ଯିଶାଇୟ 19

ମିସର୍‌ଦେଶ୍‌ତେ ସେଙ୍ଗେ ଇଶ୍ୱର୍‌ତେ ବାବବାଣି

1 ମିସର୍‌ ବିଷୟ୍‌ତେ ବବିଷ୍ୟତ୍‌ବାଣୀ। ଉଡ଼େ, ସଦାପ୍ରବୁ ଉର୍‌ଗିଙ୍କ୍‌ ମାବ୍‌ତାଗ୍‌ ୱାସ୍‌ ଆରୋହଣ ମାଡ଼ି ମିସର୍‌ତା ୱାଦୁତଣ୍ଡ୍‌; ମେଣ୍ଡେ, ଅନ୍‌ ମୁନେ ମିସର୍‌ତେ ମୂର୍ତ୍ତିକି ୱାଡ଼୍‌କିତା ନୁ ମିସର୍‌ତେ ହୃଦୟ୍‌ ଅନ୍‌ଲପେ କାଡ଼୍‌ଙ୍କି ଆଦ୍‌ତେ। 2 ମେଣ୍ଡ, "ମାମେ ମିସ୍ରୀୟନଡ଼୍‌କିଙ୍କ୍‌ ମିସ୍ରୀୟନଡ଼୍‌ ବିରଦ୍ଦ୍‌ ତେଃତିକାଡ଼୍‌; ଆସୁଙ୍କ୍‌ ଅଡ଼୍‌ ସାରେତଡ଼୍‌ ନିଜେ ନିଜେ ଦାଦାନଡ଼୍‌ ନୁ ସାରେତଡ଼୍‌ ନିଜର୍‌ ନିଜର୍‌ ବିରୁଦ୍ଦ୍‌ତେ ଯୁଦ୍ଦ୍‌ ମାଡ଼ିତଡ଼୍‌; ନାର୍‌ ନାର୍‌ଦେ ପର ରାଜ୍ୟ ରାଜ୍ୟପର ମାଡ଼ିତଣ୍ଡ୍‌ 3 ମେଣ୍ଡେ, ମିସର୍‌ତେ ଆତ୍ମା ଆଦିନ୍ ଲପେଙ୍କ୍‌ ତଲାନଙ୍କ୍ ଆଦ୍‌ତେ ନୁ ମାମେ ଆଦିନ୍‌ ମନ୍ତ୍ରର୍‌ ମାଡ଼ିକାଡ଼୍‌; ଆସୁଙ୍କ୍‌ ଅଡ଼୍‌ ମୂର୍ତ୍ତି, ଜାଦୁ, ସିରା ନୁ ୱାଡ଼୍‌ୱେନଡ଼୍‌ ମେଃକଉଡିତଡ଼୍‌। 4 ମେଣ୍ଡେ, ମାମେ ମିସ୍ରୀୟନଡ଼୍‌କିଙ୍କ୍‌ ଅଣ୍ଡୟ୍‌ ଚିହ୍ନେ ପ୍ରବୁନ୍‌ କାଇଦାଗ୍‌ ପସ୍ପିକାଡ଼୍‌ ନୁ ୱେରଣ୍ଡ୍‌ ଶକ୍ତି ରାଜା ଅଡ଼୍‌ ପରୁ ଶାସନ୍‌ ମାଡ଼ିତଣ୍ଡ୍‌," ଇଦ୍‌ ପ୍ରବୁ ସାରେତିଙ୍କ୍‌ ବେଡ଼ିୟେ ସଦାପ୍ରବୁ କେତିତଣ୍ଡ୍‌। 5 ମେଣ୍ଡେ, ସମୁଦ୍ର ଏର୍‌ ଇଡ଼କିତେ ନୁ ବେଡ଼େମ୍‌ତେ ଏର୍‌ ଇଡ଼୍‌କି ୱାସିଆଦ୍‌ତା। 