1 ବେସୁଙ୍କ୍‌ ଆୟିନା ସିୟୋନତେ ଦର୍ମ ୱେଇସ୍‌ତେ ନ୍ୟାୟ ନୁ ଆଦିନ୍‌ ପରିତ୍ରାଣ ନିଡ଼୍‌ତାନ୍‌ କୁପିଲେକାମ୍‌ ନ୍ୟାୟ ଆୟ, ଆସୁଙ୍କ୍‌ ଆୟିନା ମାମେ ଆଦିନ୍‌ ସେଙ୍ଗେ କଟ ଆୟିୱାଡ଼୍‌ ନୁ ଯିରୁଶାଲେମ୍‌ତେ ସେଙ୍ଗେ ରମ୍‌ୱାଡ଼୍‌। 2 ମେଣ୍ଡେ, ୱେରେ ଦେଶ୍‌ତେନଡ଼୍‌ ମିୟାଦ୍‌ ଦର୍ମ ନୁ ସାରେ ରାଜାନଡ଼୍‌ ଗୌରବ୍‌ ୱେଇସ୍ ଉଡ଼ିତଣ୍ଡ୍‌; ମେଣ୍ଡେ, ମିଡ଼୍‌ ସଦାପ୍ରବୁନ୍‌ ମକମ୍‌ତଡ଼୍‌ ୱେରଡ଼୍‌ ପୁଃନେ ପେଦେର୍‌ତେ ୱାଦ୍‌ତିଡ଼୍‌। 3 ମେଣ୍ଡେ, ସଦାପ୍ରବୁନ୍‌ କାଇଦେ ୱେରଡ଼୍‌ ସୁନ୍ଦର୍‌ ସଜ୍‌ତେ ଲେକାମ୍‌ ନୁ ମି ପରମେଶ୍ୱର୍‌ଦେ କାଇଦାଗ୍‌ ୱେରଡ଼୍‌ ରାଜାନ୍‌ ସଜ୍‌ ଲେକାମ୍‌ ଆଦ୍‌ତିନ୍‌। 4 ନିମେ ୱିଡ଼୍‌ସ୍ତେନଣ୍ଡ୍‌ ଇଞ୍ଜ ମେଣ୍ଡେ ପେଦେର୍‌ ପାହେମ୍‌ ଆୟ୍‌ୱିନ୍‌, କି ମିୟାଦ୍‌ ଦେଶ୍‌ ଅନାତ୍‌ ଇଞ୍ଜ ମେଣ୍ଡେ କାର୍ଙ୍ଗଡ଼୍‌; ମାତର୍‌ ନିମେ ହିପ୍‌ସୀବା* ନୁ ନିୟାଦ୍‌ ଦେଶ୍‌ ବିୟଲା* ପେଦେର୍‌ତେ ଲେକା ଆଦ୍‌ତେ; ବାତାଙ୍କ୍‌ଇତ୍କେ ସଦାପ୍ରବୁ ମିୟାଗେ ସନ୍ତୋଷ ପାହେମ୍‌ ଆଦ୍‌ତଣ୍ଡ୍‌ ନୁ ନିମେ ଦେଶ୍‌ତେ ପେଣ୍ଡୁଲ୍‌ ଆତ୍‌ତେନନି ଆଦ୍‌ତିନ୍‌। 5 ଲେଇୱେ ପେକଡ଼୍‌ ବେଲାନ୍‌ ଲେୟେ ପିକ୍‌ତିଙ୍କ୍‌ ପେଣ୍ଡୁଲ୍‌ ମାଡ଼ିତଣ୍ଡ୍‌, ଆଦ୍‌ ଲେକାମ୍‌ ମି ମାର୍‌କ୍‌ ମିକିଙ୍କ୍‌ ପେଣ୍ଡୁଲ୍‌ ମାଡ଼ିତଡ଼୍‌; ମେଣ୍ଡେ ବର ବେଲାନ୍‌ ପିଲେତାଗ୍‌ ୱେଡ଼୍‌କେ ମାଡ଼ିତଣ୍ଡ୍‌, ଆଦ୍‌ଲେକାମ୍‌ ପରମେଶ୍ୱର୍‌ ମିୟାଗେ ୱେଡ଼୍‌କେ ମାଡ଼ିତଣ୍ଡ୍‌। 6 ହୋ ସଦାପ୍ରବୁ ଯିରୂଶାଲାମତାଗ୍‌, ମାମେ ମି ନେଟେତ୍‌ ପରୁ କାମ୍‌ ମାଡ଼ାନଡ଼୍‌କ୍ ହେଞ୍ଚିମିନ୍ଦେମ୍‌; ଅଡ଼୍‌ ଦିନାମ୍‌ କି ନାର୍କା ବେସୁଙ୍କ୍‌ ବା କଟ ମାନ୍‌ନଡ଼୍‌। 