ପ୍ରଶଂସାତେ ପାଟେ
1 ହୋ ସଦାପ୍ରବୁ, ନିମେ ନା ପରମେଶ୍ୱର୍; ନାନେ ନି ଗୌରବ୍ ମାଡ଼ିତାନ୍, ନାନେ ନି ପେଦେର୍ତେ ପ୍ରଶଂସା ମାଡ଼ିତାନ୍; ବାତେଙ୍କ୍ଇତ୍କେ ନିମେ ଆଶ୍ଚର୍ଯ୍ୟକାମ୍, ଇତ୍କେ ପାଃନ୍ତେ କାଲାମ୍ତେ ଜଯୋନା ସାରେ ବିଶ୍ୱାସ୍ତେ ନୁ ସତ୍ତେ ମାଡ଼ିମିନ୍ଦେନି। 2 ବେଲାନ୍ ମିଡ଼୍ ନଗର୍ତିଙ୍କ୍ ଦିବା ମାଡ଼ିମିନ୍ଦେଡ଼ି, ସାକ୍ସାକା ମାନ୍ଦାନ୍ ନଗର୍ତିଙ୍କ୍ କିସ୍କିସା ମାଡ଼ିମିନ୍ଦେଡ଼ି; ବିଦେଶିନଡ଼୍ ରାଜପୁରୀତିଙ୍କ୍ ନଷ୍ଟ ମାଡ଼ିମିନ୍ଦେଡ଼ି; ଆଦ୍ ମେଣ୍ଡେ ବେସୁଙ୍କ୍ ତିଆର୍ ଆୟ। 3 ଆଦିନ୍ସେଙ୍ଗେ ଶକ୍ତିମାନ୍ଦାନ୍ ନାରୁଡ଼୍ ମିକିଙ୍କ୍ ଗୌରବ୍ ମାଡ଼ିତଡ଼୍ ନୁ ବୟଙ୍କାର୍ ଗୋଷ୍ଟିୟଡ଼୍ତେ ନଗର୍ ମିକିଙ୍କ୍ ୱେର୍ଦ୍ତେ। 4 ବାତେଙ୍କ୍ଇତ୍କେ ମିଡ଼୍ ଗରିବ୍ତେ ସାହାସ୍ ଡାଡୁମ୍ ଇଦାନଡ଼ି, ଦିନହିନତେ ସଙ୍କଟ୍ ସମୟ୍ତେ ଆଦିନ୍ ସାହାସ୍ ଆଦ୍ତିଡ଼୍, ବୟଙ୍କର୍ ନାରୁଡ଼୍ ନେସ୍କାନ୍ ଗାଲ୍ ଗାଟି ଗାଲ୍ ଲେକାମ୍ ନେଟେତାଗ୍ ଲାଗେମ୍ ଆଦାନ୍ ୱେଲେ ଗାଟି ତୁପାନ୍ ନିବାରକ ପଡ଼ିୟେ, କାମ୍କେ ନିବାରକ ନିଡ଼୍କେ ଆସ୍ମିନ୍ଦେଡ଼ି। 5 ବେଲାନ୍ ମିଡ଼୍ ୱାସ୍ତେ ବୂମ୍ତେ କାମ୍କେ, ଆଦ୍ଲେକାମ୍ ବିଦେଶିନଡ଼୍ ରାମ୍କିଙ୍କ୍ କଟ ମାଡ଼ି ମିନ୍ଦେନ୍; ବେଦ୍ଲେକାମ୍ ମାବ୍ତେ ନିଡ଼୍କେତଡ଼୍ କାମ୍କେ, ଆଦ୍ଲେକାମ୍ ବୟଙ୍କର୍ ନାରୁଡ଼୍ ପାରାନ୍ ଲେଙ୍ଗ୍ ଅଟ୍କା ମାଡ଼ିତିଡ଼୍।
ପରମେଶ୍ୱର୍ତେ ଅଣ୍ଡୟ ବଜି
6 ମେଣ୍ଡେ, ସାରେତିଙ୍ଗ୍ ବେଡ଼ିୟେ ସଦାପ୍ରବୁ ଇଦ୍ ମେଟେତାଗ୍ ସାରେ ନାର୍ଦେ ସେଙ୍ଗେ ଲେକେତ୍ ଲେକେତ୍ କାଦିତେ ୱେରଡ଼୍ ବଜି, ପାନ୍ତେ ଅଙ୍ଗୁର୍ରସ୍, ମେଦନିଣ୍ଡଙ୍କ୍ ଲେକେତ୍ କାଦି ଜିନିଷ୍, ସାହେ ପାନ୍ତେ ଅଙ୍ଗୁର୍ରସ୍ତେ ୱେରଡ଼୍ ବଜି ତିଆର୍ ମାଡ଼ିକାଡ଼୍। 