1 ବେନଡ଼୍ ଅଦର୍ମ ବ୍ୟବସ୍ଥା ତିଆର୍ ମାଡ଼ିତଡ଼୍ ନୁ ବେନ୍ ଲେକାନଡ଼୍ କାରାପ୍ ଗଟି ଲେକିତଡ଼୍, ଅଡ଼୍ ବେସର୍ ଦଣ୍ଡ ପାଏମ୍ ଆଦ୍ତଡ଼୍ ! 2 ଅଡ଼୍ ରାଣ୍ଡିକିଙ୍କ୍ ନିଜେତାୱୁ ଡଙ୍ଗ୍ତେ ଜିନିଷ୍ ଲେକାମ୍ ମାଡ଼ାନଙ୍କ୍, ଆନିଦାଦିଡ଼୍କ୍ ନିଜେତେ କଡ଼୍ମାୱୁ ଲେକାମ୍ ମାଡ଼ାନଙ୍କ୍, ଗରିବ୍ନଡ଼୍କିଙ୍କ୍ ନ୍ୟାୟବିଚାର୍ତାଗାଙ୍କ୍ ମାଲ୍ପିତଡ଼୍ ନୁ ନା ଦୁଃକାମ୍ତେ ନାରୁଡ଼୍କିଙ୍କ୍ ଅଦିକାର୍ ଡଙ୍ଗି ଆଦ୍ତଡ଼୍। 3 ଆଦିଙ୍କ୍ ମାଡ଼୍ତେ କାୟେ ଇଦାନ୍ ଦିନାମ୍ତେ ନୁ ଯେକାଙ୍କ୍ ୱାଦାନ୍ ବିନାଶ୍ ସମୟ୍ତେ ମିଡ଼୍ ବାତେ ମାଡ଼ିତିଡ଼୍ ? ସାହାଯ୍ୟ ସେଙ୍ଗେ ମିଡ଼୍ ବେନନ୍ ପାକେ ମିରିତିଡ଼୍ ? ନୁ ମିୟାଦ୍ ସମ୍ପତିତିଙ୍କ୍ ବେଗେ ୱାଟିତିଡ଼୍ ? 4 ଅଡ଼୍ ମାତର୍ ବନ୍ଦୀ ନାରୁଡ଼୍ ଡେକେତ୍ ମଦଲ୍ ରାଲିତଡ଼୍ ନୁ ଆୱ୍କାନ୍ ନାରିଡ଼୍ ଡେକାନ୍ ମଦଲ୍ ରାଲିତଡ଼୍। ଇୱୁସାରେ ଆତ୍କେ ଅନ୍ କପାମ୍ ୱିର୍ୟ, ମାତର୍ ଅନ୍ କାଇ ମୁନେତ୍ ଲେକାମ୍ ଏକାମ୍ ଆସ୍ମାନ୍ତେ।
ଅଶୂରତେ ନାରୁଡ଼୍ ସେଙ୍ଗେ ସଦାପ୍ରବୁନ୍ ଦଣ୍ଡ
5 ହେୟ୍ ଅଶୂର ! ଅଣ୍ଡ୍ ମାନ୍ କପାମ୍ତେ ଦଣ୍ଡ, ଅନ୍ କାଇଦାଗ୍ ମାନାଦ୍ କପାମ୍ତେ ଟେଙ୍ଗେ ମିନ୍ଦେ। 6 ନାନେ ଆଦିଙ୍କ୍ ଅଣ୍ଡୟ୍ ଅର୍ଦାମିକ ଜାତି ବିରୁଦ୍ଦ୍ତେ ନାକିଙ୍କ୍ ବେଡ଼ିୟଣ୍ଡ୍ ମାଡ଼ାଙ୍କ୍ ରଃସମିନ୍ଦେନି, ବେଲାନ୍ ଇଡ଼୍ ଡଙ୍ଗିତଡ଼୍ ଡଙ୍ଗ୍ତେ ଜିନିଷ୍ ଅଦ୍ତଡ଼୍, ନୁ ଅଡ଼୍କିଙ୍କ୍ ବାରଣ୍ଡାତାଗ୍ ବୁରୁଦେ ଲେକାମ୍ ୱିକିତଡ଼୍। 7 ଆଗେକ୍ବା ବା ତାନ୍ ଇଚ୍ଛା ଆଦ୍ଲେକାମ୍ ଆୟ, କି ଅନ୍ ହୃଦୟ୍ ଆଦ୍ଲେକା ଏର୍କେ ମାଡ଼; ମାତର୍ ନଷ୍ଟ ମାଡ଼ାନଙ୍କ୍ ନୁ ନାର୍ଗେ ନାକିଙ୍କ୍ ୱେର୍ ୱେର୍ ମାଡ଼ାଙ୍କ୍ ଅନ୍ ହୃଦୟତାଗ୍ ମିନ୍ଦେ। 