1 ଅନ୍‌‍ଦାମ୍ ଜିସୁ ୱେରଡ଼୍ ପଡ଼ିୟେତାଗ୍ ପ୍ରାର୍ତନା ମାଡ଼ ମାତ୍‍ତଣ୍ଡ୍; ଅଣ୍ଡ୍‌ ପ୍ରାର୍ତନା ତେରପ୍‍ସ୍‍ତେ ୱେୟ୍, ତାମ୍ ଶିଷ୍ୟଡ଼୍ ଲୋପେକେ ୱେରଣ୍ଡ୍ ଅଂକିଙ୍କ୍‌ କେତ୍‍ତଣ୍ଡ୍, ହୋ ପ୍ରବୁ, ବାପ୍ତିସ୍ମ ଯୋହନ୍‌ ବେଦ୍‍ପୁଟୁଙ୍କ୍ ଅନ୍‌ ଶିଷ୍ୟଡ଼୍‍କିଂଙ୍କ୍ ପ୍ରାର୍ତନା ମାଡ଼ାଙ୍କ୍ ନାଡ଼ସ୍ପତଣ୍ଡ୍, ନିମେ ‍ଆଦେ ରକମ୍ ମାକିଂଙ୍କ୍ ପ୍ରାର୍ତନା ନାଡ଼ସ୍ପେ ।

2 ଜିସୁ ଆସୁଟେ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, "ବେସୁଟ୍‌ ମିଡ଼୍ ପ୍ରାର୍ତନା ମାଡ଼ିତିଡ଼୍, ଆସୁଟେ କେଲ୍‍ମୁଟ୍,

‘ହଁ ସ୍ୱର୍ଗତନି ବାବା,

ନିୟାଦ୍ ପେଦେର୍ ପବିତ୍ର ହିଞ୍ଜ ମାନ୍ୟ ହାୟି ।

ନିୟାଦ୍ ରାଜ୍ୟ ୱାଡ଼ି ।

3 ସାରେଦିନା ମାକିଂଙ୍କ୍ ଦର୍‍କାର୍‍ ଆଦାନ୍ କାଦି ହିମ୍ ।

4 ମାକିଂଙ୍କ୍ ତିପାଲ୍ ପରିକ୍ଷାତେ ମୁନ୍‍ନେ ଆଦାନଙ୍କ୍ ହିମା,

ମାତର୍ ପାପ୍‌ ତାଗାଙ୍କ୍ ମାକିଂଙ୍କ୍ ରକ୍ଷା ମାଡ଼େ ।’"

5 ଆସୁଟେ, ଜିସୁ ଶିଷ୍ୟଡ଼୍‍କିଂଙ୍କ୍ କେତ୍‍ତଣ୍ଡ୍ କି, ମିଲୋପ୍ ବେନଣ୍ଡ୍ ଇସତ୍ ସାଙ୍ଗ ମିନ୍ଦେଣ୍ଡ୍ କି, ବେନନାଗ୍‍ଆଇ ନାର୍କା ଆଞ୍ଜ୍ କେତିତଣ୍ଡ୍, ହୋ ସାଙ୍ଗ, ନାକିଂଙ୍କ୍ ମୁଣ୍ଡ୍ ରୂଟି ଉଦାର୍ ହିମ୍, 6 ବାତେଙ୍କ୍ ଇତ୍କେ ନା ୱେରଣ୍ଡ୍ ପତିକ ସାଙ୍ଗ ନା ଲୋନ୍‌ ‍ୱାସ୍‍ମିନ୍ଦେଣ୍ଡ୍, ଅଂକିଙ୍କ୍‌ ତିନ୍ଦାଙ୍କ୍ ହିଦାନ୍ ମାଇଦିଙ୍କ୍ ନାୟାଗେ ବାତେଏ ମିକା ଇଲେ, 7 ଆସୁଟେ ଅଣ୍ଡ୍‌ ଲୋପ୍‍ମାଞ୍ଜ୍ ଇଲା କେତି‍ତଣ୍ଡ୍, ନାକିଂଙ୍କ୍ କଷ୍ଟ ଇମା; ମାଆର୍‍ ବନ୍ଦ୍ଆଦୁତ୍, ନା ପିଲା ନା ତଡ଼୍ ଉଞ୍ଜିମିନ୍ଦେ; ନାନେ ତେଦୀ ନିକିଂଙ୍କ୍ ହିଦ୍‍ପାର୍‍ୱନ୍ । 8 ନାନ୍ ମିକିଂଙ୍କ୍ କେତୁତାନ୍, ଅଣ୍ଡ୍‌ ତାମ୍ ସାଙ୍ଗ ଆସ୍ ମିକା ତେଦି ହିୱକଟ ମାନ୍‍ତଣ୍ଡ୍, ହାଲାଇତ୍କେ ଅଣ୍ଡ୍‌ ସିଗ୍ ଆୟ୍‍ୟକଟ ସେନେକ୍‍ ସେନେକ୍ ତାଲ୍‍କାନ୍ ମାଇଦିଙ୍କ୍ ଅଣ୍ଡ୍‌ ତେଦି, ଅଂକିଙ୍କ୍‌ ବେସର୍ ଦର୍‍କାର୍, ଆସର୍ ଅଂକିଙ୍କ୍‌ ହିଦ୍‍ତଣ୍ଡ୍ ।

