ଯିଶାଇୟ 29

ଦାଉଦ୍‌ତେ ନଗର୍‌ ପର ଦଣ୍ଡ

1 ହୋ ଅରିୟେଲ୍‌, ଅରୀୟେଲ୍‌, ଦାଉଦ୍‌ତେ ହେଞ୍ଚ୍‌ତେ ନଗର୍‌ ! ବର୍ଷତିଙ୍କ୍‌ ବର୍ଷ କାଇଲାଟ୍‌; ମେଟାକିନ୍‌ ପାଲି ଲେକାମ୍‌ ୱାଡ଼ି; 2 ଆଲେକେ ମାମେ ଅରିୟେଲ୍‌ତେ ପରୁ ଦୁଃକାମ୍‌ ତାତିକାଡ଼୍‌, ଆସୁଙ୍କ୍‌ ଚିନ୍ତେ ନୁ କେୟାନାଦ୍‌ ଆଦ୍‌ତେ ନୁ ଆଦ୍‌ ମାନ୍‌ ପରୁ ଅରୀୟେଲ୍‌ ବଲିଦାନ ପଡ଼ିୟେ ଲେକାମ୍‌ ଆଦ୍‌ତେ। 3 ମେଣ୍ଡେ, ମାମେ ସାରେପାକେ ନି ବିରୁଦ୍ଦ୍‌ତେ ଗୁଡ଼୍‌ସା ତିଆର୍‌ ମାଡ଼ିତମ୍‌ ନୁ ଡେକାଙ୍କ୍‌ ତଃସ୍‌ ନିକିଙ୍କ୍‌ କାଇଲାନାଦ୍‌ ମାଡ଼ିକା ନୁ ନି ବିରୁଦ୍ଦ୍‌ତେ ଅଡ଼୍‌କିଙ୍କ୍‌ ୱାଦାନ୍‌ ସେଙ୍ଗେ ବନ୍ଦ୍‌ ମାଡ଼ିକାଡ଼୍‌। 4 ଆସୁଙ୍କ୍‌ ମିଡ଼୍‌ ଡଲିତିଡ଼୍‌ ନୁ ବୂମ୍‌ଦାଗାଙ୍କ୍‌ ଗଟ୍‌ କେତିତ୍‌ ନୁ ଦୁମ୍‌ତାଗାଙ୍କ୍‌ ମିୟାୱୁ ଗଟି ସୁଦୁର୍‌ ଲେଙ୍ଗ୍‌ ଲେକାମ୍‌ ଆଦ୍‌ତା; ମେଣ୍ଡେ, ବୁତ୍‌କିନ୍‌ ଲେଙ୍ଗ୍‌ ବୁମ୍‌ଦାଗାଙ୍କ୍‌ ପେଇତିତ୍‌ ନୁ ଦୁମ୍‌ଦାଗାଙ୍କ୍‌ ମିୟାୱୁ ଗଟି ଜାମେ ଜାମେ ତିର୍ୟାନାଦ୍‌ କେଞ୍ଜାନଙ୍କ୍‌ ଆଦ୍‌ତେ। 5 ବାତେଙ୍କ୍‌ଇତ୍କେ ମି ଶତ୍ରୁନଡ଼୍‌ ନାରୁଡ଼୍‌ ମୁନେ ୱାସ୍‌ତେ ଦୂମ୍‌ ଲେକାମ୍‌ ଆଦ୍‌ତଡ଼୍‌ ନୁ ବୟଙ୍କାର୍‌ତେ ନାରୁଡ଼୍‌ ମାନ୍ଦେ ତୁଃତାନ୍‌ ପଲେ ଲେକାମ୍‌ ଆଦ୍‌ତେ; ୱେରଡ଼୍‌ ନିମିଷତାଗ୍‌ ହଟାତ୍‌ ଇଦ୍‌ ଗଟେମ୍‌ଆଦ୍‌ତେ। 6 ସାରେତିଙ୍କ୍‌ ବେଡ଼ିୟେ ସଦାପ୍ରବୁ ମାବ୍‌ନେକାନ୍‌ ନୁ ବୂମିକମ୍ପ ନୁ ବାଡ଼ିୟେ ଲେଙ୍ଗ୍‌, ଉର୍‌ଗାଲ୍‌ ନୁ ୱାଡ଼୍‌ସାମ୍‌ ନୁ କିସ୍‌ତାଡ଼୍‌ମିନ୍‌ ୱାଦ୍‌ତେ। 