୍ । 3 ଆଉ ଏଲାସ୍କ୍‌ ଜିସୁନ୍ ପାକେ କେସ୍ ରହତାଆ, "ପ୍ରବୁ, ଉଡ଼େ, ବେନଙ୍କ୍ ନିମ୍‍ ସ୍ନେହ ମାଡ଼୍‍ନିନ୍, ଅଣ୍ଡ୍‌ ରୋଗ୍‍ତେ ମିନ୍ଦେଣ୍ଡ୍ ।"

4 ଇଦ୍ କବର୍ କେଞ୍ଜି ଜିସୁ କେତ୍‍ତଣ୍ଡ୍, "ଇ ରୋଗ୍‍ତେ ଲାଜାର୍ ଡଲନ୍ । ବାତେଙ୍କ୍ ଇତ୍‍କେ ଇଦିନ୍ ତଡ଼୍ ଇଶ୍ୱର୍ ମହିମାନିତ ଆଦ୍‍ତନ୍ ନୁ ଆଦିନ୍ ତଡ଼୍ ଇଶ୍ୱର୍‌ତେ ମାର୍‍ ମିକା ଗୌରବ୍‍ ପାଏମ୍ ଆଦ୍‍ତନ୍ ।"

5 ଜିସୁ ମାର୍ତା ନୁ ତାନ୍‌ ଏଲାଡ଼୍‍ ନୁ ଲାଜାର୍‍ତିଙ୍କ୍ ପ୍ରେମତେ ସ୍ନେହ ମାଡ଼ମାତ୍‍ତନ୍‌ । 6 ଆତ୍‍କେମିକା ଲାଜାର୍ ରୋଗ୍‍ତେ ମିନ୍ଦେଣ୍ଡ୍ ଇଞ୍ଜ ବେସୁଙ୍କ୍‍ ଜିସୁ କେଞ୍ଜ୍‍ତଣ୍ଡ୍, ଆସୁଙ୍କ୍ ଅଣ୍ଡ୍‌ ବେନ୍ ପଡ଼ିୟେତାଗ୍ ମାତ୍‍ତଣ୍ଡ୍, ଆଦେପଡ଼ିଇ ତାଗ୍ ମେଣ୍ଡେ ରେଣ୍ଡ୍ ଦିନା ମାତ୍‍ତଣ୍ଡ୍ । 7 ତାନ୍‍ପେର୍କେ ଜିସୁ ଶିଷ୍ୟକିଂଙ୍କ୍ କେତ୍‍ତଣ୍ଡ୍, "ଦାଟ୍‍ଟି, ମାନାଡ଼୍ ମେଣ୍ଡ୍‍ନ୍ ଦାମ୍ ମାଲ୍‍ସ୍ ଯିହୁଦାତାଗ୍ ଆଦିକାଡ଼୍‍ ।"

8 ଶିଷ୍ୟଡ଼୍ ଅଂକିଙ୍କ୍‌ କେତ୍‍ତଡ଼୍, "ହୋ ଗୁରୁ, ବେସ୍‌କ୍ ଦିନାତେ ମୁନେନ୍ ନାରୁଡ଼୍ ମେଣ୍ଡେ ନିକିଂଙ୍କ୍ କାଲ୍‍କ୍ ହେସାଙ୍କ୍ ଚେଷ୍ଟା ମାଡ଼ମାତ୍‍ତଡ଼୍, ମେଣ୍ଡେ ନିମ୍‍ ମେଣ୍ଡନ୍ ଦାମ୍ ଆଦାଙ୍କ୍ କେତୁତିନ୍ ?"