9 ନାନ୍ ମିକିଂଙ୍କ୍ କେତୁତାନ୍, ତାଲ୍‍କାଟ୍, ହାଲାଇତ୍କେ ମିକିଂଙ୍କ୍ ହିଦ୍‍ତଡ଼୍; ମେହେକାଟ୍, ହାଲାଇତ୍କେ ମିଡ଼୍ ଦର୍‍ସ୍‍କ୍‍ତିଡ଼୍; ମାଆର୍‍ଦିଙ୍କ୍ ତାଲ୍‍ସା, ହାଲାଇତ୍କେ ମି ମାଇଦିଙ୍କ୍ ତେର୍‍ସିଦ୍‍ତଡ଼୍ । 10 ବେନ ଆୟି ତାଲ୍‍କିତଣ୍ଡ୍, ଅଂକିଙ୍କ୍‌ ହିଦ୍‍ତଡ଼୍; ବେନ ମେହେକିତଣ୍ଡ୍, ଅଣ୍ଡ୍‌ ଦର୍‍ସ୍‍କିତଣ୍ଡ୍, ବେନ ମାଆର୍‍ଦିଙ୍କ୍ ତାଲ୍‍ସିତଣ୍ଡ୍, ଅନ୍‌ ମାଇଦିଙ୍କ୍ ତେର୍‍ସିତଡ଼୍ । 11 ଇଦ୍‌ରକମ୍‌ ବେନ ମିଇ ବାବାଲ୍‌ ମିନ୍ଦେଣ୍ଡ୍,ତାନ୍‌ ମାର୍‌ ରୂଟି ତାଲ୍‍କ୍‍କେ ଅଂକିଙ୍କ୍‌ ବାତ୍ କାଲ୍‍ବଦା ହିଦ୍‍ତିଡ଼୍ ? ବା ଅଣ୍ଡ୍‌ କିକେ ତାଲ୍‍କ୍‍କେ ଅଂକିଙ୍କ୍‌ ବାତ୍ ତାଡ଼ାମ୍ ହିଦ୍‍ତିଡ଼୍ ? 12 ମେଣ୍ଡେ ଗାଡ଼୍‍ବାମ୍ ତାଲ୍‍କେ ଅଣ୍ଡ୍‌ ଅଂକିଙ୍କ୍‌ ଏଟ୍‍ଗଡେଲ୍‍ ହିଦ୍‍ତଣ୍ଡ୍ କି ? 13 ମିଡ଼୍ ଦୁଷ୍ଟ ଆତ୍‍କେ ମେଣ୍ଡେ, ମି ପିଲାଙ୍କ୍ ସାୟ୍‍ ସାୟ୍‍ତାୱ ହିଦାଙ୍କ୍ ପୁତ୍‍ତିଡ଼୍, ବେନ ବାବାଲ୍ ସ୍ୱର୍ଗତାଗାଙ୍କ୍ ହିଦ୍‍ତଣ୍ଡ୍ ଅନ୍‌ ଗାର୍‍ରେ ତାଲ୍‍କାନ୍ ନାରୁଡ଼୍‍କ୍ ନାର୍ଗେ ପବିତ୍ର ଆତ୍ମା ହିଦ୍‍ତଣ୍ଡ୍ !

14 ୱେରଟ୍‍ଦିନ୍ ଜିସୁ ଗଟି ତିର୍‍ୟାଙ୍କ୍ ପାର୍‍ୱେ ନାରୁନ୍ ମେନ୍ଦୁଲ୍ ତାଗାଙ୍କ୍ ବୁତ୍‌ତିଙ୍କ୍ ତଲ ମାତ୍‍ତଣ୍ଡ୍ । ବୁତ୍‌ତିର୍‍ୟାଙ୍କ୍ ପାର୍‍ୱେ ନାରୁନ୍ ମେନ୍ଦୁଲ୍‍ତାଗାଙ୍କ୍ ପେୟିସ୍ ଆତ୍‍ତେୱେୟ୍, ଗୁଡ଼୍‍ତେ ନାରୁଡ଼୍ ଉଡ଼ି ବାକ୍‍ୱା ଆଦ୍‍ତଡ଼୍ । 15 ✝୧୧:୧୫ ମାତିଉ ୯:3୪; ୧୦:୨୫.ବାତେଙ୍କ୍ ଇତ୍କେ ଅଡ଼୍‌‍ ଆଗାଙ୍କ୍ ବେସ୍‍କ୍‍ତୁଡ଼୍‍ କେତ୍‍ତଡ଼୍, "ବୁତ୍‌ପତି ବାଲ୍‌ଜିବୁଲ୍‌ ଶକ୍ତିତେ ଜିସୁ ବୁତ୍ ୱିର୍‍ସ୍‍ପୁତଣ୍ଡ୍ ।"