8 ବାତେଙ୍କ୍ଇତ୍କେ ଅଣ୍ଡ୍ କେତିତଣ୍ଡ୍, ମା ସେନାପତିନଡ଼୍ ସାରେତଡ଼୍ କି ରାଜାନଡ଼୍ ଆୟଡ଼୍ ? 9 କଲ୍ନୋ ଟାଉନ୍ କି କର୍କମୀଶ୍ ଟାଉନ୍ ଲେକାମ୍ ଆୟ ? ହମାତ୍ ଟାଉନ୍ କି ଅର୍ପଦ ଟାଉନ୍ ଲେକାମ୍ ଆୟ ? ଶମରୀୟା କି ଦମ୍ମେଶକ ଲେକାମ୍ ଆୟ ? 10 ବେନ୍ ମୂର୍ତ୍ତି ନାରୁଡ଼୍ ରାଜ୍ୟତେ ସାରେତଡ଼୍ ତିଆର୍ତେ ମୃର୍ତ୍ତିଲେକାମ୍, ଯିରୁଶାଲେମ୍ତେ ନୁ ଶମରୀୟାତେ ମୃର୍ତ୍ତିକିଙ୍କ୍ ୱିଡ଼୍ସି ବେଡ଼୍ୟେ, ଆୱୁ ସାରେ ରାଜ୍ୟ ମା କାଇଦେ ମିନ୍ଦେ; 11 ମାମେ ଶମରୀୟା ନୁ ତାନ୍ ମୂର୍ତ୍ତିତେ ନାରୁଡ଼୍ ପରୁ ବେଦ୍ଲେକାମ୍ ମାଡ଼ିମିନ୍ଦେମ୍, ଯିରୁଶାଲେମ୍ ନୁ ତାନ୍ ମୁର୍ତ୍ତିତେନଡ଼୍ ପରୁ ବାତେ ଆଦ୍ଲେକାମ୍ ମାଡ଼୍ୱାଡ଼୍ ? 12 ଆଦିଙ୍କ୍ ଇଦ୍ଲେକାମ୍ ଗଟେମ୍ ଆଦ୍ତେ ଯେ, ପ୍ରବୁ ସିୟୋନ୍ ମେଟେତାଗ୍ ନୁ ଯିରୁଶାଲେମ୍ତାଗ୍ ତାନ୍ ତାଲେତ୍ କାମ୍ ମାଡ଼ାନ୍ ୱେଲେ ମାମେ ଅଶୂର ରାଜାନ୍ ଆଙ୍କାର୍ ମାଡ଼ିମାନ୍ଦାନ୍ କାୟେ ନୁ ତାନ୍ କଣ୍ଡେତ୍ନଜର୍ ମାଡ଼୍ତେ କାୟେ ଇଦ୍ତାନ୍। 13 ବାତେଙ୍କ୍ଇତ୍କେ ଅଣ୍ଡ୍ କେସ୍ମିନ୍ଦେଣ୍ଡ୍, ନାନେ ବୁଦ୍ଦିମାନ୍ ଆୟିନାଙ୍କ୍ ନିଜେତ୍ କାଇଦେ ଶକ୍ତି ନୁ ନିଜେତ୍ ଜ୍ଞାନ୍ତଡ଼୍ ଇଦ୍ ମାଡ଼୍ତାନ୍; ମେଣ୍ଡେ, ନାନେ ୱେରେ ୱେରେ ନଗର୍ତେ ସୀମା ଦୂର୍ ମାଡ଼୍ତାନ୍ ନୁ ଅଡ଼୍ ଗୁଡ଼୍ପ୍ତେ ଦନ୍ ଡଙ୍ଗିମିନ୍ଦେନ୍, ମେଣ୍ଡେ ନାନେ ଉର୍ଗାଡ଼୍ ନାରୁନ୍ ଲେକାମ୍ ସିଂହାସନ୍ତାଗ୍ ମାନ୍ଦାନ୍ ନାରୁଡ଼୍କିଙ୍କ୍ ମଦଲ୍ ୱାଟି ତାସ୍ମିନ୍ଦେନ୍; 14 ମେଣ୍ଡେ, ନାୟାଦ୍ କାଇ ୱେରେ ୱେରେ ନାକିନ୍ ଦନ୍ ପିଟେତ୍ ତୁଃଉକେ ଲେକାମ୍ ତିଆର୍ ଆସ୍ମିନ୍ଦେ ନୁ ବେନ ବେଲାନ୍ ତୁଃଉକେତାଗାଙ୍କ୍ ଗାଡ଼୍ବାମ୍ ଗୁଡ଼୍ପିତଣ୍ଡ୍, ଆଦ୍ଲେକାମ୍ ନାନେ ସାରେ ପୃତିବିତିଙ୍କ୍ ଗୁଡ଼୍ପି ମିନ୍ଦେନ୍; ମେଣ୍ଡେ, ରେକା ଉତାଙ୍କ୍ କି ମୁକୁର୍ ଲେତାନଙ୍କ୍ କି ଚିଁ ଚିଁ ଲେଙ୍ଗ୍ ମାଡ଼ାନଙ୍କ୍ ବେନ ଇଲ୍ୱେ ମାତ୍ତେ। 15 ଗଡେଲ୍ ବାତେ ଆଦିନ୍ତଡ଼୍ ନାଡ଼୍କାନ୍ କର୍ତ୍ତାଲ୍ ବିରୁଦ୍ଦ୍ତେ କେତିତେ ? କରତ୍ ବାତେ କରତ୍କଇଦାନନ୍ ବିରୁଦ୍ଦ୍ତେ ନିଜେତିଙ୍କ୍ ବେଡ଼୍ୟେ ମାଡ଼ିତେ ? ବେନଡ଼୍ ଦଣ୍ଡ୍ ତେଃତିତଡ଼୍, ଦଣ୍ଡ ବାତେ ଅଡ଼୍କିଙ୍କ୍ ଉଃତିତ୍ ? ବେନ ୱେର୍କ୍ ଆୟ, ଟେଙ୍ଗେ ବାତେ ଆଦିଙ୍କ୍ ତେତିତେ ? 16 ଆଦିଙ୍କ୍ ପ୍ରବୁ ସାରେତିଙ୍କ୍ ବେଡ଼୍ୟନ୍ ସଦାପ୍ରବୁ ତାନ୍ ମଦଲ୍ତେ ନାରୁଡ଼୍ ପାକେ ରଗ୍ ରତିତଣ୍ଡ୍ ନୁ ତାନ୍ କାମ୍କେତ୍ ମଦଲ୍ କିସ୍ତାଗେ ରାଲି କାର୍ୱିତଡ଼୍। 17 ମେଣ୍ଡେ, ଇସ୍ରାଏଲ୍ତେ ୱେସ୍ କିସ୍ ଲେକାମ୍ ଆଦ୍ତେ ନୁ ଆଦିନ୍ ଦର୍ମଲେକାମ୍ କିସ୍ତାଡ଼ିମି ଲେକାମ୍ ଆଦ୍ତେ, ମେଣ୍ଡେ ଆଦ୍ କାର୍ୱି ଅଣ୍ଡୟ୍ ଦିନାମ୍ତେ ତାନ୍ ପାର୍ୱେଲି ନୁ କୟେ ମାଡାକ୍ସାରେ କାର୍ୱିଆଦ୍ତେ। 18 ମେଣ୍ଡେ, ଅଣ୍ଡ୍ ତାନ୍ ମେଟେ ନୁ କାତାମ୍ ୱାୟେତେ ଗୌରବ୍ତିଙ୍କ୍ ଜିୱେ ନୁ ମେନ୍ଦୁଲ୍ତେ କି ସାରେ ନଷ୍ଟ ମାଡ଼ିତଣ୍ଡ୍; ଆସୁଙ୍କ୍ ଦୁର୍ବଲ୍ ନାରୁନ୍ ବେଲା କାର୍ୱାନ୍ ୱେଲେ ବେଲାନ୍ ଆଦ୍ତେ, ଆଦ୍ଲେକାମ୍ ଆଦ୍ତେ। 19 ମେଣ୍ଡେ, ମେଟେତେ ୱେରେ ମାଡ଼ାକ୍ ଇସର୍ ସୁକୁକ୍ ଆଦ୍ତା ଯେ, ୱେରଣ୍ଡ୍ ପେକାଲ୍ ଆଦ୍ ଲେକେ ପାର୍ତଣ୍ଡ୍।
ଇସ୍ରାଏଲ୍ ମେଣ୍ଡନ୍ ପାକେଙ୍କ୍ ମାଲ୍ସ୍ ୱାଦାନାଦ୍