9 ଜିସୁ ଉତ୍ତର୍ ହିତ୍‍ତଣ୍ଡ୍, "ପାୟାଲ୍ ବାତେଏ ବାର ଗାଣ୍ଟା ଇଲା ? ବେନ ବେସୁଙ୍କ୍‍ ୱେସ୍‍ତେ ତାକାନ୍‍ୱେଲେ ରାଲଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଇ ଜଗତ୍‍ତାଗ୍ ୱେସ୍ ଉଡ଼ିତଣ୍ଡ୍; 10 ବାତେଙ୍କ୍ ଇତ୍‍କେ ଇକାଡ଼୍ ତେ ତାକ୍‍କେ ଅଣ୍ଡ୍‌ ରାଲିତଣ୍ଡ୍, ବାତେଙ୍କ୍ ଇତ୍‍କେ ଆଦ୍ ଅଣ୍ଡ୍‌ ଆଦାନ୍ ୱେଲେ ୱେସ୍‍ଇଲେ ।" 11 ଜିସୁ ଆହୁସାରେ ଗଟି କେତ୍‍ତଣ୍ଡ୍ ଅଡ଼୍‌‍କ୍ ମେଣ୍ଡେ ଅଦିକ୍‌ କେତ୍‍ତଣ୍ଡ୍, "ମାନ୍‍ ସାଙ୍ଗ ଲାଜାର୍ ଉସ୍‍କାଡ଼୍‍ତେ ମିନ୍ଦେଣ୍ଡ୍, ବାତେଙ୍କ୍ ଇତ୍‍କେ ଅଂକିଙ୍କ୍‌ ଉସ୍‍କାଡ଼୍ ତାଗାଙ୍କ୍‍ ତେତାନ୍ ମାଇଦିଙ୍କ୍ ନାନ୍ ଆଦୁତାନ୍ ।"

12 ତାନ୍ ପେର୍‍କେ ଶିଷ୍ୟଡ଼୍ ଅଂକିଙ୍କ୍‌ କେତ୍‍ତଡ଼୍, "ପ୍ରବୁ ଯଦି ଅଣ୍ଡ୍‌ ଉସ୍‍କାଡ଼୍‍ତେ ମିନ୍ଦେଣ୍ଡ୍, ଆଲେକେ ଅଣ୍ଡ୍‌ ସୁସ୍ଥ ଆଦ୍‍ତନ୍ ।"

13 ଜିସୁ ଅନାଦ୍‌ ଡଲାନ୍ ବିଷୟ୍‍ତେ କେସ୍‍ମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଉଞ୍ଜିମାନ୍ଦାନ୍ ବିଷୟ୍‍ତେ କେତ୍‍ତଣ୍ଡ୍ ଇଞ୍ଜ ଅଡ଼୍‌ ଏର୍କା ମାଡ଼୍‍ତଡ଼୍ । 14 ଜିସୁ ଆସୁଙ୍କ୍ ଅଡ଼୍‌‍କିଂଙ୍କ୍ ସତ୍ କେତ୍‍ତଣ୍ଡ୍, "ଲାଜାର୍ ଡଲ୍‍ତଣ୍ଡ୍; 15 ନାନ୍ ଯେ ଆଦ୍‍ପଡ଼ିୟେ ତାଗ୍ ଇଲ୍‍ୱେ ମାତ୍‍ତାନ୍, ଆଦିନ୍ ମାଇଦିଙ୍କ୍ ମିତଡ଼୍ ନାନ୍ ୱେଡ଼୍‍କା ମାଡ଼ୁତାନ୍, ବେଦ୍‍ଲେକାମ୍ ମିଡ଼୍ ବିଶ୍ୱାସ୍ ମାଡ଼ିତିଡ଼୍; ବାତେଙ୍କ୍ ଇତ୍‍କେ ଦାଟ୍‍ଟି, ମାନାଡ଼୍ ଅଂକିଙ୍କ୍‌ ଉଡାଙ୍କ୍ ଆଦିକାଡ଼୍ ।"

