1 ଜିସୁ ଅଡ଼୍‌‍କିଂଙ୍କ୍‍ ମେଣ୍ଡ୍‍ କେତ୍‍ତଣ୍ଡ୍‍, "ନାନ୍‍ ମିକିଙ୍କ୍ ସତ୍‍ କେସ୍‍ ନେଏତୁତାନ୍‍, ଇଶ୍ୱର୍‌ତେ ରାଜ୍ୟ ଶକ୍ତିତଡ଼୍‍ ୱାଦାନାଦ୍‍ ନୁ ଆଦାନାଦ୍‍ ଉଡ଼ାନ୍‍ ଯାକ ଇଗ୍‍ ମାନ୍ଦାନ୍‍ ବେସ୍‍କ୍‍ତଡ଼୍ ନାରୁଡ଼୍‍ ଡଲଡ଼୍‍ ।"

2 ✝ ୯:୨ ୨ ପିତର୍‌ ୧:୧୭,୧୮. ଆଦିନ୍‌ ଆରୁ ଦିନାତେ ପେର୍କେ ପିତର, ଯାକୁବ୍‍ ନୁ ଯୋହନ୍‌ତିଙ୍କ୍ ସାଙ୍ଗେ ଅସ୍‍ ଜିସୁ ଅଣ୍ଡୟ୍‌ ଡେଙ୍ଗ୍‍ମାନ୍ଦାନ୍‍ ମେଟେତାଗ୍‍ ଆତ୍‍ତଡ଼୍‍ । ଆଗେ ବେନଡ଼୍‍ବା ଇଲକଟ ମାତ୍‍ତଡ଼୍‍ । ଶିଷ୍ୟଡ଼୍ ଉଡ଼ଉଡ଼ ଜିସୁନାଦ୍‍ ଅଣ୍ଡୟ୍‌‍ ବେସୁଙ୍କ୍‍ ଉଡ଼୍‍ୱେ ଲେକାମ୍ ତନ୍ଦତଣ୍ଡ୍ । 3 ଅନାଦ୍‌‍ ସିଲା ପାଣ୍ଡ୍ରି ଆସ୍‍ ଗାଟି ୱେୟିସ୍‍ ଆତ୍‍ତେ ଜଗତ୍‍ତେ ବେନ ଆଦିଙ୍କ୍‍ ନର୍‍ସ୍‍ ଆସର୍‍ ପାଣ୍ଡ୍ରି ମାଡ଼୍‍ପାର୍‍ୱଡ଼୍‍ ଆୟେଡ଼୍‍ । 4 ତାନ୍‍ ପେର୍କେ ମୁୱୁଡ଼୍‍ ଶିଷ୍ୟଡ଼୍ ଉଡ଼୍‌ତଡ଼୍‍, ଏଲିୟ ନୁ ମୋଶାଲ୍‌‍ ପେଇସ୍‍ ମିକା ଜିସୁନ୍‍ତଡ଼୍‍ ତିର୍‍ୟା ତିର୍‍ୟି ଆଦୁତଡ଼୍‍ । 5 ପିତର୍‍ ଜିସୁଙ୍କ୍‍ କେତ୍‍ତଣ୍ଡ୍‍, "ଗୁରୁ, ଇଦ୍‍ ବେସର୍‍ ସାର୍‍ଦେତେ ଗଟ୍‍ ଯେ ନେଣ୍ଡ୍‍ ମାନାଡ଼୍‍ ଇଗେ ମିନ୍ଦେଡ଼୍‍ । ଇଗ୍‍ ମୁଣ୍ଡ୍ ଗୁଡ଼୍‍ସା ତିଆର୍‍ ମାଡ଼ିକା । ଅଣ୍ଡୟ୍‌‍ ନି ମାଇଦିଙ୍କ୍ ଅଣ୍ଡୟ୍‌‍ ମୋଶାନ୍‌ ମାଇଦିଙ୍କ୍ ନୁ ମେଣ୍ଡ୍‍ ଅଣ୍ଡୟ୍‌ ଏଲିୟନ୍‍ ମାଇଦିଙ୍କ୍ ।" 6 ପିତର୍‍ ବାତେ କେତିତଣ୍ଡ୍‍, ଇଞ୍ଜ୍‍ ଆଲ୍‍ସକଟ ଇ ଗଟ୍‍ କେସ୍‍ମାତ୍‍ତଣ୍ଡ୍‍ । ଇତ୍କେ ଶିଷ୍ୟଡ଼୍ ପିନା ୱେର୍‍ସ୍‍ ମାତ୍‍ତଡ଼୍‍ ।

