1 ଇଦୋମ୍‍ତାଗାଙ୍କ୍‌, କଲର୍‌ତାୱୁ ଚିଲେ କେର୍ସ୍‌ ବସୋରାତାଗାଙ୍କ୍‌ ଇଣ୍ଡ୍‌ ଯେ ୱାଦୁତଣ୍ଡ୍‌, ଅଣ୍ଡ୍‌ ବେନନ୍‌ ? ନିମେ କେର୍‌ତେ ଚିଲେତେ ଗୌରବ୍‌ତଡ଼୍‌ ନୁ ନିଜେତ୍‌ ଗାଟି ଶକ୍ତିତେ ଜିଡ଼ ମିନ୍ଦେନି ଯେ ଇଣ୍ଡ୍‌, ଅଣ୍ଡ୍‌ ବେନନ୍‌ ? ମାମେ ଯେ ଦର୍ମବାଦିମ୍‌ ନୁ ପରିତ୍ରାଣ ମାଡ଼ାଙ୍କ୍‌ ତିଆର୍‌ ଆଦ୍‌ତମ୍‌। 2 ନିଜେତ୍‌ କେର୍‌ତେ ଚିଲେ ନେତୁର୍‌ ରଙ୍ଗ୍‌ ନୁ କୁଣ୍ଡ୍‌ତାଗ୍‌ ଅଙ୍ଗୁର୍‌ତାଗ୍‌ ମୁସିମାନ୍ଦା‌ନ୍‌ ଚିଲେ ତାଗ୍‌ ଲାଗେମ୍‌ଆତ୍‌ତେ ଲେକାମ୍ ବାତ୍ତିଙ୍କ୍‌ ? 3 ମାମେ ୱେରମେ ଅଙ୍ଗୁର୍‌ଉସି ମିନ୍ଦେମ୍‌ ନୁ ନାରୁଡ଼ାଗାଙ୍କ୍‌ ମା ତଡ଼୍‌ ବେନ ଇଲ୍‌ୱେ ମାଡ଼୍‌ତଡ଼୍‌; ମାମେ ମା କପାମ୍‌ତେ ଅଡ଼୍‌କିଙ୍କ୍‌ ରେଃତମ୍‌ ନୁ ନିଜେତ୍‌ କପାମ୍‌ତେ ଅଡ଼୍‌କିଙ୍କ୍‌ ଉଃସ୍ପ୍‌ତମ୍‌; ଆଦିଙ୍କ୍‌ ଅଡ଼୍‌ ଜିୱେ ନେତୁର୍‌ ମିଟ୍‌ତାଦ୍‌ ମା ଚକେତାଗ୍‌ ରାଲ୍‌ତେ ନୁ ମାମେ ନିଜେ କେର୍‌ତେ ଚକାସାରେ ଦାଗ ଲେକାମ୍‌ ମାଡ଼ିମିନ୍ଦେମ୍‌। 4 ବାତେଙ୍କ୍‌ଇତ୍କେ ବଦ୍‌ଲା ଅଦାନ୍‌ ଦିନାମ୍‌ ମା ମାନ୍‌ତାଗ୍‌ ମାତ୍‌ତେ ନୁ ମା ମୁକ୍ତ ନାରୁଡ଼ାଦ୍‌ ବର୍ଷ ଆସ୍‌ମିନ୍ଦେ। 5 ମେଣ୍ଡେ, ମାମେ ଉଡ଼୍‌ତମ୍‌, ମେଣ୍ଡେ ସାହାଯ୍ୟ ମାଡ଼ାନଙ୍କ୍‌ ବେନ ଇଲ୍‌ୱେ ମାତ୍‌ତଣ୍ଡ୍‌ ନୁ ତଡ଼୍‌ ଆଦାନଙ୍କ୍‌ ବେନ ଇଲ୍‌ୱେ ମାତ୍‌ତାଙ୍କ୍‌ ମାମେ ବାକୁୱା ଆତ୍‌ତମ୍‌; ଆଦିନ୍‌ ସେଙ୍ଗେ ମାମେ ନିଜେତ୍‌ ବପୁ ମା ପାକେ ପରିତ୍ରାଣ ତାତ୍‌ତେ ନୁ ମାୟାଦ୍‌ କପାମ୍‌ ମାକ୍‌ ସାହାଯ୍ୟ ମାଡ଼୍‌ତେ। 