1 ସଦାପ୍ରବୁ କେତୁତଣ୍ଡ୍‌, ବେନ ଶତ୍ରୁତେ ପିଲାକି ଆଦ୍‌ତଡ଼୍‌ ଅଡ଼୍‌ ଅବିଶାପ୍‌ ପାଏମ୍‌ ଆୟିଡ଼୍‌, ମେଣ୍ଡେ, ବେନଡ୍‌ ପାପ୍‌ତେପର ପାପ୍‌ ମାଡାନ୍‌ ମାଇଦିଙ୍କ୍‌ ମୁସାନାଦିନାଗ୍‌ ମୁସିତଡ଼୍‌, ମାତର୍‌ ମା ଆତ୍ମାନ୍‌ତଡ଼୍‌ ଆୟ, ଅଡ୍‌ କାରାପ୍‌ ନାରୁଡ଼୍‌ ! 2 ଅଡ୍ ନାକିଙ୍କ୍‌ ପାଚ୍ରାମାଡକଟ ଫାରୋନ୍‌ ଶକ୍ତିତେ ମିକିଙ୍କ୍‌ ଶକ୍ତିତଣ୍ଡ୍ ମାଡାନଙ୍କ୍‌ ନୁ ମିସର୍‌ତେ ନିଡ଼୍‌କେତେ ରମାନ୍‌ ମାଇଦିଙ୍କ୍‌ ମିସର୍‌ତା ଆଦୁତଡ୍‌। 3 ଆଦିଙ୍କ୍‌ ଫାରୋନ୍‌ ଶକ୍ତିତେ ମିଡ୍‌ ସିଗ୍‌ ଲେକାମ୍‌ ଆଦ୍‌ତିଡ୍‌ ନୁ ମିସର ନିଡ଼୍‌କେତେ ରମାନ୍ ମାଇଦିଙ୍ଗ୍ ମିକିଙ୍କ୍‌ ଅପମାନ୍ ଆଦ୍‌ତା। 4 ବାତେଙ୍କ୍‌ଇତ୍କେ ତାନାୱ ଅଦିପତିଡ୍‌ ସୋୟନ୍‌ତାଗ୍‌ ମିନ୍ଦେଡ୍‌ ନୁ ତାନାୱ ରାଜ୍‌ଦୂତ୍‌ ହାନେଷତାଗ୍‌ ୱାସ୍‌ମିନ୍ଦେଡ୍‌। 5 ବେନ୍ ଗୋଷ୍ଠୀ ଅଡ଼କିଙ୍କ୍‌ ଲେକେତ୍‌ମାଡି ପାର୍‌ୱଡ୍‌ ଅଡ୍‌ ବିଷୟତେ ସାର୍‌ତଡ୍‌ ସିଗ୍‌ ଆଦ୍‌ତଡ୍‌ ଆ ଗୋଷ୍ଠୀ ସାହାଯ୍ୟ ମାଡାନାଦ୍‌ ନୁ ଉପକାର୍ ଆୟଡ଼୍‌, ମାତର୍‌ ସିଗ୍‌ ନୁ ଅପ୍‌ମାନ୍‌ ଲେକାମ୍‌ ଆଦ୍‌ତଣ୍ଡ୍‌। 6 ଦକ୍ଷିଣଦେଶ୍‌ତେ ପଶୁକି ବିଷୟତେ ବବିଷ୍ୟତ୍‌ ବାଣୀ। ବେନ୍ ଜାଗା କଞ୍ଜ୍‌ ଲେୟେ ନୁ ମୁୟ୍‌ତେ ସିଂହ, ତାଡ଼ାମ୍‌ ନୁ ଉଡ୍‌ଡ଼ିୟ୍‌ମାନ କିସ୍‌ତେ ୱିସାମ୍‌ ତାଡାମ୍ ୱାଦ୍‌ତଡ୍‌, ଇଦ୍‌ଲେକାମ୍ ବିପଦ୍‌ ନୁ ଯନ୍ତ୍ରନାତେ ଦେଶ୍‌ ଇସ୍‌ ବେନଡ଼୍‌ତଡ଼୍‌ ଅଡ୍‌କିଙ୍କ୍ ଉପକାର୍ ଆୟ, ଇଦ୍‌ଲେକାମ୍ ଅଣ୍ଡୟ ଗୋଷ୍ଠୀ ଗାରେ, ଅଡ୍‌କିଙ୍କ୍ ଲେୟଡ୍‌ ଗଦକିନ୍‌ ଆଟେତାଗ୍‌ ନିଜେତାଦ୍‌ ଦନ୍‌ ନୁ ଉଟ୍‌କିନ୍‌ କୁବ୍‌ଜା ପର ମିୟାଦ୍‌ ସମ୍ପତ୍ତି କାଞ୍ଜି ଅଦ୍‌ତଡ଼। 7 ବାତେଙ୍କ୍‌ଇତ୍କେ ମିସର ବୁସାତେ ନୁ ବୁସାତେ ସାହାଯ୍ୟ ମାଡିତଡ୍; ଆଦିଙ୍କ୍‌ ମାନାଡ୍‌ ଅଂକିଙ୍କ୍‌ ବାତ୍‌ତେ ମାଡ଼କଟ୍‌ କୁଦି ମାନ୍ଦାନ୍‌ ରାହବ ଇଞ୍ଜ ପେଦେର୍‌ ଇସ୍‌ମିନ୍ଦେମ୍‌।

8 ଇଞ୍ଜେ ଆନ୍‌, ଅଡ୍‌ ମୁନେ ଅଣ୍ଡୟ ବାଲ୍‌ତାଗ୍‌ ଆଦ୍‌ ଲେକା ନୁ ଆଦ୍‌ ବେଲାନ୍‌ ୱାଦାନ୍‌ କାଲାମ୍‌ତେ, ସାରେ ଦିନାମ୍ ଯାକ ମାନ୍ତେ, ଇଦିନ୍‌ମାଇଦିଙ୍କ୍‌ ଅଣ୍ଡୟ ଉଡି ମାନ୍ଦାନ୍‌ ବହିତାଗ୍‌ ଆଦ୍‌ ଲେକାଟ୍‌। 9 ବାତେଙ୍କ୍‌ଇତ୍କେ ଅଡ୍‌ ବିରଦ୍‌ ମାଡ଼ାନ୍‌ ପିଲୁଡ୍‌, ବଲାନଣ୍ଡ୍‌ ମାର୍‌, ଅଡ୍‌ ସଦାପ୍ରବୁନ୍‌ ନିୟମ୍‌ କେଞ୍ଜାନଙ୍କ୍ ମାନ୍‌ଇଲ୍‌ୱେ ମାର୍‌; 10 ଅଡ ଦର୍ଶନ୍‌ ଉଡାନଡ୍‌କିଙ୍କ୍‌ କେତ୍‌ତଣ୍ଡ୍‌, ମିଡ୍‌ ଉଡ଼୍‌ମାଟ୍‌ ନୁ ବବିଷ୍ୟଦ୍‌ବକ୍ତାନଡ଼୍‌କ କେତିତଡ଼୍‌, "ମିଡ୍‌ ମାୟାଗ୍‌ ଗାରେ ନିଜାମ୍‌ ବାକ୍ୟ ପ୍ରଚାର୍‌ ମାଡ୍‌ମାଟ୍‌, ମାକିଙ୍କ୍‌ ଲେକେତ୍‌ତାଦ୍ ଗଟ୍‌ କେଲ୍‌ମ୍‌ ନୁ ବୁସାତାଦ୍‌ ବାକ୍ୟ ପ୍ରଚାର୍‌ ମାଡା; 11 ମିଡ୍‌ ଆର୍‌କଞ୍ଜ୍‌ ପେଇସ୍‌ ଆନୁଟ୍‌, ଆର୍‌ ୱିଡ୍‌ସିମୁଟ୍‌, ଇସ୍ରାଏଲ୍‌ତେ ପବିତ୍ର