1 ହୋ ନା ମାର୍‌, ଯଦି ମିଡ଼୍‌ ନିଜେତ୍‌ ଗାରେତଡ଼୍‌ ସେଙ୍ଗେ ନିଜେ ଦାୟିଆସ୍‌ ମାନୁଟ୍‌, ଯଦି ୱେରେତନ୍‌ ମାଇଦିଙ୍କ୍‌ କାଇ ଇସ୍‌ମାନୁଟ୍‌, 2 ଆଲେକେ ମିଡ଼୍‌ ନିଜର ପାୟୁର୍‌ତେ ବାକ୍ୟଲେକାତ୍‌ ଉଡ଼୍‌ଦାଗ୍‌ ରାଲିମିନ୍ଦେଡ଼ି ନୁ ନିଜର ପାୟୁର୍‌କନ୍‌ ଗଟ୍‌ତେ ପୟିସ୍‌ ମିନ୍ଦେଡ଼ି । 3 ହୋ ନା ମାର୍‌, ନିମ୍ମେ ଇଞ୍ଜେ ଇ ସାରେ ପାଡ଼୍‌ୟି ମାଡ଼ାଟ୍‌, ନିଜେତିଙ୍କ୍‌ ଉଦ୍ଦାର୍ ମାଡ଼ାଟ୍‌, ବେଲାକି ମିଡ଼୍‌ ନିଜର ସାଙ୍ଗନ୍‌ କାଇଦେ ଆସମିନ୍ଦେଡ଼ି; ଆନ୍‌ନୁଟ୍‌, ନିଜେତିଙ୍କ୍‌ ନମ୍ର ମାଡ଼ି ମି ଗାରେତ୍‌ ଲତ୍‌ତେନଙ୍କ୍‌ ଉଦ୍ଦାର୍ ଆଦାଙ୍କ୍‌ ବିନତି ମାଡ଼େ । 4 ମିଡ଼୍‌ ନିଜର କଣ୍ଡାଙ୍କ୍‌ ଉସ୍‌କାଡ଼୍‌ ଆଦାନଙ୍କ୍‌ ଇମାଟ୍‌, ବା ନିଜେତ୍‌ କଣ୍ଡାମିଣ୍ଡିଙ୍କ୍‌ ପିଃତାନଙ୍କ୍‌ ଇମାଟ୍‌ । 5 ନିଜେତିଙ୍କ୍‌ କଡ଼୍‌ମାୱୁଇନା ବନ୍‌ୱାନ୍‌ କାଇଦେକନ୍‌, ପିଟେ ଇନା ୱାଲେତ୍‌ ଉଡ଼ିୟ୍‌ଦେକନ୍‌ ଉଦ୍ଦାର୍ ମାଡ଼ାଟ୍‌ । 6 ହୋ ମଣ୍ଡିନଡ଼ି, ମିଡ଼୍‌ ପେତେତ୍‌ ଗାରେଆନ୍‌, ତାନାଦ୍‌ ପାଡ଼୍‌ୟି ଉଡ଼ି ନୁ ଜ୍ଞାନି ଆୟିମ୍‌ । 7 ତାନ୍‌ ବିଚାର୍ ମାଡ଼ାନଣ୍ଡ୍ କି ମୁକିୟାଲ୍‌ କି ଶାସନ୍ ମାଡ଼ାନଣ୍ଡ୍‌ ବେନ ଇଲ୍‌ୱେମାତ୍କେନେ ଅଣ୍ଡ୍‌ ଏଦ୍‌କାଲାମ୍‌ତେ ନିଜେତ୍‌ କାଦି ତିଆର୍‌ ମାଡ଼ିତଣ୍ଡ୍‌, 8 ମେଣ୍ଡେ, ପସଲ୍ ସମୟତେ କାଦି ଅସରିଞ୍ଚିତଣ୍ଡ୍‌ । 