1 ଉଡ଼େ, ସଦାପ୍ରବୁ ପୃତିବିତିଙ୍କ୍‌ ଚିମ୍‌ଚାମ୍‌ ନୁ ବାତ୍ତେଇଲ୍‌ୱେ ମାଡ଼ମିନ୍ଦେଣ୍ଡ୍‌, ମେଣ୍ଡେ ଆଦ୍‌ ଉଲ୍‌ଟା ମାଡ଼ି ଆଗେତ୍‌ ନାରୁଡ଼୍‌କ୍‌ ୱେରେୱେରେ ମାଡ଼ମିନ୍ଦେଣ୍ଡ୍‌। 2 ଆସୁଙ୍କ୍‌ ବେଲାନ୍‌ ନାରୁଡ଼୍‌, ଆଦ୍‌ଲେକାମ୍‌ ଯାଜକ୍‌ତାଦ୍‌; ବେଲାନ୍‌ ଦାସନାଦ୍‌, ଆଦ୍‌ଲେକାମ୍‌ ତାନ୍‌ କର୍ତ୍ତାନାଦ୍‌; ବେଲାନ୍‌ ଦାସିନାଦ୍‌, ଆଦ୍‌ଲେକାମ୍‌ ତାନ୍‌ ମାଲିକ୍‌ତାଦ୍‌; ବେଲାନ୍‌ ଆସାନାୱୁ, ଆଦ୍‌ଲେକାମ୍‌ ୱାମାନଡ଼ାଦ୍‌; ବେଲାନ୍‌ ବେଡ଼ିୟେମାନ୍ଦେ, ଆଦ୍‌ଲେକାମ୍‌ ସାଉକାର୍‌; ବେଲାନ୍‌ ଉଦ୍ଦାର୍‌ଅଦାନଣ୍ଡ୍‌, ଆଦ୍‌ଲେକାମ୍‌ ଉଦ୍ଦାର୍‌ପୟିତାନଣ୍ଡ୍‌ ପରୁ ଗଟେମ୍‌ଆଦ୍‌ତେ। 3 ପୃତିବି ସାରେ ଲେକାମ୍‌ ସିମ୍‌ସାମ୍‌ ନୁ ସାରେତେ ଦଂସ ଆତ୍‌ତେ; ବାତେଙ୍କ୍‌ଇତ୍କେ ସଦାପ୍ରବୁ ଇଦ୍‌ ଗଟ୍‌ କେସ୍‌ମିନ୍ଦେଣ୍ଡ୍‌।

4 ପୃତିବି ଦୁଃକଆସ୍‌ ୱିଡ଼୍‌ସି ଆଦୁତ୍‌, ଜଗତ୍‌ ୱାସିଆସ୍‌ ୱିଡ଼୍‌ସିଆଦୁତ୍‌, ପୃତିବିତେ ବେଡ଼ିୟେ ନାରୁଡ଼୍‌ ତେରି ଆଦ୍‌ତଡ଼୍‌। 5 ପୃତିବିତାଗ୍‌ ମାନ୍ଦାନଡ଼୍‌ ଡେକେତ୍‌ ମଦଲ୍‌ ଅପବିତ୍ର ମାଡ଼ମିନ୍ଦେଡ଼୍‌, ବାତେଙ୍କ୍‌ଇତ୍କେ ଅଡ଼୍‌ ବ୍ୟବସ୍ଥାସାରେ ପାଲନ୍‌ ମାଡଡ଼୍‌, ନିୟମ୍‌ ୱିଡ଼୍‌ସିମିନ୍ଦେଡ଼୍‌, ସାରେକାଲାମ୍‌ ନିୟମ୍‌ ଉଃସ୍‌ମିନ୍ଦେଡ଼୍‌। 