ଇଶ୍ୱର୍‌ତିଙ୍କ୍‌ ମା ମୁନେ ଦୂରାମ୍‌ ମାଡିମ୍" 12 ଆଦିଙ୍କ୍‌ ଇସ୍ରାଏଲ୍‌ ପବିତ୍ର ଇଶ୍ୱର୍‌ ଇଦ୍‌ ଗଟି କେତ୍‌ତଣ୍ଡ୍‌, "ମିଡ୍‌ ଇଦ୍‌ ବାକ୍ୟ ପିନ୍ଦଇଞ୍ଜ କେତୁତିଡ୍‌, ମେଣ୍ଡେ, ଉପଦ୍ରବ ନୁ କାରାପ୍‌ ବିଶ୍ୱାସ୍‌ ମାଡି ଅଣ୍ଡ୍‌ ପର ଆଶେ ମାଡୁତିଡ୍‌; 13 ଇଦିଙ୍କ୍‌ ଡେଙ୍ଗ୍‌ ପଡ଼ିୟେତାଗ୍‌ ଉର୍ଙ୍ଗିତ୍‌ ବେନ୍‌ ଦୁଡ଼ା ଦୁଡ଼ା ଆସ୍‌ମାନ୍ତା, ହଟାତ୍‌ ଅଣ୍ଡୟ୍‌ଦାମ୍‌ ଉର୍ଙ୍ଗି ରାଲିତେ, ଆଦିନ୍‌ ଲେକାମ୍ ଇଦ୍‌ ଅପରାଦ୍‌ ମିଇ ପର ଆଦ୍‌ତେ।" 14 ମେଣ୍ଡେ, ବେଲାନ୍‌ ମାଣ୍ଡୁଲ୍‌ କୁଣ୍ଡେ ଅତାନଙ୍କ୍‌ ଆଦ୍‌ଲେକାମ୍‌ ଅଣ୍ଡ୍‌ ବାତ୍‌ତେ ଦୟା ମାଡ଼କଟ୍‌ ଆଦ୍‌ ଗୁଣ୍ଡାଲ୍‌ ମାଡ଼ି ଉଃତିତଡ଼୍‌; ଆସୁଙ୍କ୍‌ ଅଇଜାଲ୍‌ ତାଗାଙ୍କ୍‌ କିସ୍‌ କି ଗୁଇନ୍ଦେତାଗାଙ୍କ୍‌ ଏର୍‌ ଅଦାନ୍‌ ଲେକାମ୍‌ ଇସୁର୍‌ ଜିକର୍‌ ବା ଆଗାଙ୍କ୍‌ ଦର୍କ।

15 ବାତେଙ୍କ୍‌ଇତ୍କେ ପ୍ରବୁ, ସଦାପ୍ରବୁ ଇସ୍ରାଏଲ୍‌ତେ ଦର୍ମଲେକାମ୍‌ କେତ୍‌ତଣ୍ଡ୍, "ମାନ୍‌ ମାଲ୍‌କେ ନୁ ଶାନ୍ତି ଆତ୍‌କେ ମିଡ୍ ପରିତ୍ରାଣ ପାଏମ୍‌ ଆଦ୍‌ତିଡ୍‌; ମାନ୍‌ତାଗାଙ୍କ୍‌ ମାଲ୍‌ଦାନାଦ୍‌ ନୁ ବିଶ୍ୱାସ୍‌ତେ ମିୟାଦ୍‌ ଶକ୍ତି ଆଦ୍‌ତେ, ମେଣ୍ଡେ, ମିଡ୍‌ ରାଜି ଆୟିୱିଡ଼୍‌।