9 ହୋ ମଣ୍ଡିନଡ଼ି, ନିମେ ବେସ୍କ୍‌ଦିନା ଆୟିନା ଉଞ୍ଜିମାନ୍‌ତିନ୍‌ ? ନିମେ ବେସୁଙ୍କ୍‌ ଉସ୍‌କାଡ଼୍‌କନ୍‌ ତେଦିତିନ୍‌ ? 10 ମେଣ୍ଡେ ଇସୁର୍‌ ଉଞ୍ଜ୍‌କେ, ମେଣ୍ଡେ ଇସୁର୍‌ ପାଟ୍‌କେ, ମେଣ୍ଡେ ଇସୁର୍‌ ଉସ୍କାଡ଼୍‌ ଉଞ୍ଜାନ୍‌ ମାଇଦିଙ୍କ୍‌ କାଇକ୍‌ ମାଡ଼୍‌ପା ମାଡ଼୍‌ପି ଆତ୍କେ, 11 ମିଡ଼୍‌ ଗରିବ୍‌ତେମାନ୍ଦାନନ୍‌ ତାଲ୍‌କି ତିନ୍ଦାନନ୍‌ ଇନା, ମେଣ୍ଡେ ମି ଦିନାତ୍‌ତେ ଡଙ୍ଗାଲ୍‌ ନାରୁଡ଼୍‌ ଇନା ଏୱୁଦ୍‌ତଣ୍ଡ୍‌ । 12 ଦୁଷ୍ଟନ୍‌ ମାର୍‌, ପାପ୍ ମାଡ଼ାନ୍‌ ନାରୁଣ୍ଡ୍‌; ଅଣ୍ଡ୍‌ ସାରେଦାମ୍‌ କାରାପ୍‌ ମକମ୍‌ତେ ଉଡ଼ିତଣ୍ଡ୍‌; 13 ଅଣ୍ଡ୍‌ କଣ୍ଡେ ରେଃତାନଣ୍ଡ୍‌, ଅଣ୍ଡ୍‌ ଡେକା ଉତାନଣ୍ଡ୍, ଅଣ୍ଡ୍‌ ୱାଡ଼୍‌ଞ୍ଚ୍‌କିନ୍‌ ତଃସ୍ କେତାନଣ୍ଡ୍; 14 ଅନ୍‌ ହୃଦୟ୍‌ତାଗ୍‌ କାରାପ୍‌ ମାନ୍‌ତେ, ଅଣ୍ଡ୍‌ ସାରେଦାମ୍‌ କାରାପ୍ ଚିନ୍ତେ ମାଡ଼ିତଣ୍ଡ୍‌; ଅଣ୍ଡ୍‌ ରାମ୍‌କିନ୍‌ ୱିଜେ ୱିତିତଣ୍ଡ୍‌ । 15 ଆଦିଙ୍କ୍‌ ଆ ବିପଦ୍ ହଟାତ୍‌ ୱାଦ୍‌ତେ, ମେଣ୍ଡେ, ଅଣ୍ଡ ଉଦ୍ଦାର୍ ଆଦାନଙ୍କ୍ ବାତ୍‌ବା ଉପାୟି ମାନ । 16 ଆରୁ ବିଷୟତିଙ୍କ୍‌ ସଦାପ୍ରବୁ ପାସ୍କିତଣ୍ଡ୍; ସାଟ୍‌ତାନ୍‌ ବିଷୟ୍‌କିଙ୍କ୍‌ ମିକା ଅନ୍‌ ପାସ୍କିତଣ୍ଡ୍‌ । 17 ଆଙ୍କାର୍‌ତେ କଣ୍ଡେ, ମିଚ୍‌କେତାନଡ଼୍‌ ୱାଞ୍ଜେର୍‌ ନୁ ପାପ୍‌ମାଡ଼ାନ୍‌ ନେତୁର୍ କାଇ; 18 କାରାପ୍‌ ଚିନ୍ତେ ମାଡ଼ାନ୍‌ ହୃଦୟ୍‌, କାରାପ୍‌ ପାଡ଼ିୟ୍‌ ମାଡ଼ାନଙ୍କ୍‌ ଉର୍ଗିଙ୍କ୍ ୱାଟାନ୍‌ ପାଦାମ୍‌; 19 ମିଚ୍‌ସାକ୍ଷି ଯେ ମିଚ୍‌ କେତିତ୍‌ ନୁ ବେନ୍‌ ଦାଦାଲଡ଼୍‌ ଲପେ ରାମ୍‌କିନ୍‌ ୱିଜେ ୱିତିତଣ୍ଡ୍‌ ।

