1 ଯିହୁଦା ରାଜାଲ୍‌ ଉଷିୟତେ ନାତି ଯୋଥମ୍‌ର ମାର୍‌ ଆହସ୍‌ତେ ସମୟତେ ଅରାମ୍‍ର ରସୀନ ରାଜା ନୁ ରମଲୀୟତେ ମାର୍‌ ପେଃକ ପେଦେର୍‌ତେ ଇସ୍ରାଏଲ୍‌ତେ ରାଜା ଯିରୁଶାଲେମ୍‌ତେ ବିରୁଦ୍ଧତେ ଯୁଦ୍ଦ୍‌ ମାଡ଼ାନ୍‌ ସେଙ୍ଗେ ଆଗେ ଆତ୍‌ତଣ୍ଡ୍‌; ମାତର୍‌ ଆଦ୍‌ ଆରା ମାଡ଼େ ପାର୍‌ୱଡ଼୍‌। 2 ତାନ୍‌ପେର୍କେ ଦାଉଦ୍‌ପିଲୁଡ଼୍‌ତିଙ୍କ୍‌ ପୁଞ୍ଜ୍‌ପି ମାଡ଼୍‌ତଡ଼୍‌ ଯେ, ଅରାମ୍‍ ଇଫ୍ରୟିମର୍‌ତଡ଼୍‌ ଆତ୍‌ତଣ୍ଡ୍‌। ତାନ୍‌ପେର୍କେ ଅନ୍‌ ହୃଦୟ ନୁ ତାନ୍‌ ନାରୁଡ଼୍‌ ହୃଦୟ ଗାଲ୍‌ଦେ ୱାଡ଼୍‌କ୍‌ତେ ନୁ ମେଟେତ୍‌ ମାଡାକ୍‌ ଲେକାମ୍‌ ୱାଡ଼୍‌କି ଆତ୍‌ତେ। 3 ଆସୁଙ୍କ୍‌ ସଦାପ୍ରବୁ ଯିଶାଇୟଙ୍କ୍‌ କେତ୍‌ତଣ୍ଡ୍‌, ମିଡ଼୍‌ ନୁ ମିଇ ମାର୍‌ ଶାର-ଯାଶୂବ, ଚକା ସିଲେ ନର୍‌ଦାନଣ୍ଡ୍‌ ୱାୟେତେ ରାଜାନ୍‌ଆର୍‌ ପରୁ ଏର୍‌ୱିନ୍‌ ଦନ୍ଦ୍‌ତେ ତାଲେତାଗ୍‌ ଆହସ୍‌ତେ ସାଙ୍ଗେ କାଇଲାନଙ୍କ୍‌ ଆନ୍‌। 4 ନୁ ଅଙ୍କ୍‌ କେଲ୍‌ମୁଟ୍‌, ସାବ୍‌ଦାନ୍‌ ନୁ କଟଆସ୍‌ ମାନୁଟ୍‌; ରତ୍‌ସୀନ, ଅରାମ୍‍ର ନୁ ରମଲୀୟତେ ମାର୍‌ତେ ଗାଟି କପାମ୍‌ ସେଙ୍ଗେ ୱେର୍‌ମାଟ୍‌, କି ନିଜେତ୍‌ ହୃଦୟ୍‌ତିଙ୍କ୍ ମୁର୍‌ମୁରା ଆଦାନଙ୍କ୍‌ ଇମାଟ୍‌। 5 ବାତେଙ୍କ୍‌ଇତ୍କେ ଅରାମ୍‍, ମିକା ଇଫ୍ରୟିମ୍‌ ନୁ ରଲମୀୟତେ ମାର୍‌ ମିଇ ବିରୁଦ୍ଧତେ କରାପ୍‌ମନ୍ତ୍ରଣା ମାଡ଼ି କେତୁତଣ୍ଡ୍‌, 6 ୱାଡ଼ାଟ୍‌, ମାନାଡ଼୍‌ ଯିହୁଦା ବିରୁଦ୍ଧତେ ଆଞ୍ଜ୍ ଆଦିଙ୍କ୍‌ ନିଜେତ୍‌ ଲପେ ୱେର୍‌ ମାଡ଼ିତାଡ଼୍‌ ନୁ ମା ସେଙ୍ଗେ ଆଗେ ଉର୍‌ଙ୍ଗ୍‌ତେ ପଡ଼ିୟେ ମାଡ଼ି ୱେରଣ୍ଡ୍‌ ରାଜାଙ୍କ୍‌ ଇତ୍କେ, ଟାବେଲର୍‌ତେ ମାର୍‌ତିଙ୍କ୍‌ ମାନ୍‌ ରାଜାଲ୍‌ ମାଡ଼ିକାଡ଼୍‌। 