16 ମାତର୍‌ ମିଡ୍‌ କେତ୍‌ତିଡ୍‌ ଇଲେ, ମାମେ ଗୁରାକିନାଗ୍‌ ମିରିତମ୍; ଆଦିନ୍‌ ମିଡ୍‌ ମିରାନଡ଼ି ଆଦ୍‌ତିଡ୍‌; ମେଣ୍ଡେ କେଲିଡ଼୍‌, ମାନାଡ଼୍‌ ଉର୍‌ଗିଙ୍କ୍‌ ମିରି ବାହନ୍‌ତାଗ୍‌ ତାରିକାଡ଼୍‌; ଆଦିନ୍‌ ମାଇଦିଙ୍କ୍‌ ମି ପେର୍କେ ତଲାନ୍‌ ନାରୁଡ଼୍‌କିଙ୍କ୍‌ ଉର୍‌ଗିଙ୍କ୍‌ ମିରାନଡ଼୍‌ ଆଦିକାଡ଼୍‌। 17 ୱେରଣ୍ଡ୍‌ ଦମକ୍‌ତେ ହଜାର୍‌ ନାରୁଡ଼୍‌ ମିରିତଡ୍‌; ଏଇୱୁଡ଼୍‌ ଦମକ୍‌ତେ ମିଡ୍‌ ମିରିତିଡ଼୍‌; ଆସୁଙ୍କ୍‌ ମିଡ଼୍‌ ମେଟେତ୍‌ତେ ଜୁଟିନାଗ୍‌ ୱେରଡ଼୍‌ ଚିନ୍ନେ ଲେକାମ୍‌ ନୁ ବାଡିୟେ ମେଟାନାଗ୍‌ ପତ୍‌କାତେ ଲେକାମ୍‌ ଆସ୍‌ ସାରେଦିନାମ୍‌ ମାନ୍ଦ୍‌ତିଡ୍‌।" 18 ମେଣ୍ଡେ, ଇଦ୍‌ଲେକାମ୍‌ ସଦାପ୍ରବୁ ମି ପର ଅନୁଗ୍ରହ ମାଡାନ୍‌ ମାଇଦିଙ୍କ୍‌ କେପି ମାନ୍‌ତଣ୍ଡ୍, ମେଣ୍ଡେ ଇଦ୍‌ ଲେକାମ୍‌ ମି ପର ଦୟା ମାଡାନ୍‌ ମାଇଦିଙ୍କ୍‌ ଅଣ୍ଡ୍‌ ମଦଲ୍‌ ଆଦ୍‌ତଣ୍ଡ୍‌; ବାତେଙ୍କ୍‌ଇତ୍କେ ସଦାପ୍ରବୁ ନ୍ୟାୟ ବିଚାର୍‌କାତେ ପରମେଶ୍ୱର୍‌ ଆଦ୍‌ତଣ୍ଡ୍‌; ବେନଡ଼୍‌ ଅନ୍‌ ମାଇଦିଙ୍କ୍‌ କେପିତଡ଼୍‌, ଅଡ଼୍‌ ସାରେତଡ୍‌ ଦନ୍ୟ।

19 ହୋ ଯିରୂଶାଲାମ୍‌ତେ ନାରୁଡ଼ି ସିୟୋନ୍‌ତାଗ୍‌ ବାସେ ମାଡ଼ାନଡ଼ି; ମିଡ୍‌ ମେଣ୍ଡେ କେୟ୍‌ୱିଡ୍‌; ମିୟାଦ୍‌ କେୟାନାଦ୍‌ ଲେଙ୍ଗ୍‌ଦେ ଅଣ୍ଡ୍‌ ନିଜାମ୍ ମିକିଙ୍କ୍‍ ଅନୁଗ୍ରହ ମାଡିତଣ୍ଡ୍‌; ଅଣ୍ଡ୍‌ କେଞ୍ଜାନ୍‌ ସାଙ୍ଗେ ସାଙ୍ଗେ ମିକିଙ୍କ୍‌ ଉତ୍ତର୍‌ ଇଦ୍‌ତଣ୍ଡ୍‌। 