ଯିଶାଇୟ 38

ହିଜକୀୟଙ୍କ୍‌ ରଗ୍‌ତାଗାଙ୍କ୍‌ ସୁସ୍ଥଆଦାନାଦ୍‌

1 ଆଦ୍‌ ସମୟତେ ହିଜକୀୟ ରଗ୍‌ତେ ଆସ୍‌ ମାତ୍‌ତଣ୍ଡ୍‌। ଆସୁଙ୍କ୍‌ ଆମୋସତ୍‌ ମାର୍‌ ଯିଶାଇୟ ବବିଷ୍ୟତ୍‌ବକ୍ତା ଅନ୍‌ପାକେ ୱାସ୍‌ କେତ୍‌ତଣ୍ଡ୍, "ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌, ନିମେ ନିଜେତ୍‌ ଲନ୍‌ ବିଷୟ୍‌କି ସଜାମାଡ଼େ: ବାତେଙ୍କ୍‌ଇତ୍କେ ନିମେ ଡଲିତିନ୍‌, ଗେଲ୍ସ୍‌ୱିନ୍‌।" 2 ଆସୁଙ୍କ୍‌ ହିଜକୀୟ ନେଟେତ୍‌ ପାକେ ମକମ୍‌ ୱାଟି ସଦାପ୍ରବୁନ୍‌ ପାକେ ପ୍ରାତନା ମାଡ଼ି କେତ୍‌ତଣ୍ଡ୍‌, 3 "ହୋ ସଦାପ୍ରବୁ, ନାନେ ଅନୁରଦ୍‌ ମାଡ଼ୁତାନ୍‌, ନାନେ ବେଲାନ୍‌ ସତ୍‌ତେ ନୁ ସୁସ୍ଥ ହୃଦୟତେ ନି ମୁନେ ଆଦାୱାଦା ମାଡ଼୍‌ତାନ୍‌ ନୁ ନି କଣ୍ଡେତେ ଲେକେତ୍ କାମ୍‌ ମାଡ଼୍‌ତାନ୍‌, ଇଦ୍‌ ଇଞ୍ଜେ ଏର୍କେ ମାଡ଼୍‌ଡ଼େ।" ମେଣ୍ଡେ, ହିଜକୀୟ ଗାଟି କେୟ୍‌ତଣ୍ଡ୍‌। 4 ଆସୁଙ୍କ୍‌ ଯିଶାଇୟନ୍‌ ପାକେ ସଦାପ୍ରବୁନ୍‌ ବାକ୍ୟ ୱାତ୍‌ତେ। 5 ନିମେ ଆଞ୍ଜ୍‌ ହିଜକୀୟଙ୍କ୍‌ କେଲ୍‌ମ୍‌, ସଦାପ୍ରବୁ, ନି ମୁନେତ୍‌ତଡ଼୍‌ ଦାଉଦ୍‌ତେ ପରମେଶ୍ୱର୍‌ ଇଦ୍‌ ଗଟ୍‌ କେତିତଣ୍ଡ୍‌, "ମାମେ ନିୟାଦ୍‌ ପ୍ରାତନା କେଞ୍ଜ୍‌ତମ୍‌, ମିୟାଦ୍‌ କାଣ୍ଡେଡ଼୍‌ ଉଡ଼୍‌ତମ୍‌, ଉଡ଼େ ମାମେ ନିୟାଦ୍‌ ଗେଲ୍ସାନାଦ୍‌ ପନ୍ଦର ବର୍ଷ ମେଣ୍ଡେ ନାର୍ଗେ ମାଡ଼ିତମ୍‌। 