ମାର୍କ 12

ଅଙ୍ଗୁର୍‌ ୱାୟାତାଗ୍‍ ବାଗ୍‍ ଚାଷିଡ଼୍‍ ୱେଷଡ଼୍‍

1 ତାନ୍‍ପେର୍କେ ଜିସୁ ୱେଷଡ଼୍‍ ଇସ୍‍ କେତ୍‍ତଣ୍ଡ୍‍, "ଅଣ୍ଡୟ୍‌‍ୟାଗ୍‍ ଅର୍‍ତୁଣ୍ଡ୍‍ ନାରୁଣ୍ଡ୍ ୱେରଡ୍‍ ଅଙ୍ଗୁର୍‌ୱାୟେ ଆରାମ୍‍ ମାଡ଼ି ତାନ୍‍ ତିଡ଼ିୟିପାକା ୱେଲୁମ୍‍ କୁର୍‍ଦୁତଣ୍ଡ୍‍ । ଅଙ୍ଗୁର୍‍କିନ୍‍ ମାଇଦିଙ୍କ୍‍ ଅଣ୍ଡୟ୍‌‍ ଗୁୟ୍‍ନ୍ଦେ ଡେୱ୍‍ତଡ଼୍ ନୁ କେପାନଡ଼୍‍ ମାଇଦିଙ୍କ୍ ଡଡ୍‍ ତହ୍‍ତଡ଼୍‍ । ତାନ୍‍ପେର୍କେ ଅଣ୍ଡ୍‌ କ୍ଷେତତିଙ୍କ୍‍ ବାଗ୍‍ ଚାଷିଡ଼୍‍ କାଇଦେ ୱିଡ଼୍‍ସିସ୍‍ ଦୁରାମ୍‍ ପଡ଼୍‍ୟ୍‍ତାଗ୍‍ ଆତ୍‍ତଣ୍ଡ୍‍ ।" 2 ଆସୁଟ୍‍ ଅଙ୍ଗୁର୍‌ ଆଦାୟ୍‍ ମାଡ଼ାନ୍‍ ସମୟ୍‍ ୱାତ୍‍ତେ, ନିଜର୍ ବାଗ୍‍ ଆଦାୟ୍‍ ମାଡ଼ାନ୍‍ ମାଇଦିଙ୍କ୍ ୱେରଣ୍ଡ୍‍ ଦାସ୍‍ତିଙ୍କ୍‍ ଅଡ଼୍‌‍ ଗାରେ ରହ୍‍ତଣ୍ଡ୍‍ । 3 ଚାଷିଡ଼୍‍ ଆ ଦାସ୍‍ତିଙ୍କ୍‍ ପୟ୍‍ସ୍‍ ରେହ୍‍ସ୍‍ ଆସାମ୍‍ କାଇଦେ ରୟ୍‍ସିତ୍‍ତଡ଼୍‍ । 4 ୱାୟେତ୍‍ ମାଲିକ୍‍ ମେଣ୍ଡ୍‍ଅର୍‍ତୁନ୍‍ ଦାସତିଙ୍କ୍‍ ରହ୍‍ତଣ୍ଡ୍‍ । ଚାଷିଡ଼୍‍ ଅଙ୍କ୍‌ ଆନ୍‌ତେ କାରାପ୍‍ ବ୍ୟବହାର୍‌ ମାଡ଼୍‍ତଡ଼୍‍ ନୁ ରେହ୍‍ସ୍ ଅନ୍‌‍ ତାଲ୍‍ତିଙ୍କ୍‍ ପାଃସିତ୍‍ତଡ଼୍‍ । 5 ତାନ୍‍ପେର୍କେ ମାଲିକ୍‍ ବେନ୍‍ ଦାସଙ୍କ୍‍ ରହ୍‍ତଣ୍ଡ୍‍, ଅଂକିଙ୍କ୍‌ ଚାଷିଡ଼୍ ଡ଼ଲ୍‍ନା ରେହ୍‍ସିତ୍‍ତଡ଼୍‍ । ମାଲିକ୍‍ତେ ପାକେତ୍‍ ୱେର୍‍ବାଗାତଡ଼୍‍ ୱାତ୍‍ତଡ଼୍, ଚାଷିଡ଼୍‍ ଅଡ଼୍‌‍କ୍‍ ଆନ୍ତେ ଆଲେକେ ମାଡ଼୍‍ତଡ଼୍‍ । ବେସ୍‍କ୍‍ତଡ଼୍‍କିଙ୍କ୍ ରେହ୍‍ତଡ଼୍‍ ନୁ ୱେର୍‍ତଡ଼୍‍କିଙ୍କ୍‍ ଆୱ୍‍କ୍‌ତଡ଼୍ । 6 ଇଞ୍ଜେ ମାଲିକ୍‍ତେ ଗାରେ ମାତର୍‍ ୱେରଣ୍ଡେ ମାତର୍‌ ବାକି ମିନ୍ଦେଣ୍ଡ୍ ତାନ୍ ପ୍ରିୟ ମାର୍‍ । ମାଲିକ୍‍ ଆଲ୍‍ସ୍‍ତଣ୍ଡ୍‍, "ଅଡ଼୍‌‍ ନା ମାରିଙ୍କ୍‍ ନିଜାମ୍‍ ମାନେମ୍‍ ଆଦ୍‍ତଡ଼୍‍ ।" ଇଲା ଆଲ୍‍ସି ମାଡ଼େଙ୍କ୍‌ତେ ଚାଷିଡ଼୍‍ ଗାରେ ନିଜର୍‍ ମାରିଙ୍କ୍ ରହ୍‍ତଣ୍ଡ୍‍ । 7 କିନ୍ତୁ ଆ ଚାଷିଡ଼୍‍ ନିଜେନିଜ୍‍ତିଙ୍କ୍‍ କେତ୍‍ତଡ଼୍‍, "ଇଣ୍ଡ୍‍ ମାଲିକ୍‍ତେ ମାର୍‌ । ୱାଡ଼ାଟ୍‍ ଅଂକିଙ୍କ୍‌ ରେହ୍‍ସିନ୍‍ନା ଆଲାଇତ୍କେ ମାଲିକ୍‍ତେ ସମ୍ପତି ମାନ୍‍ କାଇଦେ ୱାଦ୍‍ତେ ।" 8 ଇଲା କେସ୍‍ ଅଡ଼୍‌‍ ମାଲିକ୍‍ତେ ମାରିଙ୍କ୍‍ ପୟ୍‍ସ୍‍ ଆୱ୍‍କ୍‌ତଡ଼୍‍ ନୁ ମଡ଼୍‍ତିଙ୍କ୍‍ ୱାୟେତ୍‍ ବାୟ୍‍ଦେ ଏସିତ୍‍ତଡ଼୍‍ ।

