ବିଚାର ନୁ ଉଦ୍ଧାର
1 ବେନଡ଼୍ ମା ବିଷୟ ପାଚ୍ରିଞ୍ଚ୍ତଣ୍ଡ୍, ଅଡ଼୍ତଡ଼୍ ମାମେ ମେଃକ ଆସମିନ୍ଦେମ୍; ବେନଡ଼୍ ମା ପେର୍କେ ୱାଡ଼ଡ଼୍, ଅଡ଼୍ ମାକିଙ୍କ୍ ପାହେମ୍ ଆଦ୍ତଡ଼୍; ବେନ୍ ଦେଶ୍ତେନଡ଼୍ ନାରୁଡ଼୍ ମା ପେଦେର୍ତେ ପାହେମ୍ ଆଦୁତଡ଼୍, ଅଡ଼୍କିଙ୍କ୍, ମାକିଙ୍କ୍ ଉଡ଼ାଟ୍, ମାକିଙ୍କ୍ ଉଡ଼ାଟ୍ ଇଞ୍ଜ୍ ମାମେ କେତ୍ତମ୍। 2 ବେନଡ଼୍ ନିଜେ ନିଜେ ବେନ୍ ଆର୍ଦାଗ୍ ଆଦ୍ତଡ଼୍, ଇଦ୍ଲେକାମ୍ ବିରଦି ନାରୁଡ଼୍ ପରୁ ମାମେ ସାରାଦିନ୍ ନିଜେତ୍ କାଇ ଆସ୍ମିନ୍ଦେମ୍; 3 ଇ ନାରୁଡ଼୍ ମୁଲ୍ପୁଟ୍ ବଲିଦାନ୍ ମାଡ଼ି ନୁ ସୁକୁକ୍ ଇଟାନ୍ ପରୁ ଦୁପାମ୍ ନିଡ଼୍ସ୍ପି ମା ମକମ୍ ମୁନେ ଦିନାଲ୍ ଦିନାଲ୍ ମାକିଙ୍କ୍ କିଚ୍କିଚା ମାଡ଼ିତଡ଼୍; 4 ଅଡ଼୍ ୱିସ୍କିନାଗ୍ କୁଦିତଡ଼୍ ନୁ ମିଞ୍ଜ୍ତେ ପଡ଼ିୟେତାଗ୍ ଗୁଡ଼ୁସା ମାଡ଼ିତଡ଼୍; ଅଡ଼୍ ପାଦି ଆୱୁଙ୍ଗ୍ ତିନ୍ତଡ଼୍ ନୁ ଅଡ଼୍ ଗିନେତାଗ୍ ପାସ୍କାନ୍ ଆୱୁଙ୍ଗ୍ ଜମେ ମାନ୍ତେ; 5 ଅଡ଼୍ ୱେରେତଡ଼୍ କେତିତଡ଼୍, ନିଜେତ୍ ପଡ଼ିୟେତାଗ୍ ନିଲ୍ମୁଟ୍, ମା ପାକେ ୱାଡ଼୍ମାଟ୍, ବାତେଙ୍କ୍ଇତ୍କେ ମାମେ ମିକିଙ୍କ୍ ଆନେ ଗାଟି ପବିତ୍ର; ଇଡ଼୍ ମା ମସର୍ତେ ଗାଲ୍ ଲେକାମ୍, ପାୟାଲ୍ ପଡ଼୍ଗିନ୍ ନିଡ଼୍ତାନ୍ କିସ୍ ଲେକାମ୍। 