6 ମେଣ୍ଡେ, ମାମେ ମିକିଙ୍କ୍‌ ନୁ ଇଦ୍‌ ନଗର୍‌ତାକ୍‌ ଅଶୂରିୟ ରାଜାନ୍‌ କାଇଦାଗାଙ୍କ୍‌ ରକ୍ଷା ମାଡ଼ିତମ୍‌ ନୁ ମାମେ ଇଦ୍‌ ନଗର୍‌ତାଗ୍‌ ଆଦିକାଡ଼୍‌। 7 ମେଣ୍ଡ୍‌, ସଦାପ୍ରବୁ ନିଜେତ୍‌ ଡୁଟାଙ୍ଗ୍‌ ବାକ୍ୟତିଙ୍କ୍‌ ବେଲା ପୁରା ମାଡ଼ିତଣ୍ଡ୍‌, ମି ପରୁ ସଦାପ୍ରବୁନାଦ୍‌ ଇଦ୍‌ ଚିହ୍ନେ ଆଦ୍‌ତେ; 8 ଉଡ଼େ, ମାମେ ଆହସ୍‌ତେ ପଡ଼ଦ୍‌ ଗଣ୍ଟେତିଙ୍କ୍‌ ପଡ଼ଦ୍‌ ନିଡ଼୍‌କେ ବେସର୍‌ ମୁନେ ଆତ୍‌ତେ, ଆଦ୍‌ ଦଶ ପାଦାମ୍ ପେର୍କେ ଆସର୍‌ ମାଲ୍ସ୍‌ ୱାତ୍‌ତେ।" ଆସୁଙ୍କ୍‌ ଗଣ୍ଟାତିଙ୍କ୍‌ ପଡ଼ଦ୍‌ ବେନ୍‌ ଦଶ୍‌ ପାଦାମ୍‌ ମୁନେ ଆଞ୍ଜ୍‌ମାତ୍‌ତେ, ପେର୍କେ ଆସର୍‌ ମାଲ୍ସ୍‌ ୱାତ୍‌ତେ। 9 ଯିହୁଦାତେ ରାଜା ହିଜକୀୟ ରୋଗ୍‌ ଆସ୍‌ ନିଜେତ୍‌ ରୋଗ୍‌ତାଗାଙ୍କ୍‌ ସୁସ୍ଥ ଆତ୍‌ତେ ପେର୍କେ ଇଦ୍‌ ଲେକ୍‌ତଣ୍ଡ୍‌, ଇତ୍କେ, 10 ନାନେ କେତ୍‌ତାନ୍‌, "ନାନେ ନିଜେତ୍‌ ବୟସ୍ତାଗାଙ୍କ୍‌ ମାଦ୍‌ନାମ୍‌ ସମୟ୍‌ତେ ପାତାଲ୍‌ତେ ଆର୍‌ଦାଗ୍‌ ନେଙ୍ଗିତାନ୍‌; ନାନେ ନିଜେତ୍‌ ୱଡ଼୍‌ସେଯାକ ମାନ୍ଦାନ୍‌ ଦିନାକିନ୍‌ତ ପାହେମ୍‌ ଆସ୍‌ ଗେଲ୍ସ୍‌ତାନ୍‌। 11 ନାନେ କେତ୍‌ତାନ୍‌ ନାନେ ସଦାପ୍ରବୁଙ୍କ୍‌, ଜିଉମାନ୍ଦାନଡ଼୍‌ ଦେଶ୍‌ତାଗ୍‌ ସଦାପ୍ରବୁଙ୍କ୍‌ ଉଡ଼ନ୍‌; ନାନେ ଜଗତ୍‌ତେ ନାରୁଡ଼୍‌କ୍‌ ମେଣ୍ଡେ ଉଡ଼ନ୍‌। 