ସଦାପ୍ରବୁନ୍ ଅଙ୍ଗୁର୍ୱାୟେତ୍ ପାଟେ
1 ନାନେ ନା ପ୍ରିୟସାଙ୍ଗନ୍ ସେଙ୍ଗେ, ତାନ୍ ଅଙ୍ଗୁର୍ୱାୟେତ୍ ବିଷୟତେ ନା’ପ୍ରିୟସାଙ୍ଗନ୍ ୱେରଡ଼୍ ପାଟେ ପାରିତାନ୍। ଗାଟି କାତାମ୍ ୱେରଡ୍ ବେଡ଼ିୟାଦ୍ ମେଟେତାଗ୍ ନା' ପ୍ରିୟସାଙ୍ଗନ୍ ୱେରଡ଼୍ ଅଙ୍ଗୁର୍ୱାୟେ ମାତ୍ତେ; 2 ମେଣ୍ଡେ, ଅଣ୍ଡ୍ ଆଦ୍ଟେଣ୍ଡି କାଲ୍କ୍ ପେସ୍ପତଡ଼୍ ନୁ ନାର୍ଗେ ସାୟେ ଅଙ୍ଗୁର୍ଟଣ୍ଡା ଆଗେ ଉରୁସ୍କ୍ତଡ଼୍ ନୁ ଆଗେ ନାଡ଼୍ମେତ୍ ପଡ଼ିୟେତାଗ୍ ୱେରଡ଼୍ ଡେଙ୍ଗିଲାଦ୍ ଗୁଡ଼ୁସା ତିଆର୍ ମାଡ଼ି ଅଙ୍ଗୁର୍କୁଣ୍ଡେ ମିକା ଡେଉତଣ୍ଡ୍, ମେଣ୍ଡେ ଅଙ୍ଗୁର୍କାୟା ଆଦିତା ଇଞ୍ଜ କେପମାତ୍ତଣ୍ଡ୍, ମାତର୍ ଆଗେ ସାୟେତ୍ ଅଙ୍ଗୁର୍କାୟା ଆଦ୍ଦ। 3 ଆଦିଙ୍କ୍ ଇଞ୍ଜେ ହୋ ଯିରୁଶାଲେମ୍ ନାରୁନଡ଼ି ନୁ ଯିହୁଦାତେ ନାରୁଡ଼ି, ନାନେ ମିକିଙ୍କ୍ ଅନୁରଦ୍ ମାଡ଼ୁତାନ୍, ମିଡ଼୍ ନାକିଙ୍କ୍ ନୁ ନା' ଅଙ୍ଗୁର୍ୱାୟେତେ ଲପେ ବିଚାର୍ ମାଡ଼ାଟ୍। 4 ନାନେ ନା ଅଙ୍ଗୁର୍ୱାୟେତାଗ୍ ବାତେ ମାଡ଼ନ୍, ଇଦ୍ଲେକାମ୍ ବେନ୍ ଅଦିକ୍ କାମ୍ ଆଦିନ୍ ପରୁ ମାଡ଼ାନଙ୍କ୍ ଆୟେଡ଼୍ ? ଆଦିନ୍ସେଙ୍ଗେ ନାନେ ଅଙ୍ଗୁର୍କାୟା ଆଦିତାଇଞ୍ଜ କେପ୍କେ, ଆଗେ ଲେକେତ୍ ଅଙ୍ଗୁର୍କାୟା ଆଦ୍ଦ ବାତ୍ତିଙ୍କ୍ ? 