1 ହୋ ଦ୍ୱୀପକି, ନା' ଗଟି କେଞ୍ଜାଟ୍‌; ହୋ ଜେକେମାନ୍ଦାନ୍‌ ନାକ୍‌, ମାନ୍‌ ଇମୁଟ୍‌; ନାନେ ଡଙ୍କେତ୍‌ ଆଦାନ୍‌ ସମୟ୍‌ତାଗାଙ୍କ୍‌ ସଦାପ୍ରବୁ ନାକିଙ୍କ୍‌ କାର୍ଙ୍ଗିମିନ୍ଦେଣ୍ଡ୍‌; ନାନେ ୟାୟନ୍‌ ଡଙ୍କେ ତାଗାଙ୍କ୍‌ ବୁମ୍‌ଦାଗ୍‌ ୱାଦାନ୍‌ ସମୟତାଗାଙ୍କ୍‌ ଅଣ୍ଡ୍‌ ନା ପେଦେର୍‌ ଲେକିମିନ୍ଦେଣ୍ଡ୍‌; 2 ମେଣ୍ଡେ, ଅଣ୍ଡ୍‌ ନାୟାଦ୍‌ ୱାୟେମାନ୍ଦାନ୍‌ କେସେର୍‌ ଲେକାମ୍‌ ମାଡ଼ିମିନ୍ଦେଣ୍ଡ୍‌, ନିଜେତ୍‌ କାଇଦେ ନିଡ଼୍‌କେତାଗ୍‌ ଅଣ୍ଡ୍‌ ନାକିଙ୍କ୍‌ ମିଞ୍ଜ୍‌ସ୍ପି ମିନ୍ଦେଣ୍ଡ୍‌ ନୁ ଅଣ୍ଡ୍‌ ନାକିଙ୍କ୍‌ କଲ୍‌ସ୍ତେ କାଡ଼୍‌ ଲେକାମ୍‌ ମାଡ଼ି ନିଜେତେ କାଡ଼ି ୱାଟାନ୍‌ ଟିକ୍‌ତାଗେ ମୁସି ନେଃତ୍‌ତଣ୍ଡ୍‌; 3 ମେଣ୍ଡେ, ଅଣ୍ଡ୍‌ ନାକିଙ୍କ୍‌ କେତ୍‌ତଣ୍ଡ୍‌, "ନିମେ ମା ଦାସ; ନିମେ ଇସ୍ରାଏଲ୍‌ତେ, ନି ତଡ଼୍‌ ମାମେ ମହିମା ଆଦିକାଡ଼୍‌।" 4 ମାତର୍‌ ନାନେ କେତ୍‌ତାନ୍‌, ନାନେ ଆସାମେ ତିପାଲ୍‌ ମାଡ଼ିମିନ୍ଦେଣ୍ଡ୍‌, ନାନେ ସିମ୍‌ଚାମ୍‌ ନୁ ସାରେ ସମୟତେ ନାୟାଦ୍‌ ଶକ୍ତି ତେର୍‌ସ୍ପତାନ୍‌ ; ଆଗେକ୍‌ବା ନିଜାମ୍‌ ନାୟାଦ୍‌ ବିଚାର୍‌ ସଦାପ୍ରବୁନ୍‌ ପାକେ ନୁ ନାୟାଦ୍‌ କାମ୍‌ତେ କାୟେ ନାୟାଦ୍‌ ପରମେଶ୍ୱର୍‌ତାଗ୍‌ ମିନ୍ଦେ। 5 ମେଣ୍ଡେ, ନାକିଙ୍କ୍‌ ଅନ୍‌ ସେବକ୍‌ ଆଦାନ୍‌ ସେଙ୍ଗେ ନୁ ଯାକୁବ୍‌ତିଙ୍କ୍‌ ତାନାପାକେ ତାତାନଙ୍କ୍‌ ନୁ ଇସ୍ରାଏଲ୍‌ତେ ତାନ୍‌ ପାକେ ଗୁଡ଼୍‌ପାନ୍‌ ମାଇଦିଙ୍କ୍‌ ବେନ ନାକିଙ୍କ୍‌ ୟାୟନ୍‌ ଡଙ୍କେତଗାଙ୍କ୍‌ ତିଆର୍‌ ମାଡ଼୍‌ତଣ୍ଡ୍‌, ଆ ସଦାପ୍ରବୁ ଇଞ୍ଜେ କେତିତଣ୍ଡ୍‌; ବାତେଙ୍କ୍‌ଇତ୍କେ ନାନେ ସଦାପ୍ରବୁନ୍‌ କଣ୍ଡେତେ ଲେକେତଣ୍ଡ୍‌ ଆଦ୍‌ତଣ୍ଡ୍‌ ନୁ ନା ପରମେଶ୍ୱର୍‌ ନାୟାଦ୍‌ ଶକ୍ତି ଲେକାମ୍‌ ଆସ୍‌ମିନ୍ଦେଣ୍ଡ୍‌; 6 ଆଦିଙ୍କ୍‌ ଅଣ୍ଡ୍‌ କେତିତଣ୍ଡ୍‌, ନିମେ ଯେ ଯାକୁବ୍‌ତେ ନଗର୍‌ତେ ସାରେତଡ଼କ୍‌ ତେଃତାନ୍‌ ମାଇଦିଙ୍କ୍‌ ଅଣ୍ଡ୍‌ ଇସ୍ରାଏଲ୍‌ତେ ରକ୍ଷା ଆତ୍‌ତେ ନାରୁଡ଼୍‌କିଙ୍କ୍‌ ମେଣ୍ଡନ୍‌ଦାମ୍‌ ତାତାନ୍‌ ମାଇଦିଙ୍କ୍‌ ମା ସେବକ୍‌ ଆଦ୍‌ତିନ୍‌, ଇଦ୍‌ ଅଦିକ୍‌ ଇସୁର୍‌ ବିଷୟ୍‌; ନିମେ ପୃଥିବିତେ ସାନ୍ଦ୍‌ ହେଉନା ବେଲାନ୍‌ ମାୟାଦ୍‌ ମାଡ଼୍‌ତେ ପରିତ୍ରାଣ ଲେକାମ୍‌ ଆଦ୍‌ତି, ଆଦିଙ୍କ୍‌ ମାମେ ମିକିଙ୍କ୍‌ ୱେରେ ଦେଶ୍‌ତେନଡ଼୍‌ ୱେଇସ୍‌ତେ ଲେକାମ୍‌ ମିକା ମାଡ଼ିତମ୍‌। 7 ବେନଙ୍କ୍‌ ନାରୁଡ଼୍‌ ମନା ମାଡ଼ିତଡ଼୍‌, ବେନଙ୍କ୍‌ ଦେଶ୍‌ତେ ନାରୁଡ଼୍‌ ପାସ୍କିତଡ଼୍‌, ବେନ ଶାସନ୍‌କର୍ତ୍ତାନଡ଼୍‌ ଦାସ, ଅଙ୍କ୍‌ ଇସ୍ରାଏଲ୍‌ତେ ମୁକ୍ତିଦାତାଲ୍‌ ନୁ ଅନ୍‌ ଦର୍ମସାରେ ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌, ବିଶ୍ୱାସ୍‌ତଡ଼୍‌ ନୁ ଇସ୍ରାଏଲ୍‌ତେ ପବିତ୍ର ଇଶ୍ୱର୍‌ ବେନ୍‌ ସଦାପ୍ରବୁ ନିକିଙ୍କ୍‌ ହେଞ୍ଚିମିନ୍ଦେଣ୍ଡ୍‌, ଅନ୍‌ ସେଙ୍ଗେ ରାଜାନଡ଼୍‌ ନିକିଙ୍କ୍‌ ଉଡ଼୍‌କେ ତେଦିତଡ଼୍‌; ମୁକ୍ୟାଲଡ଼୍‌ ମିକିଙ୍କ୍‌ ନମସ୍କାର୍‌ ମାଡ଼ିତଡ଼୍‌।

