1 ତାନ୍‌ପେର୍କେ ହିଜକୀୟ ରାଜାଲ୍‌ ଆଦ୍‌ କେଞ୍ଜୱାନାକେ, ନିଜେତ୍‌ ଚିଲେ ଇକି ନୁ ବାସ୍ତେ କେର୍ସମିକା ସଦାପ୍ରବୁନ୍‌ ଲନ୍‌ ଆତ୍‌ତଣ୍ଡ୍‌। 2 ମେଣ୍ଡେ, ଅଣ୍ଡ୍‌ ରାଜାନ୍‌ଲତ୍‌ତେ ମାଲିକ୍‌ ଇଲିୟାକିମ୍‌ତିଙ୍କ୍‌, ଶିବ୍‌ନ ଲେକ୍‌ତେନଙ୍କ୍‌ ନୁ ଯାଜକନଡ଼ ବେଡ଼ିୟଙ୍କ୍‌ ବାସ୍ତେ କେସ୍ପି ଆମୋସତେ ମାର୍‌ ଯିଶାଇୟ ବବିଷ୍ୟଦ୍‌ବକ୍ତାନ୍‌ ପାକେ ରତ୍‌ତଣ୍ଡ୍‌। 3 ଆସୁଙ୍କ୍‌ ଅଡ଼୍‌ ଅଙ୍କ୍‌ କେତ୍‌ତଡ଼୍‌, "ହିଜକୀୟ ଇଦ୍‌ଲେକାମ୍‌ କେତ୍‌ତଣ୍ଡ୍‌, ନେଣ୍ଡ୍‌ ଦିନାମ୍‌ ବିପଦ୍, ସିଗ୍‌ ନୁ ଅପ୍‌ମାନ୍‌ତେ ଦିନାମ୍‌; ବାତେଙ୍କ୍‌ଇତ୍କେ ପିଲାଙ୍କ୍‌ ଜନମ୍‌ମାଡ଼ାନ୍‌ ଦ୍ୱାର୍‌ତାଗ୍‌ ମିନ୍ଦେଡ଼୍‌, ମାତର୍‌ ଜନମ୍‌ ମାଡ଼ାନଙ୍କ୍‌ ଶକ୍ତି ଇଲେ। 4 ଆଦ୍‌ପାର୍‌ତେ, ଜିୱେମାନ୍ଦାନ୍‌ ପରମେଶ୍ୱର୍‌ତିଙ୍କ୍‌ ନିନ୍ଦ୍‌ ମାଡ଼ାନଙ୍କ୍‌ ନିଜେତ୍‌ ପ୍ରବୁ ଅଶୂରିୟ ରାଜାନ୍‌ତଡ଼୍‌ ପ୍ରେରିତ ରବ୍‌ଶାକିତେ ସାରେ ଗଟି ସଦାପ୍ରବୁ ମୀଇ ପରମେଶ୍ୱର୍‌ ବେନ୍‌ ଗଟ୍‌ କେଞ୍ଜିମିନ୍ଦେଣ୍ଡ୍‌, ଆଦିନ୍‌ ସେଙ୍ଗେ କାଇଲିତଣ୍ଡ୍‌; ଆଦିଙ୍କ୍‌ ବେଗେ ଇଞ୍ଜେ ମିନ୍ଦେଣ୍ଡ୍‌, ଅଡ଼୍‌ ସେଙ୍ଗେ ନିମେ ପ୍ରାତନା ମାଡ଼୍‌ଡ଼େ।" 5 ଆଦ୍‌ଲେକାମ୍‌ ହିଜକୀୟ ରାଜାନ୍‌ ଦାସନଡ଼୍‌ ଯିଶାଇୟନ୍‌ ପାକେ ଆତ୍‌ତଡ଼୍‌। 6 ଆସୁଙ୍କ୍‌ ଯିଶାଇୟ ଅଡ଼୍‌କିଙ୍କ୍‌ କେତ୍‌ତଣ୍ଡ୍‌, "ମିଡ଼୍‌ ନିଜେତ୍‌ ମାଲିକ୍‌ତିଙ୍କ୍‌ ଇଲାନ୍‌ କେତିତିଡ଼୍‌, ସଦାପ୍ରବୁ କେତିତଣ୍ଡ୍‌, ଅଶୂରିୟ ରାଜାନ୍‌ ଦାସନଡ଼୍‌ ମାକିଙ୍କ୍‌ ନିନ୍ଦ୍‌ ମାଡ଼ାନ୍‌ ବେନ୍‌ ଗଟ୍‌ କେଞ୍ଜିମିନ୍ଦେଡ଼ି, ଆଗେଙ୍କ୍‌ ୱେର୍‌ମାଟ୍‌। 