1 ନା' ନାରୁଡ଼୍‌କିଙ୍କ୍‌ ଶାନ୍ତି ମାଡ଼ାଟ୍‌, ଶାନ୍ତି ମାଡ଼ାଟ୍‌, ଇଦ୍‌ ମିୟାଦ୍‌ ପରମେଶ୍ୱର୍‌ କେତିତଣ୍ଡ୍‌। 2 ମିଡ଼୍‌ ଯିରୁଶାଲେମ୍‌ତାକ୍‌ ଲେକେତ୍‌ ମାନ୍‌ତେ ଗଟି କେଲ୍‌ମୁଟ୍‌, ମେଣ୍ଡେ ତାନ୍‌ ଯୁଦ୍ଦ୍ ତେର୍‌ତେ, ତାନ୍‌ ଅପରାଦି କ୍ଷମା ଆତ୍‌ତେ, ଅଣ୍ଡ୍‌ ସଦାପ୍ରବୁନ୍‌ କାଇଦାଗାଙ୍କ୍‌ ନିଜେତେ ସାରେ ପାପ୍‌ ସେଙ୍ଗେ ରେଣ୍ଡ୍‌ ଗୁଣ ପାଏମ୍‌ ଆତ୍‌ତଣ୍ଡ୍‌ ଇଞ୍ଜ ଆଦିନ୍‌ ପାକେ ପ୍ରଚାର୍‌ ମାଡ଼ାଟ୍‌। 3 ୱେରନାଦ୍‌ ଲେଙ୍ଗ୍‌ ପ୍ରଚାର୍‌ ମାଡ଼ାଟ୍‌, ମିଡ଼୍‌ ସିମ୍‌ ସାମ୍‌ ପଡ଼ିୟେତାଗେ ସଦାପ୍ରବୁନ୍‌ ଆର୍‌ ତିଆର୍‌ ମାଡ଼ାଟ୍‌, ଉସ୍କ ନେଲ୍‌ଦାଗ୍‌ ଆନ୍ତେ ମାନ୍‌ ପରମେଶ୍ୱର୍‌ତେ ସେଙ୍ଗେ ବେଡ଼ିୟେ ଆର୍‌ ତିଆର୍‌ ମାଡ଼ାଟ୍। 4 ସାରେ ପାକେ ଡେଙ୍ଗ୍‌ ମାଡ଼ିତେ, ସାରେ ମେଟା ନୁ ବେଡ଼ିୟେ ମେଟା ଗୁଟୁଡ଼୍‌କ୍‌ ନୁ ୱାଙ୍ଗ୍‌ସି ମିକା ମାଡ଼ିତଡ଼୍‌, ମେଣ୍ଡେ ଡିଗୁଡ଼୍‌ ପଡ଼ିୟେ ସାରେ ସାମାନ୍‌ ମାଡ଼ିତେ; 5 ମେଣ୍ଡେ, ସଦାପ୍ରବୁନ୍‌ ମହିମା ପ୍ରଚାର୍‌ ଆଦ୍‌ତେ ନୁ ସାରେତଡ୍‌ ଦେଶ୍‌ତେ ନାରୁଡ଼୍‌ ଅଣ୍ଡୟ୍‌ଦାମ୍‌ ଇଦ୍‌ ଉଡ଼ିତଡ଼୍‌; ବାତେଙ୍କ୍ଇତ୍କେ ସଦାପ୍ରବୁନ୍‌ ମକମ୍‌ ଇଦ୍‌ କେସ୍‌ମିନ୍ଦେଣ୍ଡ୍‌। 6 ୱେରଣ୍ଡ୍‌ ନାରୁଣ୍ଡ୍‌ ଲେଙ୍ଗ୍‌ କେତିତେ, "ପ୍ରଚାର୍‌ ମାଡ଼ାଟ୍‌," ଆସୁଙ୍କ୍‌ ୱେରଣ୍ଡ୍‌ କେତ୍‌ତଣ୍ଡ୍‌, "ବାତ୍‌ତେ ପ୍ରଚାର୍‌ ମାଡ଼ିକାଡ଼୍‌ ?" "ଦେଶ ଇତ୍କେ ଗାଡ଼୍‌ ଲେକାମ୍‌ ନୁ ତାନ୍‌ ସାରେ ୱାୟେତେ ପୁଙ୍ଗାର୍‌ ଲେକାମ୍‌; 7 ଗାଡ଼୍‌ ୱାସିଆଦ୍‌ତେ, ପୁଙ୍ଗାର୍‌ ଦୁଲ୍‌ଲିତେ; ବାତେଙ୍କ୍‌ଇତ୍କେ ଆଦିନ୍‌ ପରୁ ସଦାପ୍ରବୁନ୍‌ ନେସ୍‌କାନ୍‌ ଗାଲ୍‌ ୱାଦ୍‌ତେ, ନିଜାମ୍‌ ନାରୁଡ଼୍‌ ଗାଡ଼୍‌ଲେକାମ୍‌। 