8 ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌, ମାମେ ଟିକ୍‌ ସମୟତେ ମିକିଙ୍କ୍‌ ଉତ୍ତର୍‌ ଇସ୍‌ମିନ୍ଦେମ୍‌ ନୁ ପରିତ୍ରାଣ ଦିନାମ୍‌ତେ ମାମେ ମିକିଙ୍କ୍‌ ସାହାଯ୍ୟ ମାଡ଼ିମିନ୍ଦେମ୍‌; ମେଣ୍ଡେ, ମାମେ ମିକିଙ୍କ୍‌ ରକ୍ଷା ମାଡ଼ିତମ୍‌ ନୁ ଦେଶ୍‌ତେ ଉନତି ମାଡ଼ିକାଡ଼୍‌, ନାରୁଡ଼୍‌କିଙ୍କ୍‌ ଅଡ଼୍‌ୱାଦ୍‌ ଦଂସଆତ୍‌ତେ ଉତ୍ତରାଦିକାର୍‌ ମାଡ଼ାନ୍‌ ମାଇଦିଙ୍କ୍‌ ମାମେ ମିକିଙ୍କ୍‌ ନାରୁଡ଼ାଦ୍‌ ନିୟମ୍‌ ଲେକାମ୍‌ ତିଆର୍‌ ମାଡ଼ିକାଡ଼୍‌; 9 ମିଡ଼୍‌ ବନ୍ଦିନାରୁଡ଼ାଗାଙ୍କ୍‌ ପେଇସ୍‌ ଆନୁଟ୍‌ ଇଞ୍ଜ; ଇକାଡ଼୍‌ତାଗ୍‌ ମାନ୍ଦାନ୍‌ ନାରୁଡ଼୍‌କ୍‌ ନିଜେତଡ଼୍‌କିଙ୍କ୍‌ ତଃମୁଟ୍‌ ଇଞ୍ଜ କେତିତିଡ଼୍‌। ଅଡ଼୍‌ ଆର୍‌ଦାଗ୍‌ ମେକାନ୍‌ ଲେକାମ୍‌ ମେଇତଡ଼୍‌ ନୁ ମାଡ଼େତ୍‌ ଆକି ତିନ୍ଦ୍‌ତଡ଼୍‌ ଡେଙ୍ଗ୍‌ ମାନ୍ଦାନାୱୁ ସାରେ ଅଡ଼୍‌ଆଉ ମେଇୟାନ୍‌ ପଡ଼ିୟେ ଆଦ୍‌ତେ। 10 ଆୱୁ କାର୍‌ୱିନ୍‌ କି ଏର୍‌ ଉନ୍ଦେୱାତାନ୍‌ ଆୟ; କି ଏଦ୍‌ କାଲାମ୍‌ କି ପଡ଼ଦ୍‌ତେ ଏଦ୍‌ ଆୱିଙ୍କ୍‌ ନାଟ; ବାତେଙ୍କ୍‌ଇତ୍କେ ବେନ ଆୱିଙ୍କ୍‌ ଦୟା ମାଡ଼ିତଣ୍ଡ୍‌, ଅଣ୍ଡ୍‌ ଆୱିଙ୍କ୍‌ ଚାଲାମାଡ଼ିତଣ୍ଡ୍‌, ଏର୍‌ ମାନ୍ଦାନ୍‌ ଜାଗେତାଲାନ୍‌ ଆଞ୍ଚ୍‌ ଆଞ୍ଚ୍‌ ଅଡ଼୍‌କିଙ୍କ୍‌ ଅଣ୍ଡ୍‌ କାର୍ଙ୍ଗି ଅଦ୍‌ତଣ୍ଡ୍‌। 11 ମେଣ୍ଡେ, ମାମେ ନିଜେତେ ମେଟାଙ୍କ୍‌ ସାରେ ଅଣ୍ଡୟ୍‌ ଆର୍‌ ମାଡ଼ିକାଡ଼୍‌ ନୁ ମାନ୍‌ ଅସାର୍‌ ଆର୍‌ ସାରେ ଡେଙ୍ଗ୍‌ ମାଡ଼ିକାଡ଼୍‌। 12 ଉଡ଼େ, ଇଡ଼୍‌ ଜେକାଙ୍କ୍‌ ୱାଦ୍‌ତଡ଼୍‌, ମେଣ୍ଡେ ଉଡ଼େ, ଇଡ଼୍‌ ଉତ୍ତର୍‌ ନୁ ପଶ୍ଚିମ୍‌ ପାକେଙ୍କ୍‌ ୱାଦ୍‌ତଡ଼୍‌; ମେଣ୍ଡେ ଇଡ଼୍‌ ସୀନୀମ୍‌ ଦେଶ୍‌ତାଗାଙ୍କ୍‌ ୱାଦ୍‌ତଡ଼୍‌। 