7 ଉଡ଼ାଟ୍‌, ମାମେ ଆଦିନାଗେ ୱେରଡ଼୍‌ ଆତ୍ମା ଇଦିକାଡ଼୍‌, ମେଣ୍ଡେ ଅଣ୍ଡ୍‌ ବେନେଆୟି ଜନବର୍‌ କେଞ୍ଜି ନିଜେତ୍‌ ଦେଶ୍‌ତା ମାଲ୍ସ୍‌ଆଦ୍‌ତଣ୍ଡ୍‌; ମେଣ୍ଡେ, ମାମେ ଅନ୍‌ ନିଜେତ୍‌ ଦେଶ୍‌ତାକ୍‌ ଆଞ୍ଜ୍‌ ଚୁର୍‌ତଡ଼୍‌ ଅଙ୍କ୍‌କିଙ୍କ୍‌ ଆୱୁକିକାଡ଼୍‌।"

8 ତାନ୍‌ପେର୍କେ ଅଶୂରିୟ ରାଜା ଲାକିଶ୍‌ତାଗାଙ୍କ୍‌ ପେଇସ୍‌ ମିନ୍ଦେଣ୍ଡ୍‌ ଇଞ୍ଜ ରବ୍‌ଶାକି କେଞ୍ଜି ମାଲ୍ସ୍‌ ଆତ୍‌ତଣ୍ଡ୍‌ ନୁ ଅଙ୍କ୍‌ ଲିବ୍‌ନା ବିରୁଦ୍ଧ୍‌ତେ ଯୁଦ୍ଦ୍‌ ମାଡ଼ମାନ୍ଦାନାଦ୍‌ ଉଡ଼୍‌ତଣ୍ଡ୍‌। 9 ମେଣ୍ଡେ, ଅଶୂରିୟ ରାଜା କୂଶ୍‌ଦେଶ୍‌ତେ ତିର୍ହକ ରାଜାନ୍‌ ବିଷୟ୍‌ତେ ଇଦ୍‌ ଗଟ୍‌ କେଞ୍ଜ୍‌ତଣ୍ଡ୍‌ ଯେ, ଅଣ୍ଡ୍‌ ମିଇ ବିରୁଦ୍ଧ୍‌ତେ ଯୁଦ୍ଦ୍‌ ମାଡ଼ାନଙ୍କ୍‌ ୱାସ୍‌ମିନ୍ଦେଣ୍ଡ୍‌; ଇଦ୍‌ କେଞ୍ଜି ଅଣ୍ଡ୍‌ ହିଜକୀୟନ୍‌ ପାକେ କାବୁର୍‌ ରଇସ୍‌ କେତ୍‌ତଣ୍ଡ୍‌, 10 "ମିଡ଼୍‌ ଯିହୁଦାତେ ରାଜା ହିଜକୀୟଙ୍କ୍‌ ଇଦ୍‌ ଗଟ୍‌ କେତିତିଡ଼୍‌, ଯିରୁଶାଲେମ୍‌ ଅଶୂର ରାଜାନ୍‌ କାଇଦାଗ୍‌ ପୟିସ୍‌ ଆୟିୱାଡ଼୍‌, ଇଦ୍‌ ଗଟ୍‌ କେସ୍‌ ମିୟାଦ୍‌ ବିଶ୍ୱାସ୍ତେ ବୂମ୍‌ ପରମେଶ୍ୱର୍‌ ମିକିଙ୍କ୍‌ କାୱୁଡ଼୍‌ ମାଡ଼୍‌ମା କି।" 11 ଉଡ଼େ, ଅଶୂରିୟ ରାଜାନଡ଼୍‌ ସାରେଲେକାମ୍‌ ଦଂସ ମାଡ଼ାନାଦିନ୍‌ ସାରା ଦେଶ୍‌ତେ ପରୁ ବାତ୍‌ତେ ମାଡ଼ିମିନ୍ଦେଣ୍ଡ୍‌, ଆଦ୍‌ ମିଡ଼୍‌ କେଞ୍ଜ୍‌ତିଡ଼୍‌; ମେଣ୍ଡେ, ମିଡ଼୍‌ ବାତେ ଉଦ୍ଦାର୍‌ ପାହେମ୍‌ ଆଦ୍‌ତିଡ଼୍‌ ? 