5 ଇଞ୍ଜେ କେଞ୍ଜାଟ୍; ନାନେ ନା ଅଙ୍ଗୁର୍ୱାୟେତେ ପରୁ ବାତେ ମାଡ଼ିତାନ୍, ଆଦ୍ ମିକିଙ୍କ୍ କେଞ୍ଜ୍ସ୍ପିତାନ୍; ନାନେ ଆଗେ ୱେଲୁମ୍ ଟେଣ୍ଡିତାନ୍, ନାନେ ଆଦ୍ ନଷ୍ଟ ମାଡ଼ିତାନ୍; ନାନେ ଆଗେତ୍ ଗର୍ଲେ ଉଃତିତାନ୍, ଆସୁଟ୍ ଆୱୁ ୱିକିଆଦ୍ତା; 6 ମେଣ୍ଡେ, ନାନେ ଆୱିଙ୍କ୍ ସାପା ମାଡ଼ି; ଆୱିନ୍ କମା ନାଡ଼୍କନ୍ କିନ୍ତୁ ବୁମ୍ଦାଗାଙ୍କ୍ ଡେୱାନାଦ୍ ଆୟ; ମାତର୍ ଆୱୁ ପାର୍ୱେଲ୍ କୟେନ୍ ମାଡ଼େ ଲେକାମ୍ ଆଦ୍ତା; ମେଣ୍ଡେ ଆଦିନ୍ ପରୁ ଏର୍ ୱାର୍ସାମ୍ ୱାଡ଼୍ମାକି ଇଞ୍ଜ ନାନେ ମାବ୍ତିଙ୍କ୍ ଆଦେଶ୍ ଇଦ୍ତାନ୍। 7 ବେଲାନ୍ ଇସ୍ରାଏଲ୍ ପିଲୁଡ଼୍ ସାରେତିଙ୍କ୍ ବେଡ଼ିୟନ୍ ସଦାପ୍ରବୁନ୍ ଅଙ୍ଗୁର୍ୱାୟେ ନୁ ଯିହୁଦାତେ ନାରୁଡ଼୍ ତାମ୍ ମାନ୍ ପସନ୍ଦତେ ପାଲ୍ଲା; ଅଣ୍ଡ୍ ନ୍ୟାୟତିଙ୍କ୍ ଅପେକ୍ଷା ମାଡ଼୍କେ, ମାତର୍ ଉଡ଼େ, କାରାପ୍; ଦାର୍ମିକତା କେପ୍ତଡ଼୍, ମାତର୍ ଉଡ଼େ, କେୟାନାଦ୍।
ସାରେଲେକାତ୍ କାରାପ୍ ପାଡ଼୍ୟିମାଡ଼ାନଡ଼୍
8 ଦେଶ୍ତାଗ୍ ବେଲାନ୍ ମେଣ୍ଡେ ପଡ଼ିୟେ ମାନ ନୁ ମିଡ଼୍ବେଲାନ୍ ଆଗେ ମିକା ୱେରନି ବାସେ ମାଡ଼ିତିନ୍, କି ବୟଙ୍କାର୍ ଦିନାମ୍ ୱାଦୁତ୍ତେ ଲତ୍ତିଙ୍କ୍ ଲନ୍, ୱାୟେତିଙ୍କ୍ ୱାୟେ ଲାଗାମାଡ଼ୁତିଡ଼୍ ଯେ ମିଡ଼୍, ମିଡ଼୍ ଅବିସାପ୍ ପାହେମ୍ ଆଦାନଡ଼ି ! 9 ସାରେତିଙ୍କ୍ ବେଡ଼ିୟ୍ ସଦାପ୍ରବୁ ନା କେୱୁଦାଗ୍ କେତିତଣ୍ଡ୍, ନିଜାମ୍ ନାର୍ଗେ ଲକ୍ ଦଂସ ଆଦ୍ତା, ମେଣ୍ଡେ ଗାଟି ନୁ ସୁନ୍ଦର୍ ଲୋକିନାଗ୍ ନାରୁଡ଼୍ ମାନ୍ନଡ଼୍ ଆଦ୍ତଡ଼୍। 