6 ମେଣ୍ଡେ, ମାମେ ନିଜେତ୍‌ କପାମ୍‌ତେ ନାରୁଡ଼୍‌କିଙ୍କ୍‌ ୱିକିତମ୍‌ ନୁ ମା କପାମ୍‌ତେ ଅଡ଼୍‌କିଙ୍କ୍‌ ଅସ୍ପତମ୍‌, ମେଣ୍ଡେ ବୁମ୍‌ଦାଗ୍‌ ଅଡ଼୍‌ୱାଦ୍‌ ଜିୱେ ନେତୁର୍‌ ତଃସିତ୍‌ତମ୍‌।

7 ମା ସଦାପ୍ରବୁନ୍‌ ସ୍ନେହପୂର୍ଣ୍ଣ ଦୟାସାରେ ପାଲନ୍‌ ମାଡ଼ିକାଡ଼୍‌ ନୁ ସଦାପ୍ରବୁ ମା ଆୱୁସାରେ ଲେକାମ୍‌ ମାଡ଼ିମିନ୍ଦେଣ୍ଡ୍‌, ମେଣ୍ଡେ ନିୟାଦ୍‌ ୱେରେ ୱେରେ ନିୟମ୍‌ ଦୟା ନୁ ନାର୍ଗେ ସ୍ୱେହପୁର୍ଣ୍ଣ ଦୟା ଲେକାମ୍‌ ଇସ୍ରାଏଲ୍‌ ପିଲୁଡ଼୍‌ତେ ବେନ୍‌ ନାର୍ଗେ ଲେକେତ୍‌ ମାଡ଼ିମିନ୍ଦେଡ଼୍‌, ଆଦ୍‌ଲେକାମ୍‌ ମାମେ ସଦାପ୍ରବୁଙ୍କ୍‌ ପ୍ରଶଂସା ମାଡ଼ିକାଡ଼୍‌। 8 ବାତେଙ୍କ୍‌ଇତ୍କେ ଅଣ୍ଡ୍‌ କେତ୍‌ତଣ୍ଡ୍‌, ନିଜାମ୍‌ ଅଡ଼୍‌ ମା ନାରୁଡ଼୍‌, ବେନଡ଼୍‌ ମିଚ୍‌ ବ୍ୟବହାର୍‌ ମାଡ଼ଡ଼୍‌, ଇଦ୍‌ଲେକାତ୍ ପିଲା ଆଦ୍‌ତା; ଆଦିଙ୍କ୍‌ ଅଣ୍ଡ୍‌ ଅଡ଼୍‌ ତ୍ରାଣକର୍ତ୍ତାଲ୍‌ ଆତ୍‌ତଣ୍ଡ୍‌। 9 ଅଡ଼୍‌ ସାରେ ଦୁଃକାମ୍‌ତେ ଆୱୁ ସାରେ ଦୁଃକାମ୍‌ ଆତ୍‌ତା ନୁ ତାମ୍‌ ନିଜେତ୍‌ ମକମ୍‌ ଲେକାମ୍‌ ଦୂତ ଆୱିଙ୍କ୍‌ ପରିତ୍ରାଣ ମାଡ଼୍‌ତେ; ଆଦ୍‌ ତାମ୍‌ ପ୍ରେମ ନୁ ନିଜେତ୍‌ ଦୟାତେ ଅଡ଼୍‌କିଙ୍କ୍‌ ଉଦ୍ଦାର୍‌ ମାଡ଼୍‌ତେ ନୁ ପେର୍କେତ୍‌ କାଲାମ୍‌ତେ ସାରେ ଦିନାମ୍‌ ଅଡ଼୍‌କିଙ୍କ୍‌ ଯତନ୍‌ ଅସ୍‌ ମାତ୍‌ତଡ଼୍‌। 