7 ✝ ୯:୭ ମାତିଉ 3:୧୭; ମାର୍କ ୧:୧୧; ଲୁକ 3:୨୨. ଅଟାତ୍‍ ମୟଲ୍‍ ତାଗାଙ୍କ୍‍ ଅଣ୍ଡୟ୍‌‍ ମାବ୍‍ ତନ୍ଦ୍‍ତେ ନୁ ଆଦିନ୍‌ ନିଡ଼୍‍କେ ଅଡ଼୍‌‍କିଂଙ୍କ୍ ମିସ୍‍ତେ । ମେଣ୍ଡେ ଆ ମାବ୍‍ତେ ଲୋପେଙ୍କ୍ ଅଣ୍ଡୟ୍‌‍ ଗଟ୍‍ କେଞ୍ଜାଙ୍କ୍ ଆତ୍‍ତେ, "ହୋ ନା ପ୍ରିୟ ମାର୍‍, ଇନାଦ୍‍ ଲେଙ୍ଗ୍ ମାନ୍‍ ଇସ୍‍ କେଞ୍ଜାଟ୍‍ ।" 8 ଆସୁଟ୍‍ ଶିଷ୍ୟଡ଼୍ ସାରେ ପାକା ସିଟ୍‍ପାଟ୍‍ ଉଡ଼ି ମାତଡ଼୍‌ ଜିସୁନ୍‍ ୱିଡ଼୍‍ସି ଆଗେ ୱେର୍‍ ବେନଙ୍କ୍ ଉଡ଼ଡ଼୍ ।

9 ଅଡ଼୍‌‍ ମେଟେତାଗାଙ୍କ୍‍ ଡିଗାନ୍‍ ୱେଲେ ଜିସୁ ଅଡ଼୍‌‍କିଂଙ୍କ୍‍ ଗଟ୍‍ ଇସ୍‍ ତେତ୍‍ତଣ୍ଡ୍‍, "ନେଣ୍ଡ୍‍ ବାତେ ଉଡ଼ି ମିନ୍ଦେଡ଼ି, ନାରୁନ୍‌ପିଲେ ଡଲ୍‍ତାଙ୍କ୍‍ ତେଦ୍‍ନା ଜାକ ଆ ଗଟ୍‍ ବେନଡ଼୍‍କ୍‌ କେଲ୍‍ମାଟ୍‍ ।"

10 ଜିସୁନ୍‍ ଆଦେଶ୍‍ ଅଡ଼୍‌‍ ପାଲନ୍‍ ମାଡ଼୍‍ତଡ଼୍‍, କିନ୍ତୁ ଇ ବିଷୟ୍‍ତେ ଅଡ଼୍‌‍ ଅଡ଼୍‌ ଲୋପେ ଆଲଚନା ମାଡ଼୍‍ତଡ଼୍‍, "ଡଲି ତେଦାନାଦ୍‍" ଇତ୍‍କେ ବାତେ ?

11 ✝ ୯:୧୧ ମାତିଉ ୧୧:୧୪. ଅଣ୍ଡ୍‌‍ ଜିସୁଙ୍କ୍ ପାଚାରା ମାଡ଼୍‍ତଣ୍ଡ୍‍, "ଏଲିୟ ମୁନେଙ୍କ୍‍ ୱାଦ୍‍ତଣ୍ଡ୍ ଇଞ୍ଜ ମାନ୍‍ ଦର୍ମଶାସ୍ତ୍ର ତେ ଗୁରୁଡ଼୍‍ ବାତେଙ୍କ୍‍ କେତୁତଡ଼୍‍ ?" 12 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍ "ମୁନେତ୍‍ ଲେକାମ୍ ସାରେ ବିଷୟ୍‍ତେ ତିଆର୍‍ ମାଡ଼ନ୍‍ ମାଇଦିଙ୍କ୍‍ ଏଲିୟ ମୁନେ ୱାଦାନ୍‍ ଗଟ୍‍ । ମେଣ୍ଡେ ନାରୁନ୍‌ଫିଲେ ନାର୍ଗେ ଦୁଃକାମ୍‍ ତିପାଲ୍‍ ଆତ୍‍ତଡ଼୍‍ ଇଞ୍ଜ ଶାସ୍ତ୍ରତାଗ୍‍ ବାତେଙ୍କ୍‍ ଲେକା ମିନ୍ଦେ ? 13 ଅଣ୍ଡ୍‌ ବେଲା ଆଇନ୍‌, ନାନ୍‍ ମିକିଂଙ୍କ୍‍ କେସିଦୁତାନ୍, ଏଲିୟ ୱାସ୍‍ ହେୱ୍‍ସ୍‍ ମିନ୍ଦେଣ୍ଡ୍‍ ନୁ ନାରୁଡ଼୍‍ ଅନ୍‌‍ ପରୁ ମନ୍‍ ଇଚ୍ଛା ବ୍ୟବହାର୍‌ ମାଡ଼ିମିନ୍ଦେଡ଼୍‍ । ଇଦିନ୍‍ ମାଇଦିଙ୍କ୍‍ ଅନ୍‌‍ ବିଷୟ୍‍ତେ ଶାସ୍ତ୍ରତାଗ୍‍ ବାତେ କେସ୍‍ମିନ୍ଦେଡ଼୍‍, ଆୱ୍‍ସାରେ ଗଟେମ୍‍ ଆଦ୍‍ତା ।"

