1 ହିଜକୀୟ ରାଜାଙ୍କ୍‌ ଅଦିକାର୍‌ତେ ପିଲ୍‌ ହେଣ୍ଡେକ୍‌ ଅଶୂର୍‌ ରାଜା ସନ୍‌ହେରୀବ୍‌ ଯିହୁଦାତେ ବେଡ଼ିୟେ ନଗର୍‌ସାରେ ବିରୁଦ୍ଧ୍‌ତେ ୱାସ୍‌ ଆଦିନ୍‌ ସାରେ କାଇଦେ ଦଂସ ମାଡ଼୍‌ତଣ୍ଡ୍‌। 2 ମେଣ୍ଡେ ଅଶୂର୍‌ ରାଜା ରବ୍‌ଶାକିକିଙ୍କ୍‌ ବେଡ଼ିୟେସୈନ୍ୟତଡ଼୍‌ ଲାକିଶ୍‌ତାଗାଙ୍କ୍‌ ଯିରୁଶାଲାମ୍‌ତାକ୍‌ ହିଜକୀୟ ରାଜାନ୍‌ଗାରେ ରତଣ୍ଡ୍‌। ମେଣ୍ଡେ, ଅଣ୍ଡ୍‌ ରାଜାନ୍‌ ୱାୟେତ୍‌ ପରୁଙ୍କ୍‌ ଏର୍‌ୱୁତେ ଦନ୍ଦଦେ ଗାର୍‌ରେ ନିତ୍‌ତଡ଼୍‌।

3 ଆସୁଙ୍କ୍‌ ହିଲ୍‌କୀୟତେ ମାର୍‌ ଇଲିୟାକିମ୍‌ ପେଦେର୍‌ତେ ରାଜାନ୍‌ଲତ୍‌ତେ ଗେଟ୍‌ କେପାନଣ୍ଡ୍‌, ଶିବ୍‌ନ ଲେକାନଣ୍ଡ୍‌ ନୁ ଆସଫର୍‌ ମାର୍ ଯୋୟାହ ପେଦେର୍‌ତେ ଇତିହାସ୍‌ ଲେକାନଣ୍ଡ୍‌ ପେୟିସ୍‌ମିକା ତାନ୍‌ ଗାରେ ୱାତ୍‌ତଣ୍ଡ୍‌। 4 ମେଣ୍ଡେ ରବ୍‌ଶାକି ଅଡ଼୍‌କିଂଙ୍କ୍‌ କେତ୍‌ତଣ୍ଡ୍‌, ଇଞ୍ଜେ ମିଡ଼୍‌ ହିଜକୀୟତିଙ୍କ୍‌ କେଲ୍‌ମୁଟ୍‌, ମହାରାଜା ଅଶୂର୍‌ ରାଜାଲ୍‌ ଇଦ୍‌ ଗଟି କେତୁତଣ୍ଡ୍‌, ମିଡ଼୍‌ ଇଦ୍‌ ବେନ୍‌ ବିଶ୍ୱାସ୍‌ ମାଡ଼ମିନ୍ଦେଡ଼୍‌, ଆଦ୍‌ ବାତ୍‌ ଲେକାମ୍‌ ବିଶ୍ୱାସ୍‌ ? 5 ନାନ୍‌ କେସମିନ୍ଦନ୍‌, ଯୁଦ୍ଦ୍‌ ମାଡ଼ାନ୍‌ ମାଇଦିଙ୍ଗ୍‌ ମିୟାଦ୍‌ ଯଜନା ନୁ ଶକ୍ତି ମାତର୍‌ ଆସାମ୍‌ତାଦ୍‌; ନିମ୍‌ ବେନନ୍‌ ପର ଆଶେ ମାଡ଼ି ନାୟାଦ୍‌ ବିରୁଦ୍ଦ୍‌ ଆସ୍‌ମିନ୍ଦେନି ? 6 ଉଡ଼ାଟ୍‌, ନିମ୍‌ ଇଦ୍‌ ଦୁଡ଼ା ଦୁଡ଼ା ମାନ୍ଦାନ୍‌ ଡ଼ୁଡ଼୍‌ ଲେକାମ୍‌ ମିସର୍‌ତେ ପର ଆଶେ ମାଡ଼ମିନ୍ଦେନି; ମାତର୍‌ ବେନ ଆଦିନ୍‌ ପର ରୟ୍‌କେ, ଆଦ୍‌ ଅନ୍‌ କାଇଦାଗ୍‌ ନେଙ୍ଗି କାର୍‌ୱି ଆଦ୍‌ତେ; ବେନଡ଼୍‌ ମିସ୍ରୀୟ ରାଜା ପାରୋନ୍‌ ପର ଆଶେ ୱାଟ୍‌ଟଡ଼୍‌, ଅଡ଼୍‌ ପର ଅଣ୍ଡ୍‌ ତ ଇଦ୍‌ ଲେକାମ୍‌। 