7 ସାରେ ଗୋଷ୍ଟିତଡ଼୍ ପରୁ ବେନ୍ ଓଢ଼ନି ମିନ୍ଦେ ନୁ ସାରେ ଦେଶ୍ତେନଡ଼୍ ପରୁ ବେନ୍ ମଡ଼୍ତିଙ୍କ୍ ମୁସିମାନ୍ଦାନ୍ ଚିଲେ ଏକାମ୍ ଆସ୍ମିନ୍ଦେ, ଆଦ୍ ଅଣ୍ଡ୍ ଇ ମେଟେତାଗ୍ ଦଂସ ମାଡ଼ିତଣ୍ଡ୍। 8 ଅଣ୍ଡ୍ ଡଲାନାଦିଙ୍କ୍ ଅନନ୍ତ କାଲାମ୍ତେ ସେଙ୍ଗେ ଦଂସ ମାଡ଼ିମିନ୍ଦେଣ୍ଡ୍ ନୁ ପ୍ରବୁ, ସଦାପ୍ରବୁ, ସାରେତଡ଼୍ ମକମ୍ତାଗାଙ୍କ୍ ପେଇତାନ୍ ଏର୍ ଉଞ୍ଜ୍ସ୍ପିଦ୍ତଣ୍ଡ୍ ନୁ ସାରା ପୃତିବିତାଗାଙ୍କ୍ ତାନ୍ ନାରୁଡ଼୍ ଦୁଃକାମ୍ ଦୂର୍ ମାଡ଼ିତଣ୍ଡ୍; ବାତେଙ୍କ୍ଇତ୍କେ ସଦାପ୍ରବୁ ଇଦ୍ ଗଟ୍ କେସ୍ମିନ୍ଦେଣ୍ଡ୍। 9 ମେଣ୍ଡେ, ଆଦ୍ ଦିନେ ଇଦ୍ ଗଟ୍ କେତାଙ୍କ୍ଆଦ୍ତେ, "ଉଡ଼େ, ଇଦ୍ ମାନାଦ୍ ପରମେଶ୍ୱର୍; ମାନାଡ଼୍ ଅଙ୍କ୍ କେପିମିନ୍ଦେମ୍ ନୁ ଅଣ୍ଡ୍ ମାନାଙ୍କ୍ ଉଦ୍ଦାର୍ ମାଡ଼ିତଣ୍ଡ୍; ଇଣ୍ଡ୍ ସଦାପ୍ରବୁ ଆଦ୍ତଣ୍ଡ୍; ମାନାଡ଼୍ ଅଙ୍କ୍ କେପିମିନ୍ଦେମ୍, ମାନାଡ଼୍ ତାନ୍ ତିଆର୍ ମାଡ଼୍ତାଦ୍ ପରିତ୍ରାଣତେ ୱେଡ଼୍କେ ମାଡ଼ିତମ୍।"
ମୟାବ୍ତେ ଦଣ୍ଡ
10 ବାତେଙ୍କ୍ଇତ୍କେ ଇଦ୍ ମେଟେତାଗ୍ ସଦାପ୍ରବୁନ୍ କାଇ ମାନ୍ତା, ମେଣ୍ଡେ ବେଲାନ୍ ରିକା କାତାମ୍ଗାଦ୍ ଏର୍ଦେ ପାଦାମ୍ତେ ମଦଲ୍ ୱିକିତଣ୍ଡ୍, ଆଦ୍ଲେକାମ୍ ମୋୟାବ ଆଦ୍ପଡ଼ିୟେତାଗ୍ ଡଲିତେ। 11 ମେଣ୍ଡେ, ଇନ୍ତେଆଦାନ୍ ନାରୁନ୍ ବେଲାନ୍ ଇନ୍ତେଆଦାନଙ୍କ୍ କାଇକ୍ ଆତିତଣ୍ଡ୍, ମୟାବ୍ତେ ନାରୁନ୍ ଅଣ୍ଡ୍ ଆଗେ ତାନ୍ କାଇକ୍ ଆତିତଣ୍ଡ୍; ମାତର୍ ଅନ୍ ଆଶେତେ ମାନ୍ତେ ସେଙ୍ଗେ ସଦାପ୍ରବୁ ନଷ୍ଟ ମାଡ଼ିତଣ୍ଡ୍। 12 ମେଣ୍ଡେ, ଅଣ୍ଡ୍ ମି ଡେଙ୍ଗ୍ ନେଟେଲେକାତ୍ ଢ଼ାଟୁମ୍ତେ ଦୁର୍ଗ ନଷ୍ଟ ମାଡ଼ି ଡଲିମିନ୍ଦେଣ୍ଡ୍ ନୁ ଆଦ୍ ବୁମ୍ତାଗ୍ କାଇଲି ମାଣ୍ଡଲ୍ତାଗ୍ କାଲ୍ପି ମିନ୍ଦେଣ୍ଡ୍।
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)