14 ଅଡ଼୍‌‍ ୱେର୍‍ ଶିଷ୍ୟଡ଼୍ ଗାରେ ହେୱ୍‍ସ୍‍ ମାନ୍ଦାନ୍‍ୱେୟ୍‍, ଆଗେ ନାର୍ଗେ ନାରୁଡ଼୍‍ ଗୁଡ଼ି ମାତ୍‍ତଡ଼୍‍ ନୁ ଆ ଶିଷ୍ୟଡ଼୍‍ତ ବେସ୍‍କ୍‍ତଡ଼୍ ଦର୍ମଗୁରୁଡ଼୍‍ ରାମ୍‍କ୍ ମାଡ଼ମାତ୍‍ତଡ଼୍‍ । 15 ନାରୁଡ଼୍‍ ଜାପେ ଜିସୁଙ୍କ୍ ଉଡ଼ି ଦାଦ୍‍ରେଲ୍‍ତଡ଼୍‍ ନୁ ମିରି ଆଞ୍ଜ୍ ଅଂକିଙ୍କ୍‌ ମଡ଼୍‍କ୍‍ ତଡ଼୍‍ । 16 ଜିସୁ ଶିଷ୍ୟଡ଼୍‍କିଙ୍କ୍‍ କେତ୍‍ତଣ୍ଡ୍‍, "ଅଡ଼୍‌‍ ତ ବେନ୍‍ ବିଷୟ୍‍ତେ ରାମ୍‍କ୍ ମାଡ଼ମାତ୍‍ତିଡ଼୍‍ ?"

17 ନାରୁଡ଼୍‍ ଲୋପେଙ୍କ୍ ଅର୍‍ତୁଣ୍ଡ୍‍ ଉତ୍ତର୍‍ ଇସ୍‍ କେତ୍‍ତଣ୍ଡ୍‍, ଗୁରୁ, ନା ମାରିଙ୍କ୍ ବୁତ୍‌ ‍ପୟ୍‍ତେ ନୁ ଅଣ୍ଡ୍‌ ଗଟି ତିର୍ୟାଙ୍କ୍‍ ପାର୍‍ୱଣ୍ଡ୍‍ । 18 ବୁତ୍‌ ଅଂକିଙ୍କ୍‌ ବେସୁଙ୍କ୍‍ ବେସୁଙ୍କ୍‍ ନେଲ୍‍ ରାପିଦୁତ୍‌ । ଆସୁଟ୍‍ ଅନ୍‌‍ ପାୟୁର୍‍ତାଗାଙ୍କ୍‍ ବୟୁଲ୍‍ ପେୟ୍‍ତିତ୍‍, ଅଣ୍ଡ୍‌ ଅନ୍‌‍ ପାଲ୍‍କିଙ୍କ୍‍ କର୍‍କୁତଣ୍ଡ୍‍ ନୁ ଅନ୍‌‍ ମେନ୍ଦୁଲ୍‍ ମେୟ୍‍ଲ । ବୁତ୍‌ ୱିର୍‍ସ୍ପାନ୍‍ ମାଇଦିଙ୍କ୍‍ ନି ଶିଷ୍ୟଡ଼୍‍କିଙ୍କ୍‍ କେତ୍‍ତାନ୍‍, କିନ୍ତୁ ଅଡ଼୍‌‍ ବାତ୍ ବା ମାଡ଼୍‍ପାର୍‍ୱଡ଼୍‍ ।

19 ଜିସୁ ଅଡ଼୍‌‍କିଂଙ୍କ୍‍ କେତ୍‍ତଣ୍ଡ୍‍, "ମିଡ଼୍ ବେସର୍‍ କମ୍‍ ବିଶ୍ୱାସିଡ଼୍ । ମି ତଡ଼୍‍ ନାନ୍‍ ମେଣ୍ଡେ ବେସ୍‌କ୍ ଦିନା ମାନ୍ତ୍‍ତାନ୍‍ ? ପେକାଙ୍କ୍‍ ନା ଗାରେ ପୟ୍‍ସ୍‍ ତାଡ଼ାଟ୍‍ !" ଅଡ଼୍‌‍ ଅକିଂଙ୍କ୍‍ ଜିସୁନ୍ ଗାରେ ତାତ୍‍ତଡ଼୍ ।