7 ହୋ ସଦାପ୍ରବୁଙ୍କ୍‌ ଏର୍କେମାଡ଼ାନ୍‌ ନାରୁନଡ଼ି, ଆସୁଟ୍‌ ଆୟିନା ଯିରୁଶାଲେମ୍‌ତାକ୍‌ ଆନ୍‌ମାଟ୍‌ ନୁ ପୃତିବିତାଗ୍‌ ଅଙ୍କ୍‌ ପ୍ରଶଂସାତେ ବିଷୟ୍‌ ପ୍ରଚାର୍‌ ମାଡ଼ଡ଼୍‌, ବେସୁଙ୍କ୍‌ ଆୟିନା ମିଡ଼୍‌ ରମ୍‌ମାଟ୍‌, କି ଆଦିଙ୍କ୍‌ ରମାନଙ୍କ୍‌ ଇମାଟ୍‌। 8 ସଦାପ୍ରବୁ ନିଜେତେ ତିନ୍ଦେକାଇ ନୁ ଶକ୍ତିତାଦ୍‌ କାଇତଡ଼୍‌ ଶପଥ ମାଡ଼ିମିନ୍ଦେଣ୍ଡ୍‌, ନିଜାମ୍‌ ମାମେ ମିକିଙ୍କ୍‌ କାଦି ମି ଶତ୍ରୁନଡ଼୍‌ କାଦିତ୍‌ ସେଙ୍ଗେ ମେଣ୍ଡେ ଇୱାଡ଼୍‌ ନୁ ବେଦିନ୍‌ ସେଙ୍ଗେ ମିଡ଼୍‌ ତିପାଲ୍‌ ମାଡ଼ିମିନ୍ଦେଡ଼ି, ମିୟାଦ୍‌ ଆଦ୍‌ ଅଙ୍ଗୁର୍‌କାଲ୍‌ ବିଦେଶିନଡ଼୍‌ ମେଣ୍ଡେ ଉନଡ଼୍‌। 9 ମାତର୍‌ ବେନଡ଼୍‌ ଆଦ୍‌ ଗୁଡ଼୍‌ପି ମିନ୍ଦେଡ଼୍‌, ଅଡ଼୍‌ ଆଦ୍‌ ତିଞ୍ଜ୍‌ ସଦାପ୍ରବୁଙ୍କ୍‌ ପ୍ରଶଂସା ମାଡ଼ିତଡ଼୍‌ ନୁ ବେନଡ଼୍‌ ଆୱୁ ଗୁଡ଼୍‌ପି ମିନ୍ଦେଡ଼୍‌, ଅଡ଼୍‌ ମାନ୍‌ ପବିତ୍ର ପଡ଼ିୟେତେ ଦୁୱାଡ଼୍‌ତାଗ୍‌ ଆଦ୍‌ ଉନ୍ଦ୍‌ତଡ଼୍‌। 10 ମିଡ଼୍‌ ଆନୁଟ୍‌, ନଗର୍‌ତେ ଆର୍‌ଇସ୍‌ ଆନୁଟ୍; ନାରୁଡ଼ାଦ୍‌ ଆର୍‌ ତିଆର୍‌ ମାଡ଼ାଟ୍‌; ଡେଙ୍ଗ୍‌ ମାଡ଼ାଟ୍‌, ରାଜାନ୍‌ ଆର୍‌ ଡେଙ୍ଗ୍‌ ମାଡ଼ାଟ୍‌; କାଲ୍‌ବଦେ ପେସ୍ପି ଗୁଡ଼୍‌ପାଟ୍‌; ନାର୍‌ଦେ ସାରେତଡ଼୍‌ ସେଙ୍ଗେ ୱେରଡ଼୍‌ ଜାଣ୍ଡ୍‌ ତେମୁଟ୍‌। 11 ଉଡ଼େ, ସଦାପ୍ରବୁ ପୃତିବିତେ ସାରେପାକା ଏୱୁନା ଇଦ୍‌ କେସ୍‌ମିନ୍ଦେଣ୍ଡ୍‌, ମିଡ଼୍‌ ସିୟୋନ୍‌ତେ ମାୟାସ୍କିଙ୍କ୍‌ କେଲ୍‌ମୁଟ୍‌ ଉଡ଼େ, ମିୟାଦ୍‌ ପରିତ୍ରାଣ ୱାସମିନ୍ଦେ, ଉଡ଼େ, ଆୱିନାଦ୍‌ ପୁରସ୍କାର୍‌ ଆୱିନ୍‌ତଡ଼୍‌ ମିନ୍ଦେ ନୁ ଆୱୁ ମାଡ଼ିମାନ୍ଦାନ୍‌ କାମ୍‌ ଆୱିନ୍‌ ମୁନେ ମିନ୍ଦେ। 12 ମେଣ୍ଡେ, ନାରୁଡ଼୍‌ ଅଡ଼୍‌କିଙ୍କ୍‌ ପବିତ୍ର ନାରୁଡ଼୍‌, ସଦାପ୍ରବୁନ୍‌ ଉଦ୍ଦାର୍‌ ଇଞ୍ଜଡ଼୍‌ କାର୍ଙ୍ଗିତଡ଼୍‌; ମେଣ୍ଡେ ମିକ୍‌ ବେନ୍‌ ନଗର୍‌ତିଙ୍କ୍‌ ପ୍ରେମ ମାଡ଼ାଙ୍କ୍‌ କାର୍ଙ୍ଗିମାନ୍ଦାନ୍‌, ୱିଡ଼୍‌ସକଟ ମାନ୍ଦାନ୍‌ ନଗର୍‌ ଇଞ୍ଜ ଲେକା ଆଦ୍‌ତେ।