16 ✝ ୧୧:୧୬ ମାତିଉ ୧୨:3୮; ୧୬:୧; ମାର୍କ ୮:୧୧. ବାଗାତ୍ ନାରୁଡ଼୍ ଅଂକିଙ୍କ୍‌ ଉଡ଼ିୟିତାଗ୍ ୱାଟାଙ୍କ୍ ଇଚ୍ଛା ମାଡ଼ମାତଡ଼୍ ତ ଇଶ୍ୱର ଯେ ତାମ୍ କାଇଲାନ୍‍ନଡ଼୍ ଇଦିନ୍ ଚିହ୍ନେ ଲେକାମ୍ ମାବ୍‍ତାଗାଙ୍କ୍ ୱେରଡ଼୍ ଚିଏହ୍ନେ ତଅତାଙ୍କ୍ କେତ୍‍ତଣ୍ଡ୍ । 17 ବାତେଙ୍କ୍ ଇତ୍କେ ଜିସୁ ଅଡ଼ାଦ୍‌ ମନ୍‍ତେ ହେର୍‍କାତିଙ୍କ୍ ପୁଞ୍ଜ୍, ହଡ଼୍‍କିଙ୍କ୍ କେତ୍‍ତଣ୍ଡ୍, ବେନ୍ ଆୟି ରାଜ୍ୟ ୱେରେଆସ୍ ନିଜର୍ ବିରୁଦତେ ତେଦିତ୍, ହାଲାଇତ୍କେ ଦ୍ୱଂସ ଆଦ୍ ତେ, ମେଣ୍ଡେ ବେନେଆଇ ଲୋନ୍‌ ୱେରେ ଆତ୍‍କେ ଆଦ୍ ଆର୍ ଆଦ୍‍ତେ । 18 ଆଲେକେ, ଶୟ୍‍ତାନ୍‍ ମେଣ୍ଡେ ୱେରେ ଆସ୍ ନିଜର୍ ବିରୁଦ୍ଦ୍‌ ତେ ନିଜେ ତେଦିତ୍, ହାଲାଇତ୍କେ ତାନାଦ୍ ରାଜ୍ୟ ବେଦ୍‍ପୁଟୁଙ୍କ୍ ତିଆର୍ ଆସ୍ ମାନ୍‍ତେ ? ନାନ୍ ବାଲ୍‌ଜିବୁଲ୍‌ ଶକ୍ତିତେ ବୁତ୍‌କିଂଙ୍କ୍ ୱିର୍‍ସ୍‍ପୁତାନ୍ ଇଞ୍ଜ ମିଡ଼୍ ତ କେତୁତିଡ଼୍ । 19 ବାତେଙ୍କ୍ ଇତ୍କେ ନାନ୍ ବେସୁଙ୍କ୍‍ ବାଆଲ୍‍ଜିବୁଲ୍‍ତ୍ ଶକ୍ତିତେ ବୁତ୍‌କିଂଙ୍କ୍ ୱିର୍‍ସ୍‍ପୁତାନ୍, ଆଲାଇତ୍କେ ମି ମାର୍‍କ୍ ବେନନ୍ ଶକ୍ତିତେ ଆୱିଙ୍କ୍ ୱିର୍‍ସ୍‍ପୁତଡ଼୍ ? ମି ମାର୍‍କ୍ ପ୍ରମାନ୍ ମାଡ଼ିତା ଯେ ମିଡ଼୍ ବୁଲ୍‍ । 20 ନାନ୍ ଯଦି ପରମେଶ୍ୱର୍‍ତେ ଶକ୍ତିତେ ବୁତ୍‌ତିକିଂଙ୍କ୍‍ ୱିର୍‍ସ୍‍ପୁତାନ୍, ଆଲାଇତ୍କେ ଇଦ୍ ପ୍ରମାନ୍ ମାଡ଼ିତ୍ ଯେ ପରମେଶ୍ୱରତାଦ୍ ରାଜ୍ୟ ମି ଗାର୍‍ରେ ହେୱ୍‍ଦୁତ୍ ।

21 ୱେରଣ୍ଡ୍ ଶକ୍ତିତେ ମାନ୍ଦାନ୍ ନାରୁଡ଼୍ କାଡ଼ିୱିଲ୍‍କ୍ ପୟ୍‍ସ୍ ନିଜର୍ ଲୋତ୍‍ତିଙ୍କ୍ କେପିମାନ୍ତତଣ୍ଡ୍, ଆସୁଙ୍କ୍ ଅନ୍‌ ସମ୍ପତ୍ତି ଯତନ୍‍ତେ ଆସ୍ ମାନ୍‍ତା; 22 ବାତେଙ୍କ୍ ଇତ୍କେ ବେସୁଟ୍‌ ଅଂକିଙ୍କ୍‌ ଅନ୍‌ ଗାଟି ଶକ୍ତିତ୍ ନାରୁଡ଼୍ ୱାସ୍, ଅନନ୍ତ ଯୁଦ୍‌ ଆସ୍ ଅଂକିଙ୍କ୍‌ ଜିଡ଼୍‍ତଣ୍ଡ୍, ଆସୁଟେ ଅନ୍‌ କାଡ଼ିୱିଲ୍‍କ୍ ପୟ୍‍ସ୍ ମାନ୍ଦାନ୍ ସାରେ ଅଣ୍ଡ୍‌ ଲାଗି ଆତ୍‍ତେ, ଅନାୱୁ ଲାଗ୍‍ ତେ ଜିନିଷ୍‍ତିଙ୍କ୍ ତୁଉସି ଆତ୍‍ତେ ।

