ବୋୟାବତେ ଆଶେଇଲ୍ୱେ ଅବସ୍ତା
1 ମିଡ଼୍ ଉସ୍କନେଲ୍ତାଗ୍ ତନ୍ଦାନ୍ ସେଲା ସହର୍ତାଗାଙ୍କ୍ ଦେଶ୍ ଶାସନ୍ ସେଙ୍ଗେ ସିୟନ୍ ନାଟାଡ଼୍ତେ ମେଟେତାକ୍ ମେକା ରଃମୁଟ୍। 2 ବାତେଙ୍କ୍ଇତ୍କେ ମୋୟାବ୍ତେ ନାଟାକି ଅର୍ଣ୍ଣୋନ ବେଡେମ୍ ପାର୍ସ୍ ଆଦାନ୍ ସାରେ ପଡ଼ିୟାନାଗ୍ ଉଡାନ୍ ପିଟେ ଲେକାମ୍ ନୁ ପିଟେତେ ୱେରେ ୱେରେ ତୁଃକାଲେକାମ୍ ଆଦ୍ତଡ଼୍। 3 ଆଦେଶ୍ ଇମୁଟ୍, ବିଚାର୍ ମାଡ଼ାଟ୍; ମାଦ୍ନାମ୍ ପଡ଼୍ଗିନ୍ ନିଜେତ୍ ନିଡ଼୍କେତିଙ୍କ୍ ନାର୍କେ ଲେକାମ୍ ମାଡ଼ାଟ୍; ତିପାଲ୍ ଆଦାନ୍ ନାରୁଡ଼୍କିଙ୍କ୍ ମିଞ୍ଜ୍ସ୍ପାଟ୍; ଉଡାନଡ଼୍କିଙ୍କ୍ କେଲ୍ମାଟ୍। 4 ମି ତିପାଲ୍ତେ ନାରୁଡ଼୍କିଙ୍କ୍ ମି ତଡ଼୍ ମାନ୍ଦାନଙ୍କ୍ ଇମୁଟ୍; ଦଂସ ମାଡ଼ାନଡ଼୍ ମୁନେଙ୍କ୍କଞ୍ଜ୍ ମିଡ଼୍ ମାୟାବ୍ତେ ସେଙ୍ଗେ ଅଣ୍ଡୟ ମାନ୍ଦାନ୍ ପଡ଼ିୟେ ଆୟ୍ମୁଟ୍; ବାତେଙ୍କ୍ଇତ୍କେ ପୀଡ଼କ ବେଡ଼ିୟ୍ମାନ୍ଦେ ଆସ୍ମିନ୍ଦେଡ଼୍, ଅପକାର୍ ୱିଡ଼୍ସି ଆସ୍ମିନ୍ଦେ, କାରାପ୍ ନାରୁଡ଼୍ ଦେଶ୍ତାଗାଙ୍କ୍ ଦଂସ ମାଡ଼ମିନ୍ଦେଡ଼୍। 5 ମେଣ୍ଡେ ଦୟାତେ ୱେରଡ଼୍ ସିଂହାସନ୍ ତିଆର୍ ଆଦ୍ତେ ନୁ ୱେରଣ୍ଡ୍ ନିଜାମ୍ତେ ଦାଉଦ୍ତେ ଗୁଡ଼ୁସେତାଗ୍ ଲୋପେ କୁଦିତଣ୍ଡ୍; ଅଣ୍ଡ୍ ନ୍ୟାୟ ମେହେକି ବିଚାର୍ ମାଡ଼ିତଣ୍ଡ୍ ନୁ ଦର୍ମ ତିଆର୍ ମାଡ଼ାନଙ୍କ୍ ଜାଗ୍ରଦ୍ତେ ତିଆର୍ଆଦ୍ତଣ୍ଡ୍। 6 ମାମେ ମୋୟାବତେ ଗର୍ବ ବିଷୟତେ କେଞ୍ଜିମିନ୍ଦେମ୍ ଯେ, ଅଣ୍ଡ୍ ନିଜାମ୍ ଗର୍ବୀ, ଅନାଦ୍ ଅହଙ୍କାର୍ ନୁ ଅନାଦ୍ ଗର୍ବ ନୁ ଅନାଦ୍ କପାମ୍ ଗଟ୍ କେଞ୍ଜିମିନ୍ଦେମ୍; ଅନାଦ୍ ଟେମ୍ପର୍ ବାତେକେ ଇଲେ। 7 ଆଦିଙ୍କ୍ ମୋୟାବ ମୋୟାବତେ ସେଙ୍ଗେ ଦୁଃକାମ୍ ମାଡ଼ିତଣ୍ଡ୍, ସାରେତଡ଼୍ ନାରୁଡ଼୍ ଦୁଃକ ମାଡ଼ିତଡ଼୍; ବାତେଙ୍କ୍ଇତ୍କେ ମିଡ଼୍ ନିଜାମ୍ ଦୁଃକାମ୍ ଆସ୍ କୀର ହେରସ୍ତେ ସହର୍ତେ ସାୟେତ୍ କାଦିତ୍ ସେଙ୍ଗେ ମର୍ରେ ମାଡ଼ିତିଡ଼୍। 