20 ପ୍ରେତାତ୍ମା ଜିସୁଙ୍କ୍‍ ଉଡ଼ ୱାନାକେ ପେକାଙ୍କ୍‍ ଚେତ୍‍ ଇଲ୍‍ୱେ ମାଡ଼ି ନେଲ୍‍ ରାପି ପେକାନ୍‍ ପାୟୁର୍‍ତାଗାଙ୍କ୍‍ ବୟୁଲ୍‍ ପେସ୍‍ପି ନେଲ୍‍ ପର୍‍ଲାଙ୍କ୍‍ ପସ୍‍ତଣ୍ଡ୍‍ । 21 ଜିସୁ ତାମ୍‍ ବାବାଙ୍କ୍‍ କେତ୍‍ତଣ୍ଡ୍‍, "ବେସ୍‌କ୍ ଦିନା ପୟ୍‍ସ୍‍ ଅଣ୍ଡ୍‌‍ ଇଲା ଆତ୍‍ତଣ୍ଡ୍‍ ?" 22 ଅଣ୍ଡ୍‌‍ ଉତ୍ତର୍‍ ଇତ୍‌ତଣ୍ଡ୍‌‍ "ପିଲେକଂସ୍‍ । ବୁତ୍‌ ଅଂକିଙ୍କ୍‌ କିସ୍‍ତାଗ୍‍ ବା ଏର୍‍ଦାଗ୍‍ ରାପି ଆୱ୍‍କାନ୍‍ ମାଇଦିଙ୍କ୍‍ ନାର୍ଗେଦାମ୍‍ ଚେଷ୍ଟା ମାଡ଼୍‍ତେ । ଗୁରୁ ! ନିଜାମ୍‍ ଆତ୍କେ, ଦୟାମାଡ଼ି ମାକିଙ୍କ୍‍ ଇଗାଙ୍କ୍‍ ସାହାଯ୍ୟ ମାଡ଼ା ।"

23 ଜିସୁ କେତ୍‍ତଣ୍ଡ୍‍, "ହଁ !" ବେନ ବିଶ୍ୱାସ ମାଡ଼ିତଣ୍ଡ୍‍, ଅନ୍‌‍ ଗାରେ ସାରେ ନିଜାମ୍ ।

24 ପେକାଲଡ଼୍‍ ବାବାଲ୍‍ ଗାଟି ଲେଙ୍ଗ୍‍ତେ କେତ୍‍ତଣ୍ଡ୍‍, "ନା ବିଶ୍ୱାସ୍‍ ମିନ୍ଦେ, କିନ୍ତୁ ଅବିଶ୍ୱାସି । ନା ବିଶ୍ୱାସ୍‍ ଅଦିକ୍‌ ମାଡ଼ାନ୍‍ ମାଇଦିଙ୍କ୍‍ ନାକିଙ୍କ୍‍ ସାହାଯ୍ୟ ମାଡ଼ା ।"

25 ଜିସୁ ଉଡ଼୍‍ତଣ୍ଡ୍ ସାରେ ପାକାଙ୍କ୍‍ ନାରୁଡ଼୍‍ ଅନ୍‌‍ଗାରେ ୱାସ୍‍ମାତ୍‍ତଡ଼୍‍ । ଆଦିଙ୍କ୍‍ ଆ ପ୍ରେତାତ୍ମାତିଙ୍କ୍‍ ଗଟ୍‍ ଇତ୍‌ତଣ୍ଡ୍‌‍, "ତିର୍‍ୟେ ପାର୍‍ୱେ ନନ୍ ନୁ କେଞ୍ଜାଙ୍କ୍ ପାର୍‍ୱେ ଆତ୍ମା ନାନ୍‍ ନିକିଙ୍କ୍ କେତୁତାନ୍‍, ଇ ପେକାନ୍‍ ଲୋପେଙ୍କ୍‍ ପେୟ୍‍ସ୍‍ ଅନ୍‌‍ ମେଣ୍ଡେ ବେସୁଙ୍କ୍‍ ବା ଅନ୍‌‍ ଲୋପେ ନେଙ୍ଗ୍‍ମା ।"