23 ✝ ୧୧:୨3 ମାର୍କ ୯:୪୦. ବେନ ନା ତୋଡ଼୍ ଆୟ୍‍ୟଣ୍ଡ୍, ଅନ୍‌ ନା ତୋଡ଼୍‍ଦେନଣ୍ଡ୍, ମେଣ୍ଡେ ବେନ ନା ତଡ଼୍ ଅଣ୍ଡୟାଗେ ମାଡ଼ଣ୍ଡ୍, ଅଣ୍ଡ୍‌ ୱେରେ ମାଡ଼ିତନ୍ ।

24 "ଅଶୁଚି ଆତ୍ମା ୱେରନ୍ ନାରୁନାଗାଙ୍କ୍ ପେୟିସ୍ଆତ୍‍ତେ ୱେୟ୍ ଏର୍‍ ‍ହିଲ୍‍ୱା ଜାଗାକିନାଗ୍ ଆଞ୍ଜ୍ ଉଡ଼ିମେଣ୍ଡେ ରମାଙ୍କ୍ ମେହ୍‍କିତ୍, ଆସୁଟେ ମେହ୍‍କି ଦର୍‍ସ୍‍କକଟ୍ କେତିତ୍‍, ନାନେ ବେନ୍ ଲୋତ୍‍କଂଙ୍କ୍ ୱାସ୍‍ମିନ୍ଦେନ୍ ନାନେ ଆଦ୍ ଲୋନ୍‌ ମାଲ୍‍ସ୍ ଆଦ୍‍ତନ୍; 25 ଆସୁଙ୍କ୍ ବୁତ୍ ଆଦ୍ ନାରୁନାଗ୍ ମାଲ୍‍ସ୍ ଆଞ୍ଜ୍ ଉଡ଼ିତ୍, ହି ଲୋନ୍‌ ସାକ୍‍ସାକା ନୁ ଟିକ୍‍ଟାକ୍ ମିନ୍ଦେ । 26 ତାନ୍ ପେର୍‍କେ ଆଦ୍ ବୁତ୍ ଆଞ୍ଜ୍ ତାକିଂଙ୍କ୍ ଅନ୍‌ ପେର୍କେ ଦୁଷ୍ଟ ବୁତ୍‌କିଂଙ୍କ୍ ସାତ୍‍ଟାନ୍‍କିଂଙ୍କ୍ କାର୍‍ଙ୍ଗି ତାତ୍‍ତା, ଆୱ୍‍ଚାରେ ବୁତ୍‌କ୍ ଆଦ୍ ନାରୁନ୍ ଲୋପ୍ ନେଙ୍ଗି ଅଣ୍ଡୟାଗ୍ ମାନ୍‍ତା । ଆସୁଟେ ଆଦ୍ ନାରୁଡ଼୍ ମୁନେଙ୍କ୍‍ତେ କେପି ପେର୍‍କେ ଗାଟି କାରାପ୍‍ ଆଦ୍‍ତେ ।"

27 ଜିସୁ ଆଦ୍ ସାରେ ଗଟି କେତ୍‍ତାନ୍ ଦିନାମ୍‍ତେ ମାନ୍ଦେ ନାରୁଡ଼୍ ଲୋପେଙ୍କ୍ ଅଣ୍ଡ୍‌ ନାଟାଡ଼୍ ଗାଟିବେଡ଼୍‍ୟ୍ ଲେଙ୍ଗ୍‍ତେ କେତ୍‍ତା, "ଦନ୍ୟ ମି ୟାୟ୍‍ । ଆଦ୍ ନିକିଂଙ୍କ୍ ଜନମ୍‍ଇତ୍ ନୁ ପାୟାଲ୍‍ ହୁସ୍‍ପ୍‍ତେ ।"

28 ମାତର୍ ଜିସୁ କେତ୍‍ତଣ୍ଡ୍, "ଇଲା, ବେନଡ଼୍ ପରମେଶ୍ୱର୍‍ତେ ବାକ୍ୟ କେଞ୍ଜିତଡ଼୍, ମେଣ୍ଡେ ପାଲନ୍ ମାଡ଼ିତଡ଼୍, ପ୍ରକୃତ୍ ତେ ଆସତ୍ ନାରୁଡ଼୍ ଦନ୍ୟ ।"