6 ମେଣ୍ଡେ, ବେଡ଼େମ୍‌ ସାରେ ଗାବ୍‌ ପୟିତା; ମିସର୍‌ତେ ଇଲ୍‌କା ସୁଦୁର୍‌ ଆସ୍‌ ୱାସିଆଦ୍‌ତା; କେନାଲ୍‌ ବା ଏର୍‌ଦାଗ୍ ମାନ୍ଦାନ୍‌ ଗାଡ଼୍‌ ୱାସି ଆଦ୍‌ତା। 7 ନୀଲ ବେଡ଼େମ୍‌ତେ ଗାରେମାନ୍ଦାନ୍‌, ନୀଲ ବେଡ଼େମ୍‌ତେ ଗାରେମାନ୍ଦାନ୍‌ ଡୁକ୍‌ସାରେ ନୁ ନୀଲ ବେଡ଼େମ୍‌ ଗାରେ ବାତା ସାରେ ୱିତୁତଡ଼୍‌, ଆୱୁସାରେ ୱାସି ଗାଲ୍‌ଦେ ତୁଃଡ଼ିତ୍‌ତା ନୁ ମେଣ୍ଡେ ମାନ। 8 କିକେ ପୟିତାନଡ଼୍‌ ସାରେ କେୟିତା ନୁ ବେନଡ଼୍‌ ନୀଲ ବେଡ଼େମ୍‌ତାଗ୍‌ ଗାଲାକ୍‌ ୱାଟିତଡ଼୍, ଅଡ଼୍‌ ସାରେତଡ଼୍‌ ଦୁଃକାମ୍‌ ମାଡ଼ିତଡ଼୍‌, ମେଣ୍ଡେ, ବେନଡ଼୍‌ ଏର୍‌ଦାଗ୍‌ ୱାଲ୍‌ଲା ୱାଟିତଡ଼୍‌, ଅଡ଼୍‌ ବାକ୍‌ୱା ଆଦ୍‌ତଡ଼୍‌। 9 ମେଣ୍ଡେ, ବେନଡ଼୍‌ ଲେକେତ୍‌ କାମ୍‌ ମାଡ଼ିତଡ଼୍‌ ନୁ ବେନଡ଼୍ ସାୟେତ୍‌ ଚକା କେର୍‌ତଡ଼୍‌, ଅଡ଼୍‌ ସିଗ୍‌ ଆଦ୍‌ତଡ଼୍‌। 10 ମେଣ୍ଡେ, ଅନାୱୁ ଗୁଞ୍ଜେସାରେ ଉର୍ଙ୍ଗିଆସ୍‌ ଦୁଡ଼ା ଦୁଡ଼ା ଆଦ୍‌ତା, ଦରମା ସେଙ୍ଗେ କୁଲି ମାଡ଼ାନଡଡ଼୍‌ ନାରୁଡ଼୍‌ ସାରେତଡ଼୍‌ ଜିଉତାଗ୍‌ ଦୁଃକାମ୍‌ ଆଦ୍‌ତଡ଼୍‌। 11 ସୋନୟର୍‌ ଶାସନ ମାଡ଼ାନଡ଼୍‌ ସାରେଦିନେତ୍‌ ମଣ୍ଡିଡ଼୍‌ ଆଦ୍‌ତଣ୍ଡ୍‌; ଫାରୋତେ ଜ୍ଞାନି ମନ୍ତ୍ରୀନଡ଼୍‌ ଯୋଜନା ପଶୁ ଲେକାମ୍‌ ଆସ୍‌ମିନ୍ଦେ; ମିଡ଼୍‌ ବେଲାନ୍‌ ମାଡ଼ି ଫାରୋଙ୍କ୍‌ କେତୁତିଡ଼୍‌, ମାମେ ଜ୍ଞାନିନଡ଼୍‌ ମାର୍‌, ବେଡ଼ିୟେ ରାଜାନଡ଼୍‌ ମାର୍‌କ୍‌ ? 