6 ଉଡ଼େ, ମା ମୁନେ ଇଦ୍ ଲେକ୍ତାଦ୍ ମିନ୍ଦେ; ମାମେ କଟ ମାନ୍ୱାଡ଼୍, ମାତର୍ ସାରେତେ ଗଟ୍ତେ ଗଟ୍ ଇଦିକାଡ଼୍, ହଁ, ମାମେ ଅଡ଼୍ ଡେକାନାଗ୍ କାୟେ ଇଦିକାଡ଼୍, 7 ସଦାପ୍ରବୁ କେତିତଣ୍ଡ୍, "ମେଟାକିନ୍ ପରୁ ଦୁପାମ୍ ନିଡ଼୍ସ୍ପି ମିନ୍ଦେଡ଼୍ ନୁ ବେଡ଼ିୟେ ମେଟାକିନ୍ ପରୁ ମାକିଙ୍କ୍ ନିନ୍ଦ୍ ମାଡ଼ିମିନ୍ଦେଡ଼ି ଯେ ମିଡ଼୍, ମିୟାୱୁ ଅପରାଦ୍ ନୁ ମି ମୁନେତ୍ ଆନିଦାଦିଡ଼୍ନଡ଼୍ ଅପରାଦ୍ସାରେ ଦଣ୍ଡ୍ ମାମେ ଅଣ୍ଡୟ୍ଦାମ୍ ଇଦ୍ତମ୍; ଆଦିନ୍ ସେଙ୍ଗେ ମାମେ ମୁନେଙ୍କ୍ ଅଡ଼୍ ମାଡ଼୍ତେ ଇସାପ୍ତେ ଅଡ଼୍ ଡେକାନାଗ୍ ଇଦିକାଡ଼୍।" 8 ସଦାପ୍ରବୁ ଇଦ୍ ଗଟ୍ କେତିତଣ୍ଡ୍, "ଅଙ୍ଗୁର୍କୁଣ୍ଡେତାଗ୍ ବେଲାନ୍ ପୁଃନେ ଅଙ୍ଗୁର୍କାଲ୍ ଦର୍କିତ୍ ନୁ ନାରୁଡ଼୍ କେତିତଡ଼୍, ଇଦ୍ ନଷ୍ଟ ମାଡ଼୍ମାଟ୍, ବାତେଙ୍କ୍ଇତ୍କେ ଇଗେ ଆଶିର୍ବାଦ ମିନ୍ଦେ; ଆଦ୍ଲେକାମ୍ ମାମେ ନିଜେତେ ଦାସନଡ଼୍ ସେଙ୍ଗେ ମାଡ଼ିକାଡ଼୍, ମାମେ ସାରେତଡ଼୍କିଙ୍କ୍ ନଷ୍ଟ ମାଡ଼୍ୱାଡ଼୍। 9 ମାମେ, ଯାକୁବ୍ତାଗାଙ୍କ୍ ୱେରଡ଼୍ ପିଲୁଡ଼୍ ନୁ ଯିହୁଦାତାଗାଙ୍କ୍ ମା ମେଟାକିନ୍ ୱେରଡ଼୍ ଅଦିକାରୀ ଜନମ୍ ମାଡ଼ିକାଡ଼୍ ନୁ ମାନା ହେଞ୍ଚିମାନ୍ଦାନ୍ ନାରୁଡ଼୍ ଆଦ୍ ଅଦିକାର୍ ମାଡ଼ିତଡ଼୍ ନୁ ମାନ୍ ଦାସନଡ଼୍ ଆଗେ ବାସେ ମାଡ଼ିତଡ଼୍। 10 ମେଣ୍ଡେ, ମାନ୍ ବେନ୍ ନାରୁଡ଼୍ ମାନ୍ ପେର୍କେ ୱାସ୍ମିନ୍ଦେଡ଼୍, ଅଡ଼୍ ସେଙ୍ଗେ ଶାରୋଣ ୱେରଡ଼୍ ମେକା ଗୁଡ଼ୁସା ନୁ ଆକୋର୍ ବେଡ଼େମ୍ ଗଡ଼୍କିନ୍ ପାଟାନ୍ ପଡ଼ିୟେ ଆଦ୍ତେ। 