ପରମେଶ୍ୱର୍ ଜଗତ୍ତିଙ୍କ୍ ବିଚାର୍ ମାଡ଼ିତଣ୍ଡ୍
1 ସଦାପ୍ରବୁ ଇଦ୍ଗଟ୍ କେତିତଣ୍ଡ୍, "ସ୍ୱର୍ଗ ମାନ୍ ସିଂହାସନ୍ ନୁ ପୃତିବୀ ମାନ୍ ଡେକେତ୍ ଦୁମ୍; ମିଡ଼୍ ମା ସେଙ୍ଗେ ବେଦ୍ଲେକାମ୍ ତିଆର୍ ମାଡ଼ିତିଡ଼୍ ? ନୁ ବେନ୍ ପଡ଼ିୟେ ମାନାଦ୍ ରମାନ୍ ପଡ଼ିୟେ ଆଦ୍ତେ ? 2 ବାତେଙ୍କ୍ଇତ୍କେ ମାନାଦ୍ କାଇ ଇୱୁସାରେ ତିଆର୍ ମାଡ଼ିମିନ୍ଦେ, ଆଦିନ୍ ସେଙ୍ଗେ ଇୱୁସାରେ ପେୟିତ୍ତା," ଇଦ୍ ସଦାପ୍ରବୁ କେତିତଣ୍ଡ୍; "ମାତର୍ ଇ ନାରୁଡ଼୍ ପରୁ, ଇତ୍କେ ବେନ୍ ନାରୁଣ୍ଡ୍ ଦୁଃକାମ୍, ନମ୍ର ନୁ ବେନ ମାନ୍ ବାକ୍ୟତାଗ୍ ସାର୍ଦେ ଆଦ୍ତେ, ଆଦିନ୍ ପରୁ ମାମେ କଣ୍ଡେ ୱାଟିତମ୍। 3 ବେନ ଗଡ଼କ୍ ଆୱୁକିତଣ୍ଡ୍, ଅଣ୍ଡ୍ ନାରୁଣ୍ଡ୍ ଆୱୁକାନଣ୍ଡ୍ ଲେକା ଆଦ୍ତଣ୍ଡ୍; ବେନ ମେକା ପୂଜିତଣ୍ଡ୍; ଅଣ୍ଡ୍ ନେଇକିନ୍ ଗୁଡ଼ୁଙ୍ଗା ନାଡ଼୍କାନ୍ ନାରୁଣ୍ଡ୍ ଲେକାମ୍ ଆଦ୍ତଣ୍ଡ୍, ବେନ ବଳି ପୂଜେ ମାଡ଼ିତଣ୍ଡ୍, ଅଣ୍ଡ୍ ନେଇଦେ ନେତୁର୍ ପୂଜେ ମାଡ଼ାନ୍ ନାରୁଣ୍ଡ୍ ଲେକାମ୍ ଆଦ୍ତଣ୍ଡ୍; ବେନ ଦୂପାମ୍ ନିଡ଼୍ସ୍ପିତଣ୍ଡ୍, ଅଣ୍ଡ୍ ଦେୟାମ୍କିନ୍ ଦନ୍ୟବାଦ୍ ମାଡ଼ାନ୍ ନାରୁଣ୍ଡ୍ ଲେକାମ୍ ଆଦ୍ତଣ୍ଡ୍; ହଁ, ଅଡ଼୍ ନିଜେତେ ଆର୍ ହେଞ୍ଚିମିନ୍ଦେଡ଼୍ ନୁ ଅଡ଼୍ୱାଦ୍ ଜିୱେ ନିଜେତେ ପାସ୍କାନ୍ ବିଷୟତେ ସନ୍ତୁଷ୍ଟ ଆଦ୍ତେ; 4 ମାମେ ମିକା ଅଡ଼୍ କାନାଆତ୍ତେ ବିଷୟ ହେଞ୍ଚିକାଡ଼୍ ନୁ ଅଡ଼୍ ୱେର୍ ବିଷୟ ଅଡ଼୍ ପରୁ ତିଆର୍ଡ଼ିକାଡ଼୍; ବାତେଙ୍କ୍ଇତ୍କେ ମାମେ କାର୍ଙ୍ଗତେ ପେର୍କେ ବେନ ଉତ୍ତର୍ ଇୱଡ଼୍ ଆତ୍ତଡ଼୍; ମାନାଡ଼୍ ଗଟି ରିୟାନ୍ ୱେଲେ ଅଡ଼୍ କେଞ୍ଜଡ଼୍ ଆତ୍ତଡ଼୍; ମାତର୍ ବେନ୍ ମାନ୍ କଣ୍ଡେତାଗ୍ କାରାପ୍, ଆଦ୍ ମାନାଡ଼୍ ମାଡ଼୍କେ ନୁ ଆଦିନାଗ୍ ମାନାଡ଼୍ ଶାନ୍ତି ମାନ୍ୱାଡ଼୍, ଆଦ୍ ଅଡ଼୍ ହେଞ୍ଚ୍ତଡ଼୍।" 