9 ଜିସୁ ପାଚାରାମାଡ଼୍‍ତଣ୍ଡ୍‍, "କେସୁଡ଼ାଟ୍‍, ତାନ୍‍ ପେର୍କେ ଆ ଅଙ୍ଗୁର୍‌ ୱାୟେତ୍‍ ମାଲିକ୍‍ ବାତ୍ ‍ମାଡ଼ିମାନ୍ତ୍‍ତଣ୍ଡ୍‍ ? ଅଣ୍ଡ୍‌ ୱାସ୍‍ ନିଜାମ୍‍ ଆ ଚାଷିଡ଼୍‍କ୍‍ ଡ଼ଲ୍‌ନା ରେହ୍‍ସିସ୍‍ ୱାୟେତିଙ୍କ୍ ୱେର୍ ‍ଚାଷିଡ଼୍‍କ୍‍ ଇସ୍‍ମାନ୍ତ୍‍ତଣ୍ଡ୍‍ ।" 10 ଶାସ୍ତ୍ରତାଗ୍‍ ଇ ଗଟ୍‍ ମିଡ଼୍‍ ନିଜାମ୍‍ କାର୍‍ତିଡ଼୍‍ ।

"ଲୋନ୍‌‍ ତିଆର୍‍ ମାଡ଼ାନଡ଼୍‍ ବେନ୍‍ କାଲ୍‍ଦିଙ୍କ୍ ଦର୍‍କାର୍‍ ଆୟ ଇଞ୍ଜ ଆଲ୍‍ସି ୱିଡ଼୍‍ସିସ୍‍ ମାତ୍‍ତଡ଼୍‍, ଆଦ୍‍ ଲୋତ୍‍ତେ ମୁକ୍ୟ ମୂଲ୍‍ତେ କାଲ୍‍ ଆତ୍‍ତେ ।

11 ନିଜେ ପ୍ରବୁ ଇଦ୍‍ କେତ୍‍ତଣ୍ଡ୍,

ବେସର୍‍ ଚମତ୍କାର୍‍ ଇ ପାଡ଼୍‍ୟି !"