7 ପ୍ରବୁ ସଦାପ୍ରବୁ ଇଦ୍‌ଗଟ୍‌ କେତିତଣ୍ଡ୍‌, "ଆଦ୍‌ ତିଆର୍‌ ଆୟ କି ଆଦ୍‌ ବେସୁଙ୍କ୍‌ ମିକା ପୁରା ଆୟ।" 8 ବାତେଙ୍କ୍‌ଇତ୍କେ ଅରାମ୍‍ରତେ ତାଲେ ଦମ୍ମେଶକ ନୁ ଦାମାସ୍କସ୍‌ତେ ତାଲେ ରତ୍‌ସୀନ; ମେଣ୍ଡେ, ପଞ୍ଚଷଟି ୱାଡ଼୍‌ସାତ୍‌ ଲପେ ଇଫ୍ରୟିମ ଦୁଡ଼ା ଦୁଡ଼ା ଆସ୍‌ ଇଦ୍‌ଲେକାମ୍‌ ଉର୍ଙ୍ଗିତଣ୍ଡ୍‌ ଯେ, ଅଣ୍ଡ୍‌ ମେଣ୍ଡେ ୱେରଡ଼୍‌ ଗୋଷ୍ଠି ଆସ୍ ମାନଣ୍ଡ୍‌; 9 ମେଣ୍ଡେ, ଇଫ୍ରୟିମର୍‌ତେ ମୁକ୍ୟ ଶମରୀୟା ନୁ ଶମରୀୟାନ୍‌ ମୁକ୍ୟ ରମଲୀୟତେ ମାର୍‌। ଯଦି ମିଡ଼୍‌ ବିଶ୍ୱାସ୍‌ ମାଡ଼୍‌ୱିଡ଼୍‌, ଆଲେକେ ସାରେଦିନିତ୍‌ ସେଙ୍ଗେ ବେସୁଙ୍କ୍‌ ବା ଆୟ୍‌ୱିନ୍‌, ଇଦ୍‌ ନିଜାମ୍‌।

10 ତାନ୍‌ପେର୍କେ ସଦାପ୍ରବୁ ଆହସ୍‌ତିଙ୍କ୍‌ ମେଣ୍ଡେ କେତ୍‌ତଣ୍ଡ୍‌, 11 "ନିମେ ସଦାପ୍ରବୁ ତାନ୍ ପରମେଶ୍ୱର୍‌ତିଙ୍କ୍‌ ୱେରଡ଼୍‌ ଚିହ୍ନେ ତାଲ୍‌କେ; ମଦଲ୍‌ତେ ନାରୁନେ ନୁ ପରତ୍‌ତେ ନାରୁନେ ଆୟି, ତାଲ୍‌କାଟ୍‌।" 12 ମାତର୍‌ ଆହସ୍‌ କେତ୍‌ତଣ୍ଡ୍‌, "ନାନେ ତାଲ୍‌କନ୍‌ କି ସଦାପ୍ରବୁଙ୍କ୍‌ ପରିକ୍ଷା ମାଡ଼ନ୍‌।" 13 ତାନ୍‌ପେର୍କେ ଅଣ୍ଡ୍‌ କେତ୍‌ତଣ୍ଡ୍‌, "ହୋ ଦାଉଦ୍‌ତେ ପିଲୁଡ଼୍‌, ମିଡ଼୍‌ ଇଞ୍ଜେ କେଞ୍ଜାଟ୍‌; ନାରୁଡ଼୍‌ ଗାଡ଼୍‌ସ୍‌ତିଙ୍କ୍‌ ପରିକ୍ଷା ମାଡ଼ାନାଦ୍‌ ମିଇ ପରୁ ଇସୁରାଦ୍‌ ବିଷୟ୍‌ ଇଞ୍ଜ କି ମିଡ଼୍‌ ନା' ପରମେଶ୍ୱର୍‌ତେ ଗାଡ଼୍‌ସ୍‌ମିକା ପରିକ୍ଷା ମାଡ଼ିତିଡ଼୍‌ ? 