13 ହୋ ମାବ୍‌ମୟଲ୍‌, ପାଟେ ପାରେ, ହୋ ପୃତିବି, ୱେଡ଼୍‌କେ ଆୟ୍‌ମୁଟ୍‌; ହୋ ମେଟା ଗୁବାଲ୍‌, ଗାଟି ଲେଙ୍ଗ୍‌ଦେ ପାଟେ ପାରାଟ୍‌; ବାତେଙ୍କ୍‌ଇତ୍କେ ସଦାପ୍ରବୁ ନିଜେତ୍‌ ନାରୁଡ଼୍‌କିଙ୍କ୍‌ ସାନ୍ୱନା ମାଡ଼୍‌ତଣ୍ଡ୍‌ ନୁ ନିଜେତେ ଦୁଃକାମ୍‌ତେ ମାନ୍ଦାନ୍‌ ନାରୁଡ଼୍‌କିଙ୍କ୍‌ ଦୟା ମାଡ଼ିତଣ୍ଡ୍‌। 14 ମାତର୍‌ ସିୟୋନ୍‌ କେତ୍‌ତେ, ସଦାପ୍ରବୁ ନାକିଙ୍କ୍‌ ୱିଡ଼୍‌ସି ମିନ୍ଦେଣ୍ଡ୍‌, ପ୍ରବୁ ନାକିଙ୍କ୍‌ ମାର୍ଙ୍ଗିମିନ୍ଦେଣ୍ଡ୍‌। 15 ମୁତେ ନିଜେତ୍‌ ଡ଼ଙ୍କେ ତାଗାଙ୍କ୍‌ ଜନମ୍‌ ଆତ୍‌ତେ ମାରିଙ୍କ୍‌ ସ୍ନେହ ମାଡ଼କଟ କି ନିଜେତ୍‌ ପାଲ୍‌ ଉସ୍ପକଟ ପିଲେତିଙ୍କ୍‌ ମାର୍ଙ୍ଗେ ପାର୍‌ଦ୍‌ତେ ? ହଁ, ଇଡ଼୍‌ ମାର୍ଙ୍ଗେ ପାର୍‌ତଡ଼୍‌, ଆଗେକ୍‌ବା ମାମେ ମିକିଙ୍କ୍‌ ମାର୍ଙ୍ଗେ ପାର୍‌ୱମ୍‌। 16 ଉଡ଼େ, ମାମେ ନିଜେତ୍‌ ଲାବ୍‌ କାଇଦାଗ୍‌ ନିୟାଦ୍‌ ମୁର୍ତ୍ତି ତିଆର୍‌ ମାଡ଼୍‌ତେ ବିଷୟ୍‌ ଲେକିମିନ୍ଦେମ୍‌; ମିୟାଦ୍‌ ନେଟେ ସାରେଦାମ୍‌ ମା ମୁନେ ମିନ୍ଦେ। 17 ମି ପିଲାକି ଜାପେ ୱାସମିନ୍ଦେ, ମିକ୍‌ ତେଇସ୍‌ ମାନ୍ଦାନଡ଼୍‌ ନୁ ବେନଡ଼୍‌ ଦଂସ ମାଡ଼୍‌ତଡ଼୍‌, ଅଡ଼୍‌ ମିୟାଗାଙ୍କ୍‌ ପେଇସ୍‌ ଆଦ୍‌ତଡ଼୍‌। 18 ମିଡ଼୍‌ କଣ୍ଡା ତେର୍ସ ଏକାମ୍‌ ଉଡ଼ାଟ୍‌; ଇୱୁସାରେ ଅଣ୍ଡୟ୍‌ତାଗ୍‌ ଆସ୍‌ ମି ପାକେ ୱାଦୁତା। ସଦାପ୍ରବୁ କେତିତଣ୍ଡ୍‌, ମାମେ ଜିୱେମାନ୍ଦାନ୍‌ ଲେକାମ୍‌ ମିଡ଼୍‌ ପେଣ୍ଡୁଲ୍‌ ମୁତେନ୍‌ ତିଆର୍‌ ଆଦାନ୍‌ ବାଙ୍ଗ୍‌ରାମ୍‌ ଲେକାମ୍‌ ଇୱୁ ସାରେତାୱିଙ୍କ୍‌ କେର୍‌ତିଡ଼୍‌, ପିକିର୍‌ କେର୍ଦାନ୍‌ ଲେକାମ୍‌ ଅଡ଼୍‌କିଙ୍କ୍‌ କେର୍ସ୍ପିତିଡ଼୍‌। 