12 ଇହୁଦିଡ଼୍‍ ନେତାଙ୍କ୍‍ ଗିରପ୍‍ ମାଡ଼ାନ୍‍ ମାଇଦିଙ୍କ୍‍ ଚେଷ୍ଟା ମାଡ଼୍‍ତଡ଼୍‍, କାରନ୍‍ ଅଡ଼୍‌‍ ପୁତ୍‍ତଡ଼୍‍, ଅଡ଼୍‌‍କିଂଙ୍କ୍‍ ଉଡ଼ି ମିକା ଜିସୁ ଇ ୱେଷଡ଼୍‍ କେତୁତଣ୍ଡ୍ । କିନ୍ତୁ ନାରୁଡ଼୍‍ ୱେର୍‍ଙ୍ଗିଙ୍କ୍‍ ଅଡ଼୍‌‍ ଜିସୁଙ୍କ୍‍ ୱିଡ଼୍‍ସି ଆତ୍‍ତଡ଼୍‍ ।

ଶିସ୍ତୁ ଇଦାନ୍‍ ପ୍ରଶ୍ନ

13 ବେସ୍‍କ୍‍ତୁଡ଼୍‍ ପାରୁସିଡ଼୍‍ ନୁ ହେରୋଦ୍‍ତେ ମାନ୍ଦେତେ ବେସ୍‍କ୍‍ତୁଡ଼୍‍ ଜିସୁଙ୍କ୍‍ ପ୍ରଶ୍ନ ପାଚାରାମାଡ଼ି ଉଡ଼୍‍ୟିଦାଗ୍‍ ରାପାନ୍‍ ମାଇଦିଙ୍କ୍‍ ୱାସ୍‍ମାତ୍‍ତଡ଼୍‍ । 14 ଅଡ଼୍‌‍ ଜିସୁଙ୍କ୍‍ ପାଚାରାମାଡ଼୍‍ତଡ଼୍‍, "ଗୁରୁ, ମାମ୍‍ ପୁତ୍‍ତମ୍‍ ନାରୁଡ଼୍‍କିଙ୍କ୍‍ ୱେର୍‍ୱକଟ ନିମେ ସତ୍‍ ଗଟି କେତିତିନ୍‍ । ବେନନ୍ ସିଗ୍‍ ମାର୍‍ଜାଦ୍ ସେଙ୍ଗ୍ ଉଡ଼କଟ ନିମେ ଇଶ୍ୱର୍‌ତେ ଇଚ୍ଛା ବିଷୟ୍‍ତେ ଶିକ୍ଷା ଇଦ୍‍ତିନ୍‍ । କେଲ୍‍ମ୍‍, ରୋମ୍‍ ସମ୍ରାଟ୍‍ତିଙ୍କ୍‍ ଶିସ୍ତୁ ଇଦାଙ୍କ୍‍ ମା ଦର୍ମ ନିୟମ୍‍ତେ ବିରୁଦ୍‍ କି ଆୟ ? ମାମ୍‍ ଶିସ୍ତୁ ଇଦ୍‍ତମ୍‍ କି ଇଲେ ?"

15 ଜିସୁ ଅଡ଼୍‌‍ ଚାଲାକ୍‌ତିଙ୍କ୍‌ ବୁଜେମ୍‍ ଆସ୍‍ କେତ୍‍ତଣ୍ଡ୍‍, "ନାକିଙ୍କ୍‍ ବାତେଙ୍କ୍‍ ଉଡ଼୍‍ୟିଦାଗ୍‍ ରାପାଙ୍କ୍‍ ଚେଷ୍ଟା ମାଡ଼ୁତିଡ଼୍‍ ? ୱେରଟ୍‍ ରୁପାମୁଦ୍ରା ତାଡ଼ାଟ୍‍, ନାନ୍‍ ଉଡ଼ିତାନ୍ ।"

16 ଅଡ଼୍‌‍ ଡାବ୍‌ ତାତ୍‍ତାଙ୍କ୍‍ ଜିସୁ ପାଚାରାମାଡ଼୍‍ତଣ୍ଡ୍, "ଇଦିନ୍‍ ପର ବେନନ୍ ମୁର୍ତ୍ତି ନୁ ପେଦେର୍‍ ମିନ୍ଦେ ?"