29 ✝ ୧୧:୨୯ ମାତିଉ ୧୬:୪; ମାର୍କ ୮:୧୨. ନାର୍ଗେ ନାରୁଡ଼୍ ଜିସୁନାଗେ ଅଣ୍ଡୟ୍‌‍ ଆଦାଙ୍କ୍ ଅଣ୍ଡ୍‌ କେତ୍‍ତଣ୍ଡ୍, ଇଦ୍ ୱେରଡ଼୍ ଅଦାର୍ମିକିଡ଼୍ ବଂଶ । ଇଡ଼୍ ଅଣ୍ଡୟ୍‌ ବାକ୍‍ୱା ଚିହ୍ନତିଙ୍କ୍ ଉଡ଼ାନ୍‍ମାଇଦିଙ୍କ୍ ତାଲ୍‍କୁତଡ଼୍ । ବାତେଙ୍କ୍ ଇତ୍କେ ଯୂନସ୍‍ତେ ଚିହ୍ନେ ୱିଡ଼୍‍ସି ୱେରେ ‍ଅଣ୍ଡୟ୍‌‍ ଚିହ୍ନେ ଅଡ଼୍‌‍କିଂଙ୍କ୍ ହିଦାନାଦ୍ ଆୟ୍‍ୟ । 30 ଇତ୍କେ ଯୂନସ୍ ବେଦ୍‍ପୁଟୁଙ୍କ୍ ନୀନିବି ନାରୁଡ଼୍ ସେଙ୍ଗେ ଚିହ୍ନେତ୍‍ ଲେକାମ୍ ଆତ୍‍ତଣ୍ଡ୍, ଆଦେ ରକମ୍‍ ନାରୁନ୍‍ପିଲେ ଇଞ୍ଜେ ମାନ୍ଦାନ୍ ନାରୁଡ଼୍ ବଂଶତ୍ ମୁନେ ଚିହ୍ନେତ୍‍ ଲେକାମ୍ ଆଦ୍‍ତନ୍ । 31 ଦକ୍ଷିଣ୍ ପାକା ଦେଶ୍‍ତାଦ୍ ଶିବା ରାଣିଲ୍ ବିଚାର୍ ଦିନାତେ ହି ବଂଶତ୍ ନାରୁଡ଼୍ ବିରୁଦ୍ ତେ ତେଦି ଅଡ଼୍‌‍କିଂଙ୍କ୍ ଦଷି ମାଡ଼ିତ୍; କାରନ୍‍ ଆଦ୍ ଶଲୋମନ୍‍ତେ ବୁଦ୍‍ତେ ଗଟ୍ କେଞ୍ଜାଙ୍କ୍ ପୃତିବିତେ ପ୍ରନ୍ତତାଗାଙ୍କ୍ ୱାସ୍‍ମାତ୍‍ତା; ମେଣ୍ଡେ ଉଡ଼ାଟ୍, ଲୋମନ୍‍ତିଙ୍କ୍ ଅନ୍‌ ବେଡ଼୍‍ୟନ୍ ୱେରଣ୍ଡ୍ ହିଗ୍ ମିନ୍ଦେଣ୍ଡ୍ । 32 ବିଚାର୍ ଦିନ୍‍ ନିନିବୀତେ ନାରୁଡ଼୍ ମିଇ ବିରୁଦ୍ଦ୍‌ତେ ଅବିଯଗ୍ ମାଡ଼ାଙ୍କ୍ ନିଲ୍‍ଦ୍‍ତଡ଼୍, ବାତେଙ୍କ୍ ଇତ୍‍କେ ଯୁନସ୍‍ତେ ପ୍ରଚାର୍ କେଞ୍ଜି ଅଡ଼୍‌ ପାପ୍ ଆର୍ଦାଗା ମାଲ୍‍ସ୍ ୱାତ୍‍ତଡ଼୍ । ନାନ୍ ମିକିଂଙ୍କ୍ କେତୁତାନ୍, ଯୁନସ୍‍ତାଗାଙ୍କ୍ ମହାନ୍ ୱେରନ୍ ହିଗେ ମିନ୍ଦେନ୍ ।