12 ମା ଆନିଦାଦିଡ଼୍‌ ବେନ୍‌ ଗୋଶନ୍‌, ହାରଣ, ରେତ୍‌ସଫ ଦେଶୀୟନଡ଼୍‌କ୍‌ ନୁ ତଳଃସର ନାରୁଡ଼୍‌ ଏଦନ ପିଲାକିଙ୍କ୍‌ ଦଂସ ମାଡ଼୍‌ତଣ୍ଡ୍‌, ଅଡ଼୍‌ ଦେୟାକ୍‌ ବାତ୍‌ତେ ଅଡ଼୍‌କିଙ୍କ୍‌ ଉଦ୍ଦାର୍‌ ମାଡ଼୍‌ତା ? 13 ହମାତ୍‌ର୍‌ ରାଜା, ଅର୍ପଦର୍‌ ରାଜା, ସଫର୍ବୟିମ ନଗର୍‌ତେ, ହେନାର ନୁ ଅଦ୍ଦ୍ୱାର ରାଜାଲ୍‌ ବେକେ ?

14 ଆସୁଙ୍କ୍‌ ହିଜକୀୟ କାବୁର୍‌ ହେୱୁସାନଡ଼୍‌ କାଇଦାଗାଙ୍କ୍‌ ଚିଟିଅସ୍‌ ଆଦ୍‌ କାର୍‌ତଣ୍ଡ୍‌; ମେଣ୍ଡେ, ହିଜକୀୟ ସଦାପ୍ରବୁନ୍‌ ଲନ୍‌ ଆଞ୍ଜ୍‌ ସଦାପ୍ରବୁନ୍‌ ମୁନେ ଆଦ୍‌ ଟେଣ୍ଡ୍‌ତଣ୍ଡ୍‌। 15 ତାନ୍‌ପେର୍କେ ହିଜକୀୟ ସଦାପ୍ରବୁନ୍‌ ପାକେ ପ୍ରାତନା ମାଡ଼ି କେତ୍‌ତଣ୍ଡ୍‌, 16 "ହୋ କିରୂବଦୂତ ପରୁ ମାନ୍ଦାନ୍‌ ସାରେତିଙ୍କ୍‌ ବେଡ଼ିୟ୍‌ ସଦାପ୍ରବୁ, ଇସ୍ରାଏଲ୍‌ତେ ପରମେଶ୍ୱର୍‌, ମିଡ଼୍‌, ମାତର୍‌ ମିଡ଼୍‌ ପୃତିବିତେ ସାରେ ରାଜ୍ୟତେ ପରମେଶ୍ୱର୍‌ତନି; ନିମେ ସ୍ୱର୍ଗ ନୁ ପୃତିବି ତିଆର୍‌ ମାଡ଼୍‌ତିନ୍‌। 17 ହୋ ସଦାପ୍ରବୁ, ନିମେ କେୱୁତାରି କେଞ୍ଜା; ହୋ ସଦାପ୍ରବୁ, ନିମେ କଣ୍ଡାତେର୍‌ସ୍‌ ଉଡେ; ମେଣ୍ଡେ, ଜିୱେମାନ୍ଦାନ୍‌ ପରମେଶ୍ୱର୍‌ତିଙ୍କ୍‌ ନିନ୍ଦା ମାଡ଼ାନଙ୍କ୍‌ ସନ୍‌ହେରୀବ ବାତ୍‌ତେ କେସ୍‌ ରୟିସ୍‌ ମିନ୍ଦେଣ୍ଡ୍‌, ଅଣ୍ଡ୍‌ ଆୱୁସାରେ ଗଟି କେଞ୍ଜା। 