12 ଆଲେକେ ମିୟାଦ୍‌ ଜ୍ଞାନୀ ନାରୁଡ଼୍‌ ବେଗେ ? ଅଡ଼୍‌ ଇଞ୍ଜେ ମିକିଙ୍କ୍‌ କେଲିଡ଼୍‌ ନୁ ସାରେତିଙ୍କ୍‌ ବେଡ଼ିୟେ ସଦାପ୍ରବୁ ମିସର୍‌ତେ ବିଷୟ୍‌ତେ ବାତେ ଜଯୋନା ମାଡ଼ିମିନ୍ଦେଣ୍ଡ୍‌, ଆଦ୍‌ ଅଡ଼୍‌ ପୁନିଡ଼୍‌। 13 ସୋୟନତେ ଶାସନ ମାଡ଼ାନଡ଼୍‌ ମଣ୍ଡି ଆସ୍‌ମିନ୍ଦେଡ଼୍‌, ନୋଫର ଶାସନ ମାଡ଼ାନଡ଼୍‌ କାୱୁଡ଼୍‌ ଆସ୍‌ମିନ୍ଦେଡ଼୍‌; ବେନଡ଼୍‌ ମିସରୀୟ ପିଲୁଡ଼୍‌ତଡ଼୍‌ ନେଟେତେ ଲେକାମ୍‌, ଅଡ଼୍‌ ମିସର୍‌ ପାକେ ଆଞ୍ଜ ମିନ୍ଦେଡ଼୍‌। 14 ସଦାପ୍ରବୁ ମିସର୍‌ତେ ଲପେ ବୁଲ୍‌କା ମାଡ଼ାନ୍‌ ଆତ୍ମା କାଲ୍‌ପି ମିନ୍ଦେଣ୍ଡ୍‌; ମେଣ୍ଡେ, କାଲ୍‌ ଉନ୍ଦାନ୍‌ ନାରୁଣ୍ଡ୍‌ ବେଲାନ୍‌ ତାନ୍‌ ପର୍‌ସାନାଦିନେ ଇକେ ଆକେ ଆସ୍‌ମାନ୍ଦ୍‌ତଣ୍ଡ୍‌, ଆଦ୍‌ଲେକାମ୍‌ ଅଡ଼୍‌ ମିସର୍‌ତା ତାନ୍‌ ସାରେ କାମ୍‌ତେ ଆଦାୱାଦା ମାଡ଼ମିନ୍ଦେଡ଼୍‌। 15 ମେଣ୍ଡେ, ତାଲେ କି ତକେ, କି ହେତେଲ୍‌ ମାଟା କି ଏର୍‌ଦାଗ୍‌ ମାନ୍ଦାନ୍‌ ଗାଡ୍‌ ବାତ୍‌ତେ ପାର୍ଦ୍‌ତେ, ଇଦ୍‌ଲେକାମ୍‌ ବାତେବା କାମ୍‌ ମିସର୍‌ ସେଙ୍ଗେ ମାଡ଼ାନଙ୍କ୍‌ ଆୟ।

ମିସର୍‌ତାଗ୍‌ ଇଶ୍ୱର୍‌ତେ ଆରାଦନା