10 ମାତର୍‌ ଅଡ଼୍‌ କେଞ୍ଜଡ଼୍‌ ଆତ୍‌ତଡ଼୍‌ ନୁ ତାମ୍‌ ପବିତ୍ର ଆତ୍ମାତିଙ୍କ୍‌ ଦୁଃକ ମାଡ଼୍‌ତିଡ଼୍‌; ଆଦିଙ୍କ୍‌ ଅଣ୍ଡ୍‌ ମାଲ୍‌ସ୍‌ ଅଡ଼୍‌ ଶତ୍ରୁ ଆତ୍‌ତଣ୍ଡ୍‌ ନୁ ଜାମେ ଅଡ଼୍‌ପାକେ ଯୁଦ୍ଧ ମାଡ଼୍‌ତଣ୍ଡ୍‌। 11 ଆସୁଙ୍କ୍‌ ଅଣ୍ଡ୍‌ ମୁନେତ୍‌ କାଲାମ୍‌, ମୋଶା ନୁ ତାମ୍‌ ନାରୁଡ଼୍‌କ୍‌ ଏର୍କେ ମାଡ଼ି କେତ୍‌ତଣ୍ଡ୍, ଯେ ମି ଗୁଡ଼ୁସେତେ‌ ରକ୍ଷାମାଡ଼ାନଡ଼୍‌ତଡ଼୍‌ ଅଡ଼୍‌କିଙ୍କ୍‌ ସମୁଦ୍ର ୱେଇସ୍ପି ତାତ୍‌ତଣ୍ଡ୍‌, ଅଣ୍ଡ୍‌ ବେକେ ? ଯେ ଅଡ଼୍‌ ହୃଦୟତାଗ୍‌ ନିଜେତ୍‌ ପବିତ୍ର ଆତ୍ମା ନେଃତ୍‌ତଣ୍ଡ୍‌, 12 ଯେ ମୋଶାନ୍‌ ଡ଼େବେପାକେ ତାନ୍‌ ଗୌରବ୍‌ତେ ତାକ୍‌ସ୍ତତଣ୍ଡ୍‌, ଯେ ନିଜେତ୍‌ ସେଙ୍ଗେ ସାରେଦିନେତ୍‌ ପେଦେର୍‌ ମାଡ଼ାନ୍‌ ଲେକାମ୍‌ ଅଡ଼୍‌ ମୁନେ ଏର୍‌ଦିଙ୍କ୍‌ ରେଣ୍ଡ୍ ଦୁଡ଼ା ୱିର୍‌ସ୍ପତଣ୍ଡ୍‌, 13 ବେନ ୱାସ୍‌ତେବୂମ୍‌ତାଗ୍‌ ଆଦାନଙ୍କ୍‌ ଗୁରାମ୍‌ ଲେକାମ୍‌ କୁଇଙ୍କ୍‌ ସମୁଦ୍ରତେ ଲପେ ଅଡ଼୍‌କିଙ୍କ୍‌ ତାକ୍‌ସ୍‌ତଣ୍ଡ୍‌ ନୁ ଅଡ଼୍‌ ତାଲ୍‌ଗି ରାଲଡ଼୍‌, ଅଣ୍ଡ୍‌ ବେକେ ? 14 ପରୁକଞ୍ଜ୍‌ ଡିଗି ଆଦାନ୍‌ ପଶୁମାନ୍ଦେ ଲେକାମ୍‌ ସଦାପ୍ରବୁନ୍‌ ଆତ୍ମା ଅଡ଼୍‌କିଙ୍କ୍‌ ରମ୍‌ସିତ୍‌ତେ; ଇଦ୍‌ ଲେକାମ୍‌ ମିଡ଼୍‌ ନିଜେତ୍‌ ମାଇଦିଙ୍କ୍‌ ୱେରଡ୍‌ ଗୌରବ୍‌ତାଦ୍‌ ପେଦେର୍‌ ଇତ୍କେ ମି ନାରୁଡ଼୍‌କିଙ୍କ୍‌ ତାକ୍‌ସ୍‌ତିଡ଼୍‌।