7 ମେଣ୍ଡେ, ସାରେଗୋଷ୍ଠି ବେନ୍‌ ନାରୁଡ଼୍‌ ମାନ୍ଦେ ଅରିୟେଲ୍‌ ବିରୁଦ୍ଧତେ ଯୁଦ୍ଦ୍‌ ମାଡ଼ିତଡ଼୍‌, ଇତ୍କେ, ବେନଡ଼୍‌ ଆଦିନ୍‌ ନୁ ତାନ୍‌ ଡାଟୁଙ୍କ୍‌ ବିଶ୍ୱାସ୍‌ତେ ସାରେପାକେ ଯୁଦ୍‌ମାଡ଼ି ଆଦିଙ୍କ୍‌ ଆରାମାଡ଼ିତଡ଼୍‌, ଆୱୁସାରେ ସାପ୍ନେ ଲେକାମ୍‌, ନାର୍କେ ଉସ୍କାଡ଼୍‌ତେ ସାପ୍ନେତେ ଲେକାମ୍‌। 8 ବେଲାନ୍‌ କାର୍ୱିନ୍‌ ନାରୁଣ୍ଡ୍‌ ସାପ୍ନେତେ ତିଞ୍ଜମିନ୍ଦେଣ୍ଡ୍‌ ଇଞ୍ଜ ଉଡ଼ିତଣ୍ଡ୍‌, ମାତର୍‌ ଅଣ୍ଡ୍‌ ବେସୁଙ୍କ୍‌ ତେଦ୍‌ଦିତଣ୍ଡ୍‌, ଅନାଦ୍‌ ଡଲାନାଦ୍‌ ଦୁରାମ୍‌ ମାନ୍ତେ; ବେଲାନ୍‌ ଉନ୍ଦେୱାତ୍‌ତେ ନାରୁନ୍‌ ଏର୍‌ ଉଞ୍ଜମିନ୍ଦେଣ୍ଡ୍‌ ଇଞ୍ଜ୍‌ ସାପ୍ନେତେ ଉଡ଼ିତଣ୍ଡ୍‌, ମାତର୍‌ ଅଣ୍ଡ୍‌ ତେଦ୍‌ତ୍କେ, ଅଣ୍ଡ୍‌ ଦୁର୍ବଳ ମାନ୍ତଣ୍ଡ୍‌ ନୁ ଅନାଦ୍‌ ଏର୍‌ ଉନ୍ଦାନାଗେ ମାତ୍କେ, ସିୟୋନ୍‌ ମେଟେତେ ବିରୁଦ୍ଦ୍‌ତେ ଯୁଦ୍ଦ୍‌ତେନଡ଼୍‌ ସାରେନାର୍ଦେ ନାରୁଡ଼୍‌ମୁନେ ଆଦ୍‌ ଲେକାମ୍‌ ଆଦ୍‌ତେ।

ଡେରି ମାନ୍ଦାନନ୍‌ ଚେତ୍‌ନା ଇଦାନାଦ୍‌

9 ମିଡ଼୍‌ ଆନୁଟ୍‌ ନୁ କାବ୍‌ବା ଆୟ୍‌ମୁଟ୍‌; ନିଜେ ନିଜ୍‌ତିଙ୍କ୍‌ କାନାଲ୍‌ ମାଡ଼ାଟ୍‌ ନୁ କାନାଲ୍‌ ଆୟ୍‌ମୁଟ୍‌; ଅଡ଼୍‌ ତିଆର୍‌ତେ ମିନ୍ଦେଡ଼୍‌, ମାତର୍‌ ଅଙ୍ଗୁର୍‌ରସ୍‌ତାଗ୍‌ ଆୟ; ଅଡ଼୍‌ ଟିଡ୍‌ଟାଡ୍‌ ଆଦ୍‌ତଡ଼୍‌, ମାତର୍‌ କାଲ୍‌ତଡ଼୍‌ ଆୟ। 