18 ହୋ ସଦାପ୍ରବୁ, ଅଶୂରିୟ ରାଜାନଡ଼୍‌ ପୁରାଦେଶ୍‌ତେ ନାରୁଡ଼୍‌କିଙ୍କ୍‌, ଅଡ଼୍‌ ଦେଶ୍‌ତିଙ୍କ୍‌ ୱେରେ ୱେରେ ମାଡ଼ି ମିନ୍ଦେଣ୍ଡ୍‌ 19 ଓ ଅଡ଼୍‌ ଦେୟାକ୍‌କିଙ୍କ୍‌ କିସ୍‌ତାଗ୍‌ ଏସି ମିନ୍ଦେଣ୍ଡ୍‌, ଇଦ୍‌ ନିଜାମ୍‌; ବାତେଙ୍କ୍‌ଇତ୍କେ ଅଡ଼୍‌ ପରମେଶ୍ୱର୍‌ ଆୟଡ଼୍‌, ନାରୁନ୍‌ କାଇଦେ ତିଅର୍‌ ଆତ୍‌ତେ କାମ୍‌, ୱେର୍‌କି ନୁ କାଲ୍‌କିନେ ମାତର୍‌; ଆଦିଙ୍କ୍‌ ଅଡ଼୍‌ ଅଡ଼୍‌କିଙ୍କ୍‌ ଦଂସ ମାଡ଼ିମିନ୍ଦେଣ୍ଡ୍‌। 20 ଆଦିଙ୍କ୍‌ ଇଞ୍ଜେ, ହୋ ସଦାପ୍ରବୁ, ମା ପରମେଶ୍ୱର୍‌, ଅନ୍‌ କାଇଦାଗାଙ୍କ୍‌ ମାକିଙ୍କ୍‌ ଉଦ୍ଦାର୍‌ ମାଡ଼୍‌ଡ଼େ, ଆସୁଙ୍କ୍‌ ନିମେ, ମାତର୍‌ ନିମେ ଯେ ସଦାପ୍ରବୁନି ଆଦ୍‌ତିନ୍‌, ଇଦ୍‌ ପୃତିବିତେ ସାରେ ରାଜ୍ୟ ପୁନ୍ଦ୍‌ତେ।"

21 ତାନ୍‌ପେର୍କେ ଆମୋସତେ ମାର୍‌ ଯିଶାଇୟ ହିଜକୀୟ ପାକେ କେସ୍‌ ରତ୍‌ତଣ୍ଡ୍‌, ସଦାପ୍ରବୁ ଇସ୍ରାଏଲ୍‌ତେ ପରମେଶ୍ୱର୍‌ ଇଦ୍‌ଗଟ୍‌ କେତ୍‌ତଣ୍ଡ୍‌, "ନିମେ ଅଶୂର୍‌ତେ ରାଜା ସନ୍‌ହେରୀବ ବିରୁଦ୍ଧ୍‌ତେ ମା ପାକେ ପ୍ରାତନା ମାଡ଼୍‌ନାଙ୍କ୍‌, 22 ସଦାପ୍ରବୁ ଆଦିନ୍‌ ବିଷୟ୍‌ତେ ଇଦ୍‌ଗଟ୍‌ କେତ୍‌ତଣ୍ଡ୍‌, ସିୟୋନ୍‌ତେ ଲେୟେପିକିର୍‌ ମିକିଙ୍କ୍‌ ପାସ୍‌କି ମିନ୍ଦେ ନୁ ମିକିଙ୍କ୍‌ ପାସ୍କିମିନ୍ଦେ; ଯିରୁଶାଲେମ୍‌ତେ ନାଟାଡ଼୍‌ ମୀଇ ପାକେ ତାଲେ ଉଃସମିନ୍ଦେ। 23 ମିଡ଼୍‌ ବେନଙ୍କ୍‌ ସିଗ୍‌ ନୁ ନିନ୍ଦେ ମାଡ଼ିମିନ୍ଦେଡ଼ି ? ନୁ ମିଡ଼୍‌ ବେନନ୍‌ ବିରୁଦ୍ଧ୍‌ତେ ନିଜେତ୍‌ ଲେଙ୍ଗ୍‌ ମାଡ଼ିମିନ୍ଦେଡ଼ି ନୁ ନିଜେତ୍‌ କଣ୍ଡା ପରୁ ତେସ୍‌ ମିନ୍ଦେଡ଼ି ? ଇସ୍ରାଏଲ୍‌ତେ ଦର୍ମଲେକାତ୍‌ ବିରୁଦ୍ଧ୍‌ତେ ତ। 