1 ଆମୋସତେ ମାର୍‌ ଯିଶାଇୟ, ଯିହୁଦା ନୁ ଯିରୂଶାଲେମ୍‌ ବିଷୟ୍‌ତେ ବେନ ଉଡ଼୍‌ତଣ୍ଡ୍‌ ଆଦ୍‌ ସାରେତାୱିନ୍‌ ଗଟ୍‌। 2 ତେରାନ୍‌ କାଲାମ୍‌ତେ ଇଦ୍‌ଲେକାମ୍‌ ଗଟେମ୍‌ ଆଦ୍‌ତେ, ସଦାପ୍ରବୁନ୍‌ ଲତ୍‌ତେ ମେଟେ, ମେଟେତ୍‌ ପରତ୍‌ କାଲ୍‌କିନାଗ୍‌ ତିଆର୍‌ ଆଦ୍‌ତେ ନୁ ଡେଙ୍ଗ୍‌ ମେଟାନାଗାଙ୍କ୍‌ ସାରେତିଙ୍କ୍‌ ଡ଼େଙ୍ଗ୍‌ ଆଦ୍‌ତେ; ମେଣ୍ଡେ, ସାରା ଗୋଷ୍ଟିତଡ଼୍‌ ନାରୁଡ଼୍‌ ଲେକାମ୍‌ ତାନ୍‌ପାକେ ୱାଦ୍‌ତଡ଼୍‌। 3 ମେଣ୍ଡେ, ନାର୍ଗେ ଗୋଷ୍ଟି ଆଞ୍ଜ ଆଞ୍ଜ କେତିତଡ଼୍‌, "ମିଡ଼୍‌ଆନ୍ତେ ୱାଡ଼ାଟ୍‌, ମାମେ ସଦାପ୍ରବୁନ୍‌ ମେଟେତା, ଯାକୁବ୍‌ତେ ପରମେଶ୍ୱର୍‌ତେ ଲତ୍‌ତାକ୍‌ ଆଦୁତମ୍‌; ତାନ୍‌ପେର୍କେ ଅଣ୍ଡ୍‌ ନିଜେତ୍‌ ଆର୍‌ ବିଷୟ୍‌ତେ ମାକିଙ୍କ୍‌ ଶିକ୍ଷା ଇଦ୍‌ତଣ୍ଡ୍‌ ନୁ ମାନାଡ଼୍‌ ଅନ୍‌ ଗଟ୍‌ତେ ଆଦିକାଡ଼୍‌।" ବାତେଙ୍କ୍‌ଇତ୍କେ ସିୟୋନ୍‌ତାଗାଙ୍କ୍‌ ନିୟମ୍‌ ନୁ ଯିରୁଶାଲତାଗାଙ୍କ୍‌ ସଦାପ୍ରବୁନ୍‌ ବାକ୍ୟ ପେଇତିତ୍‌। 4 ମେଣ୍ଡେ, ଆ ଦେଶିୟନଡ଼୍‌ ତାଗାଙ୍କ୍‌ ବିଚାର୍‌ ମାଡ଼ିତଣ୍ଡ୍‌ ନୁ ନାର୍ଗେ ଗୋଷ୍ଟି ତାଗାଙ୍କ୍‌ ରାଜି ମାଡ଼ିତଣ୍ଡ୍‌; ଆସୁଙ୍କ୍‌ ଅଡ଼୍‌ ନିଜେତ୍‌ ଚୁର୍‌ଉଃସ୍‌ ନାଙ୍ଗେଲ୍‌ତେ କାର୍‌କୟେ ମାଡ଼ିତଣ୍ଡ୍‌ ନୁ ନିଜେତ୍‌ ନିଜେତ୍‌ ବର୍ଚ୍ଛାଉସ୍‌ କେସେର୍‌ ତିଆର୍‌ ମାଡ଼ିତଡ଼୍‌; ୱେରଣ୍ଡ୍‌ ଦେଶିୟ ନାରୁଡ଼୍‌ ୱେରେ ଦେଶିୟ ନାରୁଡ଼୍‌ ବିରୁଦ୍ଦ୍‌ତେ ଚୁର୍‌ ତେୱଡ଼୍‌, କି ଅଡ଼୍‌ ମେଣ୍ଡେ ଯୁଦ୍ଦ୍‌ ନାଡ଼୍‌ସଡ଼୍‌। 5 ହୋ ଯାକୁବ ପିଲୁଡ଼୍‌, ୱାଡ଼େ, ମାନାଡ଼୍‌ ସଦାପ୍ରବୁନ୍‌ ୱେସିନାଗେ ଆଦିକାଡ଼୍‌।