5 ସଦାପ୍ରବୁନ୍ ବାକ୍ୟତାଗ୍ ବିଦ୍ବିଦା ଆସମିନ୍ଦେଡ଼ି ଯେ "ମିଡ଼୍, ମିଡ଼୍ ଅନ୍ୱାଦ୍ ବାକ୍ୟ କେଞ୍ଜାଟ୍; ମିୟାଦ୍ ବେନ୍ ଦାଦାନଡ଼୍ ମିକିଙ୍କ୍ ପାସ୍କିତଡ଼୍, ମା ପେଦେର୍ତେ ସେଙ୍ଗେ ମିକିଙ୍କ୍ ଦୁରାମ୍ ମାଡ଼ିତଡ଼୍, ଅଡ଼୍ କେସ୍ମିନ୍ଦେଡ଼୍, ମାନାଡ଼୍ ବେଲାନ୍ ମିୟାଦ୍ ୱେଡ଼୍କେ ଉଡ଼େ ପାର୍ତମ୍, ଆଦିନ୍ ସେଙ୍ଗେ ସଦାପ୍ରବୁ ସନ୍ତୁଷ୍ଟ ଆୟିନ୍; ମାତର୍ ଅଡ଼୍ ସିଗ୍ ଆଦ୍ତଡ଼୍। 6 କେଞ୍ଜାଟ୍, ନଗର୍ତାଗାଙ୍କ୍ ରାମ୍କ୍ ଆଦାନ୍ ମର୍ରେ, ମନ୍ଦିର୍ ତାଗାଙ୍କ୍ ମର୍ରେ, ବେନ ନିଜେତ୍ ଶତ୍ରୁଡ଼୍କିଙ୍କ୍ ମାଡ଼୍ତେ କାୟେ ଇଦ୍ତଡ଼୍, ଆ ସଦାପ୍ରବୁନ୍ ଲେଙ୍ଗ୍ !
ଯିରୁଶାଲେମ୍ ତଡ଼୍ ୱେଡ଼୍କେ
7 ନପିନ୍ ମୁନେଙ୍କ୍ ଆଦ୍ ଜନମ୍ ମାଡ଼୍ତେ; ଡଙ୍କେନଦାନ୍ ମୁନେଙ୍କ୍ ମାର୍ ଜନମ୍ ମାଡ଼୍ତେ। 8 ଇଦ୍ ଲେକାମ୍ ଗଟ୍ ବେନ କେଞ୍ଜ୍ତଣ୍ଡ୍ ? ଇଦ୍ ଲେକେତ୍ ଗଟ୍ ବେନ ଉଡ଼୍ତଣ୍ଡ୍ ? ଅଣ୍ଡ୍ୟ ଦିନେତେ କି ବେନେଆୟି ଦେଶ୍ତେ ଜନମ୍ ଆଦ୍ତଣ୍ଡ୍ ? ବେନେଆୟି ଗୋଷ୍ଟିତେ ନାରୁଣ୍ଡ୍ କି ଅଣ୍ଡ୍ୟଦାମ୍ ଜନମ୍ ଆଦ୍ତଣ୍ଡ୍ ? ସିୟୋନ୍ ଡଙ୍କେତ୍ ଆଦାନ୍ ସାଙ୍ଗେ ସାଙ୍ଗେ, ଆଦ୍ ନିଜେତ୍ ପିଲାକିଙ୍କ୍ ଜନମ୍ ମାଡ଼୍ତେ।" 9 ସଦାପ୍ରବୁ କେତିତଣ୍ଡ୍, "ମାମେ ଜନମ୍ ମାଡ଼ାନ୍ କାଲାମ୍ ହେଉଦାନ୍ ଗାରେ କି ଜନମ୍ ମାଡ଼୍ୱାଡ଼୍ ?" ମି ପରମେଶ୍ୱର୍ କେତିତଣ୍ଡ୍, "ଜନମ୍ ମାଡ଼ିଦାନଣ୍ଡ୍ ଯେ ମାମେ, ମାନାଡ଼୍ କି ଡଙ୍କେ ନପ୍ ମାଡ଼ିକାଡ଼୍ ?" 