16 ତୋମା ବେନଙ୍କ୍ ଦିଦୁମ୍ ଇଞ୍ଜ କେତିତଡ଼୍‍, ଅଣ୍ଡ୍‌ ମାନ୍‍ ସାଙ୍ଗ ଶିଷ୍ୟଡ଼୍‍କ୍ କେତ୍‍ତଣ୍ଡ୍, "ଦାଟ୍‍ଟି ମାନାଡ଼୍ ଆନ୍‌‍ତେ ଗୁରୁନ୍‍ ତଡ଼୍ ଆଞ୍ଜ୍ ଅନ୍‌‍ତଡ଼୍ ଡଲିକାଡ଼୍ ।"

17 ଜିସୁ ହେଉସ୍ କେଞ୍ଜ୍‍ତଣ୍ଡ୍ ଯେ, ଅଣ୍ଡ୍‌ ନାଲୁଦିନା ଆତ୍‍ତେ ଅଂକିଙ୍କ୍‌ ସମାଦି ତାଗ୍ ୱାଟ୍‍ତଡ଼୍ । 18 ବେତନିଆ ଯିରୁଶାଲେମ୍ ତା ଗାର୍‍ରେ ମାତ୍‍ତେ, ମାତର୍ ମୁଣ୍ଡ୍ କିଲମିଟର୍ ଦୁରାମ୍; 19 ଯିହୁଦୀ ଡ଼ାଗାଙ୍କ୍ ନାର୍‍ଗେ ମାର୍ତା ନୁ ମରୀୟମ୍ ତିଙ୍କ୍ ତାମ୍ ଦାଦାଲ୍‌ ବିଷୟ୍‍ତେ ସାନ୍ତନା ହିଦାନ୍ ମାଇଦିଙ୍କ୍ ଆୱିନା ୱାସ୍‍ମାତ୍‍ତଡ଼୍‍ ।

20 ଆଗାଙ୍କ୍ ଜିସୁ ୱାତ୍‍ତଣ୍ଡ୍ ଇଞ୍ଜ ବେସୁଙ୍କ୍‍ ମାର୍ତାଲ୍ କେଞ୍ଜ୍‍ତେ, ଆସୁଙ୍କ୍ ଆଦ୍ ଜିସୁଙ୍କ୍ କାଇଲାନ୍ ମାଇଦିଙ୍କ୍ ଆତ୍‍ତେ, ବାତେଙ୍କ୍ ଇତ୍‍କେ ମରୀୟମ୍ ଲୋନ୍‌ ମାତ୍‍ତେ । 21 ମାର୍ତା ଜିସୁଙ୍କ୍ କେତ୍‍ତେ, "ପ୍ରବୁ, ନିମ୍‍ ଯଦି ଇଗେ ମାନେନି ଆଲେକେ ମା ଦାଦାଲ୍ ଡଲନ୍ ଆୟେନ୍ । 22 ବାତେଙ୍କ୍ ଇତ୍‍କେ ନାନ୍ ପୁତ୍‍ତାନ୍ ନିମ୍‍ ଇଶ୍ୱର୍‌ତିଙ୍କ୍ ବାତେଏ ମେଣ୍ଡେ ତାଲ୍‍କେ, ଇଶ୍ୱର୍ ଯେ ଆଦ୍ ଇଦ୍‍ତଣ୍ଡ୍, ହିଦ୍ ନାନ୍ ପୁତ୍‍ତାନ୍ ।"

23 ଜିସୁ ଆଦିଙ୍କ୍ କେତ୍‍ତଣ୍ଡ୍, "ମିଇ ଦାଦାଲ୍ ମେଣ୍ଡେ ଜିୱୁ ଆସ୍ ତେଦିତଣ୍ଡ୍ ।"

24 ମାର୍ତା ଜିସୁଙ୍କ୍ କେତ୍‍ତେ, "ଅଣ୍ଡ୍‌ ଯେ ଶେଷ୍ ଦିନାତେ ମେଣ୍ଡନ୍‍ନ୍ଦାମ୍ ତେଦିତଣ୍ଡ୍ ଇଦ୍ ନାନ୍ ପୁତ୍‍ତାନ୍ ।"