33 ✝ ୧୧:33 ମାତିଉ ୫:୧୫; ମାର୍କ ୪:୨୧; ଲୁକ ୮:୧୬. "ବେନ କୁପିତିଙ୍କ୍ ନିଡ଼୍‍ସ୍‍ପି ତାକିଂଙ୍କ୍ ଉଡ଼୍‍ପାର୍‍ୱା ପଡ଼୍‍ୟ୍‍ତାଗ୍, ମେଣ୍ଡେ, ବଡ୍ ମଦଲ୍ ମୁସି ୱାଟଡ଼୍, ମାତର୍ କୁପିତିଙ୍କ୍ ଦୀପରୂକା ପରକେ ୱାଟିତଡ଼୍, ବେଦ୍‍ପୁଟୁଙ୍କ୍ ଲୋପ୍ ନେଙ୍ଗାନ୍ ନାରୁଡ଼୍ ୱେୟ୍‍ସିଇଙ୍କ୍ ଉଡ଼୍‍ ପାର୍‍ତଡ଼୍ । 34 କଣ୍ଡା ମେନ୍ଦୁଲ୍‍ତେ କୁପି ରକମ୍ । ବେସୁଙ୍କ୍‍ ମି କଣ୍ଡା‌ ସାୟ୍‍ ମାନ୍‍ତା, ଆସୁଙ୍କ୍ ମି ସାରେ ମେନ୍ଦୁଲ୍ କୁପି ଲେକାମ୍‍ ୱେୟ୍‍ସ୍ ଆଦ୍‍ତେ; ବାତେଙ୍କ୍ ଇତ୍କେ ବେସୁଙ୍କ୍‍ ମି କଣ୍ଡା କାରାପ୍ ଆଦ୍‍ତେ, ଆସୁଙ୍କ୍ ମି ମେନ୍ଦୁଲ୍ ଆନ୍‌‍ତେ ହିକାଡ଼୍‍ ଆଦ୍‍ତା । 35 ମିଡ଼୍ ସାବ୍‍ଦାନ୍, ବେଲା କି ମିୟାଦ୍ ହୃଦୟ୍‍ତେ ୱେୟ୍‍ସ୍ ଇକାଡ଼୍ ଆୟ୍‍ମାକି । 36 ଯଦି ମିୟାଦ୍ ମେନ୍ଦୁଲ୍ ସାରେ ୱେୟ୍‍ସ୍ ଆଦ୍ ତେ, ଆଗେତ୍ ବେନେ ଲେକାତ୍ ହିକାଡ଼୍ ମାନ୍‍, ହାଲାଇତ୍କେ କୁପି ମିକିଂଙ୍କ୍ ୱେୟ୍‍ସ୍ ମାଡ଼୍‍ତେ ଲେକାମ୍, ଆଦ୍‍ପୁଟୁଙ୍କ୍ ମି ମେନ୍ଦୁଲ୍‍ତେ ସାରେ ୱେୟ୍‍ସ୍ ଆଦ୍‍ତେ ।"

37 ଜିସୁ ଗଟି କେତ୍‍ତାନ୍ ତେର୍‍ସ୍‍ପି ୱେରଣ୍ଡ୍ ପାରୂଶୀ ଜିସୁଙ୍କ୍ ତାନ୍ ଲୋନ୍‌ ତିନ୍ଦାନ୍ ମାଇଦିଙ୍କ୍ କାର୍‍ଙ୍ଗତଣ୍ଡ୍ । ଆସୁଟେ ଜିସୁ ଆଦ୍ ଲୋନ୍‌ ନେଙ୍ଗି ତିନ୍‍ନ୍ଦାଙ୍କ୍ କୁଦ୍‍ତଣ୍ଡ୍ । 38 ବାତେଙ୍କ୍ ଇତ୍କେ ତିନ୍ଦାନ୍ ମୁନେଙ୍କ୍ ଜିସୁ ଯିହୁଦୀ ରୀତି ଲେକାମ୍ କାୟ୍‍କ୍ ଡେକା ନର୍‍ୱାଙ୍କ୍ ଇଦ୍ ପାରୂଶୀ ଉଡ଼ି ବାକ୍‍ୱା ଆତ୍‍ତଣ୍ଡ୍ । 39 ଆସୁଙ୍କ୍ ପ୍ରବୁଜିସୁ ଅଂକିଙ୍କ୍‌ କେତ୍‍ତଣ୍ଡ୍, ମିଡ଼୍ ତ ଫାରୂଶୀନାରୁଡ଼ି ତାଲିଗିନାଙ୍କ୍ ବାୟ୍‍ଦେତ୍ ପାକେ ପରିଷ୍କାର୍ ମାଡ଼ୁତିଡ଼୍, ମାତର୍ ମି ଲୋପେ ବୁସାମାଡ଼୍‍ ତେ ପାଡ଼ିୟେ ନୁ କାରାପ୍ ନିଣ୍ଡିମିନ୍ଦେ ମିନ୍ଦେ । 40 ହୋ ମଣ୍ଡି ନାରୁଡ଼ି, ବେନ ବାୟିଦେ ତିଆର୍ ମାଡ଼୍‍ତଣ୍ଡ୍, ଅଣ୍ଡ୍‌ ବାତ୍ ଲୋପ୍‍ଆନ୍‌‍ତେ ତିଆର୍ ମାଡ଼ଣ୍ଡ୍ କି ? 41 ମିୟାଗ୍ ବାତା ମିନ୍ଦେ ଆୱ୍ ସାରେ ଗରିବ୍ ନାରୁଡ଼୍‍କ୍ ଦାନ ମାଡ଼ାଟ୍ ଆସୁଟେ ନିଜାତେ ସାରେ ପୁରା ପରିଷ୍କାର୍ ଆଦ୍‍ତେ ।