6 ଆଦିଙ୍କ୍‌ ଅବିଶାପ୍‌ ପୃତିବିତିଙ୍କ୍‌ ନଷ୍ଟ ମାଡ଼ିମିନ୍ଦେ ନୁ ଆଗେମାନ୍ଦାନ୍‌ ନାରୁଡ଼୍‌ ଅପରାଦିଡ଼୍‌ ଆସ୍‌ମିନ୍ଦେଡ଼୍‌; ଆଦିନ୍‌ ସେଙ୍ଗେ ପୃତିବିତେ ନାରୁଡ଼୍‌ ଡଲି ମିନ୍ଦେଡ଼୍‌ ନୁ ଇସୁକ୍‌ ନାରୁଡ଼୍‌ ଗେଲ୍ସିମିନ୍ଦେଡ଼୍‌। 7 ପୁଃନେ ଅଙ୍ଗୁର୍‌କାଲ୍‌ ୱାସି ଆଦୁତ୍‌, ଅଙ୍ଗୁର୍‌ଟଣ୍ଡେ ଜିମ୍‌ ଆସ୍‌ମିନ୍ଦେ, ସାର୍ଦେତ୍‌ ହୃଦୟ ଇଞ୍ଜେ ଦୁଃକାମ୍‌ତେ ମିନ୍ଦେଡ଼୍‌। 8 ଡଲା ଲେଙ୍ଗ୍‌ କଟଆସ ମିନ୍ଦେ, ୱେଡ଼୍‌କେ ମାଡ଼ାନଡ଼୍‌ ଲେଙ୍ଗ୍‌ ତେର ମିନ୍ଦେ, ଡୁମ୍‌ରିତେ ୱେଡ଼୍‌କେ ବନ୍ଦ୍‌ ଆସ୍‌ ମିନ୍ଦେ। 9 ନାରୁଡ଼୍‌ ପାଟାକିନ୍‌ତ ଅଙ୍ଗୁର୍‌ରସ୍‌ ଉନଡ଼୍‌; କାଲ୍‌ ଉନ୍ଦାନଡ଼୍‌କିଙ୍କ୍‌ କାଲ୍‌ କାୟ୍‌ତିତ୍‌। 10 ଚିମ୍‌ଚାମ୍‌ ନଗର୍‌ ଉର୍ଙ୍ଗିମିନ୍ଦେ; ବେନେଆୟି ନାରୁଣ୍ଡ୍‌ ବେଲାନ୍‌ ଲପେ ଆଦ୍‌ଦେ ପାର୍‌ୱଣ୍ଡ୍‌, ଆଦିନ୍‌ ସେଙ୍ଗେ ସାରେ ଲୋକ୍‌ ଉର୍ଙ୍ଗିମିନ୍ଦେ। 11 ଅଙ୍ଗୁର୍‌ରସ୍‌ ଉନ୍ଦାନଡ଼୍‌ ସେଙ୍ଗେ ରଟିନାଗ୍‌ ମର୍ରେଆଦ୍‌ତେ; ସାରେ ଲେକାମ୍‌ ୱେଡ଼୍‌କେ ଇକାଡ଼୍‌ ଆସ୍‌ମିନ୍ଦେ, ଦେଶ୍‌ତେ ୱେଡ଼୍‌କେ ମାୟି ଆଦୁତ୍‌। 12 ନଗର୍‌ତାଗ୍‌ ଦଂସ ଆସ୍‌ ଆଲେକେ ମାତର୍‌ ମିନ୍ଦେ ନୁ ଆର୍‌ଙ୍ଗ୍‌ ଉର୍ଙ୍ଗିମିକା ନଷ୍ଟ ଆସ୍‌ମିନ୍ଦେ। 13 ବାତେଙ୍କ୍‌ଇତ୍କେ ବେଲାନ୍‌ ଜୀତମାଡ଼େ କାୟା ଅଃଲାନ୍‌ ୱେଲେ ଆଦ୍‌ତେ ନୁ ଅଙ୍ଗୁର୍‌କାୟା ଗୁଡ଼୍‌ପାନ୍‌ ୱେଲେ ବେଲାନ୍‌ ଅଙ୍ଗୁର୍‌ ମେର୍ସ୍କାନଙ୍କ୍‌ ଆଦ୍‌ତେ, ଆଦ୍‌ଲେକାମ୍‌ ପୃତିବିତେ ନଗର୍‌ତେ ନାରୁଡ଼୍‌ ପରୁ ଗଟେମ୍‌ ଆଦ୍‌ତେ।