"ସମ୍ରାଟ୍‍ତାଦ୍‍" ଇଞ୍ଜ ଅଡ଼୍‌‍ ଉତ୍ତର୍‍ ଇତ୍‍ତଡ଼୍‍ ।

17 ଜିସୁ କେତ୍‍ତଣ୍ଡ୍‍, "ଆଲାଇତ୍କେ, ବେନ୍‍ ସମ୍ରାଟ୍‍ତଦ୍‍, ଆଦ୍‍ ସମ୍ରାଟ୍‍ତିଙ୍କ୍‍ ଇମୁଟ୍‍; ବେନ୍‍ ଇଶ୍ୱର୍‌ତାଦ୍‍, ଆଦ୍‍ ଇଶ୍ୱର୍‌ତିଙ୍କ୍‍ ଇମୁଟ୍‍ ।" ଜିସୁନ୍‍ ଇ ଗଟ୍‍ ଅଡ଼୍‌‍ କେଞ୍ଜି ବାକ୍‌ୱା ଆତ୍‍ତଡ଼୍‍ ।

ପୁନରୁତ୍‍ତାନ୍‍ତେ ପ୍ରଶ୍ନ

18 ✝ ୧୨:୧୮ ପ୍ରେରିତ ୨3:୮. ଡଲ୍‍ତେ ନାରୁଡ଼୍‍ତେ ପୁନରୁତ୍‍ତାନ୍‍ ବିଶ୍ୱାସ୍‍ ମାଡ଼୍‍ୱେ ସାଦୁକିଡ଼୍‍ ମାନ୍ଦେ ବେସ୍‍କ୍‍ତୁଡ଼୍‍ ୱାସ୍‍ ଜିସୁଙ୍କ୍‍ ପାଚାରା ମାଡ଼୍‍ତଡ଼୍‍, 19 "ଆ ଗୁରୁ, ମୋଶାଲ୍‌‍ ମା ମାଇଦିଙ୍କ୍‍ ଇ ବ୍ୟବସ୍ଥା ଲେକ୍‍ତଣ୍ଡ୍‍, ୱେରଣ୍ଡ୍‍ ପିଲାଜିଲା ଇଲକଟ ଆସ୍‍ ଡଲ୍‍କେ ଆ ନାରୁନ୍‍ତେ ରାଣ୍ଡିମୁତେଙ୍କ୍‍ ତାନ୍‍ ତାମୁଣ୍ଡ୍‌ ପେଣ୍ଡୁଲ୍‍ ଆଦ୍‍ ୱେୟ୍‍ତିତ୍‍ ନୁ ଅଡ଼ାୱ୍‍ ବେନ୍‍ ପିଲା ଜନମ୍‌ ଆଦ୍‍ତା, ଆୱ୍‍ ଡଲ୍‍ତେ ନାରୁନ୍‍ତେ ପିଲା ଇଞ୍ଜ ପେଦେର୍‍ ଆଦ୍‍ତେ । 20 ଆଲେକେ ସାତ୍‍ ଜାନ୍‍ ତାମୁସ୍‍କ୍‍ ମାତ୍‍ତଡ଼୍‍ । ବେଡ଼୍‍ୟ୍‍ ଦାଦାଲ୍‍ ପେଣ୍ଡୁଲ୍‍ ଆସ୍‍ ପିଲାଜିଲା ଆୟକଟ ଡଲ୍‍ତଣ୍ଡ୍‍ । 21 ଡଲିମାନ୍ଦାନନ୍‍ ରାଣ୍ଡି ନାଟାଡ଼୍‍ତିଙ୍କ୍‍ ଦ୍ୱିତିୟ ତାମୁଣ୍ଡ୍ ପେଣ୍ଡୁଲ୍‍ ଆସ୍‍ ଅଣ୍ଡ୍‌‍ ଆନ୍ତେ ପିଲାଜିଲା ଆୟକଟ ଡଲ୍‍ତଣ୍ଡ୍‍ । ତୃତିୟ ତାମୁଣ୍ଡ୍‍ବା ଆଲେ ଆତ୍‍ତଣ୍ଡ୍‍, 22 ମେଣ୍ଡେ ୱେର୍‍ବାଗାତ୍‍ ସାତ୍‍ ଜାନ୍‍ ତାମୁସ୍‍କିଡ଼୍‍ ଆ ୱେରଡ୍‍ ନାଟାଡ଼୍‍ ପେଣ୍ଡୁଲ୍‍ ଆସ୍‍ ସାରେତଡ଼୍‍ ପିଲାଜିଲା ଆୟକଟ ଡଲ୍‍ତଡ଼୍‍ । ମାଡ଼େଙ୍ଗ୍‍ ନାଟାଡ଼୍‍ ଆନ୍‌ତେ ଡଲ୍‍ତେ । 23 ଇଞ୍ଜେ କେଲ୍‍ମୁଟ୍‍, ପୁନରୁତ୍‍ତାନ୍‍ ଦିନ୍‍ତେ, ବେସୁଙ୍କ୍‍ ଡଲ୍‍ତେନଡ଼୍‍ ପୁନର୍ଜିବିତ୍‍ ଆସ୍‍ ତେଦିତଡ଼୍‍, ଆ ନାଟାଡ଼୍‍ ବେନନ୍ ମୁତେ ଆଦ୍‍ତେ ? ସାତ୍‍ଜାନ୍‍ ଯାକ ତ ତାଙ୍କିକ୍‍ ପେଣ୍ଡୁଲ୍‍ ଆସ୍‍ ମାତ୍‍ତଡ଼୍‍ ।"