10 ବାତେଙ୍କ୍ଇତ୍କେ ଦଶ ଏକର ଅଙ୍ଗୁର୍ୱାୟେତାଗ୍ ଅଣ୍ଡୟ୍ ଇତ୍କେ ପ୍ରାୟ ବାଇଶ୍ ଲିଟର୍ ପେଇତିତା ନୁ ଦଶ ଲିଟର୍ ତାଗାଙ୍କ୍ ଦୁଇଶହ କୁଡ଼ିଏ ଲିଟର୍ ୱିଜେତାଗାଙ୍କ୍ ମାତର୍ ଅଣ୍ଡୟ୍ ଲିଟର୍ ଶସ୍ୟ ପେଇତିତା। 11 ବେନଡ଼୍ କାଲ୍ଉନ୍ଦାନଙ୍କ୍ ଅଦିକ୍ ନାର୍କୁକ୍ ତେଦିତଡ଼୍; ଅଙ୍ଗୁର୍କାଲ୍ତେ ମାତ୍ୱାର୍ ଆଦାନ୍ ଯାକ ନାର୍କା ଡ଼େରିମାଡ଼ିତଡ଼୍, ଅଡ଼୍ ବେସର୍ ବୟଙ୍କାର୍ କାରାପ୍ ପାଡ଼୍ୟି ମାଡ଼ାନଡ଼୍ ! 12 ଅଡ଼୍ ବଜିତାଗ୍ ଡ଼଼ୁମିର୍, ନେବଲ, ଡଲା, ଅଷଡ଼୍ ନୁ ଅଙ୍ଗୁର୍କାଲ୍ ମାନ୍ତେ; ମାତର୍ ଅଡ଼୍ ସଦାପ୍ରବୁନ୍ କାମ୍ ଅଡ଼୍ ଉଡ଼ଡ଼୍ କି ତାମ୍ କାଇଦେ ପାଡ଼୍ୟି ଅଡ଼୍ ବେସୁଙ୍କ୍ ହେର୍କେ ମାଡ଼ଡ଼୍। 13 ଆଦିନ୍ ସେଙ୍ଗେ ନା ନାରୁଡ଼୍ ଜ୍ଞାନ୍ ଅବାବ୍ତେ ସେଙ୍ଗେ ବନ୍ଦୀ ଆଦ୍ତଡ଼୍; ମେଣ୍ଡେ, ଅଡ଼୍ ସାୱୁକାର୍ ନାରୁଡ଼୍ କାର୍ୱିନ୍ନେ ନୁ ଅଡ଼୍ ନାରୁଡ଼୍ପାକେ ଏର୍ ଉନ୍ଦ୍ୱାତ୍ତ୍କେ ବଣ୍ଡ୍କେ ୱାସି ଆଦ୍ତେ। 14 ଆଦିନ୍ ସେଙ୍ଗେତିଙ୍କ୍ ପାତାଲ୍ ନୁ ପର ଏକାମ୍ ନୁ ନିୟାଦ୍ ପାୟୁର୍ ଲେକାମ୍ କୁଲାମାଡ଼ି ମିନ୍ଦେ; ମେଣ୍ଡେ, ଅଡ଼୍ ଗୌରବ୍, ଅଡ଼୍ ନାରୁଡ଼୍ ମୁନ୍ନେ, ଅଡ଼୍ ମର୍ରେ ନୁ ଅଡ଼୍ ନାଡ଼୍ମେ ୱେଡ଼୍କେ ମାଡ଼ାନ୍ ନାରୁଡ଼୍ ଆଗାକଞ୍ଜ୍ ଡ଼ିଗିତଡ଼୍। 15 ଆଦିଙ୍କ୍ ସାରେତଡ଼୍ ନାରୁଡ଼୍କିଙ୍କ୍ ମଦଲ୍ ମାଡ଼ାନଙ୍କ୍ ଆଦ୍ତେ, ମେଣ୍ଡେ ବେନଡ଼୍ ନିଜେତିଙ୍କ୍ ବେଡ଼ିୟଡ଼୍ ଇଞ୍ଜ ଆଲ୍ସିତଡ଼୍ ଅଡ଼୍କିଙ୍କ୍ ନମ୍ର ମାଡ଼ାନଙ୍କ୍ ଆଦ୍ତେ। 