1 ବେନ ତଲକ୍‌ ବା ଦୁଷ୍ଟ ମିରିତଣ୍ଡ୍‌; ମାତର୍‌ ଦାର୍ମିକିଡ଼୍‌ ସିଂହଡୁୱ୍‌ ଇନା ସାହସ୍‌ ମାନ୍ଦାନଡ଼୍‌ । 2 ଦେଶତେ କରାପ୍‌ତେ ମାଇଦିଙ୍କ୍‌ ଆଗେତ୍‌ ଅଦିପତି ନାର୍ଗେ ଆଦ୍‌ତଡ଼୍‌; ମାତର୍‌ ବୁଦ୍ଦିମାନ୍‌ ନୁ ଜ୍ଞାନମାନ୍ଦାନ୍‌ ନାରୁଡ଼୍‌ତଡ଼୍‌ ଆଦିନ୍‌ ନିୟମ୍‌ ନାର୍ଗେ ଆଦ୍‌ତେ । 3 ବେନ୍‌ ନାରୁଣ୍ଡ୍‌ ଗରିବବ୍‌ତିଙ୍କ୍‌ କଷ୍ଟ ଇଦ୍‌ତଣ୍ଡ୍‌, ଅଣ୍ଡ୍‌ ଫସଲ୍‌ତିଙ୍କ୍‌ ନଷ୍ଟ ମାଡ଼ାନ୍‌ ଗାଲ୍‌ ୱାର୍‌ସାମ୍‌ ଇନା; ଆଗେତ୍‌ କାର୍‌ୱୁଦେ ଅବାବ୍‌ ଆଦ୍‌ତେ । 4 ନିୟମ୍‌ ୱିଡ଼୍‌ସ୍ତେ ଦୁଷ୍ଟଡ଼୍‌କ୍‌ ପ୍ରଶଂସା ମାଡ଼ିତଡ଼୍‌, ମେଣ୍ଡେ, ନିୟମ୍ ମାନେମ୍‌ ଆଦାନ୍‌ ନାରୁଡ଼୍‌ ଅଡ଼୍‌ତଡ଼୍‌ ବିରଦ୍‌ ମାଡ଼ିତଡ଼୍‌ । 5 କାରାପ୍‌ ନାରୁଡ଼୍‌ ନ୍ୟାୟ ବୁଜେମ୍‌ ଆୟିଅଡ଼୍‌, ମାତର୍‌ ସଦାପ୍ରବୁଙ୍କ୍‌ ମେଃକାନଡ଼୍‌ ସାରେ ବିଷୟ ବୁଜେମ୍‌ ଆଦ୍‌ତଣ୍ଡ୍‌ । 6 ବେନ ରେଣ୍ଡ୍‌ ଆର୍‌ଙ୍ଗ୍‌ ତାକନ୍ କାରାପ୍‌ ନାରୁଣ୍ଡ୍‌ ସାଉକାର୍‌ ଆତ୍କେ ବା ଅନ୍‌ ବାଦୁଲ୍‌ତେ ନିଜର ସାୟେତ୍‌ ଆର୍‌ଦାଗେ ତାକାନ୍‌ ଗରିବ୍ ନାରୁଣ୍ଡ୍‌ ସାୟେ । 7 ବେନ୍‌ ନିୟମ୍‌ ମାନେମ୍‌ ଆଦ୍‌ତଣ୍ଡ୍‌, ଅଣ୍ଡ୍‌ ବୁଦ୍ଦ୍‌ମାନ୍ଦାନ୍ ମାର୍‌; ମେଣ୍ଡେ, ବେନ ଡର୍‌ଡଙ୍କାନଡ଼୍‌ ସାଙ୍ଗ ଆଦ୍‌ତଣ୍ଡ୍‌, ଅଣ୍ଡ୍‌ ନିଜର ବାବାଙ୍କ୍‌ ସିଗ୍‌ ଇଦ୍‌ତଣ୍ଡ୍‌ । 