25 ଜିସୁ ଆଦିଙ୍କ୍ କେତ୍‍ତଣ୍ଡ୍, "ନାନ୍ ପୁନର୍‍ରୁତାନ୍ ନୁ ଜିୱୁନ୍; ବେନ ନାକିଂଙ୍କ୍ ବିଶ୍ୱାସ୍ ମାଡ଼ିତନ୍, ଅଣ୍ଡ୍‌ ବେସୁଙ୍କ୍‌ବା ଡଲ୍‍କେ, ମିକା ଅଣ୍ଡ୍‌ ଜିୱୁଅଦ୍‍ତଣ୍ଡ୍ । 26 ମେଣ୍ଡେ ବେନ ଗେଲ୍‍ସ୍‍କେ ନୁ ନାକିଂଙ୍କ୍ ବିଶ୍ୱାସ୍ ମାଡ଼ିତନ୍, ଅନ୍‌ ବେସୁଙ୍କ୍‌ବା ଡଲନ୍; ଇଦ୍ ବାତେଏ ବିଶ୍ୱାସ୍ ମାଡ଼ୁତିଡ଼୍ ?"

27 ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, "ହୋ, ପ୍ରବୁ, ବେନ ଜଗତ୍‍ତାଗ୍ ଆଗମନ୍ ମାଡ଼ାନ୍ ମାତ୍‍ତେ, ନିମ୍‍ ଯେ ଇଶ୍ୱତେ ମାର୍‍ ଆଦ୍ ମସିହ, ଇଦ୍ ନାୱାଦ୍ ବିଶ୍ୱାସ୍ ।"

28 ମରୀୟମ୍ କେତ୍‍ତେ ପେର୍‍କେ ମାର୍ତା ଆଞ୍ଜ୍ ତାନ୍ ଏଲାଡ଼୍‍ ମରୀୟମ୍ ତିଙ୍କ୍ ଜାମେ କାର୍‍ଙ୍ଗି କେତ୍‍ତେ, "ଗୁରୁ ୱାତ୍‍ତଣ୍ଡ୍ ମେଣ୍ଡେ ନିକିଂଙ୍କ୍ କାର୍‍ଙ୍ଗୁତଣ୍ଡ୍ ।" 29 ଆଦ୍ ଇଦ୍ କେଞ୍ଜି ଜାପେତେଦି ଅନ୍‌ ଗାର୍‍ରେ ଆତ୍‍ତେ । 30 ଜିସୁ ଆସୁଙ୍କ୍ ନାର୍ ଲୋପେ ୱାଡ଼୍‍ୱେ ମାତ୍‍ତଣ୍ଡ୍, ବାତେଙ୍କ୍ ଇତ୍‍କେ ମାର୍ତା ଅଂକିଙ୍କ୍‌ ବେନ୍ ପଡ଼ିୟେତାଗ୍ କାଇଲିମାତ୍‍ତେ, ଆସୁଙ୍କ୍ ଯାକ ଜିସୁ ଆଗେମାତ୍‍ତଣ୍ଡ୍ । 31 ବେନ୍ ଯିହୁଦୀନଡ଼୍ ଅଦିନ୍‌ତଡ଼୍ ଲୋନ୍‌ ମାଞ୍ଜ୍ ତାଙ୍କ୍ ସାନ୍ତନା ଇସମାତ୍‍ତଡ଼୍, ଅଡ଼୍‌ ମରୀୟମ୍ ଜାପେ ତେଦି ପେଇସ୍ ଆଦାନାଦ୍ ଉଡ଼ି, ଆଦ୍ ସମାଦି ପାକେ କେୟାନ୍ ସେଙ୍ଗେ ଆଦୁତ୍‍ତେ, ଆଦ୍ ଏର୍କା ମାଡ଼ି ଆଦିନ୍ ପେର୍‍କେ ପେର୍‍କେ ଆଦ୍‍ତଡ଼୍ ।