24 ମିଡ଼୍‌ ମି ଦାସନଡ଼୍‌ତ ପ୍ରବୁଙ୍କ୍‌ ନିନ୍ଦେ ମାଡ଼ି ନୁ କେସମିନ୍ଦେଡ଼ି, ମାମେ ନିଜେ ନିଜେତ୍‌ ରତ୍‌ତେ ମେଟାକିନାଗ୍‌ ପରୁ ଲିବାନୋନ୍‌ତେ ପାକେ ୱାସ୍‌ମିନ୍ଦେମ୍‌; ମେଣ୍ଡେ, ମାମେ ଆଦିନ୍‌ ଡେଙ୍ଗ୍‌ ଏରସ୍‌ ମାଡ଼େ ନୁ ଆଦିନ୍‌ ଡେଙ୍ଗ୍‌ମାନ୍ଦାନ୍‌ ଦେବଦାରୁ ମାଡ଼ାକ୍‌ ସାରେ ନାଡ଼୍‌କିକାଡ଼୍‌; ମେଣ୍ଡେ, ମାମେ ଆଦିନ୍‌ ଯେକେ ମାନ୍ଦାନ୍‌ ସେଙ୍ଗ୍‌ ପଡ଼ିୟେତାଗ୍‌ ନୁ ଆଦିନ୍‌ କାୟା ପୟିତାନ୍‌ନାୱୁ ମେଟେତାଗ୍‌ ନେଙ୍ଗିକାଡ଼୍‌। 25 ମାମେ ଡ଼େୱି ଏର୍‌ ଉଞ୍ଜ୍‌ମିନ୍ଦେମ୍‌, ମେଣ୍ଡେ ମାମେ ନିଜେତ୍‌ ଡ଼େକେତ୍‌ ମଦଲ୍‌ ମିସର୍‌ତେ ନଦୀସାରେ ପରିଷ୍କାର୍‌ ମାଡ଼ିକାଡ଼୍‌। 26 ବେଲାନ୍‌ ମାନାଡ଼୍‌ ନାର୍ଗେ ଦିନାକଞ୍ଜ୍‌ ଇଦ୍‌ ତିଆର୍‌ ମାଡ଼ିମିନ୍ଦେମ୍‌ ନୁ ମୁନେତ୍‌ କାଲାମ୍‌କଞ୍ଜ୍‌ ଇଦ୍‌ ତିଆର୍‌ ମାଡ଼ିମିନ୍ଦେମ୍‌, ଇଦ୍‌ ବାତ୍‌ତେ ମିଡ଼୍‌ କେଞ୍ଜ୍‌ୱିଡ଼୍‌ ? ମିଡ଼୍‌ ଯେ ନେଟେତଡ଼୍‌ ତିଆର୍‌ ଆତ୍‌ତେ ନଗର୍‌ ସାରେ ନଷ୍ଟମାଡ଼ି ଆୱୁ ସାରେକିଙ୍କ୍‌ ମଇଲାଦିବେ ମାଡ଼ିତିଡ଼୍‌, ଇଦ୍‌ ଇଞ୍ଜେ ମାମେ ସାରେ ମାଡ଼ିମିନ୍ଦେମ୍। 27 ଆଦିଙ୍କ୍‌ ଆଗେ ମାନ୍ଦାନଡ଼୍‌ ସୁଦୁର୍‌ ଶକ୍ତିତଡ଼୍‌ ଆତ୍‌ତଡ଼୍‌, ଅଡ଼୍‌ ଆୟିତ୍‌ତଡ଼୍‌ ନୁ ବାକୁୱା ଆତ୍‌ତଡ଼୍‌; ଅଡ଼୍‌ ୱାୟେତେ ଗାଡ଼୍‌ ନୁ ମେଟେତେ ଜିଟ୍‌କା, ଲନ୍‌ୱେସାନ୍‌ ଗାଡ଼୍‌ ନୁ ପାଣ୍ଡ୍‌ୱେ ଶସ୍ୟଲେକାମ୍‌ ଆତ୍‌ତଡ଼୍‌। 