20 ହୋ ନା ମାର୍‌, ମିଡ଼୍‌ ନିଜର ବାବାଙ୍କ୍‌ ସାୟେତ୍‌ ଶିକ୍ଷା ପାଲନ୍‌ ମାଡ଼ାଟ୍‌, ମେଣ୍ଡେ, ନିଜର ୟାୟନ୍‌ ଶିକ୍ଷା ୱିଡ଼୍‌ସ୍‌ମାଟ୍‌ । 21 ଆଦ୍‌ ସାରେ ମି ହୃଦୟତାଗ୍‌ ତଃସ୍‌ ନେଃମୁଟ୍‌, ନିଜର ଗୁଡ଼ୁଙ୍ଗେତାଗ୍ ନେଡ଼େମ୍‌ ଇନା ତଃମୁଟ୍‌ । 22 ମିଡ଼୍‌ ତାକିଆଦାନ୍‌ ୱେଲେ ଆଦ୍‌ ମିକିଙ୍କ୍‌ ଆର୍‌ ତଃତିତଣ୍ଡ୍‌, ମେଣ୍ଡେ ଉଞ୍ଜାନ୍‌ ୱେଲେ ଆଦ୍‌ ମି କେପାନଡ଼୍‌; ମିଡ଼୍‌ କେପାନ୍ ୱେଲେ ଆଦ୍‌ ମିଇତଡ଼୍‌ ଗଟି ତିର୍‌ୟ୍‌ତଣ୍ଡ୍‌ । 23 ବେଲାକି ଆ ଆଦେଶ୍‌ କୁପି; ନୁ ଆ ଆଦେଶ୍‌ ୱେସ୍‌; ନୁ ଶିକ୍ଷାତ୍ ମାୟିଦିଙ୍କ୍‌ ଅନୁଯୋଗ ଜିଉନ୍‌ତେ ଆର୍‌; 24 ଅଣ୍ଡ୍‌ ମିକିଙ୍କ୍‌ କାରାପ୍‌ ମୁତେନ୍‌କନ୍‌ ନୁ ୱେର୍‌ ନାଟାଡ଼୍‌ତେ ୱାଞ୍ଜେର୍‌କଞ୍ଚ୍‌ ପେର୍ଲେଗଟି ରକ୍ଷା ମାଡ଼ିତ୍‌ । 25 ମିଇ ହୃଦୟ୍‌ତାଗ୍‌ ତାନ୍‌ ସୁନ୍ଦର୍‌ତିଙ୍କ୍‌ ଲବ୍‌ ମାଡ଼୍‌ମାଟ୍‌; ବା ତାନ୍‌ କଣ୍ଡାରେଃସ୍‌ ମିକିଙ୍କ୍‌ ପସାମାଡ଼ାନଙ୍କ୍‌ ତାଙ୍କ୍‌ ଇମାଟ୍‌ । 26 ବେଲାକି କଜ୍‌ମୁତ୍‌ତେନ୍‌ ମାଇଦିଙ୍କ୍‌ କାଦି ଅବାବ ଆଦ୍‌ତେ, ମେଣ୍ଡେ ବ୍ୟବିଚାର୍‌ ନାଟାଡ଼୍‌ ନାରୁନେ ବାଡ଼ିୟେଦାମ୍‌ ଜିଉତିଙ୍କ୍‌ ପୟିତାନ୍‌ ମାଇଦିଙ୍କ୍‌ ଲୁପ୍‌ଇନା ମାଡ଼ିତ୍‌ । 27 ବେନ୍‌ ବେସୁଙ୍କ୍‌ ନିଜେତ୍‌ ଗୁଣ୍ଡେତାଗ୍‌ କିସ୍‌ ୱାଟିତଣ୍ଡ୍‌, ଆଲେକେ ଅନ୍‌ ଚକେ ବାତେ କାର୍‌ୱ ଆଦ୍‌ତେ ? 