10 ବାତେଙ୍କ୍‌ଇତ୍କେ ସଦାପ୍ରବୁ ମି ପରୁ ଗୁମ୍‌ ଉସ୍କାଡ଼୍‌ତେ ଆତ୍ମା ୱାଟିମିନ୍ଦେଣ୍ଡ୍‌ ନୁ ମିୟାଦ୍‌ ବବିଷ୍ୟତ୍‌ ବକ୍ତାନଡ଼୍‌ କଣ୍ଡା କାନାଲ୍‌ ମାଡ଼ିମିନ୍ଦେଣ୍ଡ୍‌ ନୁ ଉଡ଼ାନ୍‌ ନାରୁଡ଼୍‌ ଲେକାମ୍‌ ମିୟାୱୁ ତାଲ୍‌ଲା ଅଣ୍ଡ୍‌ ମୁସି ମିନ୍ଦେଣ୍ଡ୍‌। 11 ମେଣ୍ଡେ, ସାରେ ଉଡ଼ାନାଦ୍‌ ମି ପରୁ ଲେକ୍‌ତେ ବାକ୍ୟ ଡାବ୍‌ତାଗ୍‌ ଚିନ୍ନେ ଆସ୍‌ମିନ୍ଦେ, ବେନ କାର୍‌ତାନ୍‌ ନାରୁଙ୍କ୍‌ ଆଦ୍‌ ଇସ୍‌ ଅନୁରଦ୍‌ ମାଡ଼ି ଆଦ୍‌ କାର୍‌ସ୍‌ କେତ୍‌ତଣ୍ଡ୍‌, ଅଣ୍ଡ୍‌ କେତିତଣ୍ଡ୍‌, ଇଦ୍‌ ଚିଲ୍‌ଦେ ଲେକାଆସ୍‌ ମିନ୍ଦେ, ଆଦିଙ୍କ୍‌ ନାନେ କାର୍‌ତେ ପାର୍‌ୱନ୍‌; 12 ମେଣ୍ଡେ, ଆଦ୍‌ ବହି ପାଟ୍‌ କାର୍‌ତେ ନାରୁଙ୍କ୍‌ ଇସ୍‌, ଅନୁରଦ୍‌ ମାଡ଼ି ଇଦ୍‌ କାର୍‌ମ୍‌ଇଞ୍ଜ କେତ୍‌ତଡ଼୍‌, ଅଣ୍ଡ୍‌ କେତିତଣ୍ଡ୍‌, ନାନେ ପାଟ୍‌କାର୍‌ତେନନ୍‌ ଆୟନ୍‌। 13 ମେଣ୍ଡେ, ପ୍ରବୁ କେତ୍‌ତଣ୍ଡ୍‌, ଇ ନାରୁଡ଼୍‌ ମା ଗାରେତଡ଼୍‌ ୱାଦ୍‌ତଡ଼୍‌ ନୁ ଅଡ଼୍‌ ନିଜେ ମକମ୍‌ତେ ନୁ ପାୟୁର୍‌ତାଗ୍‌ ସମ୍ମାନ୍‌ ମାଡ଼ିତଡ଼୍‌, ମାତର୍‌ ଅଡ଼୍‌ ତାମ୍‌ ତାମ୍‌ ହୃଦୟ୍‌ତେ ମାନାଗାଙ୍କ୍‌ ଯେକା ନେଃସ୍‌ ମିନ୍ଦେଡ଼୍‌ ନୁ ମାନ୍‌ ବିଷୟକି ଅଡ଼୍‌ ବେନ୍‌ ୱେର୍‌, ଆଦ୍‌ ନାରୁଡ଼ାଗାଙ୍କ୍‌ ପାଟ୍‌ତେ ଆଦେଶ୍‌ ଆଦ୍‌ତେ। 14 ଆଦିଙ୍କ୍‌ ଉଡ଼ାଟ୍‌, ମାମେ ଇ ନାରୁଡ଼ାଗ୍‌ ୱେରଡ଼୍‌ ବାକ୍‌ୱା କାମ୍‌, ଇତ୍କେ, କାବ୍‌ବା ନୁ ବାକ୍‌ୱା କାମ୍‌ ମାଡ଼ିକାଡ଼୍‌, ମେଣ୍ଡେ ଅଡ଼୍‌ ଜ୍ଞାନୀ ନାରୁଡ଼୍‌ ବୁଦ୍‌ ନଷ୍ଟ ଆଦ୍‌ତେ ନୁ ଅଡ଼୍‌ ମାନ୍‌ତାଗ୍‌ ଆଲ୍ସାନାଦ୍‌ ନାରୁଡ଼୍‌ ବୁଦ୍ଦ୍‌ ମାଇ ଆଦ୍‌ତେ।