8 ଗାଡ଼୍‌ ୱାସ୍ତ୍‌ତେ, ପୁଙ୍ଗାର୍‌ ଦୁଲ୍‌ଲିତେ; ମାତର୍‌ ମାନ୍‌ ପରମେଶ୍ୱର୍‌ତେ ବାକ୍ୟ ସାରେଦିନାମ୍‌ ମାନ୍ତେ।" 9 ହୋ ସିୟୋନତେ ପାକେ ସୁସମାଚାର୍‌ ପ୍ରଚାର୍‌ମାଡ଼ାନଡ଼ି, ମିଡ଼୍‌ ଡେଙ୍ଗ୍‌ ମେଟେତାକ୍‌ ଆନୁଟ୍‌; ହୋ ଯିରୁଶାଲେମ୍‌ତେ ପାକେ ସୁସମାଚାର୍‌ ପ୍ରଚାର୍‌ମାଡ଼ାନଡ଼ି, ମିଡ଼୍‌ ଶକ୍ତିତେ ଗାଟିଲେଙ୍ଗ୍‌ଦେ କେଲ୍‌ମୁଟ୍‌, ୱେର୍‌ମାଟ୍‌; ଯିହୁଦା ନଗର୍‌ତେ ସାରେତଡ଼ି କେଲ୍‌ମୁଟ୍‌, "ଇକ୍‌ ଉଡ଼ାଟ୍‌, ମି ପରମେଶ୍ୱର୍‌ !" 10 ଉଡ଼ା, ପ୍ରବୁନ୍‌ ଶକ୍ତିତେ ୱାଦ୍‌ତଣ୍ଡ୍‌ ନୁ ଅନ୍‌ ଶକ୍ତି ଅନ୍‌ ସାଙ୍ଗେ ଶାସନ୍ ମାଡ଼ିତେ; ଉଡ଼େ, ଅନ୍‌ତଡ଼୍‌ ଅନାଦ୍‌ ପୁରସ୍କାର୍‌ ମିନ୍ଦେ ନୁ ଅନ୍‌ ମୁନେ ଅନାଦ୍‌ ମାଡ଼୍‌ତେ କାୟେ ମିନ୍ଦେ। 11 ଅଣ୍ଡ୍‌ ମେକାଗଲାଲ୍‌ ଲେକାମ୍‌ ନିଜେତ୍‌ ମେକାମାନ୍ଦେ ମେୟିତିତଣ୍ଡ୍‌, ମେକାପିଲାକିଙ୍କ୍‌ ଅଣ୍ଡ୍‌ ନିଜେତ୍‌ ଶକ୍ତିତଡ଼୍‌ ଗୁଡ଼୍‌ପିତଣ୍ଡ୍‌ ନୁ ନିଜେତ୍‌ ବର୍‌ତାଗ୍‌ ଆୱିଙ୍କ୍‌ କାଞ୍ଜି ଅଦ୍‌ତଣ୍ଡ୍‌, ମେଣ୍ଡେ ପାଲ୍‌ ଇସ ମାନ୍ଦାନ୍‌ ମେଣ୍ଢାଙ୍କ୍‌ ଜାମେ ଜାମେ ତଲିଅଦ୍‌ତଣ୍ଡ୍‌।

12 ବେନ ନିଜେତ୍‌ ଲାବ୍‌ କାଇଦେ ସମୁଦ୍ର ଏର୍‌ଦିଙ୍କ୍‌ କଲ୍‌ସିମିନ୍ଦେଣ୍ଡ୍‌, ଚାକଣ୍ଡ୍‌ତଡ଼୍‌ ମାବ୍‌ମୟଲ୍‌ କଲ୍‌ସି ମିନ୍ଦେଣ୍ଡ୍‌ ନୁ ଜୁଡ଼୍‌ତେ ପୃତିବୀତେ ଦୂମ୍‌ସାରେ କଲ୍‌ସିମିନ୍ଦେଣ୍ଡ୍‌, ମେଟାକିଙ୍କ୍‌ କେଜିତେ ନୁ ବେଡ଼ିୟେମେଟାଙ୍କ୍‌ ବେନ କଲ୍‌ସାନ୍‌ ଡୁଡ୍‌ତେ କଲ୍‌ସେ ପାର୍‌ତଣ୍ଡ୍‌ କି ? 