24 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍, "ମିକିଙ୍କ୍‌ ବେସର୍‍ ବୁସା ଚିନ୍ତେ ମିନ୍ଦେ । ଦର୍ମଶାସ୍ତ୍ର ନୁ ଇଶ୍ୱର୍‌ତେ ଶକ୍ତି ବିଷୟ୍‍ତେ ମିଡ଼୍‍ ବାତେ ପୁନ୍‍ୱିଡ଼୍‍ । 25 କାରନ୍‍ ଡଲ୍‍ତେନାରୁଡ଼୍‍ ପୁନରୁତ୍‍ତିତ୍ ଆତ୍‍ତଡ଼୍‍, ଅଡ଼୍‌‍ ସ୍ୱର୍ଗତେ ଦୂତକିନ୍‍ ଲେକାମ୍‍ ଆଦ୍‍ତଡ଼୍‍ ଅଡ଼୍‌‍ ପେଣ୍ଡୁଲ୍‍ ଆୟଡ଼୍‍ କି ପେଣ୍ଡୁଲ୍‍ ଇୱଡ଼୍‍ ।" 26 ଡଲ୍‍ତେନାରୁଡ଼୍‍ ପୁନରୁତ୍‍ତାନ୍‍ ଗଟ୍‍ ପାଚାର୍‌ମାଡ଼ୁତିଡ଼୍‌ ? ମୋଶାନ୍‌ ବଇତାଗ୍‍ ନିଡ଼୍‍ତାନ୍‍ ପଦ୍‍ଲେ ବିଷୟ୍‍ତେ କାର୍‍ୱିଡ଼୍‍ କି ? ଆଗେ ଲେକା ମିନ୍ଦେ, ଇଶ୍ୱର୍‍ ମୋଶାଙ୍କ୍‍ କେତ୍‍ତଣ୍ଡ୍‍, "ନାନ୍‍ ଅବ୍ରାହାମ୍‌ତେ ଇଶ୍ୱର୍, ଇସାହାକତେ ଇଶ୍ୱର୍‍ ନୁ ଯାକୁବ୍‍ତେ ଇଶ୍ୱର୍ ! 27 ଅଣ୍ଡ୍‌‍ ଡଲ୍‍ତ୍‍ନାରୁଡ଼୍‍ତେ ଇଶ୍ୱର୍‍ ଆୟଣ୍ଡ୍, ଅଣ୍ଡ୍‌‍ ଜିୱୁମାନ୍ଦାନଡ଼୍‍ ଇଶ୍ୱର୍‌ । ମିଡ଼୍‍ ପୁରାପୁରି ବୁଲ୍‍ ।"