10 ହୋ ଯିରୁଶାଲେମ୍ତାକ୍ ପ୍ରେମମାଡ଼ାନ୍ ସାରେତଡ଼୍, ମିଡ଼୍ ଆଦିନ୍ତଡ଼୍ ୱେଡ଼୍କେ ମାଡ଼ାଟ୍; ଆଦ୍ ବିଷୟ୍ତେ ମାନ୍ତାଗ୍ ଏର୍କେ ମାଡ଼ାନଡ଼୍ ସାରେତଡ଼୍, ମିଡ଼୍ ଆନ୍ତେ ୱେଡ଼୍କେତ୍ ସେଙ୍ଗେ ଆଦିନ୍ତଡ଼୍ ସାର୍ଦେମାଡ଼ାଟ୍; 11 ଆସୁଙ୍କ୍ ମିଡ଼୍ ଆଦିନାଦ୍ ପାଲ୍ ସାନ୍ତିତେ ଉନ୍ଦ୍ତିଡ଼୍ ନୁ ଡଙ୍କେ ନିଃତିତିଡ଼୍, ମିଡ଼୍ ନାର୍ଗେତେ ପାଲ୍ ଉନ୍ଦ୍ତିଡ଼୍ ନୁ ଆଦିନ୍ ପାଞ୍ଜ୍ନା ନାର୍ଗେ ଉନ୍ଦାନାଦ୍ ୱେଡ଼୍କେ ମାଡ଼ିତିଡ଼୍। 12 ସଦାପ୍ରବୁ ଇଦ୍ ଗଟ୍ କେତିତଣ୍ଡ୍, "ଉଡ଼େ, ମାମେ ଆଦିନ୍ ପାକେ ବେଡ଼େମ୍ ଲେକାମ୍ ଶାନ୍ତି ନୁ ମିଡ଼୍ ଆଦାନ୍ ବେଡ଼େମ୍ ଲେକାମ୍ ବେନ୍ ବେନା ଦେଶୀୟନଡ଼୍ ସମ୍ପତି ତାତିକାଡ଼୍, ମେଣ୍ଡେ ମିଡ଼୍ ଆଦିନାଗାଙ୍କ୍ ପାଲ୍ ଉନ୍ଦ୍ତିଡ଼୍ ନୁ ମିକ୍ ହେତି ପୟିଦ୍ତଡ଼୍ ନୁ ବଟ୍ମିଣ୍ଡାନ୍ ପରୁ ହେନ୍ଦ୍ସ୍ପିତମ୍। 13 ବେଲାନ୍ ୱେରଙ୍କ୍ ତାମ୍ ୟାୟ ସାହାସ୍ ଇଦ୍ତେ, ଆଦ୍ଲେକାମ୍ ମାମେ ମିକିଙ୍କ୍ ସାନ୍ୱନା ମାଡ଼ିକାଡ଼୍ ନୁ ମିଡ଼୍ ଯିରୁଶାଲମ୍ତାଗ୍ ସାନ୍ୱନା ପାହେମ୍ ଆଦ୍ତିଡ଼୍।" 14 ମିଡ଼୍ ଇଦ୍ ଉଡ଼ିତିଡ଼୍ ନୁ ମିୟାଦ୍ ହୃଦୟ ୱେଡ଼୍କେ ଆଦ୍ତେ, ମେଣ୍ଡେ ମିୟାୱୁ ବୁଲା ପୁଃନେ ଗାଡ଼୍ ଲେକାମ୍ ଲେତାଦ୍ ଆଦ୍ତେ; ସଦାପ୍ରବୁନ୍ କାଇ ତାନ୍ ଦାସନଡ଼୍ ପାକେ କେତାନଙ୍କ୍ ଆଦ୍ତେ ନୁ ଅଣ୍ଡ୍ ନିଜେତେ ଶତ୍ରୁନଡ଼୍ ବିରୁଦ୍ଦ୍ତେ କପାମ୍ ଆଦ୍ତଡ଼୍।
ଇଶ୍ୱର୍ତେ ମହିମା ନୁ ଶେଷ୍ ବିଚାର୍