11 ମାତର୍ ସଦାପ୍ରବୁଙ୍କ୍ ୱିଡ଼୍ସ ମିନ୍ଦେଡ଼ି, ମା ପବିତ୍ର ମେଟେତିଙ୍କ୍ ମାର୍ଙ୍ଗମିନ୍ଦେଡ଼ି, ବାଗ୍ୟ ଦେୟାମ୍ ମାୟିଦିଙ୍କ୍ ସାମ୍ଣ୍ଡେ ତିଆର୍ ମାଡ଼ୁତିଡ଼୍ ନୁ ତିଆର୍ ଆତ୍ତେ ଦେବିନ୍ ଲେକାମ୍ କାଇଲ୍ତେ ଅଙ୍ଗୁର୍କାଲ୍ ନିଃସ ମିନ୍ଦେଡ଼ି ଯେ ମିଡ଼୍, 12 ମିକିଙ୍କ୍ ମାମେ ଚୁର୍ ମାୟିଦିଙ୍କ୍ ତିଆର୍ ମାଡ଼ିକାଡ଼୍ ନୁ ମିଡ଼୍ ସାରେତଡ଼୍ ଡଲାନ୍ ପଡ଼ିୟେତାଗ୍ ଆଡ଼୍କିତିଡ଼୍; ବାତେଙ୍କ୍ଇତ୍କେ ମାମେ କାର୍ଙ୍ଗ୍ତେ ୱେଲେ ମିଡ଼୍ ଉତ୍ତର୍ ଇୱିଡ଼୍ ଆତ୍ତିଡ଼୍; ମାମେ ଗଟ୍ କେତ୍ତେ ୱେଲେ ମିଡ଼୍ କେଞ୍ଚ୍ୱିଡ଼୍ ଆତ୍ତିଡ଼୍; ମାତର୍ ମା କଣ୍ଡେତାଗ୍ ବାତ୍ତେ କାରାପ୍, ଆଦ୍ଦେ କେ ମିଡ଼୍ ମାଡ଼୍ତିଡ଼୍ ନୁ ଆଗେ ମାମେ ଶାନ୍ତି ଆୟମ୍, ଆଦେକେ ହେଞ୍ଚ୍ତିଡ଼୍।" 13 ଆଦିଙ୍କ୍ ପ୍ରବୁ ସଦାପ୍ରବୁ ଇଦ୍ ଗଟ୍ କେତିତଣ୍ଡ୍, "ଉଡ଼େ, ମା ଦାସନଡ଼୍ ତିନ୍ଦ୍ତଡ଼୍, ମାତର୍ ମିଡ଼୍ କାର୍ୱିନ୍ ଆଦ୍ତିଡ଼୍; ଉଡ଼େ, ମା ଦାସନଡ଼୍ ତିନ୍ଦ୍ତଡ଼୍, ମାତର୍ ମିଡ଼୍ କାର୍ୱିନ୍ ଆଦ୍ତିଡ଼୍; ଉଡ଼େ, ମା ଦାସନଡ଼୍ ୱେଡ଼୍କେ ମାଡ଼ିତଡ଼୍, ମାତର୍ ମିଡ଼୍ ସିଗ୍ ଆଦ୍ତିଡ଼୍; 14 ଉଡ଼େ, ମା ଦାସନଡ଼୍ ସୁକାମ୍ତେ ପାଟା ପାରିତଡ଼୍, ମାତର୍ ମିଡ଼୍ ମାନ୍ତେ ଦୁଃକାମ୍ ସେଙ୍ଗେ କେୟିତିଡ଼୍ ନୁ ଆତ୍ମାତେ ଦୁଃକାମ୍ତେ ସେଙ୍ଗେ କେୟିତିଡ଼୍। 15 ମେଣ୍ଡେ, ମିଡ଼୍ଆନ୍ଦେ ମା ହେଞ୍ଚ୍ତଡ଼୍ ନାରୁଡ଼୍ ପାକେ ମିୟାୱୁ ପେଦେରି ଅବିଚାପ ଲେକାମ୍ ନେଃତାଙ୍କ୍ ଆଦ୍ତେ ନୁ ପ୍ରବୁ, ସଦାପ୍ରବୁ ମିକିଙ୍କ୍ ଆୱୁକିତଣ୍ଡ୍; ମେଣ୍ଡେ, ଅଣ୍ଡ୍ ନିଜେତ୍ ଦାସନଡ଼୍କିଙ୍କ୍ ୱେରେ ପେଦେର୍ତେ କାର୍ଙ୍ଗିତଣ୍ଡ୍; 16 