14 ଇଡ଼୍‌ ଗାଟିଲେଙ୍ଗ୍‌ ମାଡ଼ିତଡ଼୍‌, ଇଡ଼୍‌ ୱେଡ଼୍‌କେ ମାଡ଼ିତଡ଼୍‌; ସଦାପ୍ରବୁନ୍‌ ମହିମା ସେଙ୍ଗେ ଅଡ଼୍‌ ପଡ଼ଦ୍‌ଆଦାନ୍‌ ପାକେଙ୍କ୍‌ ଗାଟି ଲେଙ୍ଗ୍‌ ମାଡ଼ିତଡ଼୍‌। 15 ଆଦିଙ୍କ୍‌ ମିଡ଼୍‌ ପୂର୍ବଦେଶ୍‌ତାଗ୍‌ ସଦାପ୍ରବୁନ୍‌, ଇତ୍କେ, ଇସ୍ରାଏଲ୍‌ତେ ପରମେଶ୍ୱର୍‌ ସଦାପ୍ରବୁନ୍‌ ପେଦେର୍‌ତେ ଗୌରବ୍‌ ସମୁଦ୍ରତେ ଦ୍ୱୀପପାକେ କେଲ୍‌ମୁଟ୍‌। 16 ଦାର୍ମିକ୍‌ନଡ଼୍‌ ଦୁଃକ ପାହେମ୍‌ ଆଦ୍‌ତଡ଼୍‌, ଇଦ୍‌ ପାଟେ ମାମେ ପୃତିବିତେ ଉସ୍କବୁମ୍‌ ତାଗାଙ୍କ୍‌ କେଞ୍ଜୁତମ୍‌। ମାତର୍‌ ନାନେ କେତ୍‌ତାନ୍‌, "ନାନେ ଦଣ୍ଡ୍‌ତେ ଆସମିନ୍ଦେନ୍‌, ନାନେ ଦଣ୍ଡ୍‌ ଆସମିନ୍ଦେନ୍‌ ! ନାନେ ଦୁଃକାତେ ନାରୁନ୍‌ !" ବିଶ୍ୱାସଉଃତାନଡ଼୍‌ ବିଶ୍ୱାସ୍‌ଉଃତ୍‌ତଡ଼୍‌; ହଁ, ବିଶ୍ୱାସଉଃତାନଡ଼୍‌ ନାର୍ଗେ ବିଶ୍ୱାସଉଃସ୍‌ ମାଡ଼ିମିନ୍ଦେଡ଼୍‌। 17 ହୋ ପୃତିବିତେ ମାନ୍ଦାନ୍‌ ନାରୁଡ଼ି, ମି ସେଙ୍ଗେ ୱେର୍‌, ଗୁଇନ୍ଦେ ନୁ ଉଡିୟି ତିଆର୍‌ ଆସ୍‌ ମିନ୍ଦେ। 18 ମେଣ୍ଡେ, ଇଦ୍‌ଲେକାମ୍‌ ଗଟେମ୍‌ଆଦ୍‌ତେ, ବେନ ଯଦି ୱେର୍‌ଦେ ଲେଙ୍ଗ୍‌ଦେ ମିରିତଣ୍ଡ୍‌, ଅଣ୍ଡ୍‌ ଗୁଇନ୍ଦେତାଗ୍‌ ରାଲିତଣ୍ଡ୍‌; ବେନ ଗୁଇନ୍ଦେତାଗାଙ୍କ୍‌ ତେଦି ୱାତ୍‌ର୍କେ, ଅଣ୍ଡ୍‌ ଉଡ଼ିୟିଦାଗ୍‌ ପୟିସ୍‌ ଆଦ୍‌ତଣ୍ଡ୍‌; ବାତେଙ୍କ୍‌ଇତ୍କେ ପରତେ ଜରକାସାରେ କଲା ମିନ୍ଦେ ନୁ ପୃତିବିତେ ମୁଲାସାରେ ୱାଡ଼୍‌କ ମିନ୍ଦେ। 