12 ନାୟାଦ୍‌ ଗେଲ୍ସାନାଦ୍ ଦୁରାମ୍‌ ଆସ୍‌ମିନ୍ଦେ ନୁ ମେକାଗଲାନ୍‌ ଗୁଡ଼ୁସେ ଲେକାମ୍‌ ନାୟାଗ୍‌କଞ୍ଜ୍‌ ତିଆର୍‌ ଆସ୍‌ମିନ୍ତେ; ନାନେ ନୁଲ୍‌ଲେକାମ୍‌ ନିଜେତ୍‌ ଜିଉଣ୍ଡ୍‌ତିଙ୍କ୍‌ ଉଡି ମିନ୍ଦେଣ୍ଡ୍‌; ଅଣ୍ଡ୍‌ ନାକିଙ୍କ୍‌ ଚକା ସିଲେ ତିଆର୍‌ତେନଙ୍କ୍‌ କୟିଦ୍‌ତଣ୍ଡ୍‌; ୱେରଡ଼୍‌ ନାର୍କେ ପାୟାଲ୍‌ କଞ୍ଜ୍‌ ଅଣ୍ଡ୍‌ ନାକିଙ୍କ୍‌ ଶେଷ ମାଡ଼ିତଣ୍ଡ୍‌। 13 ନାନେ ନାର୍କୁକଞ୍ଜ୍‌ ନିଜେତିଙ୍କ୍‌ ସୁସ୍ଥ ମାଡ଼୍‌ତାନ୍‌; ବେଦ୍‌ଲେକାମ୍‌ ସିଂହଡୁୱ୍‌, ଆଦ୍‌ଲେକାମ୍‌ ଅଣ୍ଡ୍‌ ନାୟାୱୁ ବୁଲାଙ୍କ୍‌ ଗୁଣ୍ଡାଲ୍‌ ମାଡ଼ିମିନ୍ଦେଣ୍ଡ୍‌; ଅଣ୍ଡ୍‌ ନାର୍କେ ପାୟାଲ୍‌ତେ ନିମେ ନାକିଙ୍କ୍‌ ଶେଷ ମାଡ଼୍‌ତିନ୍‌। 14 ବେଦ୍‌ଲେକାମ୍‌ କୁଟିସ୍‌ ପିଟେ ବା କଙ୍ଗା ପିଟେ ଲେଙ୍ଗ୍‌ ମାଡ଼ିତା, ଆଦ୍‌ଲେକାମ୍‌ ନାନେ ଚିଁ ଚିଁ ଲେଙ୍ଗ୍‌ ମାଡ଼୍‌ତାନ୍‌; ନାନେ ପାର୍‌ୱା ଲେକାମ୍‌ ଦୁଃକାମ୍‌ ମାଡ଼୍‌ତାନ୍‌; ପରୁ ଉଡ଼ି ଉଡ଼ି ନାୟାୱୁ କଣ୍ଡା କାନି ଆଦୁତା; ହୋ ପ୍ରବୁ, ନାନେ ସୁସ୍ଥ ଆତ୍‌ତାନ୍‌, ନିମେ ନାୟାଦ୍‌ ଗେଲ୍ସ୍‌ପାନଣ୍ଡ୍‌ ଆୟିମ୍‌। 15 ନାନେ ବାତ୍‌ତେ କେତିତାନ୍‌ ? ଅଣ୍ଡ୍‌ ତ ନାକିଙ୍କ୍‌ କେସ୍‌ମିନ୍ଦେଣ୍ଡ୍‌, ମିକା ନିଜେ ଆଦ୍‌ ପାଲନ୍‌ ମାଡ଼ିମିନ୍ଦେଣ୍ଡ୍‌; ନାନେ ନିଜେତ୍‌ ଜିୱେତେ ତିପାଲ୍‌ତେ ସେଙ୍ଗେ ନିଜେତେ ସାରେ ୱାଡ଼୍‌ସାଯାକ ଜାମେ ଜାମେ ତାକିତାନ୍‌। 16 ହୋ ପ୍ରବୁ, ଇୱୁସାରେତେ ନାରୁଡ଼୍‌ ଗେଲ୍ସିତଡ଼୍‌, ମେଣ୍ଡେ ଆସୁଙ୍କ୍‌ ଇ ସାରେଲେକାମ୍‌ ନା' ଆତ୍ମାତେ ଜିଉମିନ୍ଦେ, ଆଦିଙ୍କ୍‌ ମିଡ଼୍‌ ନାକିଙ୍କ୍‌ ସୁସ୍ଥମାଡ଼ି ଜିୱେମାଡ଼ି ମିନ୍ଦେଡ଼ି। 