ଯିରୂଶାଲେମ୍ତିଙ୍କ୍ ପରମେଶ୍ୱର୍ ଉଦ୍ଦାର୍ ମାଡ଼ାନାଦ୍
1 ହୋ ସିୟୋନ ତେଦା, ତେଦା, ନିୟାଦ୍ ଶକ୍ତି କେର୍ମ୍; ହୋ ପବିତ୍ର ନଗର୍ତନି ଯିରୂଶାଲେମ୍, ମିୟାୱୁ ସୁନ୍ଦର୍ ଚକାସାରେ କେର୍ମୁଟ୍; ବାତେଙ୍କ୍ଇତ୍କେ ଇଦ୍ ସମୟ୍ତାଗାଙ୍କ୍ ମି ୟାଗାଙ୍କ୍ ଅସୁନ୍ନତ ବା ଅଶୁଚି ନାରୁଣ୍ଡ୍ ୱାଡ଼ଣ୍ଡ୍। 2 ମିଡ଼୍ ମି ମେନ୍ଦୁଲ୍ତାଗାଙ୍କ୍ ଦୁମ୍ କାୟିସିମୁଟ୍; ହୋ ଯିରୁଶାଲେମ୍, ତେଦାଟ୍, କର୍ସ୍ତାଗ୍ କୁଦାଟ୍; ହୋ ସିୟୋନତେ ବନ୍ଦିଆତ୍ତେ ନାଟାନଡ଼ି, ନିଜେତ୍ ଗୁଡ଼ୁଙ୍ଗେତ୍ ଇକ୍ଲେମ୍ କୁସ୍ପାଟ୍। 3 ବାତେଙ୍କ୍ଇତ୍କେ ସଦାପ୍ରବୁ ଇଦ୍ଗଟ୍ କେତିତଣ୍ଡ୍, "ମିଡ଼୍ ଆସାମ୍ ଡାବ୍କିନେ ୱାମି ଆତ୍ତିଡ଼୍, ମେଣ୍ଡେ ଆସାମ୍ ଦାମ୍ଦେ ମୁକ୍ତ ମାଡ଼ିତଡ଼୍।" 4 ପ୍ରବୁ, ସଦାପ୍ରବୁ ଇଦ୍ ଗଟ୍ କେତିତଣ୍ଡ୍, "ମା ନାରୁଡ଼୍ ପ୍ରତମ୍ତେ ମାନ୍ଦାନ୍ ସେଙ୍ଗେ ମିସର୍ତାକ୍ ଆତ୍ତଡ଼୍; ମେଣ୍ଡେ, ଅଶୂରିୟ ଆସାମ୍ ଏକେ ଅଡ଼୍ ପରୁ କାରାପ୍ ମାଡ଼୍ତଡ଼୍।" 5 ଆଦିଙ୍କ୍ ସଦାପ୍ରବୁ କେତିତଣ୍ଡ୍, "ମା ନାରୁଡ଼୍ ତ ଆସାମ୍ ଆଞ୍ଜ ମାତ୍ତଡ଼୍ , ମାମେ ଇଗେ ମାଞ୍ଜ୍ ବାତେ ମାଡ଼ୁତାଡ଼୍ ?" ସଦାପ୍ରବୁ କେତିତଣ୍ଡ୍, ଅଡ଼୍ ପରୁ କର୍ତ୍ତ୍ୱତ୍ୱନଡ଼୍ ଲେଙ୍ଗ୍ ମାଡ଼ୁତଡ଼୍ ନୁ ମାୟାଦ୍ ପେଦେର୍ ପାୟାଲ୍ ପଡ଼୍ଗିନ୍ ଆଲେନେ ଲିନ୍ଦେ ଆସମିନ୍ଦେ। 