7 ମାତର୍ ଯଦି ମିଡ଼୍‌ ନାକିଙ୍କ୍‌ କେତିତିଡ଼୍‌, "ମାମେ ସଦାପ୍ରବୁ ମି ପରମେଶ୍ୱର୍‌ତେ ପରୁ ଆଶେ ନେଃତମ୍‌; ଆଲେକ୍‌ ହିଜକୀୟ ବେନନ୍‌ ଡେଙ୍ଗ୍‌ ପଡ଼ିୟେ ନୁ ବେନନ୍‌ ଅମ୍‌ବେଦିସାରେ ଦୂର୍‌ ମାଡ଼ିତ୍‌ତଣ୍ଡ୍‌, ମେଣ୍ଡେ ଯିହୁଦାଙ୍କ୍‌ ନୁ ଯିରୂଶାଲେମ୍‌ତିଙ୍କ୍‌ କେତ୍‌ତଣ୍ଡ୍‌, ମିଡ଼୍‌ ଇଦ୍‌ ଅମ୍‌ବେଦି ମୁନେ ମଡ଼୍‌କିତିଡ଼୍‌, ଅଣ୍ଡ୍‌ ବାତେ ଅଣ୍ଡ୍‌ ଆୟଣ୍ଡ୍‌ ?" 8 ଆଦିଙ୍କ୍‌ ନାନେ ବିନୟ୍‌ ମାଡ଼ୁତାନ୍‌, ନା ପ୍ରବୁ ଅଶୂର୍‌ତେ ରାଜାନ୍‌ ସାଙ୍ଗେ ରାଜିମାଡ଼ା, ନାନେ ମିକିଙ୍କ୍‌ ରେଣ୍ଡ୍‌ ହଜାର୍‌ ଗୁରାକ୍‌ ଇଦ୍‌ତାନ୍‌, ଯଦି ମିଡ଼୍‌ ପାର୍‌ତିଡ଼୍‌, ଆଲେକେ ଆୱିନ୍‌ ପରୁ ତାରାନଙ୍କ୍‌ ମି ପାକେଙ୍କ୍‌ ନାରୁଡ଼୍‌କ୍‌ ତାଡ଼ାଟ୍‌। 9 ଆଲେକ୍‌ ବେଲାନ୍‌ ମିଡ଼୍‌ ନା' ପ୍ରବୁନ୍‌ ଦାସନଡ଼୍‌ ପାକେଙ୍କ୍‌ ୱେରଡ଼୍‌ ସୁଦୁରାଦ୍‌ ସେନାପତିଙ୍କ୍‌ ସାମ୍‌ନା ମାଡ଼େ ପାର୍‌ତିଡ଼୍‌, ମେଣ୍ଡେ ରତ ନୁ ଗୁରାକ୍‌ ଚାଲାମାଡ଼ାନ୍‌ ସେଙ୍ଗେ ମିସର୍‌ତେ ପରୁ ବିଶ୍ୱାସ୍‌ ମାଡ଼ିତିଡ଼୍‌ ? 10 ନାନେ ବାତେ ସଦାପ୍ରବୁଙ୍କ୍‌ ୱିଡ଼୍‌ସି ଇଦ୍‌ପଡ଼ିୟେ ଦଂସ ମାଡ଼ାନଙ୍କ୍‌ ୱାସ୍‌ମିନ୍ଦେଣ୍ଡ୍‌ ? ସଦାପ୍ରବୁ ନାକିଙ୍କ୍‌ କେତ୍‌ତଣ୍ଡ୍‌, ଇଦେଶ୍‌ ବିରୁଦ୍ଧ୍‌ତେ ଆଞ୍ଜ୍‌ ଆଦ୍‌ ଦଂସ ମାଡ଼ା। 11 ଆସୁଙ୍କ୍‌ ଇଲିୟାକିମ୍‌ ନୁ ଶିବ୍‌ନ ନୁ ଯୋୟାହ ରବ୍‌ଶାକିଙ୍କ୍‌ କେତ୍‌ତଣ୍ଡ୍‌, "ବିନୟ୍‌ ମାଡ଼ୁତମ୍‌, ନିମେ ଅରାମିୟ ଗଟ୍‌ତେ ନି ଦାସନଡ଼୍‌କ୍‌ କେଲ୍‌ମୁଟ୍‌; ବାତେଇତ୍କେ ମାମେ ଆଦ୍‌ ବୁଜେମ୍‌ ଆଦୁତମ୍‌; ମେଣ୍ଡେ, ନେଟେତ୍‌ ମେଣ୍ଡନ୍‌ପାକେତ୍ ନାରୁଡ଼୍‌କିଙ୍କ୍‌ କେୱୁଗାରେ ମାକିଙ୍କ୍‌ ଯିହୁଦିୟ ଗଟ୍‌ତେ କେଲ୍‌ମାଟ୍‌।" 