13 ସଦାପ୍ରବୁନ୍‌ ଆତ୍ମାତିଙ୍କ୍‌ ବେନ ଆଦେଶ୍‌ ଇସ୍‌ମିନ୍ଦେଣ୍ଡ୍‌, କି ଆଦେଶ୍‌ ଇଦାନ୍‌ ନାରୁଙ୍କ୍‌ ବେନ ଶିକ୍ଷା ଇସ୍‌ମିନ୍ଦେଣ୍ଡ୍‌ ? 14 ଅଣ୍ଡ୍‌ ବେନନ୍‌ତଡ଼୍‌ ମନ୍ତ୍ରଣା ମାଡ଼୍‌ତଣ୍ଡ୍‌, ବେନ ଅଙ୍କ୍‌ ଶିକ୍ଷା ଇତ୍‌ତଣ୍ଡ୍‌ ନୁ ବିଚାର୍‌ତେ ଆର୍‌ ଅଙ୍କ୍‌ ଶିକାମାଡ଼୍‌ତେ ନୁ ଜ୍ଞାନ୍‌ ଶିକ୍ଷା ଇତ୍‌ତେ ନୁ ଏର୍କେତେ ଆର୍‌ ଅଙ୍କ୍‌ ତଃତ୍‌ତେ ? 15 ଉଡ଼େ, ଗୋଷ୍ଟିତଡ଼୍‌ ଇସୁର୍‌ ଏର୍‌ ବଟ୍‌ ଲେକାମ୍‌ ନୁ କେଜିତେ ଦୂମ୍‌ ଲେକାମ୍‌ ଲେକା ଆଦ୍‌ତଡ଼୍‌; ଉଡ଼େ, ଅଣ୍ଡ୍‌ ସମୁଦ୍ରତେ ନାଡ଼୍‌ମେ ମାନ୍ଦାନ୍‌ ପଡ଼ିୟେ ଅଣ୍ଡ୍‌ ଇସୁରାଦ୍‌ ଜିନିଷ୍‌ ଲେକାମ୍‌ ତେତିତଣ୍ଡ୍‌। 16 ମେଣ୍ଡେ, ଲିବାନୋନ୍‌ ୱେର୍କ୍‌ ନିଲ୍‌ସ୍ପାନ୍‌ ସେଙ୍ଗେ ନୁ ଆଗେତ୍‌ ଜିୱାକ୍‌କିଙ୍କ୍‌ ଆମାସ୍‌ତେ ସେଙ୍ଗେ ଆସର୍‌ ଆୟ। 17 ସାରା ଦେଶ୍‌ତେନଡ଼୍‌ ଅନ୍‌ ମୁନେ ଇଲ୍‌ୱେ ଜିନିଷ୍‌ ମାତର୍‌; ଅଡ଼୍‌ ଅନାଗେ ଇଲ୍‌ୱେ ଜିନିଷ୍‌ତାଗାଙ୍କ୍‌ ନୁ ଅସାର୍‌ ଲେକାମ୍‌ ଆଦ୍‌ତେ। 18 ଆଲେକେ ମିଡ଼୍‌ ବେନନ୍‌ତଡ଼୍‌ ପରମେଶ୍ୱର୍‌ତିଙ୍କ୍‌ ସାମାଙ୍କ୍‌ ମାଡ଼ିତଣ୍ଡ୍‌ ? କି ବେନ୍‌ ମୂର୍ତ୍ତିତିଙ୍କ୍‌ ଅନ୍‌ ଲେକାମ୍‌ ମାଡ଼ିତିଡ଼୍‌ ? 19 ଲୁଆତେ ମୁର୍ତ୍ତି ମାଡ଼ାନଣ୍ଡ୍‌ ପେଟେତାଗ୍‌ ତସିତ୍‌ ନୁ ଗୁଣ୍ଡାଲ୍‌ତେ ସୁନାତେ ଆଦ୍‌ କୁସ୍‌କିତଣ୍ଡ୍‌, ମେଣ୍ଡେ ଆଦିନ୍‌ତଡ଼୍‌ ରୂପାତେ ଇକ୍‌ଲେମ୍‌ ତିଆର୍‌ ମାଡ଼ିତେ। 