14 ଇଦ୍‌ରକମ୍‌ ପ୍ରବୁ ମିକିଙ୍କ୍‌ ୱେରଡ଼୍‌ ଚିହ୍ନେ ଇଦ୍‌ତଣ୍ଡ୍‌; ଉଡ଼ାଟ୍‌, ୱେରଡ଼୍‌ ନାଟାଡ଼୍‌ ଡଙ୍କେତ୍‌ ଆସ୍‌ ୱେରଣ୍ଡ୍‌ ମାର୍‌ ଜନମ୍‌ ମାଡ଼ିତେ ନୁ ଅନ୍‌ ପେଦେର୍‌ ଇମ୍ମାନୁୟେଲ୍‌ ଇଦିନ୍‌ ଅର୍ତ; ମାନ୍‌ତଡ଼୍‌ ପରମେଶ୍ୱର୍‌ ନେଃତିତିଡ଼୍‌। 15 କାରାପ୍‌ତିଙ୍କ୍‌ ୱିଡ଼୍‌ସି ନୁ ସାୟେତିଙ୍କ୍ ହେଞ୍ଚାନାଦ୍‌ ପୁନ୍ଦାନ୍‌ ୱେଲେ ଅଣ୍ଡ୍‌ ଦଇ ନୁ ଉର୍‌ୱେ ନିୟ୍ ତିନ୍ଦ୍‌ତଣ୍ଡ୍‌। 16 ବାତେଙ୍କ୍‌ଇତ୍କେ ପେକଡ଼୍‌ କାରାପ୍‌ତିଙ୍କ୍‌ ୱିଡ଼୍‌ସିତଡ଼୍‌ ନୁ ସାୟେତିଙ୍କ୍‌ ନେଃତାନାଦ୍‌ ପୁନ୍ଦାନ୍‌ ମୁନେଙ୍କେ ବେନ୍‌ ଦେଶ୍‌ତେ ଇର୍‌ୱୁଡ଼୍‌ ରାଜାଙ୍କ୍‌ ମିଡ଼୍‌ ପାସ୍କୁତିଡ଼୍‌, ଆଦ୍‌ ଦେଶ୍‌ ୱିଡ଼୍‌ସିଆଦ୍‌ତେ। 17 ଇଫ୍ରୟିମ୍‌ ଯିହୁଦାତାଗାଙ୍କ୍‌ ୱେର୍‌ ଆଦାନ୍‌ ଦିନାକଞ୍ଜ୍ ବେଦ୍‌ଲେକାତ୍‌ ସମୟ୍‌ ସଦାପ୍ରବୁ ମି ସେଙ୍ଗେ ମି ନାରୁଡ଼୍‌ ପରୁ ନୁ ମି ଆନିଦାଦିଡ଼୍‌ ପିଲୁଡ଼୍‌ ପରୁ ମାଡ଼ିକାଡ଼୍‌; ଇତ୍କେ, ଅଶୂରତେ ରାଜାଙ୍କ୍‌ ତାତିତଣ୍ଡ୍‌।" 18 ମେଣ୍ଡେ, ଆଦ୍‌ଦିନେ ସଦାପ୍ରବୁ ମିସର୍‌ ଦେଶ୍‌ତେ ବେଡ଼େକ୍‌ସାରେତେ ଆଞ୍ଚିନାଗ୍‌ ୱିସିନ୍‌ ପରୁ ନୁ ଅଶୂର ଦେଶ୍‌ତେ ତେନେୱିସିନ୍‌ ପରୁ ଉସଡ଼୍‌ ୱାଟି କାରିଙ୍ଗିତଣ୍ଡ୍‌। 