32 ଆଗାଙ୍କ୍ ଜିସୁ ବେନ୍ ପଡ଼ିୟେତାଗ୍ ମାତ୍‍ତଣ୍ଡ୍, ମରୀୟମ୍ ଆଦ୍ ପଡ଼ୟେ ତାଗ୍ ହେଉସ୍ ଅଂକିଙ୍କ୍‌ ଉଡ଼ି ଅନ୍‌ ଡେକାନ୍ ମଦଲ୍ ରାଲୀ କେତ୍‍ତେ, "ପ୍ରବୁ, ଯଦି ନିମ୍‍ ଇଗେ ମାନେନି, ଆଲେକେ ମା ଦାଦାଲ୍ ଡଲ୍‍ଲାନଙ୍କ୍ ଆୟେନ୍ ।"

33 ଜିସୁ ମରିୟମ୍‍ତିଙ୍କ୍ କେୟାନାଦ୍ ଉଡ଼୍‍ତଣ୍ଡ୍, ଅଣ୍ଡ୍‌ ଯିହୁଦୀନଡ଼୍‍କ୍ ଆଦିନ୍ ତଡ଼୍ ୱାତ୍‍ତାଦ୍ ଉଡ଼୍‍ତଣ୍ଡ୍ । ଅଡ଼୍‌ ମିକା କେୟମାତ୍‍ତଡ଼୍, ଆଦ୍ ଉଡ଼ି ଜିସୁ ଗାଟି ଦୁଃକ ମାଡ଼୍‍ତଣ୍ଡ୍ ନୁ ଗାଟି ଦାନ୍ଦେ ଆତ୍‍ତଣ୍ଡ୍ । 34 "ଅଂକିଙ୍କ୍‌ ବେଗା ୱାଟ୍‍ତିଡ଼୍ ?"

ଅଡ଼୍‌ ଅଂକିଙ୍କ୍‌ କେତ୍‍ତଡ଼୍, "ପ୍ରବୁ ୱାସ୍ ଉଡ଼େ ।"

35 ଜିସୁ କେୟ୍‍ତଣ୍ଡ୍ । 36 ତାନ୍ ପେର୍‍କେ ଯିହୁଦୀନଡ଼୍ କେତ୍‍ତଡ଼୍, "ଉଡ଼ାଟ୍, ଅଣ୍ଡ୍‌ ଅଂକିଙ୍କ୍‌ ବେସର୍ ସ୍ନେହ ମାଡ଼ମାତ୍‍ତଣ୍ଡ୍ ।"

37 ବାତେଙ୍କ୍ ଇତ୍‍କେ ଅଡ଼୍‌ ଆଗାଙ୍କ୍ ବେନ ବେନ୍ କେତ୍‍ତଡ଼୍, "ଇଣ୍ଡ୍ ବେନ୍ ନାରୁଣ୍ଡ୍‌ ଆ କାନାନ୍ କଣ୍ଡାଙ୍କ୍ ବେନ ସାୟେ ମାଡ଼୍‍ତଣ୍ଡ୍, ଅଣ୍ଡ୍‌ ବାତେଏ ଇନାଦ୍ ଡ଼ଲ୍‍ତାଦ୍ ମିକା ଗେଲ୍‍ସ୍‍ପେ ପାର୍‍ୱଣ୍ଡ୍ ଆୟେଣ୍ଡ୍ ?"

38 ଆଗାଙ୍କ୍ ଜିସୁ ମେଣ୍ଡ୍‍ନ୍ ଦାମ୍ ମନ୍‍ତାଗ୍ ବ୍ୟାକୁଲ୍ ଆସ୍ ସମାଦି ପାକେ ଆତ୍‍ତଣ୍ଡ୍; ଆଦ୍ ୱେରଡ଼୍ ପାଡ଼୍‍କିନାଗ୍ ମେଣ୍ଡେ ଅନ୍‌ ମୋକତାଗ୍ ୱେରଡ଼୍ କାଲ୍ ମାତ୍‍ତା । 39 ଜିସୁ ଗଟ୍ ହିତ୍‍ତଣ୍ଡ୍, "ଇଦ୍ କାଲ୍ ଗୁସ୍‍ପିମୁଟ୍," ଡଲ୍‍ତେ ନାରୁନ୍ ଏଲାଡ଼୍‍ ମାର୍ତା ଅଂକିଙ୍କ୍‌ କେତ୍‍ତେ, "ପ୍ରବୁ, ଅଣ୍ଡ୍‌ ଗାଟି ଗାବ୍ ପୋଇତଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଡଲି ନାଲୁ ଦିନା ଆଦୁତ୍‍ତେ ।"