16 ମାତର୍ ସାରେତିଙ୍କ୍ ବେଡ଼ିୟେ ସଦାପ୍ରବୁ ବିଚାର୍ତାଗ୍ ମହାନ୍ ଆଦ୍ତଣ୍ଡ୍, ମେଣ୍ଡେ, ଦର୍ମଲେକାମ୍ ପରମେଶ୍ୱର୍ ଦାର୍ମିକ୍ତାଗ୍ ପବିତ୍ର ଲେକାମ୍ ମାନେମ୍ ଆଦ୍ତଡ଼୍। 17 ଆଦ୍ ସମୟତେ ମେକାମେଇତାନଡ଼୍ ତାମ୍ ମେଇତାନ୍ ପଡ଼ିୟେତାଗାଙ୍କ୍ ମେଇତାନ୍ ଲେକାମ୍ ମେଇତଡ଼୍, ମେଣ୍ଡେ, ଉଡ଼ାନଡ଼୍ ମେନ୍ଦୁଲ୍ତେ ମାନ୍ଦାନଡ଼୍ ଦଂସପଡ଼ିୟେ ଦର୍ସ୍କିତଡ଼୍। 18 ବେନଡ଼୍ ତିପାଲ୍ତେ ଲେକାମ୍ ନଡ଼୍ତେ ପାପ୍ତିଙ୍କ୍ ମେଣ୍ଡେ କନ୍ଦା ତଃତାନ୍ ନଡ଼ମ୍ ଅଦର୍ମତେ ବିଷୟ୍ତିଙ୍କ୍ ପୟିସ୍ ନେଃସ୍ ମାନ୍ଦତଡ଼୍ ଅଡ଼୍ ଅବିଚାପ୍ତେ ନାରୁଡ଼୍ ଆଦ୍ତଡ଼୍ ! 19 ଅଡ଼୍ କେତିତଡ଼୍, "ମାନାଡ଼୍ ବେଲାନ୍ ମେଃକେ ପାର୍ତାଡ଼୍, ଆଦିନ୍ ସେଙ୍ଗେ ଅଣ୍ଡ୍ ଦାନ୍ଦେମାଡ଼ିଣ୍ଡ୍, ଅଣ୍ଡ୍ ନିଜେତ୍ କାମ୍ଜାପେ ମାଡ଼ିଣ୍ଡ୍; ମେଣ୍ଡ୍, ମାନାଡ଼୍ ବେଲାନ୍ ପୁନ୍ଦେ ପାର୍ତାଡ଼୍, ଆଦିନ୍ ସେଙ୍ଗେ ଇସ୍ରାଏଲ୍ତେ ଦାର୍ମିକ୍ତେ ଲେକାମ୍ ମନ୍ତ୍ରଣାଲେକାମ୍ ଗଟେମ୍ଆୟି।" 20 ବେନଡ଼୍ କାରାପ୍ତିଙ୍କ୍ ସାୟେ ନୁ ସାୟେତିଙ୍କ୍ କାରାପ୍ କେତିତଡ଼୍; ବେନଡ଼୍ ଇକାଡ଼୍ତିଙ୍କ୍ ୱେସ୍ ନୁ ୱେୟିସ୍ତିଙ୍କ୍ ଇକାଡ଼୍ଇଞ୍ଜ ହେର୍କେ ମାଡ଼ିତଡ଼୍; ବେନଡ଼୍ କାୟିତାଦିଙ୍କ୍ ମିଙ୍ଗ୍ତେ ନୁ ମିଙ୍ଗ୍ତାଦିଙ୍କ୍ କାୟିତେ ଇଞ୍ଜ ହେର୍କେ ମାଡ଼ିତଡ଼୍, ଅଡ଼୍ କାରାପ୍ତେ ନାରୁଡ଼୍ ! 