19 ତାନ୍‌ପେର୍କେ ଅଡ଼୍‌ ସାରେତଡ଼୍‌ ୱାସ୍‌ ଗୁଇନ୍ଦାଗପ୍‌କ୍‌ ପଡ଼ିୟା ସାରେ ନୁ କାଲ୍‌କିନ୍‌ ବସାନାଗ୍‌ ପଡ଼ିୟେତାଗ୍‌ ନୁ କୟେ ମେଟେତାଗ୍‌ ନୁ ମେୟାନ୍‌ବୁମ୍‌ତେ ପାକେ କୁଦିତଡ଼୍‌। 20 ଆଦ୍‌ ଦିନେ ପ୍ରବୁ ବେଡ଼େମ୍‌ତେ ମେଣ୍ଡନ୍‌ପାକେ ବାଡ଼ାତାତ୍‌ତେ ୱେରଙ୍କ୍‌ ବାଣ୍ଡାରିଙ୍କ୍‌, ଅଶୂରତେ ରାଜାନ୍‌ ବାଣ୍ଡାରିଙ୍କ୍‌ ତାତ୍କେ, ମେନ୍ଦୁଲ୍‌ତେ କେଲ୍‌କ୍‌ କର୍‌ୟିରିତଡ଼୍‌ ନୁ ତାନ୍‌ପେର୍କେ ଦାଢ଼ିମିକା ନଷ୍ଟ ଆଦ୍‌ତା। 21 ଆଦ୍‌ ଦିନେ ବେନ ୱେରଡ୍‌ ପେୟେ ନୁ ରେଣ୍ଡ୍‌ମେକା ପଡ଼୍‌ପ୍‌ତେ, 22 ଆଦ୍‌ ଇଦାନ୍‌ ପାଲ୍‌ ନାର୍ଗେ ପାଲ୍‌ ଉନ୍ଦ୍‌ତଣ୍ଡ୍‌; ବାତେଙ୍କ୍‌ଇତ୍କେ ଦେଶ୍‌କିନାଗ୍‌ ଇଦ୍‌ରକମ୍‌ ସାରେତଡ଼୍ ନାରୁଡ଼୍‌ ପାଲ୍‌ ନୁ ତେନେନିୟ୍‌ ତିନ୍ଦ୍‌ତଡ଼୍‌। 23 ମେଣ୍ଡେ, ବେନ୍‌ ବେନା ପଡ଼ିୟାନାଗ୍‌ ହଜାର୍‌ ରୁପା ଡାବ୍‌କିନ୍‌ ଦାମ୍‌ ଅଙ୍ଗୁର୍‌ଟଣ୍ଡେ ମାତ୍‌ତା, ଆଦ୍‌ ଦିନେ ଅଣ୍ଡ୍‌ ସାରେ ପଡ଼ିୟେ ପାର୍‌ୱେଲ୍‌ ନୁ କୟେ ମାଡ଼ାକ୍‌ ଆଦ୍‌ତା। 24 ମେଣ୍ଡେ, ସାରାଦେଶ୍‌ ପାର୍‌ୱେଲି ନୁ କୟେମାଡେ ଲେକାମ୍‌ ଆୟିନାଙ୍କ୍‌ ନାରୁଡ଼୍‌ କାଡ଼୍‌ ନୁ ୱିଲ୍‌କ୍‌ ପୟିସ୍‌ ଆଦ୍‌ପଡ଼ିୟେତା ଆଦ୍‌ତଡ଼୍‌। 25 ମେଣ୍ଡେ, ବେନ୍‌ସାରେ ମେଟା ଗୁଦାଡ଼୍‌ତେ ଡେୱି ଆସ୍‌ମାତେ, ମିଡ଼୍‌ ପାର୍‌ୱେଲି ନୁ କୟେ ମାଡେତ୍‌ ୱେର୍‌ଦେ ଆଦ୍‌ ପଡ଼ିୟେତାଗ୍‌ ଆନ୍‌ମାଟ୍‌, ମାତର୍‌ ଆଦ୍‌ ଗଡ୍‌କନ୍ଦା ମେଇୟାନ୍‌ ପଡ଼ିୟେ ନୁ ମେକାନ୍‌ ଡେକା ୱିକ୍‌କାନ୍‌ ପଡ଼ିୟେ ଆଦ୍‌ତେ।