20 ମେଣ୍ଡେ, ଆଗେକ୍‌ବା ପ୍ରବୁ ମିକିଙ୍କ୍‌ ଦୁଃକାମ୍‌ତେ କାଦି ନୁ ତିପାଲ୍‌ତେ ଏର୍‌ ଇଦ୍‌ତଣ୍ଡ୍‌, ଆଗେକ୍‌ବା ମି ମେସ୍ତେରିଡ଼୍‌ ମେଣ୍ଡେ ମିଞ୍ଜିମାନଡ଼୍‌, ମାତର୍‌ ମିୟାୱୁ କଣ୍ଡା ମି ମେସ୍ତେରିଡ଼୍‌ ଉଡ଼ିତିଡ଼୍‌। 21 ମେଣ୍ଡେ, ତିନ୍ଦେକାଇ ପାକ୍ ବା ଡେବ୍‌ ପାକେ ମାଲ୍‌ସ୍‌ୱାଦାନ୍‌ ୱେଲେ ନିୟାଦ୍ କେୱୁ ମି ପେର୍‌କେଙ୍କ୍‌ ଇଦ୍‌ ଗଟ୍‌ କେଞ୍ଜିତିଡ୍‌, "ଆର୍‌ ଇଦ୍‌, ଇଦିନାଗ୍‌ ମିଡ୍‌ ତାକିତିଡ଼୍‌।"

22 ମେଣ୍ଡେ, ମିଡ୍‌ ମିୟାୱୁ ରୂପାତାୱୁ ମୁର୍ତ୍ତିତିଙ୍କ୍‌ ଉସ୍‌ତାୱୁ ନୁ ଚଞ୍ଚ୍‌ତାଗ୍‌ ତଃସ୍‌ତେ ସୁନାତାୱୁ ମୁର୍ତ୍ତିକି ମାନ୍ଦାନାୱୁ କାରାପ୍‌ ମାଡିତିଡ଼୍‌; ମିଡ୍‌ ଆୱୁ ସାରେତାୱିଙ୍କ୍‌ ଅଶୁଚି ସାମାନ୍‌ ଲେକାମ୍‌ ୱାଟିତିଡ଼୍‌; ମିଡ୍‌ କେତିତିଡ୍‌, "ଇଗାକଞ୍ଚ୍‌ ପେଇସ୍‌ ଆନ୍‌।" 23 ମେଣ୍ଡେ, ବୁମ୍‌ତାଗ୍ ୱିତାନ୍ ସେଙ୍ଗେ ଅଣ୍ଡ୍ ମି ୱିଜେ ମାଇଦିଙ୍କ୍‌ ୱାନେ ଇଦ୍‌ତଣ୍ଡ୍‌; ବୁମ୍‌ଦାଗ୍‌ ମଡ଼୍‌ତାନ୍‌ ପେଡେକ୍‌ ଇଦ୍‌ତଣ୍ଡ୍‌ ନୁ ଆଦ୍‌ ଲେକେତ୍‌ ନୁ ନାର୍ଗେ ଆଦ୍‌ତା; ଆଦ୍‌ ଦିନାତେ ମିୟାଦ୍‌ ପଶୁମାନ୍ଦେ ଗାଲ୍‌ ପଡ଼ିୟେତାଗ୍‌ ମେଇତା। 24 ମେଣ୍ଡେ ୱାୟା ଉଡ୍‌ଦାନ୍‌ କନ୍ଦା, ଲେୟ୍‌ ଗଦକି ଚାଲ୍‌ନି ତାଗ୍‌ ହେଞ୍ଚିମାନ୍ଦାନ୍‌ ଜିନିଷ୍‌ ନୁ ଏତିତାଗ୍ ଜଡା ସାରେ କାଇଲ୍‌ତାୱୁ କାଦି ତିନ୍‌ତା।