ମୁନେତାଦ୍‌ ଏର୍କେ

15 ବେନଡ଼୍‌ ସଦାପ୍ରବୁନାଗାଙ୍କ୍‌ ନିଜେ ନିଜେ ମନ୍ତ୍ରଣା ମିଞ୍ଜ୍‌ସ୍ପାନଙ୍କ୍‌ ଚେଷ୍ଟା ମାଡ଼ିତଡ଼୍‌, ଅଡ଼୍‌ କାରାପ୍‌ ନାରୁଡ଼୍‌ ! ମେଣ୍ଡେ, ଅଡ଼୍‌ ଇକାଡ଼୍‌ତାଗେ ନିଜେ ନିଜେ କାମ୍‌ ମାଡ଼ି କେତିତଡ଼୍‌, "ମାକିଙ୍କ୍‌ ବେନ ଉଡ଼ୁତଣ୍ଡ୍‌ ? ନୁ ମାକିଙ୍କ୍‌ ବେନ ହେଞ୍ଚ ମିନ୍ଦେଣ୍ଡ୍‌ ?" 16 ମିଡ଼୍‌ ବିଷୟତିଙ୍କ୍‌ ଉଲ୍‌ଟା ୱାଟୁତିଡ଼୍‌ ! କୁମାଲ୍‌ କି ମାଣ୍ଡଲ୍‌ତେ ଲେକାମ୍‌ ଆଦ୍‌ତଣ୍ଡ୍ କି; "ଇ ନାରୁଣ୍ଡ୍‌ ମାକିଙ୍କ୍‌ ତିଆର୍‌ ମାଡ଼ଣ୍ଡ୍‌," ତିଆର୍‌ତେ ଜିନିଷ୍‌ କି ସୃଷ୍ଟି କର୍ତ୍ତାନ୍‌ ବିଷୟ୍‌ତେ ଇଦ୍‌ କେତିତଡ଼୍‌ ? କି "ଅନାଦ୍‌ ବାତ୍‌ତେ ବୁଦ୍ଦ୍‌ ଇଲ୍‌ଲେ, ମୁସ୍‌ତେ ଜିନିଷ ବା ତିଆର୍‌ ମାଡ଼ାନ୍‌ ନାରୁଣ୍ଡ୍‌ ବିଷୟ୍‌ତେ ଇଦ୍‌ କେତୁତ୍‌ ?" 17 ଅଦିକ୍‌ ଇସୁର୍‌ କାଲାତେ ଲିବାନୋନ୍‌ ବାତ୍‌ତେ ଆଦାନ୍‌ ୱାୟେତାଗ୍‌ ବାତ୍‌ତେ ପରିବର୍ତ୍ତନ୍‌ ଆୟ କି ନୁ କାୟା ଆଦାନ୍‌ ୱାୟେ କି ଗୁପେ ଲେକାମ୍‌ ଆୟ ? 18 ମେଣ୍ଡେ, ଆଦ୍‌ ଦିନେତେ ବାୟିରାଲ୍‌, ବହିତେ ବାକ୍ୟ କେଞ୍ଜିତଣ୍ଡ୍‌, ମେଣ୍ଡେ, ପିର୍ସ୍‌ଇକାଡ଼୍‌ ନୁ ଇକାଡ଼୍‌ତାଗ୍‌ ଇକାଡ଼୍‌ତେ କଣ୍ଡା ଉଡ଼ିତଡ଼୍‌। 