21 ବେନଡ଼୍ ନିଜର୍ ନିଜର୍ କଣ୍ଡେତେ ଜ୍ଞାନବାନ୍ ନୁ ନିଜେ ନିଜେତିଙ୍କ୍ ମାନ୍ତେ ବୁଦ୍ଦିମାନ୍, ଅଡ଼୍ କାରାପ୍ ନାରୁଡ଼୍ ! 22 ବେନଡ଼୍ ଅଙ୍ଗୁର୍କାଲ୍ ଉନ୍ଦାନଙ୍କ୍ ପାର୍ତେନଣ୍ଡ୍ ନୁ କାଲ୍ କାଲ୍ପାନଙ୍କ୍ ଶକ୍ତିତଣ୍ଡ୍; 23 ବେନଡ଼୍ ଲାଞ୍ଚ୍ଅସ୍ ଦୁଷ୍ଟଙ୍କ୍ ୱିଡ଼୍ସିଦ୍ତଣ୍ଡ୍ ନୁ ଦାର୍ମିକ୍ତେ ଦାର୍ମିକତା ଅନାଗାଙ୍କ୍ ଦୂରାମ୍ ମାଡ଼ିତଣ୍ଡ୍, ଅଡ଼୍ କାରାପ୍ ନାରୁଡ଼୍ ! 24 ଆଦିନ୍ସେଙ୍ଗେ କିସ୍ତେ ୱାଞ୍ଜେର୍ ବେଲାନ୍ ୱାସ୍ତେଗାଡ଼୍ କାର୍ୱନ୍ ଆଦ୍ତେ ନୁ ୱାସ୍ତେ ଗାଡ଼୍ ବେଲାନ୍ କିସ୍ତଡ଼୍ କାର୍ୱିଆତ୍ତେ, ଆଦ୍ଲେକାମ୍ ଅଡ଼ାଦ୍ ପୁଙ୍ଗାର୍ ଦୁଲ୍ଲିତେ ନୁ ଆୱିନ୍ ପୁଙ୍ଗାର୍ ଦୂମ୍ ଲେକାମ୍ ରାଲିତେ; ବାତେଙ୍କ୍ଇତ୍କେ ଅଡ଼୍ ସାରେତିଙ୍କ୍ ବେଡ଼ିୟେ ସଦାପ୍ରବୁନ୍ ନିୟମ୍ ୱିଡ଼୍ସି ମିନ୍ଦେଡ଼୍ ନୁ ଇସ୍ରାଏଲ୍ତେ ଦର୍ମଲେକାମ୍ ବାକ୍ୟ ୱିଡ଼୍ସି ମିନ୍ଦେଡ଼୍। 25 ଆଦିନ୍ ସେଙ୍ଗେ ସଦାପ୍ରବୁନ୍ କପାମ୍ ତାନ୍ ନାରୁଡ଼୍ ବିରୁଦ୍ଦ୍ତେ ନିଜେତ୍ କାଇଆସ୍ ଅଡ଼୍କିଂଙ୍କ୍ ରେଃସ୍ମିନ୍ଦେଡ଼୍, ମେଣ୍ଡେ, ବେଡ଼ିୟେ ମେଟାକି ଉଙ୍ଗ୍କେ ନୁ ନାରୁଡ଼୍ ମେନ୍ଦୁଲ୍ ରଟିନାଗ୍ ତଗ୍ଇନା ଆତ୍ତ୍କେ। ଇୱୁ ସାରେ ଆତ୍କେ କେ ଅନାଦ୍ କପାମ୍ ୱିର୍ୟ, ମାତର୍ ଅନାଦ୍ କାଇ ମୁନେଙ୍କ୍ତେ ଲେକାମ୍ ସାରେପାକେ ମିନ୍ଦେ। 