8 ବେନ୍‌ ନାରୁଣ୍ଡ୍‌ କଲନ୍ତର୍‌ ନୁ ନାର୍ଗେମାଡ଼ି ନିଜର ସମ୍ଫତ୍ତି ପେର୍ସ୍ପିତଣ୍ଡ୍‌, ଅଣ୍ଡ୍‌ ଗରିବିଡ଼୍‌ ପର ଦୟାମାଡ଼ାନନ୍‌ ମାଇଦିଙ୍କ୍‌ ଅନ୍‌ ଗୁଡ଼୍‌ପିତଣ୍ଡ୍‌ । 9 ବେନ୍‌ ନାରୁଡ଼୍‌ ନିୟମ୍‌ତିଙ୍କ୍‌ କେଞ୍ଜାନଙ୍କ୍‌ ନିଜର କେୱୁ ମାଲ୍‌ପିତଣ୍ଡ୍‌, ଅନ୍‌ ପ୍ରାର୍ତନାତିଙ୍କ୍‌ ପାସ୍କାନ୍‌ ବିଷୟ ଆଦ୍‌ତେ । 10 ବେନ୍‌ ନାରୁଣ୍ଡ୍‌ ସାୟେତ୍‌ ନାରୁଙ୍କ୍‌ କାରାପ୍‌ ଆର୍‌ଦାଗ୍‌ ଆଦାନଙ୍କ୍‌ ଉଡ଼୍‌ସ୍ପିତଣ୍ଡ୍‌, ଅଣ୍ଡ୍‌ ନିଜର୍‌ ଗୁଇନ୍ଦେତାଗ୍‌ ନିଜେ ରାଲିତଣ୍ଡ୍‌; ମାତର୍‌ ସାୟେ ନାରୁଡ଼୍‌ ସାୟେତ୍‌ ଅଦିକାର ମାଡ଼ିତଣ୍ଡ୍‌ । 11 ସାଉକାରି ନିଜର୍‌ କଣ୍ଢେତେ ଜ୍ଞାନି; ମାତର୍‌ ବୁଦ୍ଦ୍‌ମାନ୍ଦାନନ୍‌ ଗରିବ୍‌ ନାରୁଡ଼୍‌ ଅନ୍‌ ମାନ୍‌ତେ ବିଷୟ ପୁନ୍ଦ୍‌ତଣ୍ଡ୍‌ । 12 ଦାର୍ମିକିଡ଼୍‌ ଜିଡ଼୍‌କେ ଅଦିକ୍‌ ଗୌରବ୍‌ ମାଡ଼ିତଡ଼୍‌; ମାତର୍‌ ଦୁଷ୍ଟଡ଼୍‌ ତେଦ୍‌କେ ଆସୁଟ୍‌ ନାରୁଡ଼୍‌ ନିଜରତିଙ୍କ୍‌ ମିଞ୍ଜ୍‌ସ୍ପିତଡ଼୍‌ । 13 ବେନ ନିଜର କାରାପ୍‌ତିଙ୍କ୍‌ ମୁଚିତଣ୍ଡ୍‌, ଅଣ୍ଡ୍‌ ସାୟେତାଦ୍‌ ପାହେମ୍‌ ଆୟିଅଣ୍ଡ୍‌; ମାତର୍‌ ବେନ୍‌ ନାରୁଣ୍ଡ୍‌ ତାନ୍‌ ବୁଲ୍‌ଦିଙ୍କ୍‌ ମାନେମ୍‌ ଆସ୍‌ ୱିଡ଼୍‌ସିତଣ୍ଡ୍‌, ଅଣ୍ଡ୍‌ ଦୟା ପାହେମ୍‌ ଆଦ୍‌ତଣ୍ଡ୍‌ । 14 ବେନ୍‌ ନାରୁଣ୍ଡ୍‌ ସାରେୱେଲେ କାରାପ୍‌ ପାଡ଼୍‌ୟି ମାଡ଼ାନଙ୍କ୍‌ ୱେର୍‌ଦ୍‌ତଣ୍ଡ୍‌, ଅଣ୍ଡ୍‌ ଲେକେତଣ୍ଡ୍‌; ମାତର୍‌ ବେନ୍‌ ନିଜର ମନତିଙ୍କ୍‌ ଢ଼ାଟାଙ୍କ୍‌ ମାଡ଼ିତଣ୍ଡ୍‌, ଅଣ୍ଡ୍‌ ବିପତ୍‌ତାଗେ ରାଲିତଣ୍ଡ୍‌ । 