15 ଉଡ଼େ, ଗାଟି କାମ୍କେତେ ନିୟାଦ୍ କପାମ୍ ନୁ ନିଡ଼୍ତାନ୍ କିସ୍ତଡ଼୍ ନିଜେତ୍ କପାମ୍ ମାଡ଼ାନଙ୍କ୍ ସଦାପ୍ରବୁ କିସ୍ତଡ଼୍ ଆଗମନ ମାଡ଼ିତଣ୍ଡ୍ ନୁ ଅନାୱୁ ପୁତ୍ଲାକ୍ସାରେ ଉର୍ଗାଲ୍ ଲେକାମ୍ ଆଦ୍ତେ। 16 ବାତେଙ୍କ୍ ସଦାପ୍ରବୁ କିସ୍ତଡ଼୍ ନୁ ନିଜେତ୍ ଚୁର୍ତଡ଼୍ ସାରେ ପୃତିବିତଡ଼୍ ରାମ୍କିନଡ଼୍ ବିଚାର୍ତାଗ୍ ମାନ୍ଦ୍ତଡ଼୍ ଅଡ଼କ୍; ଆସୁଙ୍କ୍ ସଦାପ୍ରବୁନ୍ତଡ଼୍ ଡଲ୍ତେନଡ଼୍ ନାର୍ଗେ ଆଦ୍ତଡ଼୍। 17 ସଦାପ୍ରବୁ କେତିତଣ୍ଡ୍, "ବେନଡ଼୍ ମୁନେଙ୍କ୍କଞ୍ଜ୍ ମାନ୍ଦାନ୍ନଣ୍ଡ୍ ୱେରଣ୍ଡ୍ ପେର୍କେ ଆଦାନ୍ ପାକେ ଆଦାନଙ୍କ୍ ମିକିଙ୍କ୍ ସାକ୍ସାକା ନୁ ଶୁଚି ମାଡ଼ିତଣ୍ଡ୍, ନେଇ ଆୱୁଙ୍କ୍ ନୁ ପାଦ୍ ଆୱୁଙ୍କ୍ ନୁ ଉପେ ତିନ୍ତଡ଼୍, ଅଡ଼୍ ଅଣ୍ଡୟ୍ଦାମ୍ ନଷ୍ଟ ଆଦ୍ତଡ଼୍।" 18 ମାମେ ଅଡ଼୍ କାମ୍ ନୁ ଏର୍କେସାରେ ପୁନ୍ଦ୍ତମ୍; ସାରାଦେଶ୍ତେନଡ଼୍ ନୁ ବାଷାବାଦି ନାରୁଡ଼୍କ୍ ମାକିଙ୍କ୍ ତାତାନ୍ ସମୟ୍ତେ ୱାଦୁତ୍ ନୁ ଅଡ଼୍ ୱାସ୍ ମାନାଦ୍ ମହିମା ଉଡ଼ିତଡ଼୍। 19 ମାମେ ଅଡ଼୍ ଲପେ ୱେରଡ଼୍ ଚିହ୍ନେ ତିଆର୍ ମାଡ଼ିକାଡ଼୍ ନୁ ଅଡ଼୍ ଲପେଙ୍କ୍ ରକ୍ଷାଆଦାନ୍ ନାରୁଡ଼୍କିଙ୍କ୍ ମାମେ ୱେରେ ୱେରେ ଦେଶ୍ତେନଡ଼୍ ପାକେ, ତର୍ଶୀଶ୍, ପୁଲ ନୁ ଲୂଦ, ବେନଡ଼୍ ୱିଲ୍କ୍ ତୁବଲ ନୁ ଯବନ, ସାମାନ୍, ଇୱୁସାରେ ବେନା ଯେକେମାନ୍ଦାନ୍ ଦ୍ୱୀପସାରେ ମା ଯେକେମାନ୍ଦାନ୍ ବିଷୟ୍ ବେସୁଙ୍କ୍ କେଞ୍ଜଡ଼୍, କି ମାୟାଦ୍ କାମ୍କେ ଉଡ଼୍ୱିନ୍, ଅଡ଼୍ ପାକେ ରତିକାଡ଼୍ ନୁ ଅଡ଼୍ ୱେରେ ୱେରେ ଦେଶ୍ତେନଡ଼୍ ପାକେ ମାୟାଦ୍ ମହିମା କେତିତଡ଼୍। 