26 ମେଣ୍ଡେ, ଅଣ୍ଡ୍ ଜେକେ ମାନ୍ଦାନ୍ ଦେଶ୍କିନ୍ ନାର୍କିନ୍ ପରୁ ୱେରଡ଼୍ ଜାଣ୍ଡେ ତେତିତଣ୍ଡ୍ ନୁ ପୃତିବିତେ ବୂମ୍ତାଗାଙ୍କ୍ ଅଡ଼୍ ସେଙ୍ଗେ ଉଃସଡ଼୍ ୱାଟିତଣ୍ଡ୍, ମେଣ୍ଡେ, ଉଡ଼ାଟ୍, ଅଡ଼୍ ଗାଟିଉର୍ଗିଙ୍କ୍ ସିଟ୍ପାଟେ ୱାଦ୍ତଡ଼୍; 27 ଅଡ଼୍ଲପେଙ୍କ୍ ବେନ ଆୟଡ଼୍, କି ତାଲ୍ଗି ରାଲଡ଼୍; ବେନ କୁଡ଼୍କଡ଼ କି ଉସ୍କାଡ଼୍ତେ ଆନଡ଼୍; ମେଣ୍ଡେ, ଅଡ଼୍ ପାଡ଼୍ୟିତାଗ୍ ତଃତାଦ୍ କୁସ୍ସ କି ଅଡ଼୍ ହେର୍ପୁକ୍ ତେଗ; 28 ଅଡ଼୍ କାଡ଼୍ ସୁଜେ ନୁ ଅଡ଼୍ ୱିଲ୍କ୍ ତିଆର୍ତେ ମିନ୍ଦେ; ଅଡ଼୍ ଗୁରାକିନ୍ କକ୍ ଚିକ୍ଚାକ୍ ତନ୍ଦାନ୍ କାଲ୍ବଦେନ୍ ଲେକାମ୍ ନୁ ଅଡ଼୍ କାଲ୍କ୍ ଚକ୍ର ଉର୍ ଗାଲ୍ଦେ ଲେକାମ୍; 29 ଅଡ଼୍ ଲେଙ୍ଗ୍ ଡ଼ୁୱୁଦେ ଲେଙ୍ଗ୍ଦେ ଲେକାମ୍, ଅଡ଼୍ ଲେୟେ ଡ଼ୁୱୁକିନ୍ ଲେକାମ୍ ଲେଙ୍ଗ୍ ମାଡ଼ିତଡ଼୍; ମେଣ୍ଡ୍, ଅଡ଼୍ ଲେଙ୍ଗ୍ମାଡ଼ି ନୁ ଶିକାର୍ ପଇସ୍ ସିମ୍ସାମ୍ତାଗ୍ ଅଦ୍ତଡ଼୍ ନୁ ଉଦ୍ଦାର୍ ମାଡ଼ାନଙ୍କ୍ ବେନ ଇଲ୍ୱେମାନ୍ଦଡ଼୍। 30 ମେଣ୍ଡେ, ଅଡ଼୍ ଆଦ୍ଲେକାମ୍ ଆଦ୍ ଦିନାମ୍ ସମୁଦ୍ରତେ ଲେଙ୍ଗ୍ ଲେକାମ୍ ନାରୁଡ଼୍ ଇସ୍ରାଏଲ୍ତେ ପରୁ ମର୍ରେ ମାଡ଼ିତଡ଼୍; ଆଗେ ଯଦି ବେନ ଦେଶ୍ତେ ପରୁ ଉଡ଼ିତଡ଼୍, ଇକାଡ଼୍ ନୁ ବିପଦ୍, ମେଣ୍ଡେ, ଆଦ୍ ପଡ଼ିୟେତେ ୱେସ୍ ମାବ୍ତାଗ୍ ଇକାଡ଼୍ ଆଦ୍ତେ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)