40 ଜିସୁ ଆଦିଙ୍କ୍ କେତ୍‍ତଣ୍ଡ୍, "ଯଦି ନିମ୍‍ ବିଶ୍ୱାସ୍ ମାଡ଼କେ, ଆଲେକେ ଇଶ୍ୱର୍ ତେ ମହିମା ଉଡ଼ିତିନ୍, ଇଦ୍ ବାତେଏ ନାନ୍ ମିକିଂଙ୍କ୍ କେଲନ୍ ? 41 ଆଗାଙ୍କ୍ ଅଡ଼୍‌ କାଲ୍ ଟେଣ୍ଡ୍‍ଡ଼ିତ୍‍ତଡ଼୍ ।" ମେଣ୍ଡେ ଜିସୁ ପରୁ ଉଡ଼ିମିକା କେତ୍‍ତଣ୍ଡ୍, "ହୋ ବାବା ନିମ୍‍ ନାୟାଦ୍ ପ୍ରାର୍ତନା କେଞ୍ଜତିନ୍ ଇଞ୍ଜେ ନାନ୍ ନିକିଂଙ୍କ୍ ଦନ୍ୟବାଦ୍ ଇଦୁତାନ୍ । 42 ନିମ୍‍ ଯେ ନାୱାଦ୍ ପ୍ରାର୍ତନା କେଞ୍ଜୁତିନ୍ ଇଦ୍ ନାନ୍ ପୁତ୍‍ତାନ୍; ବାତେଙ୍କ୍ ଇତ୍‍କେ ବେନ୍ ନାରୁଡ଼୍ ସାରେପାକା ନିସ୍‍ମିନ୍ଦେଡ଼୍, ନିମ୍‍ ନାକିଂଙ୍କ୍ ରସ୍ ମିନ୍ଦେନି ଇଞ୍ଜ ଅଡ଼୍‌ ବେଲା ବିଶ୍ୱାସ୍ ମାଡ଼ିତଡ଼୍, ଆଦିନ୍ ମାଇଦିଙ୍କ୍ ଅଡ଼୍‌ ସେଙ୍ଗେ ନାନ୍ ଇଦ୍ କେତ୍‍ତାନ୍ ।" 43 ଅଣ୍ଡ୍‌ ଆଦ୍ କେସ୍ ଗାଟି ଲେଙ୍ଗ୍‍ଦେ କାର୍‍ଙ୍କ୍ ତୋଣ୍ଡ୍, "ଲାଜାର୍ ପେଇସ୍ ୱାଡ଼ା ।" 44 ଅଣ୍ଡ୍‌ ପେଇସ୍ ୱାତ୍‍ତଣ୍ଡ୍; ଅନ୍‌ କାୟ୍ ନୁ ଡେକା ସମାଦି ସିଲେତ୍ ତୋହସ୍ ମାତ୍‍ତଡ଼୍, ମେଣ୍ଡେ ଅନ୍‌ ମକତାଗ୍ ସୁଦୁଟ୍ ତୁୱାଲ୍ ଉତ୍‍ତାଦ୍ ମାତ୍‍ତେ । ଜିସୁ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, "ଇନାଦ୍ ବନ୍ଦନ୍ ଲେହେସିଶ୍ ଆଦାଙ୍କ୍ ହିମୁଟ୍ ।"