ବେଡ଼୍‍ୟାଦ୍‍ ଆଦେଶ୍‌

28 ଅର୍‍ତୁଣ୍ଡ୍‍ ଦର୍ମଗୁରୁ ଆଗେ ମାଞ୍ଜ୍‍ ଇ ସାରେ ରାମ୍‍କ୍ ଲେକାମ୍ ଆଦାନାଦ୍ କେଞ୍ଜମାତ୍‍ତଣ୍ଡ୍‍ । ସାଦୁକିଡ଼୍‍କ୍‍ ଜିସୁ ଟିକ୍‍ ଜବାବ୍‍ ଇତ୍‌ତଣ୍ଡ୍‌ ଇଞ୍ଜ ପୁଞ୍ଜ୍‍ ଅଣ୍ଡ୍‌ ଜିସୁଙ୍କ୍‍ ମେଣ୍ଡ୍‍ ଅଣ୍ଡୟ୍‌‍ ପ୍ରଶ୍ନ ପାଚାର୍‌ମାଡ଼୍‍ତଣ୍ଡ୍‍, "ମା ଦର୍ମଶାସ୍ତ୍ରତାଗ୍‍ ବେନ୍‍ ଆଦେଶ୍‌ ସାରେକେ ବେଡ଼୍‍ୟାଦ୍‍ ?"

29 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍, "ଇଶ୍ରାଏଲିୟ ନାରୁଡ଼୍‍ କେଞ୍ଜାଟ୍‍ ସାରେକେ ବେଡ଼୍‍ୟାଦ୍‍ ଆଦେଶ୍‌ ଆଦୁତେ, ‘ମାନ୍‍ ପ୍ରବୁ ଇଶ୍ୱର୍‌ ୱେରଣ୍ଡେ ପ୍ରବୁ । 30 ପ୍ରବୁ ଇଶ୍ୱର୍‌ତିଙ୍କ୍‍ ପୁରା ହୃଦୟ୍‍, ପୁରା ଆତ୍ମା, ପୁରା ମନ୍‍, ଶକ୍ତି ସାମର୍ତ୍ୟ ଇସ୍‍ ପ୍ରେମ ମାଡ଼ାଟ୍‌ ବା ବକ୍ତି ମାଡ଼ାଟ୍‍ ।’ 31 ଦ୍ୱିତିୟ ବେଡ଼୍‍ୟାଦ୍‍ ଆଦେଶ୍‌ ଆଦୁତେ, ‘ମି ଗାରେତଡ଼୍‍କ୍‍ ଆତ୍ମାତେଲେକାମ୍‍ ପ୍ରେମ ମାଡ଼ାଟ୍ ।’ ଇ ରେଣ୍ଡିନ୍‍ ୱିଡ଼୍‌ସି ବେଡ଼୍‍ୟ୍‍ ଆଦେଶ୍‌ ମେଣ୍ଡ୍‍ ଇଲେ ।" 32 ଦର୍ମଗୁରୁ କେତ୍‍ତଣ୍ଡ୍‍, "ଗୁରୁ, ନିମେ ସତ୍‍ କେତ୍‍ତିନ୍‍ ! ବାସ୍ତବିକ୍‍ ନିମ୍‍ କେତାନ୍‍ ଲେକାମ୍‌, ମାତର୍‍ ମାନ୍‍ ପ୍ରବୁ ଆଦୁତଣ୍ଡ୍‍ ୱେରଣ୍ଡେ ଇଶ୍ୱର୍‌ ଅଙ୍କ୍‌ ୱିଡ଼୍‌ସି ୱେର୍‍ ଇଶ୍ୱର୍‍ ଇଲେ । 33 ନାରୁଡ଼୍‍ ତାନ୍‍ ପୁରାହୃଦୟ୍, ପୁରାମନ୍, ପୁରାଶକ୍ତି ଇସ୍‍ ଅଂକିଙ୍କ୍‌ ପ୍ରେମ ନୁ ବକ୍ତି ମାଡ଼ାନ୍‍ ସାଙ୍ଗେ ସାଙ୍ଗେ ତାନ୍‍ ପଡ଼ଶିଡ଼୍‍କ୍‍ ଆତ୍ମାତେ ଲେକାମ୍‍ ପ୍ରେମ ମାଡ଼ାଟ୍ । ଇଶ୍ୱର୍‌ତେ ଲେକେତ୍‍ ପଶୁ ନୁ ୱେର୍‍ ବଲି ଉସର୍ଗ ମାଡ଼ାନ୍‍ ୱିଡ଼୍‌ସି, ଇ ରେଣ୍ଡ୍‍ ଆଦେଶ୍‌ ପାଲନ୍‌ ମାଡ଼ାଙ୍କ୍‍ ପେର୍କେ ଦର୍‍କାର୍‍ ।"

