1 ଆଦ୍‌ ସମୟତେ ବଲ୍‌ଦନ୍‌ତେ ମାର୍‌ ବାବିଲ୍‌ତେ ରାଜା ମରୋଦକ୍‌ ବଲ୍‌ଦନ୍‌ ହିଜକୀୟ ପାକେ ଚିଟି ନୁ ଉଡ଼ାନାଦ୍‌ ରତ୍‌ତଣ୍ଡ୍‌; ବାତେଙ୍କ୍‌ଇତ୍କେ ତାନ୍‌ ରୋଗାମ୍‌ ଆଦାନାଦ୍‌ ନୁ ସୁସ୍ଥ ଆଦାନାଦ୍‌ କାବୁର୍‌ ଅଣ୍ଡ୍‌ କେଞ୍ଜ୍‌ତଣ୍ଡ୍‌। 2 ଆସୁଙ୍କ୍‌ ହିଜକୀୟ ଅଡ଼୍‌ ପରୁ ସାର୍‌ଦେ ଆସ୍‌ ନିଜେତ୍‌ ନାର୍ଗେ ଦାମିନ୍‌ ଜିନିଷ୍‌ତେ ଲନ୍‌, ରୂପା, ସୁନା, ଲେକେତ୍‌ ଗାବ୍‌ମାନ୍ଦାନ୍‌ ଜିନିଷ୍‌, ନାର୍ଗେ ଦାମିନ୍‌ ନିୟ୍‌ ନୁ ନିଜେତ୍‌ ଅସ୍ତ୍ରାଗାର୍‌ ନୁ ନିଜେତ୍‌ ଲତ୍‌ତେ ସାରେ ଜିନିଷ୍‌ ଅଡ଼୍‌କିଙ୍କ୍‌ ତତ୍‌ତଣ୍ଡ୍‌; ହିଜକୀୟ ବାତ୍‌ତେ ଅଡ଼୍‌କିଙ୍କ୍‌ ତୱଣ୍ଡ୍‌, ଇଦ୍‌ଲେକାମ୍‌ ବାତେମିକା ଜିନିଷ୍‌ ଅନ୍‌ ଲତ୍‌ତାଗ୍‌ କି ଅନ୍‌ ସାରା ରାଜ୍ୟତାଗ୍‌ ଇଲ୍‌ୱେ ମାତ୍‌ତେ। 3 ଆସୁଙ୍କ୍‌ ଯିଶାଇୟ ବବିଷ୍ୟଦ୍‌ବକ୍ତା ହିଜକୀୟ ରାଜାନ୍‌ ପାକେ ୱାସ୍‌ ଅଙ୍କ୍‌ କେତ୍‌ତଣ୍ଡ୍‌, "ଇ ନାରୁଡ଼୍‌ ବାତ୍‌ତେ କେତ୍‌ତଡ଼୍‌ ? ଅଡ଼୍‌ ବେଗାଙ୍କ୍‌ ମି ପାକେ ୱାତ୍‌ତଡ଼୍‌ ?" ଆସୁଙ୍କ୍‌ ହିଜକୀୟ କେତ୍‌ତଣ୍ଡ୍‌, "ଅଡ଼୍‌ ଦୂରାମ୍‌ ଦେଶ୍‌ ବାବିଲ୍‌ତାଗାଙ୍କ୍‌ ନା'ପାକେ ୱାତ୍‌ତଡ଼୍‌।" 4 ଆସୁଙ୍କ୍‌ ଅଣ୍ଡ୍‌ ପଚ୍ରାମାଡ଼୍‌ତଣ୍ଡ୍‌, "ଅଡ଼୍‌ ମି ଲନ୍‌ ବାତ୍‌ତେ ଉଡ଼୍‌ତଡ଼୍‌ ?" ଆସୁଙ୍କ୍‌ ହିଜକୀୟ ଉତ୍ତର୍‌ ମାଡ଼୍‌ତଣ୍ଡ୍‌, "ନା'ଲନ୍‌ ବାତା ବାତା ମିନ୍ଦେ, ସାରେ ଅଡ଼୍‌ ଉଡ଼ିମିନ୍ଦେଡ଼୍‌; ବାତେ ନାନେ ଅଡ଼୍‌କିଙ୍କ୍‌ ଉଡ଼ଣ୍ଡ୍‌. ଇଦ୍‌ଲେକାମ୍‌ ବାତେବା ଜିନିଷ୍‌ ନା' ଲତ୍‌ତେ ଲପେ ଇଲ୍‌ଲେ।" 5 ଆସୁଙ୍କ୍‌ ଯିଶାଇୟ ହିଜକୀୟଙ୍କ୍‌ କେତ୍‌ତଣ୍ଡ୍‌, "ସାରେତିଙ୍କ୍‌ ବେଡ଼୍‌ୟନ୍‌ ସଦାପ୍ରବୁନ୍‌ ବାକ୍ୟ କେଞ୍ଜାଟ୍‌। 6 ଉଡ଼େ, ନି ଲତ୍‌ତେ ସାରେ ଜିନିଷ୍‌ ନୁ ନେଣ୍ଡ୍‌ ଆୟିନା ମି ମୁନେତ୍‌ ନାରୁଡ଼୍‌ ଗୁଡ଼୍‌ପି ସାରେ ଜିନିଷ୍‌ ବାବିଲ୍‌ତାକ୍‌ ଅଦାନ୍‌ ସମୟ ୱାସ୍‌ମିନ୍ଦେ; ସଦାପ୍ରବୁ କେତିତଣ୍ଡ୍‌, ବାତେ ମିକା ୱିଡ଼୍‌ସାନାଦ୍‌ ଆୟ। 7 ମେଣ୍ଡେ, ମି ମାର୍‌କିଡ଼୍‌ ଲପେଙ୍କ୍‌ ବେନଡ଼୍‌ ମି ଡଙ୍କେତେ ଜନମ୍‌ ନୁ ମିୟାଗେ ପୁଟିତେ, ଅଡ଼୍‌କିଙ୍କ୍‌ ଅଡ଼୍‌ ଅଦ୍‌ତଡ଼୍‌ ନୁ ଅଡ଼୍‌ ବାବିଲ୍‌ ରାଜାନ୍‌ ପ୍ରସାଦ୍‌ତାଗ୍‌ କଜାନଡ଼୍‌ଆସ୍‌ ମାନ୍ଦ୍‌ତଡ଼୍‌।" 8 ଆସୁଙ୍କ୍‌ ହିଜକୀୟ ଯିଶାୟଙ୍କ୍‌ କେତ୍‌ତଣ୍ଡ୍‌, "ନିମେ ସଦାପ୍ରବୁନ୍‌ ବେନ୍‌ ବାକ୍ୟ କେସମିନ୍ଦେଡ଼ି, ଆଦ୍‌ ଲେକେତ୍‌।" ଅଣ୍ଡ୍‌ ମେଣ୍ଡେ କେତ୍‌ତଣ୍ଡ୍‌, "ବାତେଙ୍କ୍‌ଇତ୍କେ ନା' ସମୟ୍‌ତେ ଶାନ୍ତି ନୁ ସତ୍‌ ନାର୍ଗେ ଆଦ୍‌ତେ।"