ଆସୁଙ୍କ୍ ବେନ୍ ନାରୁଡ଼୍ ପୃତିବିତାଗ୍ ନିଜେତିଙ୍କ୍ ଆଶିର୍ବାଦ ମାଡ଼ିତଣ୍ଡ୍, ଅଣ୍ଡ୍ ସତ୍ ପରମେଶ୍ୱତାଗାଙ୍କ୍ ନିଜେତିଙ୍କ୍ ଆଶିର୍ବାଦ ମାଡ଼ିତଣ୍ଡ୍ ନୁ ବେନ ନାରୁଡ଼୍ ପୃତିବିତାଗ୍ ଶପତ ମାଡ଼ିତଣ୍ଡ୍, ଅଣ୍ଡ୍ ସତ୍ ପରମେଶ୍ୱର୍ତଡ଼୍ ଶପତ ମାଡ଼ିତଣ୍ଡ୍; ଆଦିଙ୍କ୍ ମୁନେତ୍ କାଲାମ୍ତେ ବିପଦ୍ସାରେ ମାୟିମିନ୍ଦେ ନୁ ଆୱୁସାରେ ମା କଣ୍ଡେତାଗାଙ୍କ୍ ମିଞ୍ଜିମିନ୍ଦେ।
ପୁଃନେ ତିଆର୍
17 ବାତେଙ୍କ୍ଇତ୍କେ ଉଡ଼େ, ମାମେ ପୁଃନେ ମାବ୍ମୟଲ୍ ନୁ ପୁଃନେ ପୃତିବୀ ତିଆର୍ ମାଡ଼ିକାଡ଼୍ ନୁ ମୁନେତ୍ କାଲାମ୍ତେ ବିଷୟସାରେ ଏର୍କେ ମାଡ଼ାନଙ୍କ୍ ଆୟ, କି ମାନ୍ତାଗ୍ ୱାଡ଼। 18 ମାତର୍ ବାତ୍ତେ ମାନ୍ କଣ୍ଡେମୁନେ ତିଆର୍ ମାଡ଼ିକାଡ଼୍, ମିଡ଼୍ ସାରେ କାଲାମ୍ ଆଗେ ୱେଡ଼୍କେତେ ସାର୍ଦେ ମାଡ଼ାଟ୍; ବାତେଙ୍କ୍ଇତ୍କେ ଉଡ଼େ, ମାମେ ଯିରୂଶାଲେମ୍ତାକ୍ ୱେଡ଼୍କେ ଲେକାମ୍ ନୁ ଆଗେତ୍ ନାରୁଡ଼୍କିଙ୍କ୍ ୱେଡ଼୍କେତେ ମାଡ଼ି ତିଆର୍ ମାଡ଼ିକାଡ଼୍। 19 ମେଣ୍ଡେ, ମାମେ ଯିରୂଶାଲେମ୍ତାଗ୍ ୱେଡ଼୍କେ ମାଡ଼ିକାଡ଼୍ ନୁ ମା ନାରୁଡ଼ାଗ୍ ୱେଡ଼୍କେ ମାଡ଼ିକାଡ଼୍; ମେଣ୍ଡେ, ଆଗେ କେୟାନାଦ୍ ଲେଙ୍ଗ୍, କି ଗୁଣ୍ଡେତାଗ୍ ରେଃସ୍ କେୟାନାଦ୍ ଲେଙ୍ଗ୍ ମେଣ୍ଡେ କେଞ୍ଜାଙ୍କ୍ ଆୟ। 20 ଆଦ୍ ସମୟ୍ତେ ଆଦ୍ ପଡ଼ିୟେତାଗ୍ ସୁଦୁର୍ ଦିନାମ୍ତେ ପେକାଲ୍ କି ଗାଟି ମୁୟ୍ତେ ନାରୁଣ୍ଡ୍ ମେଣ୍ଡେ ମାନଣ୍ଡ୍; ବାତେଙ୍କ୍ଇତ୍କେ ପେକାଲ୍ ଅଣ୍ଡ୍ୟ ବର୍ଷ ବୟସ୍ତେ ଡଲିତଣ୍ଡ୍ ନୁ ପାପୀ ଅଣ୍ଡ୍ୟ ବର୍ଷ ବୟସ୍ ଆସ୍ ଅବିଶାପ୍ ଆଦ୍ତଣ୍ଡ୍। 