26 ପ୍ରେତାତ୍ମା ଲେଙ୍ଗ୍‌ଦେ କିଡ଼୍‍କି ମିକା ପେକାଙ୍କ୍‍ ନେଲ୍‍ ରାପି ଅନ୍‌‍ଲୋପେଙ୍କ୍‍ ପେୟ୍‍ସ୍‍ ଆତ୍‍ତେ । ଚେତ୍‍ଇଲ୍‍ୱେ ମାଡ଼ି ପେକାଙ୍କ୍ ମଡ଼୍‍ଦେ ଲେକାମ୍‍ ତନ୍ଦ୍‍ତଣ୍ଡ୍‍ ନୁ ସାରେତଡ଼୍‍ କେତ୍‍ତଡ଼୍‍, "ଅନ୍‌‍ ଡଲ୍‍ତଣ୍ଡ୍‍ ।" 27 କିନ୍ତୁ ଜିସୁ ଅନ୍‌‍ କାଇ ପୟ୍‍ସ୍‍ ଅଂକିଙ୍କ୍‌ କେତ୍‍ତଣ୍ଡ୍‍ ନୁ ଅଣ୍ଡ୍‌‍ ତେଦି ନିତ୍‍ତଣ୍ଡ୍‍ ।

28 ଜିସୁ ଲନ୍‍ ଲୋପେ ଆତ୍‍ତେ ପେର୍କେ ଶିଷ୍ୟଡ଼୍ ଅଂକିଙ୍କ୍‌ ୱେର୍‍କଟ୍‌ ପାଚାରା ମାଡ଼୍‍ତଡ଼୍‍, "ମାମ୍‍ ବାତେଙ୍କ୍‍ ଆ ପ୍ରେତାତ୍ମାତିଙ୍କ୍‍ ତଲିଦ୍‍ ପାର୍‍ୱମ୍‍ ?" 29 ଜିସୁ ଉତ୍ତର୍‍ ଇତ୍‌ତଣ୍ଡ୍‌‍, "ଇଦ୍‍ଲେକାମ୍ ପ୍ରେତାତ୍ମାକିଙ୍କ୍‍ ମାତର୍ ପ୍ରାର୍ତନାତେ ଶକ୍ତି ତଡ଼୍ ତଲାଙ୍କ୍ ଆଦ୍‍ତେ-ୱେର୍‍ ଉପାୟ୍‍ ଇଲେ ।"

30 ଜିସୁ ନୁ ତାନ୍‍ ଶିଷ୍ୟଡ଼୍ ଆ ପଡ଼୍‍ୟ୍‍ ୱିଡ଼୍‍ସି ଗାଲିଲୀ ଅଞ୍ଚଲ ଲୋପେଇସ୍‍ ଆତ୍‍ତଡ଼୍‍ । ଅଣ୍ଡ୍‌‍ ବେଗ୍‍ମିନ୍ଦେଣ୍ଡ୍‍, ବେନଡ଼୍‍ ପୁନ୍‍ମାକିଡ଼୍‍ ଇଞ୍ଜ ଜିସୁ ଇଚ୍ଛା ମାଡ଼ ମାତ୍‍ତଣ୍ଡ୍‍, 31 କିନ୍ତୁ ଇଦ୍‍ ସମୟତେ ଜିସୁ ଶିଷ୍ୟଡ଼୍‍କିଙ୍କ୍‍ ବୁଜାମାଡ଼ି କେସ୍‍ମାତ୍‍ତଣ୍ଡ୍‍, ବେଦ୍‍ପୁଟୁଙ୍କ୍, "ମନୁଷ୍ୟପୁତ୍ର," ନାରୁଡ଼୍‍ କାଇଦେ ଦର୍ସ୍କି ଅସ୍‍ ମାୟି ଆଦ୍‍ତଡ଼୍‍, କିନ୍ତୁ ବେଦ୍‍ପୁଟୁଙ୍କ୍ ଅଣ୍ତ୍‌ ଡଲାନ୍‍ ମୁଣ୍ଡ୍‍ଦିନାତେ ପେର୍କେ ଅଣ୍ଡ୍‌ ଜିୱେ ଆଦ୍‍ତଣ୍ଡ୍‍ । 32 ଶିଷ୍ୟଡ଼୍ ଇ ଗଟ୍‍ତେ ଅର୍ତ ପୁନ୍ଦାଙ୍କ୍‍ ପାର୍‍ୱଡ଼୍‍ । କିନ୍ତୁ ଆ ବିଷୟ୍‍ତେ ଅଂକିଙ୍କ୍‌ ମେଣ୍ଡେ ପ୍ରଶ୍ନ ମାଡ଼ାଙ୍କ୍‍ ୱେର୍‍ତଡ଼୍‍ ।