20 ବେନ୍‌ ନାରୁଣ୍ଡ୍‌ ଇଦ୍‌ ଲେକେତ୍‌ ପୁରସ୍କାର୍‌ ଇଦାନ୍‌ ସେଙ୍ଗେ ଗାଟି ଗରିବ୍‌, ଅଣ୍ଡ୍‌ ୱେରଡ଼୍‌ ୱେର୍କ୍‌ ହେଞ୍ଚିତଣ୍ଡ୍‌, ଅଣ୍ଡ୍‌ ଢ଼ାଟୁଙ୍କ୍‌ ୱେରଡ଼୍‌ ତିଆର୍‌ ମାଡ଼୍‌ତେ ମୂର୍ତ୍ତି ତିଆର୍‌ ମାଡ଼ାନଙ୍କ୍‌ ୱେରଣ୍ଡ୍‌ ଲେକେତ୍‌ ତିଆର୍‌ ମାଡ଼ାନଙ୍କ୍‌ ମେଃକିତଣ୍ଡ୍‌। 21 ମିଡ଼୍‌ ବାତେ ପୁନ୍‌ୱିଡ଼୍‌ ? ମିଡ଼୍‌ ବାତେ କେଞ୍ଜ୍‌ୱିଡ଼୍‌ ? ମୁନେତ୍‌ କାଲାକଞ୍ଜ୍‌ ବାତେ ମିକିଙ୍କ୍‌ କେଲ୍‌ଲଡ଼୍‌ ? ପୃତିବିତେ ଆରାମ୍‌କଞ୍ଜ୍‌ ବାତେ ମିଡ଼୍‌ ବୁଜେମ୍‌ ଆୟିଡ଼୍‌ ? 22 ଅଣ୍ଡ୍‌ ମାବ୍‌ମୟଲ୍‌ ପରୁ ମିନ୍ଦେଣ୍ଡ୍‌ ନୁ ଆଗେ ମାନ୍ଦାନ୍‌ ନାରୁଡ଼୍‌ ଇଟେକିନ୍‌ ଲେକାମ୍‌; ଅଣ୍ଡ୍‌ ନେଲ୍‌ଞ୍ଜ୍‌ତେ ୱେଇସ୍‌ ଲେକାମ୍‌ ମାବ୍‌ମୟଲ୍‌ ଏକାମ୍‌ ମାଡ଼ି ମିନ୍ଦେ, ମେଣ୍ଡେ ମାନ୍ଦାନ୍‌ ସେଙ୍ଗେ ଗୁଡ଼ୁସା ଲେକାମ୍‌ ଆୱୁ ଏକାମ୍‌ ମାଡ଼ିତଣ୍ଡ୍‌; 23 ଆଦ୍‌ ଅଦିପତିନଡ଼୍‌କ୍‌ ଅଣ୍ଡୟ୍‌ତାଗ୍‌ ନଷ୍ଟ ମାଡ଼ିତଣ୍ଡ୍; ଆଦ୍‌ ପୃତିବିତେ ବିଚାର୍‌କର୍ତ୍ତାନଡ଼୍‌ ଦାମ୍‌ ଇଲ୍‌ୱେ ମାଡ଼ିତଣ୍ଡ୍‌। 24 ହଁ, ଅଡ଼୍‌ ଉର୍ସ୍କିଆୟ୍‌ୟଡ଼୍‌; ହଁ, ଅଡ଼୍‌ ୱିତିଆୟ୍‌ୟଡ଼୍‌; ହଁ, ମାଡ଼େତେ ମାଡା ବୂମ୍‌ଦାଗ୍‌ ଉଟ, ମେଣ୍ଡେ ଅଡ଼୍‌ ପରୁ ଉଦ୍‌ଦିତଣ୍ଡ୍‌, ଆସୁଙ୍କ୍‌ ଅଡ଼୍‌ ୱାସି ଆଦ୍‌ତଡ଼୍‌ ନୁ ଉର୍‌ଗାଲ୍‌ ପିସିଲ୍‌ ଲେକାମ୍‌ ଅଡ଼୍‌କିଙ୍କ୍‌ ତୁଃଉସ୍‌ ଅଦ୍‌ତେ। 25 ଆଦିଙ୍କ୍‌ ଆଦ୍‌ ପବିତ୍ର ଇଶ୍ୱର୍‌ କେତିତଣ୍ଡ୍‌, ମାମେ ବେନନ୍‌ ସାମାନ୍‌ ଆଦେ ପାର୍‌ତମ୍‌, ଇଦ୍‌ଲେକାମ୍‌ ବେନନ୍‌ ସାଙ୍ଗେତେ ମିଡ଼୍‌ ମାକ୍‌ ସାମାନ୍‌ ଇଦ୍‌ତିଡ଼୍‌ ? 