21 ମେଣ୍ଡେ, ନାରୁଡ଼୍ ଲୋକ୍ ତିଆର୍ ମାଡ଼ି ଆଗେ ବାସେ ମାଡ଼ିତଡ଼୍ ନୁ ଅଡ଼୍ ଅଙ୍ଗୁର୍ ୱାୟେତାଗ୍ ତିଆର୍ ମାଡ଼ି ଆଗେତ୍ କାୟା ତିନ୍ଦ୍ତଡ଼୍। 22 ଅଡ଼୍ ତିଆର୍ ମାଡ଼୍ତଡ଼୍, ୱେରେତଣ୍ଡ୍ ବେନ ଆଗେ ବାସେ ମାଡ଼ଣ୍ଡ୍; ଅଡ଼୍ ଉର୍ସକେ, ୱେରେତଣ୍ଡ୍ ବେନ କାୟେ ତିନ୍ଦେପାର୍ୱଣ୍ଡ୍; ବାତେଙ୍କ୍ଇତ୍କେ ମାମେ ନାରୁଡ଼୍ ବୟସ୍ ମାଡ଼ାକିନ୍ ବୟସ୍ ଲେକାମ୍ ଆଦ୍ତେ ନୁ ମାନା ହେଞ୍ଚିମାନ୍ଦାନ୍ ନାରୁଡ଼୍ ନାର୍ଗେ ୱାଡ଼୍ସା ଯାକ ମାନ୍ କାଇଦେ ମାଡ଼୍ତେ କାମ୍ତେ କାୟେ ତିନ୍ଦିକାଡ଼୍। 23 ଅଡ଼୍ ଗାଟି ତିପାଲ୍ ଆୟଡ଼୍, କି କଷ୍ଟ ସେଙ୍ଗେ ଜନମ୍ ମାଡ଼ଡ଼୍; ବାତେଙ୍କ୍ଇତ୍କେ ଅଡ଼୍ ନୁ ଅଡ଼୍ତଡ଼୍ ଅଡ଼୍ ପିଲା, ସଦାପ୍ରବୁନ୍ ଆଶିର୍ବାଦ୍ତେ ପିଲୁଡ଼୍ ଆଦ୍ତଡ଼୍। 24 ମେଣ୍ଡେ, ଇଦ୍ ଗଟେମ୍ ଆଦ୍ତେ ଯେ, ଅଡ଼୍ କାର୍ଙ୍ଗାନ୍ ମୁନେଙ୍କ୍ ମାମେ ଉତ୍ତର୍ ଇଦିକାଡ଼୍ ନୁ ଅଡ଼୍ ଗଟି କେତାନ୍ ୱେଲେ ମାନାଡ଼୍ କେଞ୍ଜିକାଡ଼୍। 25 ପଦ୍ଲେ କୁକାଲ୍ ନୁ ମେଣ୍ଢାପିଲେ ଅଣ୍ଡୟ୍ତାଗ୍ ହେପିତା ନୁ ସିଂହଡୁୱ୍ ଗଡ୍ ଲେକାମ୍ ଗାଡ଼୍ ତିନ୍ଦ୍ତେ; ମେଣ୍ଡେ, ଦୂମ୍ ତାଡ଼ାମ୍ତେ କାଦି ଆଦ୍ତେ। ଅଡ଼୍ ମାନ୍ ପବିତ୍ର ମେଟେତେ ବେନେବା ପଡ଼ିୟେତାଗ୍ ହିଂସା କି ନଷ୍ଟ ମାଡ଼ଡ଼୍," ସଦାପ୍ରବୁ ଇଦ୍ କେତିତଣ୍ଡ୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)