42 ହୋ ଫାରୂଶୀ ନାରୁଡ଼୍ ମିଡ଼୍ ଦଣ୍ଡତେ ପାତ୍ର ! ମିଡ଼୍ ସାରେ ବିଷୟ୍ ତେ ଦଶମାଂଶ ପରମେଶ୍ୱରତିଙ୍କ୍ ଇସ୍‌‍ମାନୁଟ୍ । ପୋଦିନା, ଆରୁଦ ନୁ ନ୍ୟାୟ ବିଚାର୍ ନୁ ପରମେଶ୍ୱର୍‍ତେ ପ୍ରେମତିଙ୍କ୍ ଗମାଡ଼୍ ମାଡ଼୍‍ମାଟ୍; ହିଦ୍ ସାରେ ପାଲନ୍ ମାଡ଼ିକାଡ଼୍ ବାଗାତ୍ ସାର୍‍ତିଙ୍କ୍ ଗମାଡ଼୍ ମାଡ଼ାନାଦ୍ ଲେକେତ୍ ଆୟ୍‍ୟ ।

43 "ହୋ ପାରୂଶୀନାରୁଡ଼ି, ମିଡ଼୍ ଦଣ୍ଡତେ ପାତ୍ର, ବାତେଙ୍କ୍ ଇତ୍କେ ମିଡ଼୍ ସମାଜ୍ ଲୋତ୍‍ତାଗ୍ ବାଡ଼୍‍ୟଣ୍ଡ୍ ଆଦାଙ୍କ୍ ନୁ ହାଟ୍ ବାଜାର୍‍ତାଗ୍ ନମସ୍କାର୍ ଦର୍‍କାଙ୍କ୍ ସାୟେ ପ୍ରେମ ଇଞ୍ଜ ଇଚ୍ଛା ମାଡ଼ୁତିଡ଼୍ । 44 ହୋ, ମିଡ଼୍ ଦଣ୍ଡତେ ନାରୁଡ଼୍‌ ଆଦ୍‍ତିଡ଼୍, କାରନ୍‍ ମିଡ଼୍ ମିଞ୍ଜି ମାନ୍ଦାନ୍ ସମାଦି ଲେକାମ୍; ଆଦିନ୍ ପରୁ ନାରୁଡ଼୍ ପୁନକଟ ତାକିଆଦ୍‍ତଡ଼୍ ।"

45 ଆସୁଟେ, ୱେରଣ୍ଡ୍ ଶାସ୍ତ୍ରୀ ଜିସୁଙ୍କ୍ କେତ୍‍ତଣ୍ଡ୍, "ହୋ ଗୁରୁ, ଇଦ୍ କେସ୍ ନିମେ ମାକିଂଙ୍କ୍ ଆନ୍‌‍ତେ ଅପ୍‍ମାନ୍ ମାଡ଼ୁତିନ୍ ।"