8 ବେଲାନ୍ କି ହିଷ୍ବୋନ୍ ସହର୍ତେ ୱାୟେସାରେ ନୁ ସିବ୍ମା ନଗର୍ତେ ଅଙ୍ଗୁର୍ଟଣ୍ଡେ ୱାସି ଆଦୁତ୍; ଗୋଷ୍ଟିତଡ଼୍ କେପାନଡ଼୍ ଆଗେତ୍ ହେଞ୍ଚ୍ତେନଡ଼୍ ୱେଲୁମ୍ସାରେ ଉଃସମିନ୍ଦେଡ଼୍; ଆୱୁସାରେ ଯାସେର୍ତେ ନଗର୍ ଯାକ ଆତ୍ତଡ଼୍, ବୁମ୍ ଯାକ ଇକେଆକେ ଆତ୍ତଡ଼୍; ତାନ୍ କମା ସାରେପାକେ ଆତ୍ତା, ଆୱୁସାରେ ସମୁଦ୍ର ପାର୍ ଆତ୍ତା। 9 ତାନ୍ପେର୍କେ ମାମେ ଯାସେର୍ତେ କେୟାନ୍ ସେଙ୍ଗେ ସିବ୍ମାର୍ତେ ଅଙ୍ଗୁର୍ଟଣ୍ଡେ ସେଙ୍ଗେ କେୟାନାଦ୍; ହୋ ହିଷ୍ବୋନ୍, ହୋ ଇଲୀୟାଲୀ ମାମେ ନିଜେତ୍ କାଣ୍ଡେଡ଼୍ ଏର୍ଦେ ନିକିଙ୍କ୍ ନାତିତମ୍; ବାତେଙ୍କ୍ଇତ୍କେ ପାଣ୍ଡିମାନ୍ଦାନ୍ କାୟେ ନୁ କୟିସ୍ମାନ୍ଦାନ୍ କାୟେ ସେଙ୍ଗେ ବେନ୍ ୱେଡ଼୍କେ ଆଦାନାଦ୍ ମାତ୍ତେ ଆଦ୍ ଇଞ୍ଜେ ତେରିମିନ୍ଦେ। 10 ମେଣ୍ଡେ, ୱେଡ଼୍କେ ନୁ ସାର୍ଦେ ୱେରେ ୱାୟେତାଗାଙ୍କ୍ ଯେକା ଆସ୍ମିନ୍ଦେ; ମେଣ୍ଡେ, ଅଙ୍ଗୁର୍ୱାୟେତାଗ୍ ପାଟେ ବା ୱେଡ଼୍କେତେଲେଙ୍ଗ୍ ଆୟ; ମେଣ୍ଡେ ବେନ ଡେକେତଡ଼୍ ଆଦ୍ପି ଅଙ୍ଗୁର୍କୁଣ୍ଡେତାଗ୍ ଅଙ୍ଗୁର୍କାଲ୍ ପେସ୍ପଣ୍ଡ୍; ମାମେ ଅଙ୍ଗୁରି ଗୁଡ଼୍ପି ୱେଡ଼୍କେତେ ଲେଙ୍ଗ୍ ତିଆର୍ ମାଡ଼ିମିନ୍ଦେମ୍। 11 ଇଦ୍ କାରନ୍ତେ ସେଙ୍ଗ୍ ମାନାଦ୍ ମାନ୍ ମୋୟାବ୍ତେ ସେଙ୍ଗେ ନୁ ମାନାଦ୍ ହୃଦୟ୍କଞ୍ଜ୍ କୀର୍ହେରସ୍ତେ ସେଙ୍ଗେ ଡୁମିର୍ ଲେକାମ୍ ନେକମିନ୍ଦେ। 12 ମେଣ୍ଡେ, ମୋୟାବ ଜାମେ ଆଦାନ୍ ୱେଲେ ନୁ ଡେଙ୍ଗ୍ ପଡ଼ିୟେତାଗ୍ ନିଜେତିଙ୍କ୍ ଆୟିସ୍ପି ପ୍ରାତନା ମାଡ଼ାନ୍ ସେଙ୍ଗେ ଦର୍ମମତେ ନେଙ୍ଗାନ୍ ୱେଲେ ଅଣ୍ଡ୍ ବାତା ମିକା ଲାବ୍ ଆୟ୍ୟଣ୍ଡ୍। 13 ମୁନେଙ୍କ୍ ସମୟତେ ସଦାପ୍ରବୁ ମୋୟାବ୍ ବିଷୟ୍ତେ ଇଦ୍ ଗଟ୍ କେସ୍ମାତ୍ତଣ୍ଡ୍। 14 ମାତର୍ ଇଞ୍ଜେ ସଦାପ୍ରବୁ ଇଦ୍ ଗଟ୍ କେତିତଣ୍ଡ୍, କୁଲିବୁତି ମାଡ଼ି ୱାଡ଼୍ଷା ଲେକାମ୍ ମୁଣ୍ଡ୍ ୱାଡ଼୍ଷା ଲପେ ମୋୟାବତେ ଗୌରବ୍ ଆଦିନ୍ ବେଡ଼ିୟେମାନ୍ଦେ ମିକା ସିଗ୍ ଆଦ୍ତଡ଼୍, ମେଣ୍ଡେ ଇଦ୍ରକମ୍ ଅଦିକ୍ ଇସୁକ୍ ଆଦ୍ତା ନୁ ଲେକାନଙ୍କ୍ ମିକା ଆୟ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)