15 ଇଞ୍ଜେ ସ୍ୱର୍ଗତ୍‌ପାକେ ଉଡ଼ାଟ୍‌, ମି ପବିତ୍ରତାତେ ନୁ ମି କାମ୍‌କେତ୍‌ ମାନ୍ଦାନ୍‌ ପଡ଼ିୟାନାଗାଙ୍କ୍‌ କଣ୍ଡେ ୱାଟାଟ୍‌; ମିୟାଦ୍‌ ୱେଡ଼୍‌କେ ନୁ ମିଇ ଶକ୍ତି ବେକେ ? ମିୟାଦ୍‌ ହୃଦୟ୍‌ତାଗ୍‌ ନଦାନାଦ୍‌ ନୁ ମିୟାୱୁ ସ୍ନେହସାରେ ପରୁ ୱାସ୍‌ମିନ୍ଦେ। 16 ଯଦି ଅବ୍ରାହାମ୍‌ ମାକିଙ୍କ୍‌ ପୁନଣ୍ଡ୍‌ ନୁ ଇସ୍ରାଏଲ୍‌ ମାକିଙ୍କ୍‌ ସ୍ୱିକାର୍‌ ମାଡ଼ଣ୍ଡ୍‌, ଆଗେକ୍‌ବା ନିମେ ତ ମା ବାବାନି ଆଦ୍‌ତିନ୍‌; ସାରେ କାଲାମ୍‌କଞ୍ଜ୍‌ ମା ମୁକ୍ତିଦାତାଲ୍‌ ଇଞ୍ଜ ସଦାପ୍ରବୁ ନିୟାଦ୍‌ ପେଦେର୍‌ ମିନ୍ଦେ। 17 ହୋ ସଦାପ୍ରବୁ, ମାକିଙ୍କ୍‌ ମି ଆର୍‌ଦାଗାଙ୍କ୍‌ ବାତ୍‌ତିଙ୍କ୍‌ କାନା ମାଡ଼ୁତିନ୍‌ ନୁ ନିକିଙ୍କ୍‌ ୱେର୍‌ଦାନ୍‌ ମାଇଦିଙ୍କ୍‌ ମା ହୃଦୟତାଗ୍‌ କଷ୍ଟ ମାଡ଼ୁତିନ୍‌ ? ନି ଦାସନଡ଼୍‌, ନିୟାଦ୍‌ ଅଦିକାର୍‌ ଲେକାମ୍‌ ଗୋଷ୍ଟିତେ ସେଙ୍ଗେ ମାଲ୍‌ମୁଟ୍‌। 18 ମିୟାଦ୍‌ ପବିତ୍ର ନାରୁଡ଼୍‌ ମାତର୍‌ ସୁଦୁର୍‌ କାଲାମ୍‌ ଆଦିନ୍‌ ଅଦିକାର୍‌ ମାଡ଼୍‌ତିଡ଼୍‌; ମା ପାକେତଡ଼୍‌ ମି ପବିତ୍ର ଲାବ୍‌ ଡେକେତ୍‌ ମଦଲ୍‌ ୱିକୁତଡ଼୍‌। 19 ବେନଡ଼୍‌ ପରୁ ମିଡ଼୍‌ ବେସୁଙ୍କ୍‌ ଶାସନ୍‌ ମାଡ଼୍‌ୱିଡ଼୍‌, ବେନଡ଼୍‌ ମି ପେଦେର୍‌ତେ ବେସୁଙ୍କ୍‌ ଇଲ୍‌ୱେ ମାତ୍‌ତଡ଼୍‌, ଆଦ୍‌ ଲେକେତ୍‌ ନାରୁଡ଼୍‌ ଲେକାମ୍‌ ମାମେ ଆସ୍‌ମିନ୍ଦେମ୍‌।