12 ମାତର୍‌ ରବ୍‌ଶାକି ଅଡ଼୍‌କିଙ୍କ୍‌ କେତ୍‌ତେ, ନା ପ୍ରବୁ କି ମୀଇ ପ୍ରବୁଙ୍କ୍‌ ନୁ ମିକିଙ୍କ୍‌ ଇୱୁସାରେ ଗଟି କେତାନଙ୍କ୍‌ ନାକିଙ୍କ୍‌ ରଇସ୍‌ମିନ୍ଦେଣ୍ଡ୍‌ ? ଇ ବେନ୍‌ ନାରୁଡ଼୍‌ ମିତଡ଼୍‌ ନିଜେ କିସ୍‌କିସା କାଦି ତିନ୍ଦାନଙ୍କ୍‌ ନୁ ଉଡ଼ୁକ୍‌ତେ ଏର୍‌ ଉନ୍ଦାନଙ୍କ୍‌ ନେଟେତ୍‌ପରୁ କୁଦିମିନ୍ଦେଡ଼୍‌, ଅଡ଼୍‌ପାକେ ବାତେ ନାକିଙ୍କ୍‌ ରୱଣ୍ଡ୍‌ ? 13 ଆସୁଙ୍କ୍‌ ରବ୍‌ଶାକି ତେଦିମିକା ଗାଟି ଲେଙ୍ଗ୍‌ଦେ ଯିହୁଦିୟ ଗଟ୍‌ତେ କେତ୍‌ତେ, ମିଡ଼୍‌ ମହାରାଜାନ୍‌ ଅଶୂରତେ ରାଜାନ୍‌ ଗଟି କେଞ୍ଜାଟ୍‌ ? 14 ରାଜା ଇଦ୍‌ଗଟ୍‌ କେତ୍‌ତଣ୍ଡ୍‌, ମିକିଙ୍କ୍‌ ଉଡ଼୍‌ସ୍ପାନଙ୍କ୍‌ ହିଜକୀୟଙ୍କ୍‌ ଇମାଟ୍; ବାତେଙ୍କ୍‌ଇତ୍କେ ଅଣ୍ଡ୍‌ ମିକିଙ୍କ୍‌ ଉଦ୍ଦାର୍‌ ମାଡ଼େ ପାର୍‌ୱଣ୍ଡ୍‌; 15 କି "ସଦାପ୍ରବୁ ନିଜାମ୍‌ ମାନାଙ୍କ୍‌ ଉଦ୍ଦାର୍‌ ମାଡ଼ିତେ ନୁ ଇଦ୍‌ ନଗର୍‌ତେ ଅଶୂରିୟ ରାଜାନ୍‌ କାଇତଡ଼୍‌ ଆୟଡ଼୍‌," ଇଦ୍‌ଗଟ୍‌ କେସ୍‌ ହିଜକୀୟ ମିକିଙ୍କ୍‌ ସଦାପ୍ରବୁନାଗେ ବିଶ୍ୱାସ୍‌ ମାଡ଼୍‌ମାଟ୍‌। 16 ହିଜକୀୟତେ ଗଟ୍‌ କେଞ୍ଜ୍‌ମାଟ୍‌; ବାତେଙ୍କ୍‌ଇତ୍କେ ଅଶୂରିୟ ରାଜା ଇଦ୍‌ ଗଟ୍‌ କେତିତଡ଼୍‌, ମିଡ଼୍‌ ନାତଡ଼୍‌ ଚାନ୍ଦ୍‌ ମାଡ଼ାଟ୍‌ ନୁ ନା'ପାକେ ପେଇସ୍‌ ୱାଡ଼ାଟ୍‌ ନୁ ସାରେତଡ଼୍‌ ନିଜେ ନିଜେ ଅଙ୍ଗୁର୍‌କାୟା ନୁ ସାରେତଡ଼୍‌ ନିଜେନିଜେ ତୟ୍‌ ମାଡ଼େତ୍‌ କାୟା ତିନୁଟ୍‌, ମେଣ୍ଡେ ସାରେତଡ଼୍‌ ନିଜେ ନିଜେ ନୂୟିଦେ ଏର୍‌ ଉନୁଟ୍‌; 17 ପେର୍କେ ନାନେ ୱାସ୍‌ ମିୟାଦ୍‌ ସାରେ ଦେଶ୍‌କିନ୍‌ ଲେକାମ୍‌ ୱେରଡ଼୍‌ ଦେଶ୍‌ତିଙ୍କ୍‌, ଇତ୍କେ, ଶସ୍ୟ ନୁ ଅଙ୍ଗୁର୍‌ ସମୟ୍‌ତେ ଦେଶ, ମେଣ୍ଡେ ରୁଟି ନୁ ଅଙ୍ଗୁର୍‌ୱାୟେ ଲେକାତ୍ ଦେଶ୍‌ତିଙ୍କ୍‌ ମିକିଙ୍କ୍‌ ଅଦ୍‌ତାନ୍‌। 