28 ମାତର୍‌ ମିୟାଦ୍‌ କୁଦାନାଦ୍‌, ବାୟିଦେ ଆଦାନାଦ୍‌, ଲୋପେ ୱାଦାନାଦ୍‌ ନୁ ମା ବିରୁଦ୍ଧ୍‌ତେ କପାମ୍‌ ଆଦାନାଦ୍‌ ମାମେ ପୁତ୍‌ତମ୍‌। 29 ମିଡ଼୍‌ ମା ବିରୁଦ୍ଧ୍‌ତେ କପାମ୍‌ ଆସ୍‌ମିନ୍ଦେମ୍‌ ନୁ ମିୟାଦ୍‌ ମିଞ୍ଜ୍‌ସ୍ପି କେତାନ୍‌ ଗଟ୍‌ ମା କେୱୁଦାଗ୍‌ ୱାସ୍‌ମିନ୍ଦେ, ଆଦିଙ୍କ୍‌ ମାମେ ମି ମସର୍‌ତାଗ୍‌ ନିଜେତ୍‌ ଲୟିକଡ଼୍‌ ନୁ ମି ପାୟୁର୍‌ତାଗ୍‌ ନିଜେତ୍‌ ଲଗାମ୍‌ ଇଦ୍‌ତମ୍‌, ମେଣ୍ଡେ ମିଡ଼୍‌ ବେନ୍‌ ଆର୍‌ଦାଲାନ୍‌ ୱାତ୍‌ତିଡ଼୍‌, ଆଦ୍‌ ଆର୍‌ଦାଲେନ୍‌ ମାମେ ମିକିଙ୍କ୍‌ ମାଲ୍‌ପିଦ୍‌ତମ୍‌।" 30 ଆଦିଙ୍କ୍ ହୋ ହିଜକୀୟ, ମି ପରୁ ଇଦ୍‌ ଚିହ୍ନେ ଆଦ୍‌ତେ; ମିଡ଼୍‌ ଇଦ୍‌ ୱାଡ଼୍‌ସା ପେୟିତାନ୍‌ ଶସ୍ୟ ନୁ ଦ୍ୱିତୀୟ ୱାଡ଼୍‌ସା ଆଗାଙ୍କ୍‌ ମଡ଼୍‌ତାନ୍‌ ଶସ୍ୟ ତିନ୍ଦ୍‌ତିଡ଼୍‌; ମେଣ୍ଡେ, ତୃତୀୟ ୱାଡ଼୍‌ସା ୱିଜେ ୱିତି ଶସ୍ୟ କୟିଦ୍‌ତିଡ଼୍‌ ନୁ ଅଙ୍ଗୁର୍‌ୱାୟେମାଡ଼ି ଆଗେତ୍‌ ଶସ୍ୟ ପାହେମ୍‌ ଆଦ୍‌ତିଡ଼୍‌। 31 ମେଣ୍ଡେ, ଯିହୁଦା ପିଲୁଡ଼୍‌ରକ୍ଷା ଆତ୍‌ତେ ନାରୁଡ଼୍‌ ମେଣ୍ଡନ୍‌ଦାମ୍‌ ମଦଲ୍‌କ୍ସ୍‌ ମାଡ୍‌ଡା ଉଟିତା ନୁ ପରୁ କାୟା ପୟିତିତା। 32 ବାତେଙ୍କ୍‌ଇତ୍କେ ଯିରୁଶାଲେମ୍‌ତାଗାଙ୍କ୍‌ ୱେରଡ଼୍‌ ନୁ ରକ୍ଷାଆତ୍‌ତେ ନାରୁଡ଼୍‌ ସିୟୋନ୍‌ ମେଟେତାଗାଙ୍କ୍‌ ପେୟିତିତଡ଼୍‌; ସାରେତିଙ୍କ୍‌ ବେଡ଼ିୟେ ସଦାପ୍ରବୁନ୍‌ ହେଞ୍ଚ୍‌ତେ ନାରୁଡ଼୍‌କ୍‌ ଇଦ୍‌ ସିଦ୍ଦ୍‌ ମାଡ଼ିତଡ଼୍‌। 