15 ବେଲାନେ କିଡ଼୍‌କାନ୍‌ ସିଂହଡୁୱ୍‌ ନୁ ଉଡ଼ାନ୍‌ ଏଡ଼୍‌ଜ୍‌; ଆଲାନେ ଗରିବ୍‌ ନାଡ଼ୁର୍‌ତେ ପର ଶାସନ୍‌ ମାଡ଼ାନ୍‌ କର୍ତ୍ତାଲ୍‌ । 16 ବେନ ଶାସନ୍‌କର୍ତ୍ତାଲ୍‌ ବୁଦ୍ଦ୍‌ଇଲ୍‌ୱେନନ୍‌, ଅଣ୍ଡ୍‌ ବା ଅଦିକ୍‌ ଅନ୍ୟାୟ୍‌ ଆଦ୍‌ତଣ୍ଡ୍‌, ମାତର୍‌ ବେନ୍‌ ଲବ୍‌ତିଙ୍କ୍‌ ପାସ୍କିତଣ୍ଡ୍‌, ଅଣ୍ଡ୍‌ ନିଜର ଦିନ୍‌ ପେର୍‌ସ୍ପିତଣ୍ଡ୍‌ । 17 ବେନ୍‌ଆୟି ନାରୁନ୍‌ ଆୱ୍‌କ୍‌ତେ ଦଷିଡ଼୍‌ ସେଙ୍ଗେ ଦଷ୍‌ ଆସ୍‌ ମିନ୍ଦେଣ୍ଡ୍‌ ଅଣ୍ଡ୍‌ ଗୁୟିଦେତାଗ୍‌ ଏୱୁନା ମିରିତଣ୍ଡ୍‌; ବେନ ଅଂକିଙ୍କ୍‌ ଅଟ୍‍କା ମାଡ଼୍‌ମାକିଣ୍ଡ୍‌ 18 ବେନ୍‌ ନାରୁଣ୍ଡ୍‌ ସତ୍‌ତେ ଚାଲେମ୍‌ଆଦ୍‌ତଣ୍ଡ୍‌, ଅଣ୍ଡ୍‌ ଉଦ୍ଦାର୍‌ ପାହେମ୍‌ ଆଦ୍‌ତଣ୍ଡ୍‌; ବେନ୍‌ ନାରୁଣ୍ଡ୍‌ କାରାପ୍‌ ଆର୍‌ଦାଗେ ତାକିତଣ୍ଡ୍‌ ଅଟାତ୍‌ ରାଲିତଣ୍ଡ୍‌ । 19 ବେନ ନିଜର୍‌ ବୁମ୍‌ଦିଙ୍କ୍‌ ଚାଷ୍ ମାଡ଼ିତଣ୍ଡ୍‌, ଅଣ୍ଡ୍‌ ନାର୍ଗେ କାଦି ପାହେମ୍‌ ଆଦ୍‌ତଣ୍ଡ୍‌; ମେଣ୍ଡେ, ବେନ ବେକାର୍‌ ନାରୁଡ଼୍‌ତେ ସାଙ୍ଗ ଆଦ୍‌ତଣ୍ଡ୍‌, ଅଣ୍ଡ୍‌ ନାର୍ଗେ ଗରିବ୍‌ ଆଦ୍‌ତଣ୍ଡ୍‌ । 20 ବିଶ୍ୱାସ୍ତେ ନାରୁନାଦ୍‌ ଆଶିର୍ବାଦ୍‌ ନାର୍ଗେ ଆଦ୍‌ତେ; ମାତର୍‌ ବେନ ସାଉକାର୍‌ ଆଦାନଙ୍କ୍‌ ଅଦିକ୍‌ ଚେଷ୍ଟା ମାଡ଼ିତଣ୍ଡ୍‌, ଅଣ୍ଡ୍‌ ବେଲାବା ଦଣ୍ଡ୍‌ ପାହେମ୍‌ ଆଦ୍‌ତଣ୍ଡ୍‌ ‌ । 