45 ଯିହୁଦୀନଡ଼୍ ଆଗାଙ୍କ୍ ନାର୍‍ଗେ, ବେନଡ଼୍ ମରୀୟମ୍ ତେ ଗାର୍‍ରେ ୱାସ୍‍ମାତ୍‍ତଡ଼୍ ନୁ ଜିସୁନ୍ ପାଡ଼୍‍ୟି ଉଡ଼୍‍ତଡ଼୍, ଅଡ଼୍‌ ଅନାଗ୍ ବିଶ୍ୱାସ୍ ମାଡ଼୍‍ତଡ଼୍; 46 ମେଣ୍ଡେ, ଅଡ଼୍‌ ତାଗାଙ୍କ୍ ବେନ ପାରୂଶୀଡ଼୍ ପାକେ ଆଞ୍ଜ୍, ଜିସୁ ବାତ୍ ବାତେଏ ପାଡ଼୍‍ୟି ମାଡ଼ିମାତ୍‍ତଣ୍ଡ୍, ଆଦ୍ ସାରେ ଅଡ଼୍‌‍କ୍ କେତ୍‍ତଣ୍ଡ୍; 47 ଆଗାଙ୍କ୍ ବେଡ଼ିଇ ଯାଜକ୍ ନୁ ପାରୂଶୀଡ଼୍ ବେଡ଼ିଇ ଶବାତାଗ୍ ଆଞ୍ଜ୍ କେତ୍‍ତଡ଼୍, "ମାନାଡ଼୍ ବାତେଏ ମାଡ଼ିକାଡ଼୍ ? ଇ ନାରୁନ୍ ତ ନାର୍‍ଗେ ବାକ୍‍ୱାକାମ୍ ମାଡ଼ୁତଣ୍ଡ୍ । 48 ଯଦି ମାମ୍‍ମେ ଅଂକିଙ୍କ୍‌ ଆଲେନ୍ ୱିଡ଼୍‍ସିଦ୍‍ତମ୍, ଆଲେକେ ସାରେତଡ଼୍ ଅନାଗ୍ ବିଶ୍ୱାସ୍ ମାଡ଼ିତଡ଼୍, ମେଣ୍ଡେ ରୋମିୟ ନାରୁଡ଼୍ ୱାସ୍ ମାନ୍‍ନାଦ୍ ମନ୍ଦିର୍‍ତିଙ୍କ୍ ନୁ ଜାତିତିଙ୍କ୍ ଦଂସ ମାଡ଼ିଦ୍‍ତଡ଼୍ ।"

49 ଅଡ଼୍‌ ଆଗାଙ୍କ୍ ଆ ହେଣ୍ଡେତ୍ ବେଡ଼୍‍ୟାଦ୍‍ ଯାଜକ୍ କୋୟାପାଲ୍‍ କେତ୍‍ତଣ୍ଡ୍, "ମିଡ଼୍ ବାତେଏ ପୁନ୍‍ୱିଡ଼୍; 50 ସାରେ ଜାତି ବିନଷ୍ଟ ଆଦାନ୍ ୱିଡ଼୍‍ସି ୱେରଣ୍ଡ୍ ନାରୁଡ଼୍ ଡଲ୍‍ନାଦ୍ ସାଏ ହିଦ୍‍ବାତ୍ ମିଡ଼୍ ବୁଜେମ୍ ଆୟୱିଡ଼୍ ।" 51 କୟାପା ନିଜେତ୍ ମାନ୍‍ ତାଗାଙ୍କ୍ ହିଦ୍ କେଲଣ୍ଡ୍, ବାତେଙ୍କ୍ ଇତ୍‍କେ ଅଣ୍ଡ୍‌ ଆଦ୍ ୱାଡ଼୍‍ସେତେ ବେଡ଼ିଇ ଯାଜକ୍ ମାନ୍ଦାନ୍ ମାଇଦିଙ୍କ୍ ହିଦ୍ ଗଟ୍ ଅନ୍‌ ମକତାଗାଙ୍କ୍ ପେଇସ୍ ମାତ୍‍ତେ, 52 ଚିହ୍ନେ ୱେରେ ଆସ୍‍ମାନ୍ଦାନ୍ ଇଶ୍ୱର୍‌ତେ ନାରୁଡ଼୍, ୱେରଡ଼୍ ଗଷ୍ଟିତାଗ୍ ଅଣ୍ଡୟାଗେ ମାଡ଼ାଙ୍କ୍ ଜିସୁଙ୍କ୍ ଡଲେ ୱେଇତିତ୍ ।