6 ବାତେଙ୍କ୍‌ଇତ୍କେ ମିଡ଼୍‌ ନିଜେତ୍‌ ନାରୁଣ୍ଡ୍‌ ଯାକୁବ୍‌ତେ ପିଲୁଡ଼୍‌ତିଙ୍କ୍‌ ୱିଡ଼୍‌ସି ମିନ୍ଦେଡ଼ି, ବେଲାନ୍‌କି ଅଡ଼୍‌ ମୁନେତ୍‌ ଦେଶିତେ ବ୍ୟବହାର୍‌ତେ ନିଣ୍ଡିମିନ୍ଦେଡ଼୍‌ ନୁ ପଲେଷ୍ଟିୟନଡ଼୍‌ ନ୍ୟାୟ ନାରୁଡ଼୍‌ ଆସ୍‌ମିନ୍ଦେଡ଼୍‌, ମେଣ୍ଡେ, ଅଡ଼୍‌ ବିଦେଶିୟ ପିଲାକିନ୍‌ତଡ଼୍‌ କାଇଲି ମିନ୍ଦେଡ଼୍‌। 7 ଅଡ଼୍‌ୱାଦ୍‌ ଦେଶ୍‌ମିକା ରୂପା ନୁ ସୁନାତେ ନିଣ୍ଡିମାନ୍ତେ; ଅଡ଼୍‌ ଦନ୍‌ଦେ ସୀମା ଇଲେ; ମେଣ୍ଡେ, ଅଡ଼୍‌ ଦେଶ୍‌ ଗୁରାକିନ୍‌ ରତକ୍‌ ଲେକାନଙ୍କ୍‌ ଆୟ। 8 ଅଡ଼୍‌ ଦେଶ୍‌ ମିକା ମୂର୍ତ୍ତିପୂଜାତେ ନିଣ୍ଡ୍‌ତେ; ଅଡ଼୍‌ ୱାଡ଼୍‌ଞ୍ଜ୍‌କିନ୍‌ ତିଆର୍‌ତେ ବା କାଇଦେତଡ଼୍‌ ତିଆତ୍‌ତେ ସାମାନ୍‌କିଙ୍କ୍‌ ମଡ଼୍‌କିତଡ଼୍‌। 9 ସାରେ ନାରୁଡ଼୍‌ ତତ୍‌ରାଲଡ଼୍‌ ନୁ ବାଡ଼୍‌ୟି ନାରୁଡ଼୍‌ ଡଲିତଡ଼୍‌; ଆଦିଙ୍କ୍‌ ଅଡ଼୍‌କିଂଙ୍କ୍‌ କ୍ଷମା ମାଡ଼୍‌ମାଟ୍‌। 10 ମିଡ଼୍‌ ସଦାପ୍ରବୁଙ୍କ୍‌ ୱେର୍‌ମୁଟ୍‌ ନୁ ଅନ୍‌ ମହିମାତେ କାମ୍‌ଦେ ୱେସିନେ, କାଲ୍‌କିନ୍‌ ପାଡ଼୍‌କିନାଗ୍‌ ନେଙ୍ଗିମିକା ଦୁମ୍‌ଦାଗ୍‌ ନିଜେତିଙ୍କ୍‌ ମିଞ୍ଜ୍‌ସ୍ପାଟ୍‌। 11 ନାରୁଡ଼୍‌ ଗର୍ବ ଉଡ଼ାନାଦ୍‌ ମଦଲ୍‌ ଆଦ୍‌ତେ ନୁ ନାରୁଡ଼୍‌ ଅହଙ୍କାର୍‌ ମାୟି ଆଦ୍‌ତେ, ମେଣ୍ଡେ, ଆଦ୍‌ଦିନେ ମାତର୍‌ ସଦାପ୍ରବୁ ମହାନ୍‌ ଆଦ୍‌ତଣ୍ଡ୍‌। 12 ମାତର୍‌ ଅହଙ୍କାରିଡ଼୍‌, ଗର୍ବିତ ନୁ ବଡ଼୍‌ପନିୟାଦ୍‌ ସାରେତଡ଼୍‌ ପାକେ ସାରେତିଙ୍କ୍‌ ବେଡ଼ିୟ୍‌ ସଦାପ୍ରବୁନ୍‌ ୱେରଡ଼୍‌ ଦିନେ ୱାଦ୍‌ତେ, ଆଗାଙ୍କ୍‌ ଆଦ୍‌ ମଦଲ୍‌ ଆଦ୍‌ତେ; 13 ଇତ୍କେ ଆଦ୍‌ ଦିନେ ଲିବାନୋନ୍‌ତେ ଡ଼େଙ୍ଗ୍‌ ନୁ ଡ଼େଙ୍ଗ୍‌ତାୱୁ ସାରେ ଏରସ୍‌ ମାଡ଼େତେ ବିରୁଦ୍ଦ୍‌ତେ ନୁ ବାଶନତେ ସାରେ ଅଲୋନ୍‌ ମାଡ଼େତ୍‌ ବିରୁଦ୍ଦ୍‌ତେ; 14 ମେଣ୍ଡେ,ସାରେ ଡ଼େଙ୍ଗ୍‌ ମେଟେତ୍‌ ବିରୁଦ୍ଦ୍‌ତେ ନୁ ସାରେଉନ୍ନତ୍‌ ବେଡ଼ିୟେମେଟେତେ ବିରୁଦ୍ଦ୍‌ତେ; 15 ମେଣ୍ଡେ, ସାରେତିଙ୍କ୍‌ ଡ଼େଙ୍ଗ୍‌ ବିରୁଦ୍ଦ୍‌ତେ ନୁ ସାରେ ଡ଼ୁଟାଙ୍କତେ ନେଟେତେ ବିରୁଦ୍ଦ୍‌ତେ; 16 ତର୍ଶୀଶ୍‌ତେ ସାରେ ଜାହାଜତେ ବିରୁଦ୍ଦ୍‌ତେ ନୁ ସୁନ୍ଦର୍‌ତାଦ୍‌ ସାରେତ୍‌ କାୟିଦେ ପାଡ଼ିୟ୍‌ ବିରୁଦ୍ଦ୍‌ତେ ଆଦ୍‌ତେ। 17 ମେଣ୍ଡେ, ନାରୁଡ଼୍‌ ଗର୍ବତାଦ୍‌ ପଦ୍‌ ମଦଲ୍‌ ଆଦ୍‌ତେ ନୁ ନାରୁଡ଼ାଦ୍‌ ଅହଙ୍କାର୍‌ ମାୟି ଆଦ୍‌ତା; ମେଣ୍ଡେ ଆଦ୍‌ ଦିନେତେ ସଦାପ୍ରବୁ ମହାନ୍‌ ଆଦ୍‌ତଣ୍ଡ୍‌। 18 ମେଣ୍ଡେ, ମୂର୍ତ୍ତିପୂଜାକିନ୍‌ ସାରେ ନିଜାମ୍‌ ଲେକାମ୍‌ ନଷ୍ଟ ଆଦ୍‌ତେ। 19 ମେଣ୍ଡେ, ବେସୁଙ୍କ୍‌ ସଦାପ୍ରବୁ ପୃତିବିତିଙ୍କ୍‌ ନାର୍ଗେ ଉତାନଙ୍କ୍‌ ତେଦିତଣ୍ଡ୍‌, ଆସୁଙ୍କ୍‌ ନାରୁଡ଼୍‌ ଅଙ୍କ୍‌ ୱେର୍‌ତାନଡ଼୍‌ ନୁ ମହିମାତେ ତେଜତାଗାଙ୍କ୍‌ ମେଟେତ୍‌ତେ ପାଡ଼୍‌କ୍‌ ନୁ ପୃଥିବିତେ ଗୁଇନ୍ଦେତାଗ୍‌ ନେଙ୍ଗିତଡ଼୍‌। 20 ନାରୁଡ଼୍‌ ନିଜେତ୍‌ ତିଆର୍‌ ଆତ୍‌ତେ ରୂପାତେ ମୂର୍ତ୍ତି ନୁ ସନ୍‌ଦେ ପୁତ୍‌ଲାକିଙ୍କ୍‌ ଆଦ୍‌ ଦିନେ ମୁଃସ୍‌ତାୱୁ ନୁ ଉପେନ୍‌ ଗାରେ ୱାଟ୍‌ଟିଦ୍‌ତଡ଼୍‌। 21 ସଦାପ୍ରବୁ ପୃତିବିତିଙ୍କ୍‌ ଇଦ୍‌ଲେକାମ୍‌ ଉତାନଙ୍କ୍‌ ତେଦ୍‌କେ, ଅଙ୍କ୍‌ ୱେର୍‌ତାନଡ଼୍‌ ନୁ ତାନ୍‌ ମହିମାତେ ୱେୟିତେ ପାଡ଼୍‌କ୍‌ତେ ଗୁଇନ୍ଦେ ନୁ ମେଟେତ୍‌ ପଡ଼ିୟେତାଗ୍‌ ନେଙ୍ଗାନ୍‌ ମାଇଦିଙ୍କ୍‌; 22 ଇଡ଼୍‌ ନାରୁଡ଼୍‌ ଆଶେତେ ମାନ୍‌ମାଟ୍‌, ନାରୁଡ଼ାଦ୍‌ ନେସ୍‌କାନାଦ୍‌ ତାନାଦ୍‌ ମକତାଗାଙ୍କ୍‌ ମିନ୍ଦେ, ବାତେଙ୍କ୍‌ଇତ୍କେ ତାନାଦ୍‌ ବାତ୍‌ତେ ବା ଦାମ୍‌ ଇଲେ।