21 ମକମ୍‌ଉଡ଼ି ବିଚାର୍‌ ମାଡ଼ାନାଦ୍‌ ସାୟେ ଆୟ । ମେଣ୍ଡେ ଦୁଡ଼େ ରୁଟିତେ ମାଇଦିଙ୍କ୍‌ କାରାପ୍‌ ମାଡ଼ାନାଦ୍‌ ସାୟେ ଆୟ । 22 କାରାପ୍‌ କଣ୍ଡେତ୍‌ ନାରୁଣ୍ଡ୍‌ ସମ୍ପତ୍ତିତେ ପେର୍‌କେ ମିରିତଣ୍ଡ୍‌, ମାତର୍‌ ଅକିଙ୍କ୍‌ ଅବାବ୍ ଆଦ୍‌ତେ ଇଞ୍ଜ ଅଣ୍ଡ୍‌ ପୁନଣ୍ଡ୍‌ । 23 ବୁସା ମାଡ଼ି ଗଟି କେତାନନ୍‌ ନାରୁନ୍‌ ବାଦୁଲ୍‌ତେ ନାରୁଡ଼୍‌କିଙ୍କ୍‌ କାଲ୍‌ପାନ୍‌ ନାରୁଣ୍ଡ୍‌ ମାରେଙ୍କ୍‌ତେ ଅଦିକା ଆଶିର୍ବାଦ୍‌ ପାହେମ୍‌ ଆଦ୍‌ତଣ୍ଡ୍‌ । 24 ବେନ ନିଜର୍‌ ବାବାଙ୍କ୍‌ ବା ୟାୟନ୍‌ ସାମାନ୍‌ ଡଙ୍ଗି କେତିତଣ୍ଡ୍‌, ଇଗେ ବାତେ କାରାପ୍‌ ଇଲେ, ଅଣ୍ଡ୍‌ କାରାପ୍‌ତେ ସାଙ୍ଗ୍‌ । 25 ଆଶେମାଡ଼ାନ୍‌ ନାରୁଣ୍ଡ୍‌ ରାମ୍କ୍‌ ମାଡ଼ିତଣ୍ଡ୍‌, ମାତର୍‌ ବେନ ସଦାପ୍ରବୁନ୍‌ ପର ଆଶେ ୱାଟିତଣ୍ଡ୍‌, ଅଣ୍ଡ୍‌ ଲେକେତ୍‌ ମେନ୍ଦୁଲ୍‌ ଆଦ୍‌ତଣ୍ଡ୍‌ । 26 ବେନ ନିଜେତ୍‌ ହୃଦୟ୍‌ତାଗେ ଆଶେ ନେଃତିତଣ୍ଡ୍‌, ଅଣ୍ଡ୍‌ ମୁର୍କ; ମାତର୍‌ ବେନ ଜ୍ଞାନତେ ତାକିତଣ୍ଡ୍‌, ଅଣ୍ଡ୍‌ ରକ୍ଷା ପାହେମ୍‌ ଆଦ୍‌ତଣ୍ଡ୍‌ । 27 ବେନ ଗରିବ୍‌ତିଙ୍କ୍‌ ଦାନ ମାଡ଼ିତଣ୍ଡ୍‌, ଅକିଙ୍କ୍‌ ଅବାବ୍‌ ଆୟ; ମାତର୍‌ ବେନ ନିଜର କଣ୍ଡାନେ ଉଡ଼ି ବା ଉଡ଼୍‌ୱେ ଲେକାମ୍‌ ଆଦ୍‌ତଣ୍ଡ୍‌, ଅଣ୍ଡ୍‌ ଅବିଶାପ୍‌ ପାହେମ୍‌ ଆଦ୍‌ତଣ୍ଡ୍‌ । 28 ଦୁଷ୍ଟଡ଼୍‌ ନାର୍ଗେ ଆତ୍କେ, ନାରୁଡ଼୍‌ ନିଜେତିଙ୍କ୍‌ ଇର୍‌ଦ୍‌ତଡ଼୍‌; ମାତର୍‌ ଅଡ଼୍‌ ନଷ୍ଟ ଆତ୍କେ, ଦାର୍ମିକିଡ଼୍‌ ପେର୍‌ସିତଡ଼୍‌ ।