53 ଆଦିଙ୍କ୍ ଆଦ୍ ଦିନ୍‍କଞ୍ଜ୍ ଅଡ଼୍‌ ଜିସୁଙ୍କ୍ ହାଉକାଙ୍କ୍ ମାଇଦିଙ୍କ୍ ଚକ୍ରାନ୍ତ ମାଡ଼୍‍ତଡ଼୍ । 54 ଜିସୁ ଯିହୁଦୀନଡ଼୍ ଆଗାଙ୍କ୍ ମେଣ୍ଡେ ଆଦ୍‍ଦା ୱାଦା ଆୟ୍‍ୟଣ୍ଡ୍, ବାତେଙ୍କ୍ ଇତ୍‍କେ ଆଦ୍ ପଡ଼ୟେ ତାଗାଙ୍କ୍ ପେଇସ୍‍ଆଞ୍ଜ୍ ଜିରୂଶାଲମ୍ ୱିଡ଼୍‍ସି ଉଚ୍‍କ ମାନ୍ଦାନ୍ ଏପ୍ରୟିମ୍ ପେଦେର୍‍ତେ ୱେରଡ଼୍ ସହର୍ ଆତ୍‍ତଣ୍ଡ୍, ମେଣ୍ଡେ ଆ ଶିଷ୍ୟନଡ଼୍‍ତଡ଼୍ ଆଗେ ମାତ୍‍ତଣ୍ଡ୍ ।

55 ଯିହୁଦୀନଡ଼୍ "ନିସ୍ତାର୍," ପାଣ୍ଡୁମ୍ ଗାର୍‍ରେ ଏୱୁସ୍ ମାତ୍‍ତେ, ମେଣ୍ଡେ ରାଜ୍ୟକିନାଗାଙ୍କ୍ ନାର୍‍ଗେ ନାରୁଡ଼୍ ସୁସ୍ଥ ଆଦାନ୍ ମାଇଦିଙ୍କ୍ ନିସ୍ତାର୍ ପାଣ୍ଡୁମ୍ ତାଗ୍ ଜିରୂଶାଲମ୍ ଆଦ୍‍ତଡ଼୍ । 56 ଆଗେ ଅଡ଼୍‌ ଜିସୁଙ୍କ୍ ମେହେକ ମନ୍ଦିର୍ ତାଗ୍ ନିସ୍‍ମାନ୍ଦାନ୍ ୱେଲେ ତାମ୍‍ତାମ୍ କେତାଙ୍କ୍ ପସ୍‍ପ୍‍ତ୍‍ତଡ଼୍, "ମିଡ଼୍ ବାତେଏ ଏର୍କା ମାଡ଼ୁତିଡ଼୍ ? ଅଣ୍ଡ୍‌ ବାତ୍ ପାଣ୍ଡୁମ୍ ତାଗ୍ ୱାଦ୍‍ତଣ୍ଡ୍ ନା ଇଲେ ?" 57 ମୁକ୍ୟ ଯାଜକିଡ଼୍ ନୁ ପାରୂଶୀଡ଼୍ ଜିସୁଙ୍କ୍ ପଇତାନ୍ ସେଙ୍ଗେ, ଅଣ୍ଡ୍‌ ବେଗା ମିନ୍ଦେଣ୍ଡ୍, ଇଦ୍ ଯଦି ବେନ ପୁନ୍‍ତଣ୍ଡ୍, ଆଦ୍ କେତାନଙ୍କ୍ ଗଟ୍ ଇସ୍‍ମାତ୍‍ଡ଼୍ ।