1 ଯିରୂଶାଲାମ୍‌ ବିଷୟ୍‌କିନ୍‌ ଦର୍ଶନ୍‌ତେ ବାବବାଣୀ। ଇଞ୍ଜେ ନିୟାଦ୍‌ ବାତେ ଆସମିନ୍ଦେ ଯେ, ମିଡ଼୍‌ ସାରେତଡ଼ି ଲକିନ୍‌ ମୁର୍ସିନାଗ୍‌ ଆଞ୍ଜମିନ୍ଦେଡ଼ି ? 2 ହୋ ୱେଡ଼୍‌କେତେ ଲେଙ୍ଗ୍‌ ମାଡ଼ାନଡ଼ି, ରାମ୍‌କିନ୍‌ଲେଙ୍ଗ୍‌ଦେ ନଗର୍‌ତଡ଼୍‌, ୱେଡ଼୍‌କେ ନିଣ୍ଡିମାନ୍ଦାନାଦ୍‌; ମିଡ଼୍‌ ଡଲ୍‌ତେ ନାରୁଡ଼୍‌ ଚୁର୍‌ତଡ଼୍‌ ଡଲ୍‌ୱିଡ଼୍‌ କି, ଅଡ଼୍‌ ଯୁଦ୍ଦ୍‌ତାଗ୍‌ ଡଲଡ଼୍‌। 3 ମି ଶାସନ୍‌କର୍ତ୍ତା ସାରେତଡ଼୍‌ ଅଣ୍ଡୟ୍‌ଦାମ୍‌ ମିର୍‌ତଡ଼୍‌, ଅଡ଼୍‌ ୱିଲ୍‌କିନ୍‌ କାଡ଼୍‌ ୱିଡ଼୍‌ସ୍‌ୱେ ମୁନେଙ୍କ୍‌ ପୟିସ୍‌ ତହସ୍‌ ଆତ୍‌ତଡ଼୍‌; ମି ଲପେଙ୍କ୍‌ ପାହେମ୍‌ ଆତ୍‌ତେ ସାରେତଡ଼୍‌ ନାରୁଡ଼୍‌ ଅଣ୍ଡ୍‌ୟ୍‌ତାଗ୍‌ ତହସ୍‌ ଆତ୍‌ତଡ଼୍‌, ଅଡ଼୍‌ ମିର୍‌ତଡ଼୍‌। 4 ଆଦିନ୍‌ସେଙ୍ଗେ ନାନେ କେତ୍‌ତାନ୍‌, "ନାକିଙ୍କ୍ ୱିଡ଼୍‌ସି ମେଣ୍ଡନ୍‌ ପାକେ ଉଡ଼ାଟ୍‌, ନାନେ ନାର୍ଗେ କେୟିତାନ୍‌; ମା' ନାରୁଡ଼୍‌ ଦଂସ ବିଷୟ୍‌ତେ ନାକିଙ୍କ୍‌ ସ୍ୱାନ୍ତନା ମାଡ଼ାନଙ୍କ୍‌ ଚେଷ୍ଟା ମାଡ଼୍‌ମାଟ୍‌। 5 ବାତେଙ୍କ୍ଇତ୍କେ ଦର୍ଶନ୍‌ ମାଡ଼ାନାଦ୍‌ ପ୍ରବୁନାଦ୍‌, ସାରେତିଙ୍କ୍ ବେଡ଼ିୟେ ସଦାପ୍ରବୁନ୍‌ ପ୍ରେରିତ ଆରେମ୍‌ଆତ୍ତେ, ମାନ୍ଦେତଡ଼୍‌, ଦୁଃକାମ୍‌ତେ ନେଟେ ଉର୍ଙ୍ଗାନାଦ୍‌ ନୁ ମେଟାକିନ୍‌ ପରୁ କେୟାନାଦ୍‌ ମାଡ଼ାନାଦ୍‌ ଦିନାମ୍‌ ଇଦ୍‌। 6 ମେଣ୍ଡେ, ଏଲମ୍‌ ରତାରୋହୀ, ଗୁରାକିନ୍‌ତଡ଼୍‌ ୱାତ୍‌ତେ ସୈନ୍ୟତଡ଼୍‌ ୱିଲ୍‌କ୍‌ କାଡ଼୍‌କ୍‌ ପାୟିତେନଡ଼୍‌ ନୁ ଅଟ୍‌କା ମାଡ଼ାନାଦ୍‌ ପୟିସ୍‌ ମାତ୍‌ତଡ଼୍‌। 