19 ପୃତିବି ନିଜାମ୍‌ ଉଙ୍ଗମିନ୍ଦେ, ପୃତିବି ଅଦିକ୍‌ କାର୍ଙ୍ଗମିନ୍ଦେ ମିନ୍ଦେ, ପୃତିବି ଅଦିକ୍‌ ଦାନ୍ଦେ ଆସମିନ୍ଦେ। 20 ପୃତିବୀ କାଲ୍‌ଉତ୍‌ତେ ନାରୁଣ୍ଡ୍‌ ଲେକାମ୍‌ ଉଙ୍ଗମିନ୍ଦେ ନୁ ଗୁଡ଼୍‌ସେ ଲନ୍‌ ଲେକାମ୍‌ ଇକେ ଆକେ ଉଙ୍ଗିତ୍‌; ମେଣ୍ଡେ, ଆଦିନ୍‌ ଅପରାଦ୍‌ ଆଦିନ୍‌ ପରୁ ବଜ୍‌ ଆଦ୍‌ତେ. ମେଣ୍ଡେ ଆଦ୍‌ ରାଲିତେ, ମେଣ୍ଡେ ତେଦ। 21 ମେଣ୍ଡେ, ଆଦ୍‌ ଦିନେ ସଦାପ୍ରବୁ ପରୁ ପରୁମାନ୍ଦାନ୍‌ ସୈନ୍ୟସାମନ୍ତତିଙ୍କ୍‌ ନୁ ବୁମ୍‌ଦାଗ୍‌ ବୁମ୍‌ଦାଗ୍‌ ସାରେତଡ଼୍ ରାଜାନଡ଼୍‌କ୍‌ ମାଡ଼୍‌ତେ କାୟେ ଇଦ୍‌ତଣ୍ଡ୍‌। 22 ଆସୁଙ୍କ୍‌ ବେଲାନ୍‌ ବନ୍ଦିନଡ଼୍‌ ଗପିନାଗ୍‌ ଅଣ୍ଡୟ୍‌ତାଗ୍‌ ଆଦ୍‌ତଡ଼୍‌, ଆଦ୍‌ଲେକାମ୍‌ ଅଡ଼୍‌ ଅଣ୍ଡୟ୍‌ତାଗ୍‌ ଆସ୍‌ ବନ୍ଦିଲତ୍‌ତାଗ୍‌ ବନ୍ଦି ଆଦ୍‌ତଡ଼୍‌, ମେଣ୍ଡେ, ନାର୍ଗେଦିନା ପେର୍କେ ଅଡ଼୍‌କିଂଙ୍କ୍‌ ବିଚାର୍‌ ଆଦ୍‌ତେ। 23 ଆସୁଙ୍କ୍‌ ନେଲ୍‌ଞ୍ଜ୍‌ ୱେସ୍‌ ଆୟ୍‌ୱେମାନ୍ତେ ନୁ ପଡ଼ଦ୍‌ ୱେସ୍ ଇୱ; ବାତେଙ୍କ୍‌ଇତ୍କେ ସାରେତିଙ୍କ୍‌ ବେଡ଼ିୟେ ସଦାପ୍ରବୁ ସିୟୋନ୍‌ ମେଟେତାଗ୍‌, ଯିରୂଶାଲେମ୍‌ତାଗ୍‌ ନୁ ତାନ୍‌ ବେଡ଼ିୟେ ନାରୁଡ଼୍‌ ମୁନେ ଗାଟି ଶକ୍ତିତେ ରାଜତ୍ୱ ମାଡ଼ିତଡ଼୍‌।