1 ହୋ କୂଶଦେଶ୍‌ତେ ବେଡ଼େକ୍‌ ଆ ପାକେତ୍‌ ପାର୍ତାନ୍‌ ରେକାନ୍‌ ଲେଙ୍ଗ୍‌ ଆଦାନାୱୁ ଦେଶ୍‌କ୍‌; 2 ଅଣ୍ଡ୍‌ ସମୁଦ୍ର ଆର୍‌ଦେ ତୁମ୍‌ ଲେକାତ୍ ଓଡେତେ ଏର୍‌ଦେ ପର ଦୂତ୍‌କିଙ୍କ୍‌ ରସ୍‌ମିକା କେତିତ୍‌, ହୋ ଉର୍‌ଗିଙ୍କ୍‌ ଆଦାନ୍‌ ଦୂତ୍‌କି, ବେନ୍‌ ନଗର୍‌ତେ ନାରୁଡ଼୍‌ ନାର୍ଗେଲାକାମ୍‌ ନୁ ନିୟିମ୍, ବେନ୍ ନାରୁଡ଼୍‌ମାନ୍ଦେ ବୟଙ୍କାର୍‌; ବେନ୍‌ ନଗର୍‌ତେ ନାରୁଡ଼୍‌ ନାର୍ଗେ ମାଡ଼ିତଣ୍ଡ୍‌ ନୁ ଆୱୁକିତଣ୍ଡ୍‌, ବେନଡ଼୍‌ ଦେଶ୍ ବେଡ଼େମ୍‌କିଙ୍କ୍‌ ରେଣ୍ଡ୍‌ ୱିର୍‌ସ୍ପି, ମିଡ଼୍‌ ଅଡ଼୍‌ ଗାରେ ଆନୁଟ୍‌ !

3 ହୋ ଜଗତ୍‌ତେ ନାରୁଡ଼ି; ଇଦ୍‌ ପୃତିବିତେ ମାନ୍ଦାନ୍‌ ସାରେତଡ଼ି, ମେଟାକିନ୍‌ ପର ପତ୍‌କା ତେଏତାନ୍‌ ୱେଲେ ମିଡ଼୍‌ କଣ୍ଡେ ଉଡ଼ାଟ୍‌ ନୁ ତୂରି ଉଦାନ୍‌ ୱେଲେ ମିଡ଼୍‌ କେଞ୍ଜାଟ୍‌। 4 ବାତେଙ୍କ୍‌ଇତ୍କେ ସଦାପ୍ରବୁ ମାକିଙ୍କ୍‌ ଇଦ୍‌ ଲେକାମ୍‌ କେସମିନ୍ଦେଣ୍ଡ୍‌, "ଏଦ୍‌ ସମୟତେ ସୁଦୁର୍‌ କାମ୍‌କେ ଲେକାମ୍‌, ଶସ୍ୟକଇଦାନ୍‌ କାଲାମ୍‌ତେ କାମ୍‌କେ ସମୟ୍‌ତେ ଇମ୍‌ଲେକାତ୍‌ ମାବ୍‌ ଲେକାମ୍‌ ମାନାଡ଼୍‌ ଆୟିଦ୍‌ତାଡ଼୍‌ ନୁ ନିଜେତ୍‌ ମାନ୍ଦାନ୍‌ ପଡ଼ିୟେତାଗାଙ୍କ୍‌ ମାଞ୍ଜ୍‌ ମେଃହ୍‌କିକାଡ଼୍‌।"

5 ବେଲାନ୍‌କି ଅଙ୍ଗୁର୍ ଗୁଡ଼୍‌ପାନ୍‌ ମୁନେ ମଗେ ଆତ୍‌ତେ ପେର୍କେ ନୁ ପୁଙ୍ଗାର୍‌ ଅଙ୍ଗୁର୍‌ କାୟା ଆଦି ପାଣ୍ଡାନ୍‌ ସମୟ୍‌ତେ ଅଣ୍ଡ୍‌ କେସେର୍‌ ଅସ୍‌ ଆଗେତ୍‌ କାୟା କୟିଦ୍‌ତଣ୍ଡ୍‌ ନୁ ଆଗେତ୍‌ ହେକାମ୍‌ ଆତ୍‌ତେ କମାଙ୍କ୍‌ ନାଡ଼୍‌କିତଣ୍ଡ୍‌। 6 ମେଟାକିନ୍‌ ଜେକେମାନ୍ଦାନ୍‌ ପିଟେକି ନୁ ପୃତିବିତେ ଜିୱାକିଙ୍କ୍‌ ମାଇଦିଙ୍କ୍‌ ଆୱୁସାରେ ୱିଡ଼୍‌ସାଙ୍କ୍‌ ଆଦ୍‌ତେ; ଜେକେତ୍‌ ପିଟେକି ଆୱିନ୍‌ ପର ଏଦ୍‌କାଲାମ୍‌ ମାନ୍‌ତା ନୁ ପୃତିବିତେ ଜିୱାକ୍‌ସାରେ ଆୱିନ୍‌ ପର ସାଲ୍‌କାଲାମ୍‌ ମାନ୍ତ୍‌ତା।

7 ଆଦ୍‌ ସମୟତେ ଡେଙ୍ଗ୍‌ ନାରୁଣ୍ଡ୍‌ ନୁ ସୁନ୍ଦର୍‌ ନୁ ଆନିଦାଦିଡ୍‌ତେ ବୟଙ୍କାର୍‌ ଅଣ୍ଡୟ ନଗର୍‌ତେ ନାରୁଡ଼୍‌; ବେନଡ଼୍‌ ପାସ୍‌କିତଡ଼୍‌ ନୁ ଡେକେତ୍‌ ମଦଲ୍‌ ୱିକିତଡ଼୍‌, ବେନଡ଼୍‌ ଦେଶ ନଦିକିଙ୍କ୍‌ ୱେର୍‌, ଇଦ୍‌ ଲେକାମ୍‌ ନାରୁନ୍‌ ସାରେତିଙ୍କ୍‌ ବେଡ଼ିୟେ ସଦାପ୍ରବୁନ୍‌ ପେଦେର୍‌ତେ ପୁରୁସ୍କାର୍‌ ପଡ଼ିୟେ ସିୟୋନ ମେଟେତିଙ୍କ୍‌ ତାତିତଡ଼୍‌।