34 ✝ ୧୨:3୪ ଲୁକ ୧୦:୨୫-୨୮. ତାମ୍‍ ଜ୍ଞାନବାନ୍ ଉତ୍ତର୍‍ କେଞ୍ଜି ଜିସୁ କେତ୍‍ତଣ୍ଡ୍‍, "ମିଡ଼୍‍ ଇଶ୍ୱର୍‌ତେ ରାଜ୍ୟତାଗାଙ୍କ୍‍ ନାର୍ଗେଦୁରାମ୍‍ ଇଲେଡ଼ି ।"

ତାନ୍‍ ପେର୍କେ ଜିସୁଙ୍କ୍‍ ମେଣ୍ଡେ ପ୍ରଶ୍ନ ପାଚାରାମାଡ଼ାଙ୍କ୍‍ ବେନବା ସାହାସ୍‍ ମାଡ଼ଡ଼୍‍ ।

ମସିହନ୍‍ ବିଷୟ୍‍ତେ ପ୍ରଶ୍ନ

35 ଦାଉଦ୍‍ତେ ମନ୍ଦିର୍‍ତାଗ୍‍ ଅଣ୍ଡ୍‌‍ଦିନେ ଶିକ୍ଷା ଇଦାନ୍‍ୱେଲେ କ୍ରିଷ୍ଟ ୱେରଡ୍‍ ପ୍ରଶ୍ନ ପାଚାର୍‌ମାଡ଼୍‍ତଣ୍ଡ୍, ଦର୍ମଗୁରୁଡ଼୍‍ ବାତେଙ୍କ୍‍ କେତୁତଡ଼୍‍, ମସିହ ଦାଉଦ୍‍ତେ ମାର୍‍ ଇଞ୍ଜ ? 36 ପବିତ୍ର ଆତ୍ମାତାଗାଙ୍କ୍‍ ପ୍ରେରଣା ପାହେମ୍‍ଆସ୍‍ ଦାଉଦ୍‍ କେତ୍‍ତଣ୍ଡ୍‍,

"ପ୍ରବୁ ନା ପ୍ରବୁଙ୍କ୍ କେତ୍‍ତଣ୍ଡ୍‍,"

ମାମ୍‍ ମି ସାରେ ଶତ୍ରୁଡ଼୍‍କିଙ୍କ୍‍

ମି ଡେକେତ୍‍ ମଦଲ୍‍ ମାଡ଼୍‍ନା ଯାକ, ନିମେ ମା ତିନ୍ଦେ ପାକେ କୁଦିମାନ୍‍ ।

37 ଇଗାଙ୍କ୍‍ ପୁନ୍ଦାଙ୍କ୍‍ ଆଦୁତ୍‍ତେ ଯେ, ମସିହଙ୍କ୍ ଦାଉଦ୍‍ ପ୍ରବୁ ଇଞ୍ଜ ଲେକା ଆତ୍‍ତେ । ଆଲାଇତ୍କେ ମସିହ ଦାଉଦ୍‍ତେ ମାର୍‍ ଆଦ୍‍ତଣ୍ଡ୍‍ ବେଲା ?