16 ଆଦ୍‌ଦିନେ ମିସର୍‌ ମୁତେକିନ୍‌ ଲେକାମ୍‌ ଆଦ୍‌ତଡ଼୍‌, ମେଣ୍ଡେ, ସାରେତିଙ୍କ୍‌ ବେଡ଼ିୟେ ସଦାପ୍ରବୁ, ତାନ୍‌ ପରୁ ବେନ୍‌ କାଇ ଉତିତଣ୍ଡ୍‌, ଅନ୍‌ ଆଦ୍‌ କାଇ ଉତାନ୍‌ ସେଙ୍ଗେ ଅଣ୍ଡ୍‌ ୱାଡ଼୍‌କିତଣ୍ଡ୍‌ ନୁ ୱେର୍‌ତଣ୍ଡ୍‌। 17 ମିସର୍‌ତେ ସେଙ୍ଗେ ଯିହୁଦା ଦେଶ୍‌ ୱେର୍‌ଦାନାଦ୍‌ ଲେକାମ୍‌ ଆଦ୍‌ତେ, ସାରେତିଙ୍କ୍‌ ବେଡ଼ିୟେ ସଦାପ୍ରବୁ ତାନ୍ ବିରୁଦ୍ଦ୍‌ତେ ବେନ୍‌ ନିୟମ୍‌ ମାଡ଼ୁତଣ୍ଡ୍‌, ଆଦିନ୍‌ ସେଙ୍ଗେ ବେନ ସାରେତଡ଼୍‌ ନାରୁଡ଼୍‌କିଙ୍କ୍‌ ଯିହୁଦାତେ ପେଦେର୍‌ କେତିତଡ଼୍‌, ଅଣ୍ଡ୍‌ ୱେର୍‌ତଣ୍ଡ୍‌। 18 ଆଦ୍‌ଦିନେ ମିସର୍‌ ଦେଶ୍‌ତାଗ୍‌ ଏଇଙ୍ଗ୍‌ ନାର୍‌ କିଣାନୀୟ ଗଟି କେତିତଡ଼୍‌ ନୁ ସାରେତିଙ୍କ୍‌ ବେଡ଼ିୟେ ସଦାପ୍ରବୁନ୍‌ ପେଦେର୍‌ତେ ଶପତ୍‌ ମାଡ଼ିତଡ଼୍‌, ୱେରଡ଼୍‌ ନଗର୍‌ ନଷ୍ଟଆତ୍‌ତେ ନଗର୍‌ ଇଞ୍ଜ ପୁନ୍ଦ୍‌ତଡ଼୍‌। 19 ଆଦ୍‌ଦିନେ ମିସର୍‌ ଦେଶ୍‌ତେ ନାଡ଼୍‌ମେ ପ୍ରବୁନ୍‌ ଲେକାମ୍‌ ୱେରଡ଼୍‌ ଯଜ୍ଞବେଦି ଆଦ୍‌ତେ ନୁ ଆଦିନ୍‌ ଦାଗ୍‌ତେ ଗାରେ ସଦାପ୍ରବୁନ୍ ୱେରଡ଼୍‌ ଗୁଞ୍ଜେ ତିଆର୍‌ ଆଦ୍‌ତେ। 20 ମେଣ୍ଡେ, ତାନ୍‌ ମିସର୍‌ ଦେଶ୍‌ତା ସାରେତିଙ୍କ୍‌ ବେଡ଼ିୟେ ସଦାପ୍ରବୁନ୍‌ ଚିହ୍ନେ ନୁ ସାକ୍ଷି ଲେକାମ୍‌ ଆଦ୍‌ତେ; ବାତେଙ୍କ୍‌ଇତ୍କେ ଅଡ଼୍‌ ଉପଦ୍ରବିନଡ଼୍‌ ସେଙ୍ଗେ ସଦାପ୍ରବୁନ୍‌ ପାକେ କେୟିତଡ଼୍‌, ଆସୁଙ୍କ୍‌ ଅଣ୍ଡ୍‌ ୱେରଣ୍ଡ୍‌ ତ୍ରାଣକର୍ତ୍ତା ନୁ ଉଦ୍ଦାର୍‌ ମାଡ଼ାନଣ୍ଡ୍‌ ରଃତିତଣ୍ଡ୍‌ ନୁ ଅଣ୍ଡ୍‌ ଅଡ଼୍‌କିଙ୍କ୍‌ ଉଦ୍ଦାର୍‌ ମାଡ଼ିତଣ୍ଡ୍‌। 