ମାତିଉ 7

ବାଗାତ୍ ନାରୁଡ଼ାଦ୍ ଦଷ୍ ପୟିତାନଡ଼୍

1 "ବିଚାର୍ ମାଡ଼ମାଟ୍, ଆଲାତ୍କେ ଇଶ୍ୱର୍‌ ମିକିଂଙ୍କ୍ ବିଚାର୍ ମାଡ଼ଣ୍ଡ୍ । ଇଶ୍ୱର୍ ମିକା ନିୟାଦ୍ ଦଷ୍ ପୟଣ୍ଡ୍ ।" 2 ✝୭:୨ ମାର୍କ ୪:୨୪.ବାଗାତ୍ ନାରୁଡ଼ାଦ୍ ଦଷ୍ ବିଷୟ୍‍ତେ ମିଡ଼୍ ବେଦ୍‍ପୁଟୁଙ୍କ୍ ବିଚାର୍ ମାଡ଼ିତିଡ଼୍, ଇଶ୍ୱର୍ ଆଦେପୁଟୁଙ୍କ୍ ମିୟାଦ୍ ବିଚାର୍ ମାଡ଼ିତନ୍ । ମିଡ଼୍ ବାଗାତ୍ ନାରୁଡ଼୍ ସେଙ୍ଗେ ବେନ୍ ନିୟମ୍ ତିଆର୍ ମାଡ଼ୁତିଡ଼୍, ଆଦ୍ ନିୟମ୍ ଇଶ୍ୱର୍ ମିଇ ସେଙ୍ଗେ ମିକା ତିଆର୍ ମାଡ଼ିତନ୍ । 3 ମେଣ୍ଡେ, ବାତେଙ୍କ୍ ନି ତାମୁଣ୍ଡ୍‌ ତେ କଣ୍ଡେତାଗ୍ ମାନ୍ଦାନ୍ ଇଡ଼୍‍ପେତିଙ୍କ୍ ଉଡ଼ୁତି, ବାତେଙ୍କ୍ ଇତ୍କେ ନି ନିଜେ କଣ୍ଡେତାଗ୍ ବେନେ ଜିଟ୍‍କେ ମିନ୍ଦେ, ଆଦ୍ ହାଲ୍‍ସି ଉଡ଼୍‍ୱିନ୍ ? 4 ନିଜେତ୍ କଣ୍ଡେତାଗ୍ ୱେର୍‍କ୍ ଇଡ଼୍‍ପେ ମାନ୍‍ନା ନିମ୍‍ ବେନ୍ ସାହାସ୍‍ତେ ନି ତାମୁଣ୍ଡ୍‌ତେ କଣ୍ଡେତାଗାଙ୍କ୍ ଇଡ଼୍‍ପେତିଙ୍କ୍ ପେସ୍ପିଦ୍‍ତାନ୍ ଇଞ୍ଜ କେତୁତିନ୍ ? 5 ରେ ଦୁଷ୍ଟ ନାରୁଡ଼୍ ! ମିଇ କଣ୍ଡେତାଗ୍ ମାନ୍ଦାନ୍ ୱେର୍‍କ୍ ଇଡ଼୍‍ପେ ମୁନେନ୍ ଟେଣ୍ଡାଟ୍ । ଆଲେକେ ମିଇ ତାମୁଣ୍ଡ୍‌ତେ କଣ୍ଡେତାଗ୍ ମାନ୍ଦାନ୍ ଇଡ଼୍‍ପେତିଙ୍କ୍ ସହଜ୍‍ତେ ଉଡ଼େ ପାର୍‍ଦ୍‍ତିନ୍ ।