33 ଆଦିଙ୍କ୍‌ ସଦାପ୍ରବୁ ଅଶୂରିୟ ରାଜାନ୍‌ ବିଷୟ୍‌ତେ ଇଦ୍‌ ଗଟ୍‌ କେତିତଣ୍ଡ୍‌, "ଅଣ୍ଡ୍‌ ଇଦ୍‌ ନଗର୍‌ତିଙ୍କ୍‌ ୱାଡ଼ଣ୍ଡ୍‌, କି ଆଗେ କାଡ଼୍‌ ତାଲ୍‌କଣ୍ଡ୍‌, କି ଆଦିନ୍‌ ମୁନେ କମେ ପୟିସ୍‌ ୱାଡ଼ଣ୍ଡ୍‌, କି ଆଦିନ୍‌ ବିରୁଦ୍ଧ୍‌ତେ ୱେଲୁମ୍‌ କୁର୍‌ୱଣ୍ଡ୍‌। 34 ସଦାପ୍ରବୁ କେତିତଣ୍ଡ୍‌, ଅଣ୍ଡ୍‌ ବେନ୍‌ ଆର୍‌ଦାଗ୍‌ ୱାତ୍‌ତଣ୍ଡ୍‌, ଆଦ୍‌ ଆର୍‌ଦାଗ୍‌ ମାଲ୍‌ସ୍‌ ଆଦ୍‌ତଣ୍ଡ୍‌ ନୁ ଅଣ୍ଡ୍‌ ଇଦ୍‌ ନଗର୍‌ତା ୱାଡ଼ଣ୍ଡ୍‌। 35 ବାତେଙ୍କ୍‌ଇତ୍କେ ମାମେ ନିଜେତ୍‌ ସେଙ୍ଗେ ନୁ ମା ଦାସ ଦାଉଦ୍‌ତେ ସେଙ୍ଗେ ଇଦ୍‌ ନଗର୍‌ତା ଉଦ୍ଦାର୍‌ ମାଡ଼ାନଙ୍କ୍‌ ତଡ଼୍‌ ଆଦିକାଡ଼୍‌।" 36 ତାନ୍‌ପେର୍କେ ସଦାପ୍ରବୁନ୍ ଦୂତ ପେଇସ୍‌ ଅଶୂରିୟନଡ଼୍‌ ମୁର୍‌ସିନାଗ୍‌ ଅଣ୍ଡୟ୍‌ ଲାକ୍‌ ଅଶେଏଇଙ୍କ୍‌ ହଜାର୍ ନାରୁଡ଼୍‌କ୍‌ ଆୱୁକ୍‌ତେ; ମେଣ୍ଡେ, ନାରୁଡ଼୍‌ ନାର୍କୁକ୍‌ ତେଦ ୱାନାକେ, ଉଡ଼ାଟ୍‌, ସାରେତଡ଼୍‌ ଡଲ୍‌ତେ ମଡ଼୍‌କ୍‌। 37 ତାନ୍‌ପେର୍କେ ଅଶୂର୍‌ତେ ରାଜା ସନ୍‌ହେରୀବ ନେଙ୍ଗ୍‌ତଣ୍ଡ୍‌ ନୁ ମାଲ୍‌ସ୍‌ ଆଞ୍ଜ୍‌ ନୀନିବୀତାଗ୍‌ ମାତ୍‌ତଣ୍ଡ୍‌। 38 ଆସୁଙ୍କ୍‌ ଅଣ୍ଡ୍‌ ନିଜେତ୍‌ ନିଷ୍ରୋକ ପେଦେର୍‌ତେ ଦେୟାତେ ଲନ୍‌ ପୂଜେ ମାଡ଼ାନ୍‌ ୱେଲେ ଅଦ୍ରମ୍ମେଲକ୍‌ ନୁ ଶରେତ୍‌ସର୍‌ ପେଦେର୍‌ତଣ୍ଡ୍‌ ଅନ୍‌ ଇର୍‌ୱୁଡ଼୍‌ ମାର୍କ୍‌ ଅଙ୍କ୍‌ ଚୁରିନ୍‌ତଡ଼୍ ଆୱୁକ୍‌ତଡ଼୍‌। ଆସୁଙ୍କ୍‌ ଅଡ଼୍‌ ଆରାରାଟ୍‌ ଦେଶ୍‌ତା ମିର୍‌ତଡ଼୍‌। ମେଣ୍ଡେ, ଅନ୍‌ ମାର୍‌ ଏସର୍‌ହଦ୍ଦୋନ୍‌ ଅନ୍‌ ପଡ଼ିୟେତାଗ୍‌ ରାଜ୍‌ ମାଡ଼୍‌ତଣ୍ଡ୍‌।