17 ଉଡ଼୍‌, ନାନେ ନିଜେତେ ଶାନ୍ତି ସେଙ୍ଗେ ବେଡ଼ିୟେ ଦୁଃକାମ୍‌ ପାହେମ୍‌ ଆତ୍‌ତାନ୍‌; ମାତର୍‌ ନିମେ ନା' ଜିୱେ ପରୁ ପ୍ରେମମାଡ଼ି ଡଲାନାଗାଙ୍କ୍‌ ଉଦ୍ଦାର୍‌ ମାଡ଼୍‌ତିଡ଼୍‌; ବାତେଙ୍କ୍‌ଇତ୍କେ ନିମେ ନିଜେତ୍‌ ପେର୍କେତ୍‌ପାକେ ନାୟାୱୁ ଅପରାଦ୍‌ ସାରେ ୱାଟି ମିନ୍ଦେନି। 18 ଆଦିଙ୍କ୍‌ ପାତାଲ ମିୟାଦ୍‌ ପ୍ରଶଂସା ମାଡ଼ାନଙ୍କ୍‌ ପାର୍‌ୱଡ଼୍‌, ଡଲାନାଦ୍‌ ମିୟାଦ୍‌ ଗୁଣ୍‌ ପ୍ରଶଂସା ମାଡ଼୍‌ଡ଼େ ପାର୍‌ୱଡ଼୍‌; ଗୁଇନ୍ଦେତାଗ୍‌ ମାନ୍ଦାନଡ଼୍‌ ମିୟାଦ୍‌ ସତ୍ୟତେ ସେଙ୍ଗେ ପ୍ରଶଂସା ମାଡ଼୍‌ଡ଼େ ପାର୍‌ୱଡ଼୍‌। 19 ବେଦ୍‌ଲେକାମ୍‌ ନେଣ୍ଡ୍‌ ନାନେ ମାଡ଼ୁତାନ୍‌, ଆଦ୍‌ଲେକାମ୍‌ ଜିୱେମାନ୍ଦାନ୍‌ ନାରୁଡ଼୍‌, ମାତର୍‌ ଜିଉତେ ନାରୁଣ୍ଡ୍‌ ନିକିଙ୍କ୍‌ ପ୍ରଶଂସା ମାଡ଼ିତଣ୍ଡ୍‌; ବାବାଲ୍‌ ପିଲାକିଙ୍କ୍‌ ନିୟାଦ୍‌ ସତ୍ୟତା ଗଟ୍‌ କେତିତଣ୍ଡ୍‌। 20 ସଦାପ୍ରବୁ ନା ପରିତ୍ରାଣ ମାଡ଼ାନ୍‌ କର୍ତ୍ତାଲ୍‌; ଆଦିଙ୍କ୍‌ ମାମେ ଜିଉମାନ୍‌ନାକେ ସଦାପ୍ରବୁନ୍‌ ଲତ୍‌ତାଗ୍‌ ଡଲାନ୍‌ତଡ଼୍‌ ନା ତଡ଼ଦ୍‌ଦେ ପାଟେ ପାରିତମ୍‌।" 21 ଯିଶାଇୟ କେସ୍‌ମାତ୍‌ତଣ୍ଡ୍‌, "ଅଡ଼୍‌ ତୟେମାଡ଼େ ତଲ୍‌କେ ଅସ୍‌ ନଦାନ୍‌ ପରୁ ଇୱିଡ଼୍‌, ଆସୁଙ୍କ୍‌ ଅଣ୍ଡ୍‌ ସୁସ୍ଥ ଆଦ୍‌ତଣ୍ଡ୍‌।" 22 ହିଜକୀୟ ମେଣ୍ଡେ କେତ୍‌ତଣ୍ଡ୍‌, ନାନେ ଯେ ସଦାପ୍ରବୁନ୍‌ ଲତ୍‌ତାଗ୍‌ ଆଦ୍‌ତାନ୍‌, ଇଦିନ୍‌ ଚିହ୍ନେ ବାତ୍‌ତେ ?