7 ମେଣ୍ଡେ, ମିୟାଦ୍‌ ଲେକେତ୍‌ ଡିଗୁଡ଼୍‌ସାରେ ରତକିନେ ନିଣ୍ଡି ମାତ୍‌ତା ନୁ ଗୁରାକିନଡ଼୍‌ ନଗର୍‌ ଦ୍ୱାର୍‌ତାଗ୍‌ ତିଆର୍‌ ଆସ୍‌ମାତ୍‌ତଡ଼୍‌।" 8 ମେଣ୍ଡେ ସଦାପ୍ରବୁ ଯିହୁଦାତେ ରକ୍ଷା ଆର୍‌ଦିଙ୍କ୍‌ ଟେଣ୍ଡ୍‌ଡ଼ିତ୍‌ତଣ୍ଡ୍‌ ନୁ ଆଦ୍‌ ଦିନେ ମିଡ଼୍‌ ମେଟେତ୍‌ ଯୁଦ୍ଦ୍‌ମାଡ଼ାନାୱିନ୍‌ ପରୁ କଣ୍ଡେ ୱାଟ୍‌ତଡ଼୍‌। 9 ମେଣ୍ଡେ, ଦାଉଦ୍‌ ନଗର୍ତେ ଉର୍ଙ୍ଗତେ ପଡ଼ିୟେ ନାର୍ଗେ ମିଡ଼୍‌ ଉଡ଼୍‌ତିଡ଼୍‌ ନୁ ମଦଲ୍‌ତେ ପୁଙ୍ଗାର୍‌ ତାଗାଙ୍କ୍‌ ଏର୍‌ସାରେ ଅଣ୍ଡୟ୍‌ତାଗ୍‌ ମାଡ଼୍‌ତିଡ଼୍‌। 10 ମିଡ଼୍‌ ଯିରୂଶାଲମ୍‌ତାଗ୍‌ ମାନ୍ଦାନ୍‌ ଲକ୍‌ସାରେ ଲେକ୍‌ତିଡ଼୍‌ ନୁ ନେଟେ ଦୁଟାଙ୍କ୍‌ ମାଡ଼ାନଙ୍କ୍‌ ଲକ୍‌ସାରେ ଉଃତିଡ଼୍‌। 11 ମିକା ମିଡ଼୍‌ ପାନ୍ତେ ନୂଇ ଏର୍‌ ସେଙ୍ଗେ ରେଣ୍ଡ୍‌ ଦୁଡ଼ାନ୍‌ ପଡ଼ିୟେନାଗ୍‌ ଏର୍‌ ନିଲ୍ପାନଙ୍କ୍‌ ତିଆର୍‌ ମାଡ଼୍‌ତିଡ଼୍‌; ମାତର୍‌ ବେନ ଇଦ୍‌ ତିଆର୍‌ ମାଡ଼୍‌ତଣ୍ଡ୍‌, ମିଡ଼୍‌ ଅନ୍‌ ପାକେ ଉଡ଼୍‌ୱିଡ଼୍‌, କି ବେନ ନାର୍ଗେ କାଲାମ୍‌କଞ୍ଜ୍‌ ଇଦିନ୍‌ ତିଆର୍‌ ମାଡ଼୍‌ତଣ୍ଡ୍‌, ମିଡ଼୍‌ ଅଙ୍କ୍‌ ଏର୍କେ ମାଡ଼୍‌ୱିଡ଼୍‌। 12 ଆଦ୍‌ ଦିନେ ପ୍ରବୁ, ସାରେତିଙ୍କ୍ ବେଡ଼ିୟେ ସଦାପ୍ରବୁ କେୟି ନୁ ଦୁଃକା‌ମ୍‌ ନୁ ତାଲେ କୁସ୍‌ସ୍କି ନୁ ଆଦ୍‌ ଦେଶେନଡ଼୍‌ ବାସ୍ତା ଚକେ ଟିକିଡ଼୍‌ ତାଗ୍‌ କେର୍ଦାଙ୍କ୍‌ କାର୍‌ଙ୍ଗ୍‌ତଣ୍ଡ୍‌; 13 ମାତର୍‌ ଉଡ଼ାଟ୍‌, ୱେଡ଼୍‌କେ ମାଡ଼ାନାଦ୍‌, ଗଡ୍‌ ନୁ ମେକା, ଆୱୁଙ୍କ୍‌ ତିନ୍ଦାନାଦ୍‌ ନୁ ଅଙ୍ଗୁର୍‌କାଲ୍‌ ଉଞ୍ଜ ମିନ୍ଦେଡ଼୍‌; ୱାଡ଼ାଟ୍‌, ମାନାଡ଼୍‌ ତିନ୍ଦାନ୍‌ ଉନ୍ଦାନ୍‌ ମାଡ଼ିକାଡ଼୍‌, ବାତେଙ୍କ୍‌ଇତ୍କେ ନାଡ଼୍‌ ମାନାଡ଼୍‌ ଡଲିକାଡ଼୍‌। 