21 ମେଣ୍ଡେ, ମିସର୍‌ତାକ୍‌ ସଦାପ୍ରବୁନ୍‌ ପରିଚୟ୍‌ ଇଦ୍‌ତଡ଼୍‌ ନୁ ଆଦ୍‌ଦିନେ ମିସରୀୟନଡ଼୍‌ ସଦାପ୍ରବୁଙ୍କ୍‌ ପୁନ୍ଦ୍‌ତଡ଼୍‌; ମେଣ୍ଡେ, ଅଡ଼୍‌ ବଳି ନୁ ନିୟ୍‌ ଇସ୍‌ ଆରାଦନା ମାଡ଼ିତଡ଼୍‌ ନୁ ସଦାପ୍ରବୁନ୍‌ ପାକେ ଶପତ୍‌ମାଡ଼ି ଅଡ଼୍‌ ଆୱୁସାରେ ମାଡ଼ିତଡ଼୍‌। 22 ସଦାପ୍ରବୁ ମିସର୍‌ତିଙ୍କ୍‌ ରେଃତିତଣ୍ଡ୍‌, ରେଃତିତଣ୍ଡ୍‌ ନୁ ସୁସ୍ଥ ମାଡ଼ିତଡ଼୍‌; ମେଣ୍ଡେ, ଅଡ଼୍‌ ସଦାପ୍ରବୁନ୍‌ ପାକେ ମାଲ୍‌ସ୍‌ ୱାଦ୍‌ତଡ଼୍‌, ଆସୁଙ୍କ୍‌ ଅଣ୍ଡ୍‌ ଅଡ଼୍‌ ଅନୁରଦ୍‌ ୱିଡ଼୍‌ସି ଅଡ଼୍‌କିଂଙ୍କ୍‌ ସୁସ୍ଥ ମାଡ଼ିତଡ଼୍‌। 23 ଆଦ୍‌ଦିନେ ମିସର୍‌ତାଗାଙ୍କ୍‌ ଅଶୂରତିଙ୍କ୍‌ ୱେରଡ଼୍‌ ରାଜାନ୍‌ ଆର୍‌ ମାନ୍ତେ, ଆଗେ ଅଶୂରିୟନଡ଼୍‌ ମିସର୍‌ତାକ୍‌ ନୁ ମିସରୀୟନଡ଼୍‌ ଅଶୂରତିଙ୍କ୍‌ ଆଦା ୱାଦା ଆଦ୍‌ତଡ଼୍‌; ମେଣ୍ଡେ, ମିସରୀୟନଡ଼୍‌ ଅଶୂରିୟନଡ଼୍‌ ସାଙ୍ଗେ ଆରାଦନା ମାଡ଼ିତଡ଼୍‌। 24 ଆଦ୍‌ ଦିନେ ଇସ୍ରାଏଲ୍‌, ମିସର୍‌ ନୁ ଅଶୂରତେ ସାଙ୍ଗେ ମୁଣ୍ଡ୍‌ କାଇଲି ପୃତିବିତାଗ୍‌ ଆଶିର୍ବାଦ୍‌ତେ ପାହେମ୍‌ ଆଦ୍‌ତଣ୍ଡ୍‌; 25 ବାତେଙ୍କ୍‌ଇତ୍କେ ସାରେତିଙ୍କ୍‌ ବେଡ଼ିୟେ ସଦାପ୍ରବୁ ଅଡ଼୍‌କିଂଙ୍କ୍‌ ଆଶିର୍ବାଦ୍‌ ମାଡ଼ି କେସ୍‌ମିନ୍ଦେଣ୍ଡ୍‌, "ମା ନାରୁଡ଼୍‌ ମିସର୍‌, ମା କାଇଦେ ମାଡ଼ିମାନ୍ଦାନ୍‌ କାମ୍‌ ଅଶୂର ନୁ ମା ଅଦିକାର୍‌ ଇସ୍ରାଏଲ୍‌ ଆଶୀର୍ବାତଡ଼୍‌ ଆୟିଡ଼୍‌।"