18 ସଦାପ୍ରବୁ ପରମେଶ୍ୱର୍‌ ମାକିଙ୍କ୍‌ ଉଦ୍ଦାର୍‌ ମାଡ଼ିତଣ୍ଡ୍‌ ଇଞ୍ଜ ବେନ ହିଜକୀୟ ବେଲାନ୍‌ ମିକିଙ୍କ୍‌ ମନା ମାଡ଼ଣ୍ଡ୍‌, ଆଦିନ୍‌ ସେଙ୍ଗେ ସାବ୍‌ଦାନ୍‌ ଆୟିମୁଟ୍‌। ୱେରେ ନାକିନ୍‌ ଦାୟାକିନାଗାଙ୍କ୍‌ ବେନେଆୟି ଦେୟାକ୍‌ ବାତେ ଅଶୂରିୟ ରାଜାନ୍‌ କାଇଦାଗାଙ୍କ୍‌ ନିଜେତ୍‌ ଦେଶ୍‌ ଉଦ୍ଦାର୍‌ ମାଡ଼ିମିନ୍ଦେଣ୍ଡ୍‌ ? 19 ହମାତ୍‌ର୍‌ ନୁ ଅର୍ପଦର୍‌ ମୁର୍ତ୍ତିକି ବେକେ ? ସଫର୍ବୟିମର୍‌ ଦେୟାକ୍‌ ବେକେ ? ନୁ ଅଡ଼୍‌ ବାତେ ନା' କାଇଦାଗାଙ୍କ୍‌ ଶମରୀୟାତିଙ୍କ୍‌ ଉଦ୍ଦାର୍‌ ମାଡ଼ିତଣ୍ଡ୍‌ ? 20 ଇୱୁସାରେ ଦେଶ୍‌କିନ୍‌ ଦେୟାକିନ୍‌ ତାଗାଙ୍କ୍‌ ବେନ୍‌ ମୁର୍ତ୍ତି ନା କାଇଦାଗାଙ୍କ୍‌ ନିଜେତ୍‌ ଦେଶ୍‌ ଉଦ୍ଦାର୍‌ ମାଡ଼୍‌ତଣ୍ଡ୍‌ ଯେ, ସଦାପ୍ରବୁ ପରମେଶ୍ୱର୍‌ ନା' କାଇଦାଗାଙ୍କ୍‌ ଯିରୂଶାଲେମ୍‌ତିଙ୍କ୍‌ ଉଦ୍ଦାର୍‌ ମାଡ଼ିତଣ୍ଡ୍‌ ? 21 ମାତର୍‌ ନାରୁଡ଼୍‌ କଟଆସ୍‌ ମାତ୍‌ତଡ଼୍‌, ଅଙ୍କ୍‌ ପଦେଣ୍ଡ୍‌ମିକା ଉତ୍ତର୍‌ ମାଡ଼ଡ଼୍‌; ବାତେଙ୍କ୍‌ଇତ୍କେ ଅଙ୍କ୍‌ ଉତ୍ତର୍‌ ଇମାଟ୍‌ ଇଞ୍ଜ ରାଜାନ୍‌ ଆଦେଶ୍‌ ମାତ୍‌ତେ। 22 ଆସୁଙ୍କ୍‌ ହିଲ୍‌କୀୟତେ ମାର୍‌ ଇଲିୟାକିମ୍‌ ପେଦେର୍‌ତେ ରାଜାନ୍‌ ଲନ୍‌କେପାନଣ୍ଡ୍‌ ନୁ ଶିବ୍‌ନ ଲେକକ୍‌ ନୁ ଆସଫର୍‌ ମାର୍‌ ଯୋୟାହ ପେଦେର୍‌ତେ ଇତିହାସ୍‌ ଲେକକ୍‌ ନିଜେ ନିଜେତ୍‌ ଚକା ସିଲେ ଇକି ହିଜକୀୟନ୍‌ ପାକେ ୱାସ୍‌ ରବ୍‌ଶାକିତେ ଗଟିସାରେ ଅଙ୍କ୍‌ କେଞ୍ଜ୍‌ସ୍ପତଣ୍ଡ୍‌।