28 ବେନ୍‌ ବେସୁଙ୍କ୍‌ ନିଡ଼୍‌ତାନ୍‌ ତାଡ଼୍‌ମିନ୍‌ ପର ତାକିତଣ୍ଡ୍‌, ଆସୁଙ୍କ୍‌ ଅନ୍‌ ପାଦାମ୍‌ତାଗ୍‌ ବାତେ ପଟ୍‌କା ଆୟ ? 29 ନିଜେତ୍‌ ଗାରେ ମାନ୍ଦାନ୍ ଲତ୍‌ତେ ନାଟାଡ଼୍‌ତାଗ୍‌ ବେନ୍‌ ନାରୁଣ୍ଡ୍‌ ଉଞ୍ଜିତଣ୍ଡ୍‌, ଅଣ୍ଡ୍‌ ଆଦ୍‌ଲେକାମ୍‌; ବେନ୍‌ ଆଦିଙ୍କ୍‌ ଇଟିତଣ୍ଡ୍‌, ଅଣ୍ଡ୍‌ ଦଣ୍ଡ ପାହେମ୍‌ ଆଦ୍‌ତଣ୍ଡ୍‌ । 30 ଡ଼ଙ୍ଗାଲ୍‌ କାର୍‌ୱିଙ୍କ୍‌ ଆସ୍‌ ଜିୱେ ରକ୍ଷାତ୍‌ ମାଇଦିଙ୍କ୍‌ ଯଦି ଡଙ୍ଗାଲ୍‌ ଡଙ୍ଗିତଣ୍ଡ୍‌, ଆଲେକେ ନାରୁଡ଼୍‌ ଅକିଙ୍କ୍‌ ପାସ୍କକିତଡ଼୍‌ । 31 ମାତର୍‌ ଅଣ୍ଡ୍‌ ଦରାପଡ଼େମ୍‌ ଆତ୍କେ, ଅକିଙ୍କ୍‌ ସାତ ଗୁଣ ମାଲ୍‌ପାନଙ୍କ୍‌ ଆଦ୍‌ତେ; ନିଜେତ୍‌ ଲତ୍‌ତେ ସାରେ ଆଦିଙ୍କ୍‌ ଇଦାନଙ୍କ୍‌ ଆଦ୍‌ତେ । 32 ୱେରଣ୍ଡ୍‌ ଲାଞ୍ଜେ ମାନେୟି ମୁର୍କ; ଅଣ୍ଡ୍‌ ନିଜେତ୍‌ ଜିୱେ ନଷ୍ଟ ମାଡ଼ିତଣ୍ଡ୍‌, ଅଣ୍ଡ୍‌ ହିଁ ଆଦ୍‌ ମାଡ଼ିତଣ୍ଡ୍‌ । 33 ଅଣ୍ଡ୍‌ ତିପାଲ୍ ଆଦ୍‌ତଣ୍ଡ୍‌ ନୁ ଅପମାନ୍ ପାହେମ୍‌ଆଦ୍‌ତଣ୍ଡ୍‌; ମେଣ୍ଡେ, ଅନ୍‌ ଦଷ୍‌ ବେସୁଙ୍କ୍ ବା ମିଞ୍ଜ । 34 ବେନ୍‌ ନାଟାଡ଼୍‌ତେ ବିଷୟ ଆଙ୍କାର୍ ନାରୁଣ୍ଡ୍‌ ନାର୍ଗେ କପାମ୍‌ତେ ବିଷୟ; ପେର୍ଲେଗଟି କେତାନ୍‌ ୱେଲେ ଅଣ୍ଡ୍‌ ବାତ୍‌ତେ ବା କ୍ଷମା ମାଡ଼ଣ୍ଡ୍‌ । 35 ଅଣ୍ଡ୍‌ ବାତେଆୟି ଲାଞ୍ଚ୍‌ଇତ୍କେ ବା ନେୱଣ୍ଡ୍‌; ବା ନିମେ ନାର୍ଗେ ଲାଞ୍ଚ୍‌ଇତ୍କେ ମିକା ହେଁ ଅଣ୍ଡ୍‌ ମାନେମ୍‌ ଆୟିୟଣ୍ଡ୍‌ ।