20 ମେଣ୍ଡେ, ଆଦ୍ ଦିନାମ୍ତେ ଇଦ୍ଲେକାମ୍ ଘଟେମ୍ ଆଦ୍ତେ ଯେ, ଇସ୍ରାଏଲ୍ତେ ଦୁଡ଼େତ୍ ଦୁଡ଼େ ନୁ ଯାକୁବ୍ ପିଲୁଡ଼୍ତେ ରକ୍ଷାଆତ୍ତେ ନାରୁଡ଼୍ ନିଜେତ୍ ରେଃସ୍ ମାନ୍ଦାନ୍ ନାରୁଡ଼୍ ପରୁ ମେଣ୍ଡେ ବିଶ୍ୱାସ୍ ମାଡ଼ଡ଼୍; ମାତର୍ ଅଡ଼୍ ନିଜାମ୍ ଲେକେତ୍ ଇସ୍ରାଏଲ୍ତେ ଦର୍ମଲେକାମ୍ ସଦାପ୍ରବୁନ୍ ପରୁ ବିଶ୍ୱାସ୍ ମାଡ଼ିତଡ଼୍। 21 ଦୁଡ଼େ, ଇତ୍କେ, ଯାକୁବ୍ତେ ଦୁଡ଼େ, ପରାକ୍ରାନ୍ତ ପରମେଶ୍ୱର୍ତେ ପାକେ ମାଲ୍ସ୍ ୱାଦ୍ତଡ଼୍। 22 ବାତେଙ୍କ୍ଇତ୍କେ ମି ଇସ୍ରାଏଲ୍ ନାରୁଡ଼୍ ସମୁଦ୍ରତେ ଉସ୍କଲେକାମ୍ ଆତ୍କେ କେ ଅଡ଼୍ୱାଦ୍ ମାତର୍ ଦୁଡ଼େତ୍ ଦୁଡ଼େ ମାଲ୍ସ୍ ୱାଦ୍ତଡ଼୍; ଦାର୍ମିକ୍ତିଙ୍କ୍ ଅଟ୍କା ମାଡ଼ାଙ୍କ୍ ଆୟ୍ୱେ ଲେକାମ୍ ଦଂସ ଆସ୍ମିନ୍ଦେ। 23 ବେଲାନ୍ କି ପ୍ରବୁ, ସାରେକେ ବେଡ଼୍ୟନ୍ ସଦାପ୍ରବୁ ସାରା ପୃତିବିତାଗ୍ ଦଂସ ମାଡ଼ିତଣ୍ଡ୍, ତିଆର୍ତେ ୱେର୍ୱେର୍, ସାରେ ଦଂସ ମାଡ଼ିତଣ୍ଡ୍।
ସଦାପ୍ରବୁ ଆଶେରିୟାତିଙ୍କ୍ ଦଣ୍ଡ ଇତ୍ତଣ୍ଡ୍
24 ବେଲାନ୍ ପ୍ରବୁ, ସାରେକେ ବେଡ଼୍ୟନ୍ ସଦାପ୍ରବୁ କେତିତଣ୍ଡ୍, ହୋ ସିୟୋନତେ ନାରୁଡ଼ି ମା ନାରୁଡ଼ି, ବେଲାନ୍ ଅଶୂର ମିସର୍ତେ ନିୟମ୍ ଲେକାମ୍ ମିକିଙ୍କ୍ ଦଣ୍ଡ୍ ଇଦ୍ତଣ୍ଡ୍ ନୁ ମି ୱେରେତଡ଼୍ ଟେଙ୍ଗେ ତେତିତଣ୍ଡ୍, ଆଗେକ୍ବା ଆଦିନ୍ ବିଷୟ୍ତେ ୱେର୍ମାଟ୍। 25 ବାତେଙ୍କ୍ଇତ୍କେ ଇସୁର୍ କାଲାମ୍ତେ କପାମ୍ ନୁ ଅଡ଼୍ ଦଂସତେ ମାନାଦ୍ କପାମ୍ ସାନ୍ତି ଆଦ୍ତେ। 26 ନାନେ ସେନାପତି ସଦାପ୍ରବୁ ବେଲାନ୍ ନାନେ ଆସ୍ କାଲ୍କିନାଗ୍ ହେଞ୍ଚ୍ତେନଡ଼୍ ରେହେସ୍ ମାତ୍ତଡ଼୍ ଅଡ଼୍କିଙ୍କ୍ କରଡ଼ାତେ ରେଃତିତାନ୍। ବେଦ୍ଲେକାମ୍ ମିଶରୀୟନଡ଼୍ ଦଣ୍ଡ ଆସ୍ମାତ୍ତାନ୍, ଆଦ୍ ଲେକାମ୍ ଅଶରୀୟ ନଡ଼୍କିଙ୍କ୍ ଦଣ୍ଡ ଇଦ୍ତଡ଼୍। 