6 "ଆଦିନ୍ ମାଇଦିଙ୍କ୍ ମା ନାରୁଡ଼୍ ମା ପେଦେର୍ ପୁନ୍ଦ୍ତଡ଼୍; ଆଦିଙ୍କ୍ ବେନ ଗଟି କେତିତଡ଼୍, ଅଣ୍ଡ୍ ଯେ ମାମେ ଆଦ୍ତମ୍, ଇଦ୍ ଅଡ଼୍ ଆଦ୍ଦିନେ ପୁନ୍ଦ୍ତଡ଼୍; ଉଡ଼େ, ଅଣ୍ଡ୍ ମାମେ।" 7 ବେନ୍ ନାରୁଣ୍ଡ୍ ସୁସମାଚାର୍ ତାତୁତଣ୍ଡ୍, ବେନ ଶାନ୍ତି ପ୍ରଚାର୍ ମାଡ଼ୁତଣ୍ଡ୍, ବେନ ସାୟେତେ ସୁସମାଚାର୍ତେ ତାସମିନ୍ଦେଣ୍ଡ୍, ବେନ ପରିତ୍ରାଣ ପ୍ରଚାର୍ ମାଡ଼ୁତଣ୍ଡ୍, ବେନ ସିୟୋନ୍ତିଙ୍କ୍ "ମି ପରମେଶ୍ୱର୍ ରାଜ୍ୟ ମାଡ଼ିତଣ୍ଡ୍" ଇଞ୍ଜ କେତୁତଣ୍ଡ୍, ଇଦିନ୍ ଡେକା ମେଟାକିନ୍ ପରୁ ବେଲାନ୍ ବେସର୍ ଆଦ୍ତେ ! 8 ଇଡ଼୍, ମି ଲନ୍କେପାନଡ଼୍ ଲେଙ୍ଗେ ! ଅଡ଼୍ ଗାଟି ଲେଙ୍ଗ୍ ମାଡ଼ୁତଡ଼୍, ଅଡ଼୍ ଅଣ୍ଡୟ୍ତାଗ୍ ପାଟେ ପାରୁତଡ଼୍; ବାତେଙ୍କ୍ଇତ୍କେ ସଦାପ୍ରବୁ ସିୟୋନ୍ତିଙ୍କ୍ ମାଲ୍ସ୍ ୱାଦାନ୍ ୱେଲେ ଅଡ଼୍ ସାମ୍ନା ସାମିନି ଆସ୍ ଉଡ଼ିତିଡ଼୍। 9 ହୋ ଯିରୂଶାଲେମ୍ତେ ଉର୍ଙ୍ଗିମାନ୍ଦାନ୍ ପଡ଼ିୟେତ୍ ସାରେତଡ଼ି, ଗାଟି ୱେଡ଼୍କେତ୍ ଲେଙ୍ଗ୍ ମାଡ଼ାଟ୍, ଅଣ୍ଡୟ୍ତାଗ୍ ପାଟା ପାରାଟ୍, ବାତେଙ୍କ୍ଇତ୍କେ ସଦାପ୍ରବୁ ନିଜେତ୍ ନାରୁଡ଼୍କିଙ୍କ୍ ଶାନ୍ତି ମାଡ଼ିମିନ୍ଦେଣ୍ଡ୍, ଅଣ୍ଡ୍ ଯିରୁଶାଲେମ୍ତିଙ୍କ୍ ମୁକ୍ତ ମାଡ଼ିମିନ୍ଦେଣ୍ଡ୍। 10 ସଦାପ୍ରବୁ ସାରାଦେଶ୍ତେନଡ଼୍ କଣ୍ଡେତେ ନିଜେତ୍ ପବିତ୍ର ବପୁ ଇସ୍ ମିନ୍ଦେଣ୍ଡ୍ ନୁ ପୃତିବୀତେ ମୁନେଙ୍କ୍ତଡ଼୍ ସାରେତଡ଼୍ ମାନ୍ ପରମେଶ୍ୱର୍ତେ ପରିତ୍ରାଣ ଉଡ଼ିତଡ଼୍। 