25 ମେଣ୍ଡେ, ବେନ ବେଡ଼ିୟେ ଦଂସ ଦିନାମ୍‌ତେ ଗୁଇନ୍ଦେସାରେ ମିସି ଆଦ୍‌ତା, ଆଦ୍‌ ଦିନାମ୍‌ତେ ସାରେ ଡେଙ୍ଗ୍‌ ମେଟାକିନାଗ୍‌, ସାରେ ଡେଙ୍ଗ୍‌ ଗିରିକିନାଗ୍‌ ବେଡ଼େମ୍‌ ନୁ ଏର୍‌ ମାନ୍ଦାନାଦ୍‌ ଆଦ୍‌ତା। 26 ମେଣ୍ଡେ, ବେନ୍‌ ଦିନାମ୍‌ ସଦାପ୍ରବୁ ତାନ୍‌ ନିଜେତ୍‌ ନାରୁଡ଼ାଦ୍‌ ରେଃତାନ୍‌ ପଡିୟେ ତଃତିତଡ୍‌ ନୁ ରେଃତାନଡ଼୍‌ ଅଡ଼ାୱୁ ପୁଣ୍ଡ୍‌କିଙ୍କ୍‌ ସୁସ୍ଥ ମାଡ଼ିତଣ୍ଡ୍‌, ଆଦ୍‌ ଦିନାମ୍‌ତେ ନେଲ୍‌ଞ୍ଜ୍‌ ୱେୟିସ୍‌ ପଡ୍‌ଦ୍‌ ୱେୟିସ୍‌ ସାତ୍‌ତେ ଦିନାମ୍‌ତେ ୱେଇସ୍‌ ଲେକାମ୍‌ ସାତ୍‌ଗୁଣ୍‌ ଆଦ୍‌ତେ।

27 ଉଡାଟ୍‌, ସଦାପ୍ରବୁନ୍‌ ପେଦେର୍‌ ତାନାଗ୍‌ କପାମ୍‌ତେ ନିଡ଼୍‌ତାନାଦ୍‌ ନୁ ଗାଟି ଦୁମ୍‌ ଆସ୍‌ ଜେକାକଞ୍ଜ୍‌ ୱାସମିନ୍ଦେଣ୍ଡ୍‌; ତାମାଦ୍‌ ପାୟୁର୍‌ତେ କପାମ୍‌ତେ ନିଣ୍ଡିମିନ୍ଦେଣ୍ଡ୍‌ ନୁ ତାନାଦ୍‌ ୱେଞ୍ଜେର୍‌ ଏକାମ୍‌ ପୟିସ୍‌ ମାନ୍ଦାନ୍‌ କିସ୍ ଲେକାମ୍; 28 ମେଣ୍ଡେ, ଅନାଦ୍‌ ନେସ୍କାନ୍‌ ଗାଲ୍‌ ପ୍ଳାବିତ୍‌ ଗାଲ୍‌ ଲେକାମ୍‌, ସାରେ ଦେଶତେ ନାରୁଡ୍‌କିଙ୍କ୍ ଅସାର୍‌ ସାଲ୍‌ନିତାଗ୍‌ ଏତେନ୍‌ ଲେକାମ୍ ଆଦ୍‌ ବଣ୍ଡ୍‌କେ ଏୱୁନା ତେଦୁତ୍‌; ମେଣ୍ଡେ, ନଗର୍‌ତେ ମୁନେତ୍‌ ମକମ୍‌ତାଗ୍‌ ବୁଲ୍‌କାମାଡ଼ାନ୍‌ ଲଗାମ୍‌ ଇଦ୍‌ତଣ୍ଡ୍। 29 ପବିତ୍ର ପାଣ୍ଡୁମ୍‌ତେ ନାର୍କାତେ ବେଲ୍‌ନ୍‌, ଆଦ୍‌ଲେକାମ୍‌ ମିଡ଼୍‌ ପାଟେ ପାରିତିଡ଼୍‌; ମେଣ୍ଡେ ନାରୁଡ଼୍‌ ବେଲାନ୍‌ ସଦାପ୍ରବୁ ପବିତ୍ର ମନ୍ଦିର୍‌ତିଙ୍କ୍‌, ଇସ୍ରାଏଲ୍‌ତେ କାଲ୍‌କିନ୍‌ ଗାରେ ଆଦାନ୍‌ ସେଙ୍ଗେ ଅଷଡ଼୍‌ ଉଦ ତାକ ଆଦ୍‌ତଡ଼୍‌, ଆଦ୍‌ଲେକାମ୍‌ ମିୟାଦ୍‌ ମାନ୍‌, ହୃଦୟ୍‌ ୱେଡ଼୍‌କେ ଆଦ୍‌ତେ।