27 ବେସୁଙ୍କ୍ ଆଦ୍ ସମୟ୍ତେ ଅଶରୀୟ କର୍ତ୍ତାନଡ଼୍ ମୁକ୍ତ ମାଡ଼ିତଡ଼୍ ମେଣ୍ଡେ ଅଡ଼୍ ଜୁଆଡ଼୍ ମି ଆଟେତାଗ୍ ସାରେଦାମ୍ ବେସୁଙ୍କ୍ ମେଣ୍ଡେ ମାନନ୍।
ସୌନ୍ୟଡ୍ ଯୁଦ୍ ମାଡ଼ାନାଦ୍
28 ଅଣ୍ଡ୍ ଅୟାତାକ୍ ୱାସ୍ମିନ୍ଦେଣ୍ଡ୍, ଅଣ୍ଡ୍ ମିଗ୍ରୋଣ ଇସ୍ ଆଞ୍ଜ୍ମିନ୍ଦେଣ୍ଡ୍; ଅଣ୍ଡ୍ ମିକ୍ମସତାଗ୍ ତାନ୍ ଜିନିଷ ସାରେ ୱାଟମିନ୍ଦେନ୍; 29 ଅଡ଼୍ ମେରାମ୍ ୱେୟ୍ସ୍ ଆଞ୍ଜ୍ମିନ୍ଦେଡ଼୍; ଅଡ଼୍ ଗେବାତାଗ୍ ଗୁଡ଼ୁସା ମାଡ଼ିମିନ୍ଦେଡ଼୍; ରାମା କମ୍ପେମ୍ଆସ ମିନ୍ଦେ; ଶାଉଲ୍ତେ ଗିବୀୟାତାଗ୍ ମିରି ମିନ୍ଦେଣ୍ଡ୍। 30 ଆଗୋ ଗଲ୍ଲୀମର୍ତେ ନାରୁଡ଼୍, ମିଡ଼୍ ନିଜେତ୍ ଲେଙ୍ଗ୍ଦେ ଗାଟି ଲେଙ୍ଗ୍ ମାଡ଼ାଟ୍, ହୋ ଲୟିଶ୍, କେୱୁତାରେ, ଆ ଦୁଃକାମ୍ତେ ଅନାଥୋତ୍, 31 ମଦମେନା ମିରି ମିନ୍ଦେଡ଼୍; ଗେବୀମ ନାର୍ଦେନଡ଼୍ ମିର୍ରାନଙ୍କ୍ ଅଣ୍ଡୟ୍ତାଗ୍ ଆସମିନ୍ଦେଡ଼୍। 32 ଅଣ୍ଡ୍ ନେଣ୍ଡ୍ ନୋବତାଗ୍ ମାନ୍ତ୍ତଣ୍ଡ୍; ଅଣ୍ଡ୍ ସିୟୋନ ନାଟାଡ଼୍ତେ ମେଟେ ଯିରୂଶାଲେମ୍ ଗିରି ପାକେ କାଇ ଉଃସମିନ୍ଦେଣ୍ଡ୍। 33 ଉଡ଼ାଟ୍, ପ୍ରବୁ, ସାରେକେ ବେଡ଼୍ୟନ୍ ସଦାପ୍ରବୁ ବୟଙ୍କାର୍ ଲେକାମ୍ତେ କମାସାରେ ନାଡ଼୍କିତଣ୍ଡ୍; ମେଣ୍ଡେ, ଡେଙ୍ଗ୍ ମାନ୍ଦାନାୱୁସାରେ ନାଡ଼୍କି ଆଦ୍ତେ ନୁ ଉନ୍ନତ୍ସାରେ ନତ ମାଡ଼୍ ୱେୟ୍ତିତ୍। 34 ଅଣ୍ଡ୍ ଲୁହା ତଡ଼୍ ମେଟେତେ ସାରେ ପଡ଼ିୟାକିଙ୍କ୍ ନାଡ଼୍କିତଡ଼୍, ମେଣ୍ଡେ ୱେରଣ୍ଡ୍ ଗାଟି ଶକ୍ତିମାନ୍ଦାନନ୍ ତଡ଼୍ ଲିବାନୋନ୍ ନଷ୍ଟ ଆଦ୍ତଣ୍ଡ୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)