14 ମେଣ୍ଡେ, ସାରେତିଙ୍କ୍ ବେଡ଼ିୟେ ସଦାପ୍ରବୁ ସ୍ୱୟଂ ମାନ୍‌ କେୱୁଗାରେ କେତ୍‌ତଣ୍ଡ୍‌, ନିଜାମ୍‌ ମିୟାଦ୍‌ ଡଲାନ୍‌କାଲାମ୍‌ ଯାକ ମିୟାଦ୍‌ ଇଦ୍‌ ଅପରାଦ୍‌ କ୍ଷମା ଆୟ, ପ୍ରବୁ ସାରେତିଙ୍କ୍ ବେଡ଼ିୟେ ସଦାପ୍ରବୁ ଇଦ୍‌ଲେକାମ୍‌ କେତ୍‌ତଣ୍ଡ୍‌। 15 ପ୍ରବୁ, ସାରେତିଙ୍କ୍ ବେଡ଼ିୟେ ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌, ମିଡ଼୍‌ଇଦ୍‌ ଡାବୁକ୍‌ ଇସାପ୍‌ ମାଡ଼ାନନ୍‌ ପାକେ, ଇତ୍କେ, ଲତ୍‌ତେ ମୁକ୍ୟାଲ୍‌ ଶିବ୍‌ନ ପାକେ ଆଞ୍ଜ୍‌ କେଲ୍‌ମୁଟ୍‌, 16 ମିଡ଼୍‌ ଇଗେ ବାତେ ମାଡ଼ୁତିଡ଼୍‌ ? ନୁ ଇଗେ ମିକିଙ୍କ୍‌ ବେନ ମିନ୍ଦେଣ୍ଡ୍‌ ଯେ, ମିଡ଼୍ ନିଜେତ୍‌ ସେଙ୍ଗେ ୱେରଡ଼୍‌ ସମାଦି ଡେୱିମିନ୍ଦେଡ଼ି ? ଆଦ୍‌ ତ ଡେଙ୍ଗ୍‌ ପଡ଼ିୟେତାଗ୍‌ ନିଜେତ୍‌ ସମାଦି ଡେୱିମିନ୍ଦେଡ଼ି ନୁ କାଲ୍‌ତାଗ୍‌ ନିଜେତ୍‌ ସେଙ୍ଗେ ମାନ୍ଦାନ୍‌ ପଡ଼ିୟେ ଡେୱି ମିନ୍ଦେନି ! 17 ଉଡ଼େ, ବୀରଡ଼୍‌ତେ ନ୍ୟାୟ ସଦାପ୍ରବୁନ୍‌ ଶକ୍ତିତେ ମିକିଙ୍କ୍‌ ଏସିଦ୍‌ତଣ୍ଡ୍‌, ହଁ, ଅଣ୍ଡ୍‌ ଢ଼ାଟୁମ୍‌ତେ ପୟିସ୍‌ ମିକିଙ୍କ୍‌ ଦୁରାମ୍‌ ଏସିଦ୍‌ତଣ୍ଡ୍‌। 18 ନିଜାମ୍‌ ଅଣ୍ଡ୍‌ ବଲ୍‌ ଲେକାମ୍‌ ମିକିଙ୍କ୍‌ ଉଡ଼୍‌ସ୍ପି ନୁ ଉଡ଼୍‌ସ୍ପି ୱେରଡ଼୍‌ ବେଡ଼ିୟେ ଦେଶ୍‌ତାଗ୍‌ ଏସିଦ୍‌ତଣ୍ଡ୍‌; ଆଗେ ମିଡ଼୍‌ ଡଲିତିଡ଼୍‌ ନୁ ଆଗେ ମିୟାଦ୍‌ ଗୌରବ୍‌ ଲେକାମ୍‌ ରତସାରେ ମାନ୍ତା, ମିଡ଼୍ ନିଜେ କର୍ତ୍ତାନ୍‌ ଲତ୍‌ତେ କାର୍କେ ଲେକାମ୍‌। 19 ମେଣ୍ଡେ, ମାମେ ମିକିଙ୍କ୍‌ ମି ପଦତାଗାଙ୍କ୍‌ ଟେଣ୍ଡ୍‌ଡ଼ିଦ୍‌ତମ୍‌ ନୁ ଅଣ୍ଡ୍‌ ନିକିଙ୍କ୍‌ ନି ପଡ଼ିୟାତାଗାଙ୍କ୍‌ ଲାଗି ତାସ୍‌ ନେଲ୍‌ ୱାଟିତଡ଼୍‌। 