11 ମିଡ଼୍ ପେଇମୁଟ୍, ପେଇମୁଟ୍, ଆଦ୍ ପଡ଼ିୟେକଞ୍ଜ୍ ପେଇସ୍ ଆନୁଟ୍, ବାତେବାଡ଼୍ କାରାପ୍ ଜିନିଷ ଇଟ୍ମାଟ୍; ମିଡ଼୍ ଆଦିନ୍ ନାଡ଼୍ମେଙ୍କ୍ ପେଇସ୍ ଆନୁଟ୍; ହୋ ସଦାପ୍ରବୁନ୍ ସାମାନ୍ କାଞ୍ଜାନଡ଼ି, ମିଡ଼୍ ଶୁଚି ଆୟ୍ମୁଟ୍। 12 ବାତେଙ୍କ୍ଇତ୍କେ ମିଡ଼୍ ତେରେପେତେ ଆସ୍ ଆନ୍ମାଟ୍, କି ମିଡ଼୍ ମିରି ପେୟିସ୍ ଆନ୍ମାଟ୍; ବାତେଙ୍କ୍ଇତ୍କେ ସଦାପ୍ରବୁ ମି ମୁନେ ମୁନେ ଆଦ୍ତଣ୍ଡ୍ ନୁ ଇସ୍ରାଏଲ୍ତେ ପରମେଶ୍ୱର୍ ମି ତଡ଼ ମାନ୍ଦ୍ତଣ୍ଡ୍।
ଦୁଃକାମ୍ତେନଡ଼୍ ସଦାପ୍ରବୁନ୍ ଦାସ
13 ଉଡ଼େ, ମା ଦାସ ଲେକେତ୍ ବିଚାର୍ ମାଡ଼ିତଣ୍ଡ୍, ଅଣ୍ଡ୍ ବେଡ଼ିୟଣ୍ଡ୍, ବେଡ଼ିୟେ ଜାଗେ ପାହେମ୍ ଆତ୍ତଣ୍ଡ୍ ନୁ ମହାନ୍ ଆଦ୍ତଣ୍ଡ୍। 14 ନାରୁଡ଼୍ ଡ଼ାଗାଙ୍କ୍ ଅଡ଼ାଦ୍ ତିଆର୍ ନୁ ନାରୁଡ଼୍ ପିଲାକିନ୍ଆଗାଙ୍କ୍ ଅଡ଼ାଦ୍ ମକମ୍ତାଗ୍ ୱେର୍ ତିଆର୍ ଆୟିନାଙ୍କ୍ ବେଲାନ୍ ନାର୍ଗେ ନାରୁଡ଼୍ ଅନ୍ ବିଷୟ୍ତେ ବାକ୍ୱା ଆସ୍ମାତ୍ତଡ଼୍, 15 ଆଦ୍ଲେକାମ୍ ଅଡ଼୍ ନାର୍ଗେ ଦେଶ୍ତେ ନାରୁଡ଼୍କ୍ ଇଲ୍ସ୍କିତଣ୍ଡ୍; ରାଜାନଡ଼୍ ତାମ୍ ମୁନେ ନିଜେ ନିଜେତ୍ ମକମ୍ ବନ୍ଦ୍ ମାଡ଼ିତଡ଼୍; ବାତେଙ୍କ୍ଇତ୍କେ ବାତେ ଅଡ଼୍କିଙ୍କ୍ କେଲ୍ୱେ ମାତ୍ତଡ଼୍, ଆଦ୍ ଅଡ଼୍ ଉଡ଼ିତଡ଼୍ ନୁ ବାତେ ଅଡ଼୍ କେଞ୍ଜ୍ୱେ ମାତ୍ତଡ଼୍, ଆଦ୍ ଅଡ଼୍ ପୁନ୍ଦ୍ତଡ଼୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)