46 ଆଦ୍ ‍କେଞ୍ଜି ଜିସୁ କେତ୍‍ତଣ୍ଡ୍, ହୋ ଦର୍ମଶାସ୍ତ୍ରନାରୁଡ଼ି ହାୟ, ମିଡ଼୍ ନାରୁଡ଼୍ ପରୁ କଷ୍ଟତ୍ ନିୟମ୍‍ତେ ବୋଜ୍ କାଞ୍ଜ୍‍ପିସ୍ ମିନ୍ଦେଡ଼ି ଯେ, ଆଦିଙ୍କ୍ କଞ୍ଜାନଙ୍କ୍ କଷ୍ଟ ଆଦୁତ୍‍ତେ । ହି ନିୟମ୍‍ତିଙ୍କ୍ କେଞ୍ଜାନଙ୍କ୍ ମିଡ଼୍ ନାରୁଡ଼୍‍କିଂଙ୍କ୍ ତିଆର୍ ମାଡ଼ୁତିଡ଼୍ । ବାତେଙ୍କ୍ ଇତ୍କେ ନିଜେ ବେସୁଟ୍‌ ଆନ୍‌‍ତେ ହିଗାଙ୍କ୍ ୱେରଡ଼୍ ମେଣ୍ଡେ ନିୟମ୍ ପାଲନ୍ ମାଡ଼ାଙ୍କ୍ ସାହାଯ୍ୟ ମାଡ଼୍‍ୱିଡ଼୍ । 47 ମିଡ଼୍ ଦଣ୍ଡ ଆଦ୍‍ତିଡ଼୍ ! ମିଡ଼୍ ବାବବାଦୀଡ଼ାଦ୍‍ ସମାଦି ସୁନ୍ଦର୍ ତିଆର୍ ମାଡ଼ୁତିଡ଼୍, ବେନଡ଼କ୍ ମି ମୁନେତ୍ ନାରୁଡ଼୍ ଆୱ୍‍କି ମାତ୍‍ତଡ଼୍ । 48 ମିଡ଼୍ କେଞ୍ଜୁତିଡ଼୍ ଯେ ମି ଆନିଦାଦିଡ଼୍ ବାତେଏ ମାଡ଼୍‍ତଡ଼୍ ଆଦିଙ୍କ୍ ମିଡ଼୍ ତଡ଼େକ୍ ମାଡ଼ୁତିଡ଼୍, ଅଡ଼୍‌‍ ବାବବାଦୀଡ଼୍‍କ୍ ହାୱ୍‍କ୍‍ତଡ଼୍ ମେଣ୍ଡେ ମିଡ଼୍ ଅଡ଼ାୱୁ ସମାଦି ତିଆର୍ ମାଡ଼ୁତିଡ଼୍ । 49 ପରମେଶ୍ୱର୍ ଆନ୍‌‍ତେ ନିଜର୍ ବୁଦ୍‍ତେ କେସ୍‍ମିନ୍ଦେଣ୍ଡ୍, ନାନେ ଅଡ଼୍‌‍ ଗାର୍‍ରେ ବାବବାଦୀନଡ଼କ୍ ନୁ ପ୍ରେରିତ୍‍ ଶିଷ୍ୟଡ଼୍‍କ୍ ରହ୍‍ତିତାନ୍, ଅଡ଼୍‌‍ ଲୋପେଙ୍କ୍ ବେସ୍‍କ୍‍ତୁଡ଼୍‍କିଂଙ୍କ୍ ଅଡ଼୍‌‍ ଆୱ୍‍କିତଡ଼୍ ନୁ ମେଣ୍ଡେ ବାଗାତଡ଼୍‍କିଙ୍କ୍ ତାଡ଼ନା ମାଡ଼ିତଡ଼୍, 50 ଇଦ୍ ଯୁଗ୍‍ତେ ନାରୁଡ଼୍ ପୃତିବିତେ ତିଆର୍ ମୁନେଙ୍କ୍ ସାରେତଡ଼୍ ବାବବାଦୀଡ଼୍ ହାୱୁକ୍‍ତେ ସେଙ୍ଗେ ଦଣ୍ଡ୍ ଆଦ୍‍ତଡ଼୍ । 51 ହେବଲ୍‍ତେ ହାୱୁକ୍‍ତେ ଆରାମ୍ ମାଡ଼ି ଯିକରୀୟନ୍ ହେଉନା ବେନଡ଼୍‍କ୍ ବେଦୀ ନୁ ପବିତ୍ର ପଡ଼ିୟେତାଗ୍ ହାୱୁକ୍‍ତେ ମାଡ଼ିମାତ୍‍ତଡ଼୍ । ହଁ, ନାନ୍ ମିକିଂଙ୍କ୍ କେତୁତାନ ଇଦ୍ ଯୁଗ୍‍ତେ ନାରୁଡ଼୍ ଦଣ୍ଡ ଆଦ୍‍ତଡ଼୍ । ତିଆର୍ ଆତ୍‍ତାଗାଙ୍କ୍ ବେସ୍‍କ୍‍ତଡ଼୍ ବବିଷ୍ୟଦ୍ ବକ୍ତାଲଡ଼୍ ନେତୁର୍‍ ଇସ୍‍ମିନ୍ଦେ, ଆଦିନ୍‌ମାଇଦିଙ୍କ୍ ହି ଦିନାମ୍‍ତେ ଜିୱୁନ୍ ମାନ୍ଦାନ୍ ନାରୁଡ଼୍‍କିଂଙ୍କ୍ ଦଣ୍ଡ ଆଦ୍‍ଦେ ୱେୟ୍‍ତିତ୍ । 52 "ହୋ ଦର୍ମଶାସ୍ତ୍ରୀଡ଼୍ ! ମିଡ଼୍ ଦଣ୍ଡ ଆଦ୍‍ତିଡ଼୍, ମିଡ଼୍ ପରମେଶ୍ୱର୍‍ତେ ଜ୍ଞାନତାଦ୍ କୁଚ୍‍କାଇତିଙ୍କ୍ ମିଞ୍ଜ୍‍ପିତିଡ଼୍, ବେଦ୍ ଜ୍ଞାନତାଦ୍ ହାର୍‍ଦିଙ୍କ୍ ଟେଣ୍ଡି । ମିଡ଼୍ ନିଜେ ଐଶ୍ୱରିକ୍ ବୁଦ୍‍ ନାଡ଼ସ୍‍ୱିଡ଼୍ କି, ବେନଡ଼୍ ନାଡ଼୍‍ସାଙ୍କ୍ ଇଚ୍ଛା ମାଡ଼ମାତ୍‍ତଡ଼୍, ଅଡ଼୍‌‍କିଂଙ୍କ୍ ଆନ୍‌‍ତେ ନାଡ଼୍‍ସାଙ୍କ୍ ହିୱୀଡ଼୍ ।"

53 ଆସୁଙ୍କ୍ ଜିସୁ ଅଡ଼୍‌‍ ଆଗାଙ୍କ୍ ପେୟିସ୍ ଆଦ୍‍ଦାନ୍ ୱେୟେ ଶାସ୍ତ୍ରୀଡ଼୍ ନୁ ପାରୂଶୀଡ଼୍ ଗାଟି ଇର୍ଷା ବା କପାମ୍ ଆସ୍, 54 ବାତେଙ୍କ୍ ଇତ୍କେ ଅଡ଼୍‌‍ ଜିସୁଙ୍କ୍ ବେସ୍‌କ୍ ବୁଲ୍ ଗଟ୍ କେସ୍ ଉଡ଼ୁଇତାଗ୍ ରାପାନଙ୍କ୍ ହାର୍ ମେହେକ ମାତ୍‍ତଡ଼୍ ।