26 ପରୁ ଉଡ଼ାଟ୍‌, ମିଡ଼୍‌ ବେନ୍‌ ଉକାକ୍‌ ଉଡ଼ ମିନ୍ଦେଡ଼ି, ଆୱିଙ୍କ୍‌ ବେନ ତିଆର୍‌ ମାଡ଼ିମିନ୍ଦେଣ୍ଡ୍‌ ଆୱୁ ସାରେ ଉକାକିନ୍‌ ମାନ୍ଦେତାଗାଙ୍କ୍‌ ୱେର ୱେର ମାଡ଼ି ପେସ୍ପିତାତିତଣ୍ଡ୍‌, ମେଣ୍ଡେ ସାରେତାୱିଙ୍କ୍‌ ପେଦେର୍‌ ପୟିସ୍‌ କାର୍ଙ୍ଗିତଣ୍ଡ୍‌, ଅନାଦ୍‌ ନାର୍ଗେ ଶକ୍ତି ମିନ୍ଦେ ମେଣ୍ଡେ ଅନ୍‌ ଶକ୍ତିତଡ଼୍‌ ଅନାଗେ ୱେରଡ଼୍‌ ମିକା ମିଞ୍ଜିମାନ୍ଦେ ପାର୍‌ୱ। 27 ମାୟାଦ୍‌ ଆର୍‌ ସଦାପ୍ରବୁନାଗେ ମିଞ୍ଜ୍‌ସ୍ପି ନୁ ମାୟାଦ୍‌ ବିଚାର୍‌ ମା ପରମେଶ୍ୱର୍‌ତେ ଜ୍ଞାନ୍‌ତାଗାଙ୍କ୍‌ ୱାସ୍‌ମିନ୍ଦେ, ହୋ ଯାକୁବ୍‌, ନିମେ ବାତ୍‌ତିଙ୍କ୍‌ ଇଦ୍‌ କେସମିନ୍ଦେନି, ହୋ ଇସ୍ରାଏଲ୍‌, ନିମେ ବାତ୍‌ତିଙ୍କ୍‌ ଇଦ୍‌ କେତୁତିନ୍‌ ? 28 ନିମେ ବାତେ ପୁନ୍‌ୱିନ୍‌ ? ନିମେ ବାତେ କେଞ୍ଜ୍‌ୱିନ୍‌ ? ପୃତିବୀତେ ସାରେ ସୃଷ୍ଟିକର୍ତ୍ତାଲ୍‌ ଅନାଦି ସାରେଦିନେତ୍‌ ପରମେଶ୍ୱର୍‌ ସଦାପ୍ରବୁ ଆୟଣ୍ଡ୍‌, କି ଆୟଣ୍ଡ୍‌; ଅନାଦ୍‌ ନାର୍ଗେ ଜ୍ଞାନ୍‌ତେ ପୁନ୍ଦାନଙ୍କ୍‌ ଆୟି। 29 ଅଣ୍ଡ୍‌ ଆୟିତେ ନାରୁଡ଼୍‌କିଙ୍କ୍‌ ଶକ୍ତି ଇଦ୍‌ତଣ୍ଡ୍‌ ନୁ ବପୁଇଲ୍‌ୱେ ନାରୁଡ଼୍‌କ୍‌ ବପୁତଣ୍ଡ୍‌ ମାଡ଼ିଦ୍‌ତଣ୍ଡ୍‌। 30 ଲେୟଡ଼୍‌ ଆୟିଦ୍‌ତା ନୁ ନେସ୍କିତଡ଼୍‌, ମେଣ୍ଡେ ଲେୟିୟଡ଼୍‌ ନିଜାମ୍‌ ତାଲ୍‌ଗି ରାଲିତଡ଼୍‌; 31 ମାତର୍‌ ବେନଡ଼୍‌ ସଦାପ୍ରବୁଙ୍କ୍‌ କେପିତଡ଼୍‌, ଅଡ଼୍‌ ପୁଃନେ ପୁଃନେ ଶକ୍ତି ପାହେମ୍‌ ଆଦ୍‌ତଡ଼୍‌; ଅଡ଼୍‌ ପରୁ ଉଡ଼ାନ୍‌ ଗାଦ୍‌ ପିଟେ ଲେକାମ୍‌ ପରୁ ପାର୍‌ତିତଡ଼୍‌; ଅଡ଼୍‌ ଆୟ କଟ ମିରିତଡ଼୍‌; ଅଡ଼୍‌ ଆୟକଟ୍‌ ତାକିତଡ଼୍‌।