19 ବାତେଙ୍କ୍‌ଇତ୍କେ ନିଜାମ୍‌ ଇଞ୍ଜେ ମିଡ଼୍‌, ମି ଦଂସ ନୁ ବେନଇଲ୍ୱେ ପଡ଼ିୟା ନୁ ମିୟାଦ୍‌ ନଷ୍ଟଆତ୍‌ତେ ଦେଶ୍‌, ନାରୁଡ଼୍‌ ସେଙ୍ଗେ ସପୁର୍‌ ଆଦ୍‌ତିଡ଼୍‌ ନୁ ମିକିଙ୍କ୍‌ ନଷ୍ଟମାଡ଼ାନ୍‌ ନାରୁଡ଼୍‌ ଦୂରାମ୍‌ ମାନ୍ଦ୍‌ତଡ଼୍‌। 20 ମିୟାଗାଙ୍କ୍‌ ଦୁରାମ୍‌ ଅସ୍‌ ମାନ୍ଦାନ୍‌ ପିଲା ମେଣ୍ଡେ ମି କେୱୁକିନାଗ୍‌ କେତିତା, ନା ସେଙ୍ଗେ ଇଦ୍‌ ପଡ଼ିୟେ ଅଦିକ୍‌ ସପୁର୍‌; ନାକିଙ୍କ୍‌ ପଡ଼ିୟେ ଇମୁଟ୍‌, ନାନେ ଆଗେ ମାନ୍ତାନ୍‌। 21 ଆସୁଟ୍‌ ମିଡ଼୍‌ ମାନ୍‌ତେ ମାନ୍‌ତେ କେତିତିଡ଼୍‌, ନା ମାର୍‌କ୍‌ ଦୁରାମ୍‌ ଆସ୍‌ ମିନ୍ଦେଡ଼୍‌, ନାନେ ୱେରନ୍‌, ଦାସିନ୍‌ ଆସ୍‌ ଇକେଆକେ ଉଡମିନ୍ଦେନ୍‌, ନା ସାରେତଡ଼୍‌କିଙ୍କ୍‌ ବେନ ଜନମ୍‌ ଇସ୍‌ ମିନ୍ଦେଣ୍ଡ୍‌ ? ନୁ ଇଡ଼୍‌କିଙ୍କ୍‌ ବେନ ପଡ଼୍‌ପି ମିନ୍ଦେଣ୍ଡ୍‌ ? ଉଡ଼େ, ନାନେ ୱେରନେ ଆଦ୍‌ଲେକାମ୍‌ ମାତ୍‌ତାନ୍‌; ଇଡ଼୍‌ ବେଗେ ମାତ୍‌ତଡ଼୍‌ ? 22 ପ୍ରବୁ, ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌, ଉଡ଼େ, ମାମେ ୱେରେ ଦେଶ୍‌ତେନଡ଼୍‌ ପରୁ ନିଜେତ୍‌ କାଇ ତେଃତିକାଡ଼୍‌ ନୁ ନାର୍‌ଦେସାରେତଡ଼୍‌ ପରୁ ନିଜେତ୍‌ ପତ୍‌କା ତେଃତିକାଡ଼୍‌; ଆସୁଟ୍‌ ଅଡ଼୍‌ ମି ମାର୍ର୍‌କିଡ଼୍‌ ଡେକାନାଗ୍‌ ତାତିତଡ଼୍‌ ନୁ ମି ମାୟାସ୍କ୍‌ ଅଡ଼୍‌ ଆଟାନାଗ୍‌ କାଞ୍ଜିଆଦ୍‌ତା। 