30 ମେଣ୍ଡେ, ସଦାପ୍ରବୁ ତାନ୍‌ କପାମ୍‌ ଗାଟି ନୁ ସାରେପାକେ ପୟିତ୍‌ତେ କିସ୍‌ ତାଡ଼୍‌ମ୍‌, ମରୁଡ଼ି, ୱାଡ଼୍‌ସାମ୍‌ ନୁ ଆଦୁର୍‌ଗାଡାନ୍‌ ୱାନେତଡ଼୍‌ ତାନାଦ୍‌ ମେର୍ସାନ୍‌ ଲେଙ୍ଗ୍‌ କେଞ୍ଜ୍‌ସ୍ପିତଣ୍ଡ୍‌ ନୁ ନିଜେତ୍‌ କାଇଦେ ଶକ୍ତି ତଃତିତଣ୍ଡ୍। 31 ବାତେଙ୍କ୍‌ଇତ୍କେ ସଦାପ୍ରବୁ ଲେଙ୍ଗ୍‌ତେ ଅଶୂର୍‌ତେ ନାରୁଡ଼୍‌କିଙ୍କ୍‌ ୱେରେ ୱେରେ ଆସ୍‌ ଉର୍ଙ୍ଗିତଡ଼୍‌, ଅଣ୍ଡ୍‌ ଶାସନ ମାଡ଼ାନ୍‌ ଡ଼ୁଡ଼୍‌ତେ ତାକିଂଙ୍କ୍‌ ରେଃତିତଣ୍ଡ୍‌। 32 ମେଣ୍ଡେ, ବେନ୍ ତିଆର୍‌ ମାଡ଼ିମାନ୍ଦାନ୍‌ ଡ଼ୁଡ୍‌ ସଦାପ୍ରବୁ ଆଦିନ୍‌ ପରୁ ୱାଟିତଣ୍ଡ୍‌, ଆଗେ ନାର୍ଗେ ରେଃତାନ୍‌ ସମୟତେ ଡଲା ନୁ ଅଷଡ୍‌ ନେକିତା ନୁ ଅଣ୍ଡ୍‌ ଅଡ୍‌ତଡ୍‌ ବେଡ଼ିୟାଦ୍‌ ଯୁଦ୍ଦ୍‌ ମାଡିତଣ୍ଡ୍। 33 ବାତେଙ୍କ୍‌ଇତ୍କେ ତଫତ୍‌ତେ ପେଦେର୍‌ତେ କିସ୍‌ ଗୁଇନ୍ଦେ ମୁନେତ୍‌ କାଲାମ୍‌କଞ୍ଜ୍‌ ତିଆର୍‌ ଆସ୍‌ମିନ୍ଦେ ନୁ ଆଦ୍‌ ରାଜାନ୍‌ ମାଇଦିଙ୍କ୍‌ ତିଆର୍‌ ଆସ୍‌ମିନ୍ଦେ; ଅଣ୍ଡ୍ ଆଦିଙ୍କ୍ କୁଇଙ୍କ୍‌ ନୁ ଗାଲ୍‌ ମାଡ଼ିମିନ୍ଦେଣ୍ଡ୍‌, ମୁନେଙ୍କ୍‌ କଞ୍ଜ୍ ନିଡ଼୍‌ସମାନ୍ଦାନ୍‌ କିସ୍‌ ଗୁଇନ୍ଦେ ନୁ ନାର୍ଗେ ୱେର୍‌କିନ୍‌; ମେଣ୍ଡେ, ସଦାପ୍ରବୁନ୍‌ ନେସ୍‌କାନ୍‌ ଗାବ୍‌ ସାରେତିଙ୍କ୍‌ ଅଣ୍ଡ୍‌ ପଡ଼୍‌ସିଦ୍‌ତଣ୍ଡ୍‌।