33 ଅଡ଼୍‌‍ କପର୍ନାହୁମ୍‍ ତାଗ୍‍ ଏୱ୍‍ତଡ଼୍‍ ଲୋନ୍‌‍ ନେଙ୍ଗ୍‍ତେ ପେର୍କେ ଜିସୁ ଶିଷ୍ୟଡ଼୍‍କିଙ୍କ୍‍ ପାଚାରାମାଡ଼୍‍ତଣ୍ଡ୍, "ଆର୍‍ଦାଗ୍‍ ୱାଦାନ୍‍ୱେୟ୍‍ ମିଡ଼୍‍ ବେନ୍‍ ବିଷୟ୍‍ତେ ରାମ୍‍କ୍‍ ମାଡ଼ମାତ୍‍ତିଡ଼୍‍ ?"

34 ✝ ୯:3୪ ଲୁକ ୨୨:୨୪. ଅଡ଼୍‌‍ ଉତ୍ତର୍‍ ଇୱକଟ ମାତ୍‍ତଡ଼୍‍, ବାତେଙ୍କ୍‌ଇତ୍କେ ଅଡ଼୍‌‍ ଲୋପେଙ୍କ୍‍ ସାରେତିଙ୍କ୍ ବେନଣ୍ଡ୍ ବେଡ଼୍‍ୟଣ୍ଡ୍‍, ଇ ବିଷୟତେ ଅଡ଼୍‌‍ ଆର୍‍ଦାଗ୍‍ ଆଲ୍‍ସ ମାତ୍‍ତଡ଼୍‍ । 35 ✝୯:3୫ ମାତିଉ ୨୦:୨୬,୨୭; ୨3:୧୧; ମାର୍କ ୧୦:୪3,୪୪; ଲୁକ ୨୨:୨୬.ଜିସୁ କୁଦି ଅନ୍‌‍ ବାରଜାନ୍‍ ଶିଷ୍ୟଡ଼୍‍କିଙ୍କ୍‍ ଗାରେ କାର୍ଙ୍ଗି ଅଡ଼୍‌‍କିଂଙ୍କ୍‍ କେତ୍‍ତଣ୍ଡ୍‍, "ବେନ ମୁନେ ଜାଗା ଇଚ୍ଛା ମାଡ଼ିତଣ୍ଡ୍‍, ଅଣ୍ଡ୍‌ ପେର୍କେ ମାନିଣ୍ଡ୍‍ ନୁ ସାରେତଡ଼୍‍ଦେ ସେବକ ଆଇନ୍‌ ।" 36 ତାନ୍‍ପେର୍କେ ଅଣ୍ଡ୍‌ ଅର୍‍ତୁଙ୍କ୍‍ ବାବୁଙ୍କ୍‍ ତାସ୍‍ ସାରେତଡ଼୍‍ ମୁନେ ନିଲ୍‍ସ୍ପ୍‍ତଣ୍ଡ୍‍, ମେଣ୍ଡେ ଅଂକିଙ୍କ୍‌ ବର୍‍ ମାଡ଼ି କେତ୍‍ତଣ୍ଡ୍, 37 ✝୯:3୭ ମାତିଉ ୧୦:୪୦; ଲୁକ ୧୦:୧୬; ଯୋହନ୍‌ ୧3:୨୦."ବେନଆଇ ନା ପେଦେର୍‍ତେ ଇଦ୍‍ଲେକାମ୍‍ ଅର୍‌ତୁଙ୍କ୍‌ ବାବୁଙ୍କ୍‍ ସ୍ୱାଗତ୍‍ ମାଡ଼ିତଣ୍ଡ୍‍, ଅଣ୍ଡ୍‌ ନାକିଙ୍କ୍‍ ସ୍ୱାଗତ୍‍ ମାଡ଼ିତଣ୍ଡ୍‍ ନୁ ବେନ ନାକିଙ୍କ୍‍ ଗ୍ରହଣ ମାଡ଼ିତଣ୍ଡ୍, ଅଣ୍ଡ୍‌‍ ମାତର୍‍ ନାକିଙ୍କ୍‍ ଆୟ, ନା ତ୍ରାନକର୍ତ୍ତାଙ୍କ୍‍ ଆନ୍ତେ ଗ୍ରହଣ ମାଡ଼ିତଣ୍ଡ୍‍ ।"