20 ମେଣ୍ଡେ, ଆଦ୍‌ ଦିନେ ମାମେ ମା ଦାସତିଙ୍କ୍‌, ହିଲ୍‌କୀୟତେ ମାର୍‌ ଇଲିୟାକିମ୍‌ତିଙ୍କ୍‌ କାର୍ଙ୍ଗିକାଡ଼୍‌; 21 ମେଣ୍ଡେ, ମାମେ ମି ଲାଟିଚକା ଆଦିଙ୍କ୍‌ କେର୍ଦିକାଡ଼୍‌ ନୁ ମି ପାକେ ଆଦିଙ୍କ୍‌ ଶକ୍ତିତଣ୍ଡ୍‌ ମାଡ଼ିକାଡ଼୍‌ ନୁ ମି କର୍ତ୍ତାନ୍‌ କାଇଦାଗ୍‌ ସମର୍ପଣ ମାଡ଼ିକାଡ଼୍‌; ଆସୁଟ୍‌ ଅଣ୍ଡ୍‌ ଯିରୁଶାଲମ୍‌ ନାରୁଡ଼୍‌ ନୁ ଯିହୁଦା ପିଲୁଡ଼୍‌ତେ ବାବାଲ୍‌ ଆଦ୍‌ତଣ୍ଡ୍‌। 22 ମେଣ୍ଡେ, ମାମେ ଦାଉଦ୍‌ପିଲୁଡ଼୍‌ତେ ଚାବି ତାନ୍‌ ଆଟେତାଗ୍‌ ୱାଟିତାଡ଼୍‌, ଆଦ୍‌ ଟେଣ୍ଡ୍‌କେ, ବେନ ବନ୍ଦ ମାଡ଼୍‌ୱାଡ଼୍‌ ନୁ ଅଣ୍ଡ୍‌ ବନ୍ଦ ମାଡ଼୍‌ତଣ୍ଡ୍‌, ବେନ ଟେଣ୍ଡେ ପାର୍‌ୱଣ୍ଡ୍‌। 23 ମେଣ୍ଡେ, ମାମେ କୁଟି ଲେକାମ୍‌ ଅଣ୍ଡ୍‌ ଢ଼ାଟାଙ୍କ୍‌ ପଡ଼ିୟେତାଗ୍‌ ଆଦିଙ୍କ୍‌ ରେଃତିକାଡ଼୍‌ ନୁ ଅଣ୍ଡ୍‌ ନିଜେତ୍‌ ଆନିଦାଦିଡ଼୍‌ ପିଲୁଡ଼୍‌ତେ ଗୌରବ୍‌ତଡ଼୍‌ ସିଂହାସନ୍‌ ଲେକାମ୍‌ ଆଦ୍‌ତେ। 24 ମେଣ୍ଡେ, ନାରୁଡ଼୍‌ ଆଦିନ୍‌ ଆନିଦାଦିଡ଼୍‌ ପିଲୁଡ଼୍‌ ସାରେ ଗୌରବ୍‌, ପିଲାଜିଲା ନୁ ତିନ୍ଦାନ୍‌ କାଦି ଅଣ୍ଡୟ୍‌ କୁଣ୍ଡେ ସାରେ ଇସୁର୍‌ ଜିନିଷ ଆଦିନ୍‌ ପରୁ ୱେତିତଡ଼୍‌। 25 ସାରେତିଙ୍କ୍ ବେଡ଼ିୟେ ସଦାପ୍ରବୁ କେତିତଣ୍ଡ୍‌, "ବେନ କୁଟି ଢ଼ାଟୁଙ୍କ୍‌ତେ କଟି ମାତ୍କେ ବା, ଆଦ୍‌ ଆଗାଙ୍କ୍‌ ଲୁଜ୍‌ ଆଦ୍‌ତେ ନୁ ଆଦ୍‌ ଉର୍ଙ୍ଗିଆସ୍‌ ନେଲ୍‌ ରାଲିତେ, ମେଣ୍ଡେ ଆଦିନ୍‌ ପରୁ ମାନ୍ଦାନ୍‌ ବଜ୍‌ ନଷ୍ଟ ଆଦ୍‌ତେ, ବାତେଙ୍କ୍‌ଇତ୍କେ ସଦାପ୍ରବୁ ଇଦ୍‌ କେସମିନ୍ଦେଣ୍ଡ୍‌।"