20 ମେଣ୍ଡେ, ସଦାପ୍ରବୁ କେତିତଣ୍ଡ୍, ଇସ୍ରାଏଲ୍ତେ ପିଲାକି ବେଲାନ୍ ପବିତ୍ରତେ ସଦାପ୍ରବୁନ୍ ଲତ୍ତିଙ୍କ୍ ଉପହାର୍ ତାତିତଣ୍ଡ୍, ଆଦ୍ଲେକାମ୍ ଅଡ଼୍ ମି ତାମୁସ୍କ୍ ସାରେତଡ଼୍କ୍ ସଦାପ୍ରବୁନ୍ ଉଦେଶ୍ୟତେ ଉପହାର୍ତେ ସେଙ୍ଗେ, ସାରେ ଦେଶ୍ତେନଡ଼୍ ଲୋପେ ସାରେତଡ଼୍କ୍ ଗୁରାକ୍, ବାଣ୍ଡ୍ ନୁ ଉଟ୍, ଗୁରାମ୍ ଲେକାମ୍ ତନ୍ଦାନ୍ ପଶୁ ନୁ ଗାଟି ଉର୍ଗିଙ୍କ୍ ମିରାନ୍ ପଶୁକିନ୍ ପରୁ ମାୟାଦ୍ ପବିତ୍ର ମେଟେ ଯିରୁଶାମ୍ତାକ୍ ତାତିତଡ଼୍। 21 ମେଣ୍ଡେ, ମାମେ ଅଡ଼୍ ଲୋପେଙ୍କ୍ ଯାଜକ ନୁ ଲେବିୟ ଆଦାନ୍ ସେଙ୍ଗେ ନାରୁଡ଼୍ କାର୍ଗିକାଡ଼୍, ଇଦ୍ ସଦାପ୍ରବୁ କେତିତଣ୍ଡ୍। 22 ବାତେଙ୍କ୍ଇତ୍କେ ମାମେ ବେନ୍ ପୁଃନେ ମାବ୍ମୟଲ୍ ନୁ ପୁଃନେ ପୃତିବୀ ତିଆର୍ ମାଡ଼ିକାଡ଼୍, ଆଦ୍ ବେଲାନ୍ ମାନ୍ ମୁନେ ମାନ୍ତେ, ବେଲାନ୍ ମିୟାଦ୍ ପିଲୁଡ଼୍ ନୁ ମିୟାଦ୍ ପେଦେର୍ ମାନ୍ଦ୍ନ୍ତେ, ଇଦ୍ ସଦାପ୍ରବୁ କେତୁତଣ୍ଡ୍। 23 ମେଣ୍ଡେ, ଅଣ୍ଡୟ୍ ଆମାସ୍ ତାଗାଙ୍କ୍ ମେଣ୍ଡନ୍ ଆମାସ୍ ଯାକ ନୁ ଅଣ୍ଡୟ୍ ରମାନ୍ ଦିନେକଞ୍ଜ୍ ମେଣ୍ଡନ୍ ରମାନ୍ ଦିନାମ୍କଞ୍ଜ୍ ହେଉନା ସାରେ ପୃତିବିତେ ନାରୁଡ଼୍ ମାନ୍ ମୁନେ ତିନ୍ଦାନ୍ ସେଙ୍ଗେ ୱାଦ୍ତା, ଇଦ୍ ସଦାପ୍ରବୁ କେତୁତଣ୍ଡ୍। 24 ମେଣ୍ଡେ, ଅଡ଼୍ ବାଇଦେ ଆଞ୍ଜ୍, ବେନ ମାନ୍ ବିରୁଦ୍ଧ୍ତେ ଅଦର୍ମ ମାଡ଼ିମିନ୍ଦେଡ଼୍, ଆ ନାରୁଡ଼ାୱୁ ମଡ଼୍ ଉଡ଼ିତିଡ଼୍; ବାତେଙ୍କ୍ଇତ୍କେ ଅଡ଼ାୱୁ ପୁଡ଼ିକ୍ ଡଲ, କି ଅଡ଼୍ୱାଦ୍ କିସ୍ ବେସୁଙ୍କ୍ବା ପିୟ; ଅଡ଼୍ୱାଦ୍ ଡଲାନାଦ୍ ପାସ୍କାନ୍ ପଡ଼ିୟେ ଆଦ୍ତେ।
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)