38 ଯୋହନ୍‍ ଜିସୁଙ୍କ୍‍ କେତ୍‍ତଣ୍ଡ୍‍, "ଗୁରୁ ନି ପେଦେର୍‍ ଆସ୍‍ ୱେରଣ୍ଡ୍‍ ନାରୁଣ୍ଡ୍‍ ବୁତ୍‌ ୱୁଡ଼୍‍ସ୍ପାନାଦ୍‍ ମାମ୍‍ ଉଡ଼୍‍ତମ୍‍ ଅଣ୍ଡ୍‌‍ ମା ଦଲତଣ୍ଡ୍‍ ଆୟ୍‍ୱାଙ୍କ୍‍ ମାମ୍‍ ଅଂକିଙ୍କ୍‌ କାର୍‍ଙ୍ଗ୍ ତାଡ଼୍‍ମ ।"

39 ଜିସୁ କେତ୍‍ତଣ୍ଡ୍, "ଇ କାମ୍‍ଦାଗ୍‍ ଅଂକିଙ୍କ୍‌ ତିପାଲ୍ ଇମାଟ୍‍ ।" ବେନ ନା ପେଦେର୍‍ ଆସ୍‍ ଆଶର୍ଯ୍ୟ ପାଡ଼୍‌ୟି ମାଡ଼ିତଣ୍ଡ୍‍, ଅଣ୍ଡ୍‌‍ ସାଙ୍ଗେ ସାଙ୍ଗେ ନା ବିରୁଦ୍ଦ୍‌ତେ ବାତେ କେତ୍‍ ପାର୍‍ୱଣ୍ଡ୍ । 40 ✝୯:୪୦ ମାତିଉ ୧୨:3୦; ଲୁକ ୧୧:୨3.ବେନ ମାନ୍‍ ବିରୁଦ୍ଦ୍‌ ଆୟଣ୍ଡ୍‍, ଅଣ୍ଡ୍‌‍ ମାନ୍‍ ପାକ୍‍ତଣ୍ଡ୍ । 41 ✝୯:୪୧ ମାତିଉ ୧୦:୪୨.ନାନ୍‍ ନିଜାମ୍‌ କେତୁତାନ୍‍, ନା ପେର୍‌କ୍‌ତଣ୍ତ୍‌ ଇଞ୍ଜ ମିକିଂଙ୍କ୍‍ ବେନ ଯଦି ଉନ୍ଦାନ୍‍ ମାଇଦିଙ୍କ୍‍ ଗିଲାସ୍‍ତାଗ୍‍ ଏର୍‍ ଇଦ୍‍ତ, ଅଣ୍ଡ୍‌ ନିଜାମ୍‍ ଅଣ୍ଡ୍‌‍ ମସୀହ ନାଗାଙ୍କ୍‍ ପୁରସ୍କାର୍ ପାହେମ୍‍ ଆଦ୍‍ତଣ୍ଡ୍‍ ।