19 ମେଣ୍ଡେ ନମ୍ର ନାରୁଡ଼୍‌ ସଦାପ୍ରବୁନାଗେ ନିଜେତ୍‌ ନିଜେତ୍‌ ୱେଡ଼୍‌କେ ନାର୍ଗେ ମାଡ଼ିତିଡ଼୍‌ ନୁ ନାରୁଡ଼୍‌ଡ଼ାଗେ ଗରିବ୍‌ନଡ଼୍‌ ଇସ୍ରାଏଲ୍‌ତେ ପବିତ୍ର ଇଶ୍ୱର୍‌ ୱେଡ଼୍‌କେ ମାଡ଼ିତଡ଼୍‌। 20 ବାତେଙ୍କ୍‌ଇତ୍କେ ଦୟା ଇଲ୍‌ୱେ ନାରୁଡ଼୍‌ ନିନ୍ଦା ଆସ୍‌ମିନ୍ଦେଡ଼୍‌, ନିନ୍ଦେତେ ମାଇ ମିନ୍ଦେଡ଼୍‌ ନୁ ବେନଡ଼୍‌ ଅଦର୍ମ ସେଙ୍ଗେ କେପିମିନ୍ଦେଡ଼୍‌, ଅଡ଼୍‌ ସାରେତଡ଼୍‌ ୱେର୍‌ ୱେର୍‌ ଆସ୍‌ ମିନ୍ଦେଡ଼୍‌; 21 ଅଡ଼୍‌ ଗଟିନେ ନାରୁଡ଼୍‌କିଙ୍କ୍‌ ଦଷି ମାଡ଼ିତଡ଼୍‌ ନୁ ନଗର୍‌ତେ ଆର୍‌ତାଗ୍‌ ଦଷ୍‌ତେ ସେଙ୍ଗେ ଉଡ଼ିୟି ୱାଟୁତଡ଼୍‌ ନୁ ବାତା ଇଲୱେ ଦାର୍ମିକ୍‌ତେ ପରୁ ଅନ୍ୟାୟ୍‌ ମାଡ଼ିତଡ଼୍‌। 22 ଆଦିଙ୍କ୍‌ ଅବ୍ରାହାମ୍‌ତେ ମୁକ୍ତିକର୍ତ୍ତାଲ୍‌ ସଦାପ୍ରବୁ ଯାକୁବ ପିଲୁଡ଼୍‌ ବିଷୟ୍‌ତେ ଇଦ୍‌ଲେକାମ୍‌ କେତ୍‌ତଣ୍ଡ୍‌; "ଯାକୁବ୍‌ ଇଞ୍ଜେ ସିଗ୍‌ ଆୟଣ୍ଡ୍‌, କି ଅନ୍‌ ମକମ୍‌ ମୁର୍‌ମୁରା ଆୟ। 23 ମାତର୍‌ ବେସୁଙ୍କ୍‌ ଅଣ୍ଡ୍‌ ମା କାଇଦେ କାମ୍‌ ମାଡ଼୍‌ତେ ଲେକାମ୍‌ ତାନ୍‌ ପିଲାକି ମିୟାଗେ ଉଡ଼ିତିଡ଼୍‌, ଆସୁଙ୍କ୍‌ ଅଡ଼୍‌ ମା ପେଦେର୍‌ତିଙ୍କ୍‌ ପବିତ୍ର ମାଡ଼ାନାଦ୍‌ ମାନେମ୍‌ ଆଦ୍‌ତଡ଼୍‌; ନିଜାମ୍‌, ଅଡ଼୍‌ ଯାକୁବ୍‌ତେ ଦର୍ମ ଲେକେତଡ଼୍‌କିଙ୍କ୍‌ ପବିତ୍ର ଲେକାମ୍‌ ମାନେମ୍‌ ଆଦ୍‌ତଡ଼୍‌ ନୁ ଇସ୍ରାଏଲ୍‌ତେ ପରମେଶ୍ୱର୍‌ତିଙ୍କ୍‌ ୱେର୍‌ଦ୍‌ତଡ଼୍‌। 24 ବେନଡ଼୍‌ କାଉଡ଼୍‌ ମାଡ଼ାନଡ଼୍‌, ଅଡ଼୍‌ ଆନ୍ତେ ବୁଦ୍ଦି ପାହେମ୍‌ ଆଦ୍‌ତଡ଼୍‌ ନୁ ପେର୍‌ଲେ ଗଟିନଡ଼୍‌ ସାୟେ ଗଟି ନାଡ଼୍‌ସିତଡ଼୍‌।"