23 ମେଣ୍ଡେ, ରାଜାନଡ଼୍‌ ମି ପାଲନ୍‌ ମାଡ଼ାନଡ଼୍‌ ବାବାଲ୍‌ ନୁ ଅଡ଼୍‌ ରାଣିକି ମିକିଙ୍କ୍‌ ପାଲନ୍‌ ମାଡ଼ାନ୍‌ ୟାୟ ଆଦ୍‌ତା; ଅଡ଼୍‌ ବୂମ୍‌ଦାକ୍‌ ମକମ୍‌ ୱାଟି ମିକିଙ୍କ୍‌ ନମସ୍କାର୍‌ ମାଡ଼ିତଡ଼୍‌ ନୁ ମି ଡେକେତ୍‌ ଦୂମ୍‌ କାଇତିତା; ଆସୁଟ୍‌ ମାମେ ଯେ ସଦାପ୍ରବୁ ନୁ ମାକିଙ୍କ୍‌ କେପିମାନ୍ଦାନଡ଼୍‌ ଯେ ସିଗ୍‌ ଆୟଡ଼୍‌, ଇଦ୍‌ ମିଡ଼୍‌ ପୁନ୍ଦ୍‌ତିଡ଼୍‌। 24 ବୀରନାଗାଙ୍କ୍‌ କି ଡଙ୍ଗିମାନ୍ଦାନ୍‌ ଜିନିଷ୍‌ ଡଙ୍ଗି ଅଦ୍‌ଦେ ପାର୍‌ତଡ଼୍‌, କି ନ୍ୟାୟତେ ବନ୍ଦିଆତ୍‌ତେ ନାରୁଡ଼୍‌ ବାତ୍‌ତେ ମୁକ୍ତ ମାଡ଼ିଦ୍‌ତଡ଼୍‌ ? 25 ମାତର୍‌ ସଦାପ୍ରବୁ ଇଦ୍‌ ଗଟ୍‌ କେତିତଣ୍ଡ୍‌, ବୀରନ୍ ବନ୍ଦିଆତ୍‌ତେ ନାରୁଡ଼୍‌ କେ ଡଙ୍ଗିଆଦ୍‌ତଡ଼୍‌ ନୁ ବୟଙ୍କର୍‌ ନାରୁନେ ଡଙ୍ଗିମାନ୍ଦାନ୍‌ ଜିନିଷ୍‌ ଦର୍ସ୍କାଙ୍କ୍‌ ଆଦ୍‌ତେ; ବାତେଙ୍କ୍‌ଇତ୍କେ ମି ବିରଦିନଡ଼୍‌ ସାଙ୍ଗେ ମାନାଡ଼୍‌ ରାମ୍‌କ ମାଡ଼ିକାଡ଼୍‌ ନୁ ମିଡ଼୍‌ ପିଲାକିଙ୍କ୍‌ ମାନାଡ଼୍‌ ରକ୍ଷା ମାଡ଼ିକାଡ଼୍‌। 26 ମେଣ୍ଡେ, ମାମେ ମି କାରାପ୍‌ ବେବାର୍‌ ନାରୁଡ଼୍‌କିଙ୍କ୍‌ ଅଡ଼୍‌ ନିଜେତ୍‌ ଆୱୁଙ୍ଗ୍‌ ତିଇତିକାଡ଼୍‌ ନୁ ମିଙ୍ଗ୍‌ତେ ଅଙ୍ଗୁର୍‌କାଲ୍‌ତେ ଅସାନ୍‌ ଲେକାମ୍‌ ଅଡ଼୍‌ ନିଜେତ୍‌ ନେତୁର୍‌ତେ ଅସିତଡ଼୍‌; ଆସୁଟ୍‌ ମାନାଡ଼୍‌ ଯେ ସଦାପ୍ରବୁ, ମି ତ୍ରାଣକର୍ତ୍ତା ନୁ ମି ମୁକ୍ତିଦାତାଲ୍‌, ଯାକୁବ୍‌ତେ ଶକ୍ତିତଡ଼୍‌, ଇଦ୍‌ ସାରେ ନାରୁଡ଼୍‌ ପୁଃନ୍ତତଡ଼୍‌।