42 ବେନଆଇ ନା ଇ ବିଶ୍ୱାସିଡ଼୍ ଲୋପେଙ୍କ୍‍ ସାରେତାଗାଙ୍କ୍‍ ସୁଜୁର୍ ମିକା ବିଶ୍ୱାସ୍‍ ଇଲ୍‍ୱେନନ୍ ଗଟାମାଡ଼ିତଣ୍ଡ୍‍, ଅନ୍‌‍ ବଣ୍ଡ୍‍କ୍‍ତାଗ୍‍ ଅଣ୍ଡୟ୍‌‍ ଜାତେକାଲ୍‍ ତହ୍‍ସିସ୍‍ ଅଂକିଙ୍କ୍‌ ସମୁଦ୍ରତାଗ୍‌ ଏସିଦାଙ୍କ୍‍ ଅନ୍‌‍ ମାଇଦିଙ୍କ୍‍ ସାୟ୍‍ ଆଦ୍‍ତେ । 43 ✝୯:୪3 ମାତିଉ ୫:3୦.ଯଦି ନି ଅଣ୍ଡୟ୍‌ କାଇଦେ ସେଙ୍ଗେ ବିଶ୍ୱାସ୍‍ ୱିଡ଼୍‍ସିତ୍‍କେ, ଆ କାଇଦିଙ୍କ୍‍ ନାଡ଼୍‍କି ହେସିମୁଟ୍ । ରେଣ୍ଡ୍ କାଇକ୍‍ ଗାଟି ନିଡ଼୍‍ସ ମାନ୍ଦାନ୍‍ ନର୍‍କତାଗେ ରାଲାନାଗାଙ୍କ୍‍ ଅଣ୍ଡୟ୍‌‍ କାଇ ଇଲକଟ ଅନନ୍ତ ଜିୱୁନ୍‍ତାଗ୍‍ ଆଦାନାଦ୍‌ ସାୟେ । 44 ବାତେଙ୍କ୍ ଇତ୍କେ ଅଡ଼୍‌‍କିଂଙ୍କ୍ ନର୍କତାଗ୍ ପୁଡ଼ିୟ୍‍କ୍ ଡଲ୍‍ଅ, କିସ୍‍ ବେସୁଙ୍କ୍‍ ପିୟ । 45 ଯଦି ମି ୱେରଟ୍‍ ଡେକେତ୍‍ ସେଙ୍ଗେ ବିଶ୍ୱାସ୍‍ ମାଡ଼ିମାନ୍ତ୍‍ତାଡ଼୍‍, ଆ ଡେକେତିଙ୍କ୍‍ ନାଡ଼୍‍କିମୁଟ୍‍ । ରେଣ୍ଡ୍‍ ଡେକାମାଞ୍ଜ୍‍ ନର୍‍କତାଗ୍‍ ରାଲାନ୍ ୱିଡ଼୍‌ସି ୱେରଡ଼୍‍ ଡେକ୍‍ ଇଲକଟ ଅନନ୍ତ ଜିୱୁନ୍‍ ଲାବ୍ ମାଡ଼ାନ୍‍ ନାଦ୍‍ ସାୟେ । 46 ବାତେଙ୍କ୍ ଇତ୍କେ ଅଡ଼୍‌‍କିଂଙ୍କ୍ ନର୍କତାଗ୍ ପୁଡ଼ିୟ୍‍କ୍ ଡଲ୍‍ଅ, କିସ୍‍ ବେସୁଙ୍କ୍‍ ପିୟ । 47 ✝୯:୪୭ ମାତିଉ ୫:୨୯.ଯଦି ମି ୱେର୍‌ଡ୍‍ କଣ୍ଡେତ୍‍ ସେଙ୍ଗେ ବିଶ୍ୱାସ୍ ମାଡ଼ିମାନ୍ତାଡ଼୍, ଆଦିଙ୍କ୍‍ ଏଲ୍‍ସ୍ପିମୁଟ୍‍ । ରେଣ୍ଡ୍ କଣ୍ଡା ମାଞ୍ଜ୍‍ ନର୍‍କତାଗ୍‍ ରାଲାନାଦ୍‌ ୱିଡ଼୍‌ସି ୱେରଡ଼୍‍ କଣ୍ଡା ମାଞ୍ଜ ଇଶ୍ୱର୍‌ତେ ରାଜ୍ୟତାଗ୍‍ ନେଙ୍ଗାଙ୍କ୍‍ ନାଦ୍‍ ସାୟେ । 48 ମନେ ନେହ୍‍ମୁଟ୍‍, ନର୍‍କତ୍‍ ପୁଡ଼୍‍ୟି ବେସୁଙ୍କେ ବା ଡଲ, ଆଗେ ନିଡ଼୍‍ସ ମାନ୍ଦାନ୍‍ କିସ୍‍ ବେସୁଙ୍କ୍‍ ବା ପିୟ୍‍ୟ ।

49 "ଅୱଡ଼୍‍ ତଡ଼୍‍ ବେଦ୍‍ପୁଟୁଙ୍କ୍ ପୁଜାନାଦିନ୍‍ ତଡ଼୍‍ ସାୟେ ଆଦ୍‍ତେ, ଆଦେପୁଟୁଙ୍କ୍ କିସ୍‌ ତଡ଼୍‌ ସାରେତଡ଼୍‌ ପବିତ୍ର ଆଦ୍‌ତଡ଼୍‌ ।"

50 ✝ ୯:୫୦ ମାତିଉ ୫:୧3; ଲୁକ ୧୪:3୪,3୫. "ଅୱଡ଼୍‍ ଅଣ୍ଡ୍‌ ସାୟେତ୍‍ ଜିନିଷ୍; କିନ୍ତୁ ଅୱଡ଼୍‍ ଯଦି ତାନ୍‍ ଅୱଡ଼୍‍ତେ ମିଙ୍କ୍‍ସ୍ପାନାଦ୍‍ ହରାମାଡ଼ିତେ, ଆଦିଙ୍କ୍‍ ବେଦ୍‍ପୁଟୁଙ୍କ୍ ମିଙ୍କ୍‍ସ୍ପାଙ୍କ୍‍ ଆଦ୍‍ତେ ?"

"ମି ହୃଦୟତାଗ୍‍ ସାଙ୍ଗନ୍‍ ଲୋପେ ଅୱଡ଼୍‌ଇନା କାଇଲି ମାନୁଟ୍, ଆଲାଇତ୍କେ ମିଡ଼୍‍ଆନ୍‌ତେ ମାନ୍ଦ୍‍ପାର୍‍ଦ୍‍ତିଡ଼୍‍ ।"