ଦର୍ମଗୁରୁଡ଼୍‍ ବିଷୟ୍‍ତେ ଜିସୁନ୍‍ ସତର୍କଗଟ୍‍

ଅନ୍‌‍ଦାମ୍‍ ୱେରଡ୍‍ ବେଡ଼ିୟା ମାନ୍ଦେ ନାରୁଡ଼୍‍ ଜିସୁନ୍‍ ଗଟ୍‍ ଇଚ୍ଛାତେ କେଞ୍ଜମାତ୍‍ତଡ଼୍‍ ।

38 ଅଡ଼୍‌‍କିଂଙ୍କ୍‍ ଶିକ୍ଷା ଇଦାନ୍‍ୱେଲେ ଜିସୁ କେତ୍‍ତଣ୍ଡ୍‍, "ଲାଟି ଚକା କେର୍‍ସ୍‍ ଆଟ୍‍ ବଜାର୍‍ତା ନାରୁଡ଼୍‍ଡ଼ାଗାଙ୍କ୍‍ ସମ୍ମାନ ପାହେମ୍‍ ଆଦ୍‌ ଦର୍ମଗୁରୁଡ଼୍‍ ସେଙ୍ଗେ ସତର୍କ ମାନୁଟ୍‍ । 39 ଉପାସନା ଲୋନ୍‌‍ ନୁ ବଜିକିନାଗ୍‍ ଜାଗା ଅଦିକାର୍‌‍ ମାଡ଼ମାନ୍ଦାନ୍‍ ! 40 ଅଡ଼୍‌‍ ରାଣ୍ଡିମୁତେକିନ୍‍ ଇଲ୍‍ୱେ ସୁଯଗ୍‍ ଅସ୍‍ ଆୱିନ୍‍ ସମ୍ପତି ଅଦ୍‍ତଡ଼୍‍ । କିନ୍ତୁ ଚାଲାକ୍‍ ମାଡ଼ି ଲେକେତ୍‍ ପ୍ରାର୍ତନା ମାଡ଼ିତଡ଼୍‍ । ଆଦିନ୍‌ ମାଇଦିଙ୍କ୍‍ ଅଡ଼୍‌‍ ନାର୍ଗେ କଷ୍ଟ ଦଣ୍ଡପାହେମ୍‌ ଆଦ୍‍ତଡ଼୍‍ ।"

ରାଣ୍ଡିମୁତେନ୍‍ ଦାନ

41 ଅନ୍‌‍ଦାମ୍‍ ଜିସୁ ମନ୍ଦିର୍‌ତାଗ୍‍ ଦାନ ଇଦାନ୍‍ ଜାଗେତ୍‍ ଗାରେ କୁଦିମାତ୍‍ତଣ୍ଡ୍ । ନାରୁଡ଼୍‍ ୱାସ୍‍ ଆଗେ ନେହ୍‍ସ୍‍ ମାନ୍ଦାନ୍ ବାକ୍‍ସତାଗ୍‍ ଦାନ ୱାଟାନାଦ୍ ଅଣ୍ଡ୍‌‍ ଉଡ଼ ମାତ୍‍ତଣ୍ଡ୍‍ । ଦନିଡ଼୍‍ ଆଗେ ନାର୍ଗେ ଡାବ୍‍କ୍‍ ୱାଟମାତ୍‍ତଡ଼୍‍ । 42 ଆସୁଟ୍‍ ଅଣ୍ଡୟ୍‌‍ ଗରିବ୍‍ ରାଣ୍ଡିଲ୍‍ ଆଗେ ୱାସ୍‍ ମାତର୍‍ ରେଣ୍ଡ୍‍ ସୁଦୁରାୱ୍‍ ତମ୍ୱା ମୁଦ୍ରା*୧୨:୪୨ ସୁଦୁରାୱ୍‍ ତମ୍ୱା ମୁଦ୍ରା ଆୱୁ ରେଣ୍ଡ୍‍ ଅଣ୍ଡୟ୍‌‍ ବେଡ଼୍‍ୟାଦ୍‍ ତମ୍ବା ମୁଦ୍ରା ତଡ଼୍‍ ସାମାନ୍‍ । ସୁଦୁରାଦିଙ୍କ୍‍ ଲାପ୍‍ଟସ୍‍ ନୁ ବେଡ଼୍‍ୟାଦିଙ୍କ୍‍ କଡ୍ରାଟେସ୍‍ କେତିତଡ଼୍‍ । ଆ ବାକ୍‍ସତାଗ୍‍ ୱାଟ୍‍ତେ । 43 ଜିସୁ ଶିଷ୍ୟଡ଼୍‍କିଙ୍କ୍‍ ସତ୍‍ କେତ୍‍ତଣ୍ଡ୍‍, "ଇ ଗରିବ୍‍ ରାଣ୍ଡିନ୍‍ ଦାନ ୱେର୍‍ବାଗାତଡ଼୍‍ ଇସ୍‍ମାନ୍ଦାନ୍‍ ଦନ୍‍ତାଗାଙ୍କ୍‍ ନାର୍ଗେ । 44 ସାୱ୍‌କାରିଡ଼୍‌ ତାମ୍‍ ମିଗ୍‍ଲ୍‍ତେ ଦନ୍‍ତାଗାଙ୍କ୍‍ ଇସ୍‍ମିନ୍ଦେଡ଼୍‍, କିନ୍ତୁ ଇ ନାଟାଡ଼୍‍ ତାନ୍‍ ଦରିଦ୍ର୍ୟ ତଡ଼୍‍ ତାନ୍‍ ଗାରେ ସମ୍ପତି ବାତ୍‍ ମାତ୍‍ତେ, ସାରେ ଇତ୍‍ତେ ।"